ruma 10 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

ġmkad a‑s‑rad‑njmn

¹ way‑aytma, mnšk a‑bahra‑ttiriġ ad‑njmn ayt‑tmazirt‑inu. ar‑bahra‑tḍalabġ rbbi fllasn.

² ẓḍarġ a‑fllasn‑fkġ tugga n‑is‑a‑bahra‑ttirin rbbi, walaynni ur‑ssinn rbbi ġmklli iga.

³ ur‑fhimn aġaras lli‑s‑a‑itrḍu rbbi f‑mddn, walaynni ar‑ttirin ad‑rḍun rbbi s‑mamnk yaḍni, aylliġ ur‑akkʷ‑umẓn aġaras lli‑ira ntta.

⁴ ašku lmasiḥ ikmml ššrɛ, baš a‑iskr sslamt ġ‑gr rbbi d‑kullu wanna srs yumnn.

⁵ yura musa f‑willi ranin ad‑trḍun rbbi s‑ššrɛ inna: «wanna iskarn ma‑illan ġ‑ššrɛ ra‑iddr f‑ssibt n‑ššrɛ.»

⁶ walaynni inna i‑wanna‑f‑irḍa rbbi f‑ssibt n‑ma‑yumn: «ad‑ur‑ttinit d‑ih̬f‑nnk ‹ma‑ra‑iġli s‑ignna a‑iḍalb lmasiḥ a‑d‑igguz?›

⁷ ula‑da‑ttinit ‹ma‑ra‑igguz s‑tdrut n‑wakal a‑iḍalb lmasiḥ a‑d‑iġli zġ‑gr willi mmutnin?›»

⁸ ašku inna‑daġ: «hay‑awal n‑rbbi ilkm‑k‑id, yili ġ‑imi‑nnk yili ġ‑uwl‑nnk.» awal‑an a‑t‑igan d‑ġwad‑s‑a‑ntbrraḥ f‑mamnk a‑itrḍu rbbi f‑winna umnnin.

⁹ ašku iġ‑tnnit ġ‑lgddam n‑mddn «yasuɛ a‑igan sidi» tamnt is‑t‑id‑issnkr rbbi zġ‑lmut, hati ra‑tnjmt.

¹⁰ ašku s‑uwl a‑s‑a‑ntamn nṭṭaf sslamt d‑rbbi. s‑infurn a‑s‑a‑t‑nttini ġ‑lgddam n‑mddn nnjm.

¹¹ ityara ġ‑warra n‑rbbi: «wanna fllas ittkln ur‑sar‑ti‑tʷgraẓ.»

¹² rbbi ur‑a‑iẓẓmẓlay ayt‑yudaya zġ‑ayt‑tmizar yaḍni, walaynni iga siditsn kullutn. ar‑yakka timih̬ar‑ns i‑kullu winna gis zawgnin,

¹³ ašku ityara: «wanna izawgn ġ‑ism n‑siditnnġ, ra‑injm.»

¹⁴ walaynni mamnk a‑rad‑zawgn ġ‑ism‑ns iġ‑ur‑srs‑uminn? mamnk a‑rad‑amnn iġ‑ur‑fllas‑sfldn? mamnk a‑rad‑sfldn iġ‑ur‑illi mad‑asn‑in‑yiwin lh̬bar?

¹⁵ mamnk a‑ra‑n‑awin lh̬bar iġ‑ur‑illi ma‑tn‑yuznn? ġmklli ityaran: «mnšk a‑s‑ifulki a‑nẓr ġwid‑d‑iwinin lh̬bar išwan.»

¹⁶ walaynni ur‑a‑ttirin kullutn ad‑sflidn s‑lh̬bar ifulkin. inna‑daġ išaɛya: «wa‑sidi rbbi, ma‑iran a‑yamn awal lli‑asn‑d‑niwi?»

¹⁷ walaynni ġwilli sflidnin, ntni a‑ra‑yamn. ġwilli mi‑n‑ntawi lh̬bar l‑lmasiḥ, ntni a‑ra‑isfld.

¹⁸ imma ayt‑rbbi is‑ur‑sfldn f‑lh̬bar‑ad ġayd izrin? nssn is‑fllas‑sfldn, ašku ityara: «timitar‑nsn kkant kraygatt mani, truḥ‑twaġra‑nsn ttmi n‑wakal.»

¹⁹ walaynni mddn‑an n‑ayt‑rbbi, is‑ur‑ẓḍarn ad‑fhmn maylli mi sfldn? musa ad‑aġ‑imlan is‑t‑fhmn, ašku f‑imi‑ns a‑f‑inna rbbi: «ra‑kʷn‑rarġ a‑ttirim ma‑illan ġ‑dar iġribn. rad‑awn‑tt‑ssṭiyyrġ s‑willi mi ttinim ‹ur‑ssinn yat.›»

²⁰ ula išaɛya izɛm inna: «ufan‑iyi ġwilli ur‑sri‑siggilnin, ssbayynġ ih̬f‑inu i‑willi ur‑gigi‑sqsanin.»

²¹ walaynni izuyd rbbi inna f‑ayt‑dars: «ha‑yyi ass kullu mdiġ‑n ifassn‑inu i‑mddn lli‑sri‑rurnin tiġurdin‑nsn, agʷin ad‑sflidn s‑wawal‑inu.»