ruma 15 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

tmɛawanat i‑ngratun

¹ nkkʷni lli‑idusn ġ‑liman, illa fllannġ a‑ntɛawan ġwilli ḍɛfnin ġ‑aynna fllasn iẓẓayn. a‑ur‑nttiri ġir a‑nrḍu ih̬f‑nnġ.

² hati illa f‑kraygatt yan a‑itrḍu gʷmas ar‑gis‑iskar lh̬ir ar‑t‑issdus ġ‑uġaras l‑lmasiḥ.

³ ašku lmasiḥ ula ntta ur‑ttin‑ikki ar‑itrḍu ih̬f‑ns. ijra‑yas ġmklli ityaran: «flla a‑f‑a‑d‑ṭṭarnt‑trggam n‑willi gik rggmnin.»

⁴ kullu ma‑ityaran ġ‑uwssan lli‑zrinin, ityara baš a‑nlmd nkkʷni, nṣbr nzɛm nzga ġ‑rrja f‑ssibt n‑maylli naqra ġ‑warratn‑an.

⁵ ḍalbġ rbbi lli‑yakkan ṣṣbr d‑zzɛamt, ad‑awn‑ifk a‑bdda‑di‑ttmšaškam i‑ngratun ġ‑tamunt l‑lmasiḥ yasuɛ,

⁶ baš a‑kullu‑ttmunum s‑yan‑wawal a‑ttalġm rbbi babas n‑siditnnġ yasuɛ lmasiḥ.

⁷ mayad a‑f‑awn‑nniġ a‑ttqbalm i‑ngratun ġmklli‑kʷn‑iqbl lmasiḥ, baš a‑gigun‑ibayyn lmjd n‑rbbi.

⁸ ašku lmasiḥ iwrri iga ah̬ddam i‑ayt‑yudaya baš a‑iml is‑iqama rbbi ġ‑lḥqq, issafu iwaliwn zganin lli‑s‑inna i‑lajdud‑nsn.

⁹ iskr ġmkad baš ad‑ẓrn ayt‑tmizar yaḍni rrḥmt n‑rbbi alġn‑t ula ntni. ġmklli ityaran: «mayad a‑f‑ra‑ki‑tškarġ ġ‑gr ayt‑tmizar aggugnin, alġġ ism‑nnk s‑imurign l‑lfrḥ.»

¹⁰ ityara‑daġ: «way‑ayt‑tmizar aggugnin, frḥat d‑mddn n‑rbbi.»

¹¹ ityara‑daġ: «sbbḥat i‑rbbi a‑bnadm kullukn, talġm‑t a‑kullu imzdġn n‑ddunit.»

¹² inna‑daġ išaɛya: «ra‑d‑yašk yan zġ‑tasut n‑yassa. ra‑t‑issattuy rbbi a‑iḥkam ġ‑ayt‑tmizar aggugnin. nttan a‑ġ‑ra‑n‑kullu‑trjun.»

¹³ ḍalbġ rbbi lli‑yakkan rrja, a‑kʷn‑iɛmmr s‑lfrḥ d‑sslamt iggutn ġilad ġ‑srs‑tumnm, baš a‑bahra‑gigun‑ittigat rrja‑yad s‑tḥkimt n‑rruḥ lqudus.

tawuri n‑bulus

¹⁴ way‑aytma, ssnġ nkki is‑tɛmmrm s‑ufulki ula tawassna, tiẓḍarm a‑ttnṣaḥm i‑ngratun.

¹⁵ walaynni s‑zzɛamt ayd‑s‑awn‑in‑uriġ f‑tġawsiwin‑ad. zɛmġ ad‑awn‑tnt‑id‑ssktiġ ašku rbbi ad‑iyi‑ifkan lbaraka‑yad,

¹⁶ ig‑iyi d‑uh̬ddam l‑lmasiḥ yasuɛ ġ‑gr ayt‑tmizar aggugnin. ar‑th̬damġ zund yan‑unmġur n‑tgmmi n‑rbbi, ar‑ssakmurġ mddn n‑ayt‑tmizar i‑rbbi s‑tbrraḥt l‑lh̬bar ifulkin, baš a‑fllasn‑irḍu rbbi iẓli‑tn i‑ih̬f‑ns s‑usġus n‑rruḥ lqudus.

