matta 9 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

lmasiḥ ijjujji akušam

¹ ikšm yasuɛ s‑tanawt iwrri‑d s‑tsga‑yad n‑umda, iruḥ‑d tamdint lli‑ġ‑izdġ.

² aškin‑d dars kra n‑mddn awin‑as‑d yan‑urgaz ikušmn ign f‑imjdin‑ns. yasuɛ iẓra mamnk ad‑bahra‑srs‑umnn, isawl s‑ukušam yini‑as: «thnna a‑iwi, ittin fllak ddnub‑nnk.»

³ ilin ġin kra n‑imslmdn n‑ššrɛ, inin d‑ih̬f‑nsn: «ġwad, awal l‑lkufr ayd inna.»

⁴ imma yasuɛ issn mad‑swangmn, yini‑asn: «mah̬ aylliġ tudjam iswingimn ʷh̬šnnin ad‑kšmn s‑ih̬fawn‑nnun?

⁵ ma‑gisn‑irh̬an, ad‑iniġ ‹ittin fllak ddnub‑nnk› nġd ad‑iniġ ‹nkr ar‑ttidut›?

⁶ imma ġilad rad‑awn‑mlġ is‑dari taẓḍḍart ġ‑ddunit ad‑ssittiġ ddnub, nkki lli‑igan yus n‑bnadm.» isawl ilmma s‑ukušam yini‑as: «nkr, tasit imjdin‑nnk, tddut s‑tgmmi.»

⁷ inkr ġakudan iddu s‑tgmmi‑ns.

⁸ lliġ‑t‑ẓran, ġuwḍn mddn‑an kullutn ar‑talġn rbbi lli‑ifkan taẓḍḍart‑ad iggutn i‑bnadm.

iġra lmasiḥ i‑matta

⁹ iftu yasuɛ zġ‑ġin, s‑iẓra yan bu‑nkkas ism‑ns matta, iskiws ġ‑illiġ a‑tamẓn iqaridn n‑nkkas. yini‑as yasuɛ: «ašk‑id mun didi.» inkr ġakudan imun dids.

¹⁰ igawr yasuɛ ġ‑tgmmi n‑matta, aškin‑d id‑bu‑nkkas ggutnin d‑wiyyaḍ ʷh̬šnnin, drun d‑yasuɛ d‑imḥḍarn‑ns.

¹¹ lliġ‑t‑ẓran ifarisin, sqsan imḥḍarn‑ns: «mah̬ aylliġ a‑ištta‑umslmd‑nnun d‑ayt‑nkkas d‑wiyyaḍ ʷh̬šnnin?»

¹² imma yasuɛ, lliġ isfld i‑mad‑nnan irar‑asn: «urd ġwilli dusnin a‑iḥtajjan aṭbib walaynni ġwilli uḍnnin.

¹³ zaydat tswangmm ġ‑warra n‑rbbi lli‑innan ‹riġ darun lḥnant, urd tiġrsi.› imma nkki, ur‑d‑uškiġ a‑n‑ġrġ i‑willi ġalnin is‑fulkin, walaynni uškiġ‑d a‑n‑ġrġ i‑willi ʷh̬šnnin.»

asqsi f‑uẓum

¹⁴ aškin‑d imḥḍarn n‑yuḥanna amsddam s‑dar yasuɛ inin‑as: «ar‑ntaẓum nkkʷni d‑ifarisin. mah̬ aylliġ ur‑a‑taẓumn imḥḍarn‑nnk?»

¹⁵ yini‑asn: «is‑ra‑ṭiyyr i‑ayt‑tmġra d‑usli didsn? walaynni rad‑d‑aškin‑uwssan lli‑ġ‑ra‑fllasn‑yitti‑usli. ġakudan a‑rad‑taẓumn.

¹⁶ ur‑illi ma‑itggan tadġart n‑ttub l‑ljdid i‑tmlsit taqdimt, ašku ra‑tkkis‑tdġart l‑ljdid zġ‑tqdimt, tbbi s‑uggʷar.

