ruma 16 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

isllm‑n bulus f‑aytmatn

¹ riġ a‑kʷn‑uṣṣaġ f‑uwlltmatnnġ iɛzzan fibi lli‑igan tamɛawnt i‑umnaggar ġ‑kanh̬ariyya.

² ssmrḥbat srs s‑ism n‑siditnnġ ġmklli‑s‑d‑iqqan imẓlayn n‑rbbi. ɛawnat‑stt s‑aynna‑n‑darun‑tḥtajja, ašku nttat tɛawn mddn ggutnin tɛawn‑iyi ula nkki.

³ ar‑n‑tsllamġ f‑briskilla d‑akila lli‑didi‑h̬dmnin ġ‑twuri l‑lmasiḥ yasuɛ.

⁴ ntni kkan‑ttin ujadn ad‑fkn ih̬f‑nsn ar lmut f‑ssibt‑inu. ar‑tn‑tškarġ bahra, urd ġir nkki walaynni ar‑tn‑tškarn kullu imnaggarn n‑ayt‑tmizar aggugnin.

⁵ ar‑n‑daġ‑tsllamġ f‑umnaggar lli‑darsn‑itmunun ġ‑tgmmi‑nsn. ar‑n‑tsllamġ ula f‑umddakkʷl‑inu iɛzzan abinitus. iga nttan amzwaru lli‑yumnn s‑lmasiḥ ġ‑tmazirt n‑asiyya.

⁶ ar‑n‑tsllamġ f‑maryam lli‑bahra‑ith̬damn ġ‑gratun.

⁷ ar‑n‑tsllamġ ula f‑andrunikus d‑yunyas lli‑ganin zġ‑ayt‑dari. kkan‑ttin didi ġ‑lḥbs. tyawssann ntni ġ‑irqqasn, umẓn aġaras l‑lmasiḥ ur‑ta‑t‑umẓġ nkki.

⁸ ar‑n‑tsllamġ f‑ambliyatus lli‑igan amddakkʷl‑inu iɛzzan ġ‑siditnnġ.

⁹ ar‑n‑tsllamġ ula f‑urbanus lli‑didnnġ‑ith̬damn ġ‑twuri l‑lmasiḥ, ntta d‑umddakkʷl‑inu iɛzzan stah̬is.

¹⁰ ar‑n‑tsllamġ f‑aballis lli‑ityaramn izga ġ‑lmasiḥ. ar‑n‑tsllamġ ula f‑ayt‑tgmmi n‑aristubulus.

¹¹ ar‑n‑tsllamġ f‑hirudyun lli‑igan zġ‑ayt‑dari. ar‑n‑tsllamġ ula f‑willi ganin win siditnnġ zġ‑ayt‑tgmmi n‑narkissus.

¹² ar‑n‑tsllamġ f‑th̬ddamin n‑siditnnġ trifina d‑trifusa. ar‑n‑tsllamġ ula f‑uwlltmatnnġ iɛzzan barsis lli‑bahra‑ith̬damn i‑siditnnġ.

¹³ ar‑n‑tsllamġ f‑rufus lli‑ityawẓlayn i‑twuri n‑siditnnġ. ar‑n‑tsllamġ ula f‑innas lli‑zgigi‑iskarn zund yus.

¹⁴ ar‑n‑tsllamġ f‑asinkritus d‑fligun d‑harmis d‑batrubas d‑harmas ntni d‑aytmatn lli‑didsn‑llanin.

¹⁵ ar‑n‑tsllamġ f‑filulugus d‑yulya d‑niryus d‑uwlltmas, ntni d‑ulumbas d‑kullu imẓlayn n‑rbbi lli‑didsn‑llanin.

¹⁶ nsallamat i‑ngratun s‑unsallam n‑tagʷmat. ar‑n‑fllawn‑tsllamn kullu imnaggarn l‑lmasiḥ.

almmud l‑lḥqq

¹⁷ ḍalbġ‑kʷn ay‑aytma, a‑stti‑ttawim ġ‑willi aṭṭunin aytmatn ar‑asn‑tggan ifikš ma‑tn‑issṭarn, ar‑tffuġn zġ‑ulmmud lli‑tlmdm ġayd izrin. iniġ‑awn, anfat‑asn

¹⁸ ašku ġwilli skarnin ġmkad urd siditnnġ a‑mi‑th̬damn walaynni adis‑nsn. s‑iwaliwn šwanin mimnin a‑s‑a‑jllun lɛaql n‑wanna igan lġšim.

¹⁹ imma kunni, frḥġ f‑ssibt‑nnun ašku sfldn kullu mddn f‑mamnk a‑tumẓm ġ‑lmasiḥ. walaynni riġ a‑twrrim tissanm kullu ma‑ifulkin, tanfm i‑kullu ma‑yʷh̬šnn.

²⁰ imma rbbi lli‑bdda‑yakkan sslamt, yan imikk ra‑irar šiṭan a‑ig albbij ġ‑ddu iḍarn‑nnun. ad‑awn‑tili lbaraka n‑siditnnġ yasuɛ.

²¹ ar‑n‑fllawn‑itsllam timutaws lli‑didi‑ith̬damn, ntta d‑lukyus d‑yasun d‑susibatrus lli‑ganin zġ‑ayt‑dari.

²² ula nkki tartyus lli‑yuran tabrat‑ad s‑ufus‑inu, ar‑n‑fllawn‑tsllamġ s‑ism n‑siditnnġ.

^23-24 ar‑n‑fllawn‑itsllam gayus lli‑dar gguzġ ussan‑ad. tigmmi‑ns a‑ġ‑a‑tmunun kullu aytmatn n‑umnaggar. ar‑n‑fllawn‑itsllam arastus lli‑igan bu‑ṣnduq n‑tmdint‑ad, ntta ula gʷmatnnġ kwartus.

²⁵ imma ġilad, a‑nalġ rbbi lli‑iẓḍarn a‑kʷn‑izzga ġ‑liman‑nnun ġmklli‑awn‑nniġ s‑lh̬bar ifulkin lli‑s‑a‑tbrraḥġ f‑lmasiḥ yasuɛ.

²⁶ ašku maylli intln kullu ġayd izrin, issbayyn‑t‑id rbbi ġilad, iml‑aġ‑t ġ‑warratn l‑lanbiya, baš ad‑wrrin amnn mddn ġ‑kullu timizar n‑ddunit ar‑skarn s‑wawal‑ns, ġmklli yuṣṣa rbbi lli‑bdda‑illan.

²⁷ rbbi lli‑dar kullu taḥkimt, nttan a‑bahra‑ntalġ f‑yasuɛ lmasiḥ ġilad ula kullu mayd‑d‑iftan. amin.