ruma 5 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

sslamt ġ‑gratnnġ d‑rbbi

¹ imma ġilad tlla‑yaġ sslamt ġ‑gratnnġ d‑rbbi f‑uwdm n‑siditnnġ yasuɛ lmasiḥ, ašku iga‑yaġ d‑wid‑f‑irḍa f‑ssibt n‑ma‑srs‑numn.

² f‑uwdm l‑lmasiḥ a‑f‑aġ‑tlla lbaraka‑yad lliġ srs numn. ar‑bahra‑ntfraḥ s‑rrja‑yad‑aġ‑ifka, ašku nssn is‑rad‑aġ‑išškšm s‑lmjd n‑rbbi.

³ walaynni urd ġir mayan a‑s‑a‑ntfraḥ. ar‑ntfraḥ ula s‑trfufnt nna‑darnnġ‑illan, ašku nssn izd s‑trfufnt a‑s‑ra‑ginnġ‑itzayad ṣṣbr.

⁴ ula s‑ṣṣbr a‑s‑ra‑ntnru tassast nna‑illan. ula s‑tnri a‑s‑ra‑darnnġ‑yili rrja.

⁵ ula rrja ur‑rad‑aġ‑iẓẓigʷraẓ, ašku rbbi iɛmmr ulawn‑nnġ s‑lḥnant‑ns s‑tḥkimt n‑rruḥ lqudus lli‑aġ‑ifka.

⁶ ġakud lli‑iqṣad rbbi, lliġ sul nḍɛf, immut lmasiḥ ad‑aġ‑ijjnjm nkkʷni lli‑n‑irurn tiġurdin‑nnġ s‑rbbi.

⁷ is‑ur‑ra‑išqu a‑immt kra n‑yan f‑yan iskarn lḥqq? iẓḍar a‑yili ma‑ra‑izɛm ard immt f‑yan ifulkin,

⁸ walaynni rbbi imla‑yaġ mnšk a‑s‑ginnġ‑iḥnna, ašku immut fllannġ lmasiḥ lliġ sul a‑ntsala ddnub.

⁹ imma ġilad ġ‑iskr sslamt ġ‑gratnnġ d‑rbbi s‑lmut‑ns, nssn bahra is‑rad‑aġ‑ijjnjm lmasiḥ zġ‑lġaḍab n‑rbbi.

¹⁰ ašku lliġ sul nga wid tẓinin d‑rbbi, iskr sslamt ġ‑gratnnġ dids s‑lmut n‑yus. imma ġilad ġ‑tlla sslamt ġ‑gratnnġ dids, nssn s‑uggʷar is‑rad‑aġ‑ijjnjm s‑tudrt‑ns.

¹¹ walaynni urd ġir mayan a‑darnnġ‑illan. nkkʷni s‑lfrḥ iggutn a‑s‑a‑ntfraḥ s‑rbbi, ašku ifka‑yaġ sslamt ġilad ġ‑gratnnġ dids f‑ssibt n‑siditnnġ yasuɛ lmasiḥ.

babatnnġ adam ula siditnnġ lmasiḥ

¹² f‑ssibt n‑babatnnġ adam a‑s‑d‑kšmn ddnub s‑ddunit, awin‑d lmut. mayan a‑f‑a‑tmtatn kullu mddn, ašku kullu skrn ddnub.

¹³ kkan‑ttin ddnub ġ‑ddunit ur‑ta‑ityawfka ššrɛ. ur‑a‑itḥasab rbbi ddnub‑an lliġ ur‑illi ššrɛ,

¹⁴ walaynni ar‑kullu‑tmtatn mddn‑an. ar‑tn‑ttnru lmut zġ‑uwssan n‑adam d‑sul ġ‑uwssan n‑musa, ar‑ttnru ula ġwilli ur‑ffuġnin zġ‑kra n‑wawal n‑rbbi ġmklli iffuġ adam s‑lmɛṣit lli‑iskr nttan. irwas adam i‑yasuɛ lli‑d‑yuškan tigira‑ns.

¹⁵ walaynni urd yan ad‑gan, ašku tawafka n‑rbbi ur‑tgi zund lmɛṣit n‑adam. ggutn ġwilli mmutnin f‑ssibt l‑lmɛṣit n‑urgaz‑an, walaynni uggʷar a‑tga lbaraka n‑rbbi ula tawafka lli‑s‑ibark mddn ggutnin f‑uwdm n‑urgaz yaḍni a‑t‑igan d‑yasuɛ lmasiḥ.

¹⁶ tawafka‑yad ur‑tgi zund lmɛṣit‑an. ašku lliġ iɛaṣa adam yat‑twal, yut rbbi fllas lḥukm s‑lɛqubit išqan. imma ġilad ġ‑bahra‑ɛaṣan mddn ggutnin, ifka‑yaġ tawafka‑yad n‑sslamt ġ‑gratnnġ dids.

¹⁷ tkka‑ttin lmut ar‑ttnru f‑ssibt l‑lmɛṣit n‑adam, walaynni uggʷar n‑mayan a‑ra‑nnru s‑tudrt lli‑aġ‑illan f‑ssibt n‑yasuɛ lmasiḥ, nkkʷni lli‑mi‑ifka rbbi lbaraka iggutn d‑twafka n‑sslamt ġ‑gratnnġ dids.

¹⁸ ġakud lliġ iɛaṣa adam, a‑tlla lɛqubit i‑kullu mddn. ġakud lliġ iskr yasuɛ ma‑irḍan rbbi, a‑tlla sslamt d‑tudrt i‑kullu mddn.

¹⁹ ġakud lliġ iffuġ adam zġ‑wawal n‑rbbi, a‑irur mddn ggutnin ffuġn zġ‑wawal‑ns. ġakud lliġ iskr yasuɛ s‑wawal n‑rbbi, a‑irur mddn ggutnin irḍu fllasn rbbi.

²⁰ ifk ilmma rbbi ššrɛ baš ad‑igatn lmɛṣiyat. walaynni ġunšk lli‑ttigatn ddnub uggʷar‑an a‑tga lḥnant n‑rbbi.

²¹ hati lquwwa n‑ddnub ar‑di‑ttawi lmut, imma lquwwa l‑lḥnant n‑rbbi ar‑di‑ttawi sslamt d‑tudrt idumn f‑uwdm n‑yasuɛ lmasiḥ siditnnġ.