ruma 4 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

babatnnġ ibrahim

¹ ma‑ra‑nini f‑ibrahim lli‑igan babatnnġ zġ‑tsga n‑ddat? mad‑as‑illan?

² mrad izd f‑ssibt n‑kra iskar ibrahim a‑f‑fllas‑irḍa rbbi, ra‑dars‑yili ma‑s‑a‑itškar ih̬f‑ns. walaynni ur‑iẓḍar yan a‑iškr ih̬f‑ns ġ‑lgddam n‑rbbi.

³ ityara ġ‑warra n‑rbbi: «ibrahim yumn rbbi, mayan a‑f‑t‑iga rbbi d‑wad‑f‑irḍa.»

⁴ wanna ith̬damn ar‑itamẓ tiġrad‑ns, urd tikki ad‑gant, walaynni f‑twuri lli‑iskr a‑f‑a‑tnt‑itamẓ.

⁵ imma wanna yumnn s‑walli yakkan sslamt i‑mddn ʷh̬šnnin, ra‑t‑ig rbbi d‑wad‑f‑irḍa f‑ssibt n‑ma‑yumn, urd f‑ssibt n‑kra iskar.

⁶ ula dawd imla izd ambarki a‑iga wanna‑f‑irḍa rbbi bla iskr yat,

⁷ yini: «imbarkin ad‑gan winna mi iṣamḥ rbbi f‑ddnub‑nsn, issitti fllasn ġaylli‑tn‑iššḥššamn.

⁸ ambarki a‑iga wanna mi ur‑iḥasb rbbi lmɛṣiyat‑ns.»

⁹ ma‑ra‑nini f‑lbaraka‑yad f‑isawl dawd? is‑tlla ġir i‑willi ẓẓullanin i‑ddat‑nsn? uhu, tlla ula i‑willi ur‑ẓẓullinin i‑ddat. ašku nġra ma‑ityaran f‑ibrahim, nġr izd f‑ssibt n‑ma‑yumn a‑f‑t‑iga rbbi d‑wad‑f‑irḍa.

¹⁰ imma rrḍa‑yad, managu ad‑as‑t‑ifka rbbi? izd ġakud lliġ ur‑ta‑iẓẓulli ibrahim i‑ddat‑ns, nġd ġ‑tġurdin n‑mad‑as‑iẓẓulla? ifka‑yas‑t rbbi lliġ ur‑ta‑iẓẓulli.

¹¹ tga‑yas‑tẓallit‑an tamatart ma‑s‑a‑d‑iktti rrḍa lli‑as‑ifka rbbi f‑ssibt n‑ma‑yumn lliġ ur‑ta‑iẓẓulli i‑ddat‑ns. ġmkad a‑s‑iwrri iga ibrahim babatsn n‑kullu willi umnnin rbbi, a‑tn‑igan d‑willi‑f‑irḍa rbbi wah̬h̬a ur‑ẓẓullin i‑ddat.

¹² imma ibrahim iga babatsn ula n‑willi ẓẓullanin i‑ddat, urd ġir f‑ssibt n‑tẓallit walaynni f‑ssibt n‑mad‑umnn rbbi ula ntni ġmklli yumn ibrahim lliġ ur‑ta‑iẓẓulli i‑ddat‑ns.

irḍa rbbi f‑ibrahim

¹³ awal izgan a‑s‑inna rbbi i‑ibrahim ula tarwa‑ns, yini‑as: «ra‑twrtm kullu ddunit.» urd f‑ssibt n‑ššrɛ a‑f‑as‑inna awal‑an, walaynni f‑ssibt n‑ma‑yumn ibrahim irḍu fllas rbbi.

¹⁴ mrad izd ayt‑ššrɛ a‑ra‑iwrt ddunit ur‑ra‑yili yat i‑willi umnnin ula‑ra‑izga‑wawal‑an n‑rbbi.

¹⁵ imma ššrɛ ra‑d‑yawi lɛqubit n‑rbbi f‑willi ssnnin ššrɛ. walaynni ġwilli‑t‑ur‑ssinnin, ntni ur‑zgis‑ffuġn.

¹⁶ imma ġwilli umnnin, ntni a‑ra‑yamẓ kullu mayad. ntni a‑mi‑ra‑issafu rbbi awal‑ns, baš a‑yakka lbaraka‑ns i‑kullu winna ganin tarwa n‑ibrahim, urd ġir i‑willi skarnin s‑ššrɛ, walaynni ra‑stt‑yakka i‑willi umnnin ġmklli yumn ibrahim. ašku ibrahim iwrri iga babatnnġ kullwaġ,

¹⁷ ġmklli ityaran: «giġ‑k d‑babatsn n‑ayt‑tmizar ggutnin.» ġmkad a‑s‑iga ibrahim babatnnġ dar rbbi lli‑s‑yumn, a‑t‑igan d‑walli issddrn ġwilli mmutnin, ar‑itamr ma‑ur‑illin a‑yili s‑illa.

¹⁸ imma ibrahim, wah̬h̬a ur‑ta‑yas‑illi yat ġ‑maylli itrju, izuyd ar‑sul‑itrju s‑liman iggutn aylliġ‑nnit iwrri iga «babatsn n‑ayt‑tmizar ggutnin.» inna‑yas rbbi: «ġunškad a‑rad‑gn tarwa‑nnk.»

¹⁹ ntta ur‑iškka ġ‑mad‑as‑inna rbbi, wah̬h̬a issn is‑dars‑illa ma‑itggan miyya n‑usggʷas, tuwssr ddat‑ns bahra ula tẓḍar‑tmġart‑ns sara a‑trbbu.

²⁰ yumn rbbi bla‑akkʷ iškka ġ‑wawal lli‑s‑as‑inna. izayd idus ġ‑liman‑ns ar‑italġ rbbi,

²¹ yissan bahra is‑iẓḍar rbbi a‑ikmml maylli‑s‑as‑inna s‑wawal izgan.

²² mayad a‑f‑t‑iga rbbi d‑wad‑f‑irḍa, ašku yumn.

²³ walaynni lliġ ityara «iga‑t d‑wad‑f‑irḍa,» urd ġir f‑ssibt n‑ibrahim a‑f‑ityara‑wawal‑an.

²⁴ ityara f‑ssibt‑nnġ ula nkkʷni. ašku rbbi rad‑aġ‑ig d‑wid f‑irḍa ula nkkʷni, f‑ssibt n‑ma‑numn srs nttan lli‑d‑issnkrn siditnnġ yasuɛ zġ‑lmut.

²⁵ idḥi‑t a‑immt f‑ssibt n‑ddnub‑nnġ, issnkr‑t‑id a‑iskr sslamt ġ‑gratnnġ dids.