¹⁷ illa dari ma‑s‑a‑tfraḥġ s‑ism l‑lmasiḥ yasuɛ ġ‑twuri‑ad lli‑s‑a‑th̬damġ i‑rbbi,

^18-19 ašku ur‑rad‑zɛmġ ad‑sawlġ f‑yat abla ma‑iskr lmasiḥ f‑ufus‑inu. ašku s‑iwaliwn d‑iskkirn d‑lquwwat d‑tmitar tjhhdnin ula s‑tḥkimt n‑rruḥ lqudus a‑s‑irur ayt‑tmizar ad‑amẓn aġaras n‑rbbi. ġmkad a‑s‑sslkmġ lh̬bar‑ns i‑kullu timizar zġ‑tsga n‑urušalim ar tasga n‑illirikun.

²⁰ hati yat‑tġawsa kad‑riġ: ad‑tbrraḥġ s‑lh̬bar ifulkin ġ‑innaġ ur‑jju‑sfldn f‑lmasiḥ, ašku ur‑riġ ad‑bnnuġ f‑llsas n‑kra n‑yan yaḍni.

²¹ ġmklli ityaran: «ġwilli ur‑iruḥ lh̬bar‑ns a‑ra‑t‑iẓr. ġwilli ur‑fllas‑sfldnin a‑ra‑t‑yissan.»

ira bulus a‑iddu s‑ruma

²² mayan a‑yyi‑itkkisn aylliġ ur‑a‑n‑ttaškiġ s‑darun.

²³ kigan d‑isggʷasn ayd ttiriġ a‑n‑darun‑aškġ. walaynni ġilad ġ‑kmmlġ tawuri‑nu ġ‑tsgiw‑ad

²⁴ ar‑bahra‑trjuġ a‑kʷn‑in‑sliġ ġakud nna‑ġ‑rad‑mudduġ s‑ṣbanya, baš ad‑frḥġ ġ‑gratun, tɛawnm‑iyi ilmma ad‑kmmlġ f‑umuddu‑nu.

²⁵ imma ġilad rad‑dduġ zwar s‑urušalim ad‑ɛawnġ imẓlayn n‑rbbi ġin.

²⁶ ašku aytmatn ġ‑makiduniyya d‑ah̬aya, ibayyn‑asn is‑ifulki ad‑aznn kra l‑lmɛawnt i‑willi ẓlḍnin ġ‑imẓlayn n‑rbbi ġ‑urušalim.

²⁷ ibayyn‑asn is‑ifulki ad‑skrn mayad, ašku illa fllasn ntni n‑ayt‑tmizar yaḍni ad‑rarn lh̬ir i‑ayt‑yudaya. iqqan‑tn‑d a‑tn‑tɛawann s‑lbarakat n‑ddat, ašku umẓn zġ‑darsn lbarakat n‑rruḥ.

²⁸ iġ‑asn‑in‑sslkmġ lamant‑ad kmmlġ tawuri‑ad, ra‑kʷn‑sliġ zriġ s‑ṣbanya.

²⁹ ssnġ ġakud nna‑n‑darun‑uškiġ ra‑n‑didi‑awiġ kullu lbaraka l‑lmasiḥ.

³⁰ ra‑kʷn‑ḍalbġ ay‑aytma, s‑ism n‑siditnnġ yasuɛ lmasiḥ ula s‑lḥnant n‑rruḥ lqudus, a‑tbkism tmɛawanm didi s‑tẓallit i‑rbbi f‑ssibt‑inu.

³¹ ḍalbat rbbi a‑yyi‑ijjnjm zġ‑willi ur‑umnnin ġ‑tmazirt n‑yudaya. tḍalbm‑t ula f‑imẓlayn‑ns ġ‑urušalim ad‑rḍun s‑maylli‑s‑riġ a‑tn‑srs‑ɛawnġ,

³² baš a‑n‑darun‑aškġ s‑lfrḥ iggutn ġmklli ira rbbi, sunfuġ ġ‑gratun.

³³ ḍalbġ rbbi lli‑bdda‑yakkan sslamt a‑didun‑yili kullukn. amin