ruma 13 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

lḥukkam ula ḍḍariba

¹ illa f‑kraygatt yan a‑iskar s‑wawal n‑willi tḥkamnin tamazirt. ašku ur‑illi yan itḥkamn bla‑t‑iẓli rbbi i‑twuri‑an. ula ġwilli ḥkamnin ġilad, rbbi a‑tn‑iẓlin.

² yan iḍaḍḍn lḥukkam, hati iḍaḍḍ maylli ira rbbi, d‑wanna iḍaḍḍn ra‑fllas‑ittut lḥukm.

³ ašku lḥukkam ur‑a‑ssiksaḍn ġwilli skarnin afulki walaynni ġwilli skarnin lh̬ʷšant. is‑trit a‑ur‑tiksaṭṭ zġ‑walli itḥkamn? rad‑ak‑iniġ, skar afulki s‑fllak‑irḍa,

⁴ ašku iga ah̬ddam n‑rbbi f‑a‑gik‑iskar lh̬ir. walaynni iġ‑a‑tskart ma‑yʷh̬šnn, illa dark ma‑f‑a‑ttiksaṭṭ, ašku lḥakm dars lḥqq a‑yut lḥukm, ig ah̬ddam n‑rbbi f‑a‑issḍr lɛqubit f‑willi skarnin ma‑yʷh̬šnn.

⁵ mayan a‑f‑fllawn‑illa a‑tskarm s‑wawal l‑lḥukkam, urd ġir baš a‑tanfm i‑lġaḍab n‑rbbi, walaynni f‑ssibt n‑ma‑ttirim ġ‑uwl‑nnun a‑bdda‑tskarm ma‑yʷġẓann.

⁶ f‑mayad a‑f‑a‑takkam ḍḍariba i‑lḥukkam, ašku gan ih̬ddamn n‑rbbi ar‑tti‑tawin ġ‑mayan.

⁷ akkayat‑asn mad‑awn‑ḍfarn, ḍabiyt i‑ayt‑ḍabiyt, nkkas i‑ayt‑nkkas. akkayat‑daġ luqr i‑willi mi illa luqr, ula ššukr i‑willi mi illa ššukr.

tayri d‑lḥnant

⁸ ad‑ur‑tasim tamrwast i‑yan. ġir yat‑tmrwast a‑kʷn‑d‑iqqann: a‑ttḥnnum i‑ngratun. wanna iḥnnan ġ‑wiyyaḍ, han ikmml kullu ma‑ityaran ġ‑ššrɛ.

⁹ ašku luṣiyat «a‑ur‑tznut» «a‑ur‑tnġt» «a‑ur‑takʷrt» «a‑ur‑tirit ma‑igan win wiyyaḍ,» nẓḍar a‑tnt‑nssmun ntnti d‑tiyyaḍ nna‑llanin s‑yan‑wawal, a‑t‑igan: «a‑ttirit adjar‑nnk zund ih̬f‑nnk.»

¹⁰ wanna ittirin adjar‑ns, ur‑ra‑yiẓḍar ad‑as‑iskr ma‑yʷh̬šnn. mayad a‑f‑awn‑nniġ, wanna iḥnnan ġ‑wiyyaḍ, ikmml kullu ma‑ityaran ġ‑ššrɛ.

¹¹ awiyat‑stt ġ‑mayad ašku tssnm matta azmz‑ad ġ‑nlla, tlkm‑d tasaɛt a‑tnkrm zġ‑iyṭṣ. ašku yakmur‑d‑wass n‑ujnjm‑nnġ ġilad, uggʷar n‑ma‑d‑yakmur ġakud lliġ ngra ġ‑uġaras l‑lmasiḥ.

¹² ifta‑yiḍ, ɛlayn a‑d‑iġli‑wass. illa fllannġ a‑n‑nluḥ iskkirn n‑tillas nls imqlad n‑tifawt.

¹³ yili fllannġ a‑nskar ġmklli‑d‑iqqann ayt‑uzal. a‑ur‑ttmunum f‑tillay ʷh̬šnnin ula‑da‑tssnufulm ih̬fawn‑nnun s‑tissi. a‑ur‑ttšthum ula‑da‑ttfsadm. a‑ur‑ttmmaġm ula‑da‑ttnuwwašm.

¹⁴ lsat afulki n‑siditnnġ yasuɛ lmasiḥ bla‑da‑ttlhum s‑ddat ula ma‑ittiri bnadm i‑ih̬f‑ns.