¹⁷ ur‑illi ma‑itggan aman n‑waḍil iktin l‑ljdid ġ‑ilmawn iqdimn, ašku rad‑stġn ilmawn iqdimn, ffin‑waman h̬srn ilmawn. walaynni ar‑tggan aman n‑waḍil l‑ljdid ġ‑ilmawn l‑ljdid. ġmkan a‑s‑rad‑qaman fulkin s‑sin.»

lmasiḥ ijjujji illis n‑umġar d‑tmġart lli‑iggrn i‑tmlsit‑ns

¹⁸ sul a‑isawal yasuɛ s‑d‑yuška yan‑umġar, iḍr‑d ġ‑dar iḍarn‑ns yini‑as: «tasaɛt‑ad tmmut illi imẓẓin. walaynni ašk‑id tgt fllas afus‑nnk tddr.»

¹⁹ inkr yasuɛ imun dids ntta d‑imḥḍarn‑ns.

²⁰ tlla ġin yat‑tmġart tuḍn, yili‑bdda‑gis‑usggʷrd n‑idammn sin d‑mraw n‑usggʷas. truḥ‑d tiġurdin n‑yasuɛ tggr i‑tama n‑tmlsit‑ns,

²¹ tini d‑ih̬f‑ns: «iġ‑n‑ggrġ ġir i‑tmlsit‑ns rad‑jjiġ.»

²² igrawl yasuɛ issmaqql gis yini‑as: «thnna a‑illi, tjjit ġilad ašku tumnt.» ġakudan a‑tjji‑tmġart.

²³ lliġ ilkm yasuɛ tigmmi n‑umġar yaf‑n ġwilli kkatnin taɛuwwatt d‑mddn ggutnin ar‑ssġuyyun.

²⁴ yini‑asn: «ittiyat. han tafruh̬t ur‑tmmut. ġir tgn.» imma ntni ar‑gis‑ḍṣṣan.

²⁵ lliġ ssufġn mddn‑an kullutn, ikšm yasuɛ s‑dar‑tfruh̬t. yamẓ‑as ġ‑ufus, tnkr‑d.

²⁶ awin ilmma lh̬bar‑ns s‑tmazirt‑an kullutt.

lmasiḥ ijjujji sin ibukaḍn

²⁷ iftu yasuɛ zġ‑ġin, ḍfurn‑t sin ibukaḍn ar‑tġuwwatn ar‑ttinin: «ḥnnu ginnġ a‑yus n‑dawd.»

²⁸ lliġ ikšm yasuɛ s‑yat‑tgmmi ruḥn‑t‑id ibukaḍn‑lli. isqsa‑tn: «is‑tumnm is‑ẓḍarġ ad‑skrġ mayad?» inin‑as: «numn a‑sidi.»

²⁹ iggr i‑walln‑nsn yini‑asn: «ad‑awn‑yili ma‑s‑tumnm.»

³⁰ wrrin sfawn ġakudan. yuṣṣa‑tn ilmma s‑lmɛqul yini‑asn: «rarat lɛaql, a‑ur‑tinim i‑yan f‑mayad.»

³¹ imma ntni ddan ar‑sawaln f‑yasuɛ ġ‑tmazirt‑an kullutt.

lmasiḥ ijjujji aẓnẓum

³² ġir ddan ntni s‑d‑uškan kra n‑mddn yaḍni, awin‑as‑d yan‑urgaz aẓnẓum, yili gis yal‑ljnn.

³³ lliġ‑zgis‑iffuġ ljnn iwrri‑uẓnẓum ar‑isawal. ar‑tɛjjabn mddn kullutn ar‑ttinin: «ur‑jju‑illi zund mayad ġ‑dar ayt‑rbbi.»

³⁴ imma ifarisin ar‑ttinin: «nttan s‑tḥkimt n‑ugllid l‑ljnun a‑s‑a‑issufuġ ljnun.»

ulli bla amksa

³⁵ ar‑itkka yasuɛ kullu timdinin ula iduran, ar‑isslmad ġ‑tgʷmma n‑tẓallit ar‑itbrraḥ s‑lh̬bar ifulkin n‑tgldit n‑ignna, ar‑ijjujji mddn zġ‑kraygatt tamaḍunt ula kraygatt aṭṭan nna‑gisn‑illan.

³⁶ lliġ imnad ġ‑mddn‑an ggutnin, qaman gis bahra, ašku iẓra tammara d‑taġuft lli‑ġ‑llan zund ulli bla amksa.

³⁷ yini ilmma i‑imḥḍarn‑ns: «tggut‑tmgra walaynni drusn ih̬ddamn.

³⁸ ḍalbat bu‑tmgra a‑yazn ih̬ddamn ad‑ssmunn tamgra‑ns.»