ruma 3 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

¹ imma ġilad, ma‑ra‑nini f‑ayt‑yudaya? is‑ur‑darsn timih̬ar n‑rbbi uggʷar n‑mddn yaḍni? imma taẓallit n‑ddat, is‑ur‑gis‑tlli kra l‑lfaytt?

² rad‑awn‑iniġ, ntni ad‑dar timih̬ar s‑kigan. tamah̬irt tamzwarut: ntni a‑mi‑ifka rbbi iwaliwn‑ns.

³ walaynni lliġ ur‑zgan kra n‑ayt‑yudaya ġ‑iwaliwn n‑rbbi, is‑iffuġ nttan zġ‑iwaliwn‑an?

⁴ uhu, ur‑a‑itffuġ rbbi zġ‑wawal‑ns. ar‑bdda‑iskar s‑lḥqq wah̬h̬a da‑kullu‑skarn mddn s‑tkrkas. ġmklli ityaran: «ra‑iban is‑yʷġẓan‑wawal‑nnk, ẓrn imṣraḍn‑nnk izd kiyi a‑dar lḥqq.»

⁵ walaynni iġ‑a‑itban lḥqq n‑rbbi s‑uggʷar f‑ssibt l‑lh̬ʷšant lli‑nskar nkkʷni, izd ra‑nini «rbbi ur‑iġwi lḥqq lliġ fllannġ iġḍb.» ha‑yyi sawlġ zund mddn n‑ddunit‑ad,

⁶ walaynni ur‑ra‑nini ġmkan. ašku rbbi, mrad is‑ur‑dars lḥqq ur‑ra‑yiẓḍar a‑iḥkam f‑ddunit.

⁷ iġ‑nffuġ zġ‑lḥqq, nml izd rbbi a‑dar lḥqq. walaynni iġ‑nssbayyn timuġra n‑rbbi s‑ġmkan, mah̬ aylliġ sul ira a‑fllannġ‑iḥkam ig‑aġ d‑willi ʷh̬šnnin?

⁸ iġ‑iga ġmkan is‑ur‑ra‑yaf a‑nini: «nkrat a‑nskar lh̬ʷšant baš a‑iban‑ufulki n‑rbbi s‑uggʷar»? llan‑nnit kra n‑mddn ar‑ginnġ‑rggmn, ġaln izd ġmkan a‑s‑a‑nttini. imma ntni ra‑fllasn‑ittut lḥukm lli‑asn‑igan.

kullu mddn skrn ddnub

⁹ imma nkkʷni n‑ayt‑yudaya, is‑nuf mddn yaḍni? uhu ur‑tn‑nuf, ašku illa lḥukm n‑rbbi f‑kullu mddn ġmklli‑yad nniġ, yili f‑ayt‑yudaya yili‑daġ f‑ayt‑tmizar yaḍni, ašku ar‑kullu‑skarn ddnub.

¹⁰ ġmklli ityaran ġ‑warra n‑rbbi: «ur‑illi yan ifulkin,

¹¹ ur‑illi yan ifhmn, ur‑illi yan isiggiln rbbi.

¹² ffuġn aġaras kullutn, jlan. ur‑illi yan iskarn afulki, ur‑akkʷ‑illi yan.

¹³ ar‑rẓẓmn aqrjuḍ‑nsn zund amḍḍal ih̬wan. tikrkas ka‑tasin s‑ils. ssmm zund ilgmmaḍn a‑itkkan infurn‑nsn.

¹⁴ imi‑nsn ar‑d‑issufuġ nnɛlat d‑trggam.

¹⁵ ar‑bdda‑tujadn ad‑ssyaggasn wiyyaḍ.

¹⁶ ar‑tawin tammara d‑tguḍi kullu mani tkkan.

¹⁷ aġaras n‑sslamt ur‑jju‑t‑ssinn.

¹⁸ ur‑akkʷ‑a‑tuqqarn rbbi.»

¹⁹ kullu ma‑ityaran ġ‑ššrɛ, nssn is‑ityara f‑ssibt n‑willi dar ššrɛ, baš a‑iqqn imi i‑kraygatt yan, tili ddunit kullutt ġ‑ddu lḥukm n‑rbbi.

²⁰ ašku ur‑iẓḍar yan a‑iskr sslamt ġ‑gras d‑rbbi s‑iskkirn n‑ššrɛ. walaynni ššrɛ ad‑aġ‑imalan ma‑igan ddnub.

rrḥmt n‑rbbi

²¹ imma ġilad imla‑yaġ rbbi aġaras lli‑s‑iskr sslamt ġ‑gras d‑mddn. urd ššrɛ a‑s‑tt‑iskr, walaynni ar‑nnit‑imala ššrɛ ula lanbiya izd lḥqq a‑iga.

²² ašku rbbi ar‑iskar sslamt ġ‑gras d‑willi umnnin s‑yasuɛ lmasiḥ. ar‑tt‑yakka i‑kullu wanna yumnn, ašku bnadm yan a‑iga.

²³ kullu mddn skrn ddnub, aggugn f‑lmjd n‑rbbi.

²⁴ walaynni s‑rrḥmt‑ns a‑s‑asn‑ifka lbaraka‑yad, iskr sslamt ġ‑gras didsn f‑ssibt l‑lmasiḥ yasuɛ.

²⁵ yuzn‑d lmasiḥ a‑immt ifru mddn s‑idammn‑ns baš a‑iṣamḥ i‑winna srs umnnin. ġmkad a‑s‑imla rbbi izd s‑lḥqq a‑s‑a‑bdda‑iskar. ġayd izrin iṣbr bahra, ur‑a‑itḥkam f‑ddnub n‑mddn.

²⁶ imma ġilad imla mamnk a‑izzga lḥqq, ifk sslamt i‑wanna yumnn s‑yasuɛ.

²⁷ is‑sul‑nẓḍar a‑ntškar ih̬f‑nnġ? uhu, ur‑akkʷ‑nẓḍar a‑nškr ih̬f‑nnġ, ašku ur‑a‑fllannġ‑itrḍu rbbi f‑ssibt n‑kra nskar walaynni f‑ssibt n‑ma‑numn.

²⁸ nlmd is‑iskr rbbi sslamt ġ‑gras d‑mddn f‑ssibt l‑liman‑nsn, urd f‑ssibt n‑iskkirn n‑ššrɛ.

²⁹ ra‑kʷn‑sqsaġ ġilad: izd rbbi win ayt‑yudaya ka‑iga? is‑ur‑igi win ayt‑tmizar yaḍni ula ntni? s‑ṣṣaḥt, iga rbbi n‑ayt‑tmizar yaḍni,

³⁰ ašku ur‑illi abla nttan. ra‑iskr sslamt ġ‑gras d‑ayt‑yudaya f‑ssibt n‑mad‑umnn, iskr sslamt ġ‑gras d‑ayt‑tmizar yaḍni f‑ssibt n‑mad‑umnn ula ntni.

³¹ walaynni iġ‑a‑ntamn ġmkad is‑ra‑niri a‑n‑nluḥ ššrɛ? uhu, ur‑akkʷ‑ra‑n‑nluḥ ššrɛ, walaynni ar‑t‑sul‑nzzga.