matta 8 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

lmasiḥ ijjujji anjdam

¹ lliġ‑d‑igguz yasuɛ zġ‑uwrir, ḍfurn‑t mddn ggutnin.

² yašk‑id dars yan‑unjdam iḍr‑d ġ‑lgddam‑ns yini‑as: «wa‑sidi, tẓḍart a‑yyi‑tssġust iġ‑trit.»

³ iggr‑as yasuɛ s‑ufus‑ns yini‑as: «riġ nkki. ġus.» yitti zġ‑gis ljdam ġakudan iġus.

⁴ izayd yasuɛ yini‑as: «ad‑ur‑tinit yat i‑yan, walaynni ddu tmlt ih̬f‑nnk i‑unmġur n‑tgmmi n‑rbbi, tfkt‑as tiġrsi lli‑f‑yuṣṣa musa a‑tg tugga i‑mddn.»

lmasiḥ ijjujji ah̬ddam l‑lqbṭan

⁵ ikšm yasuɛ s‑tmdint n‑kafrnaḥum. yašk‑id dars yal‑lqbṭan n‑iɛskrin n‑rruman, iḍalb‑t bahra

⁶ yini‑as: «wa‑sidi, ikušm‑uh̬ddam‑inu, ign ġ‑tgmmi ityawmrrat bahra.»

⁷ yini‑as yasuɛ: «ra‑n‑aškġ jjujjiġ‑t.»

⁸ imma lqbṭan isawl‑d yini‑as: «wa‑sidi, ur‑sthllaġ a‑tkšmt s‑tgmmi‑nu, walaynni ini ġir yan‑wawal s‑ijji‑uh̬ddam‑inu.

⁹ ha‑yyi ula nkki ar‑skarġ s‑wawal n‑ma‑yyi‑yugʷrn, ilin iɛskrin ġ‑ddu‑ufus‑inu. iġ‑nniġ i‑yan ‹ddu› iddu. iġ‑nniġ i‑wayyaḍ ‹ašk‑id› yašk‑id. iġ‑nniġ i‑uh̬ddam‑inu ‹skr tawuri‑ad› iskr‑tt.»

¹⁰ lliġ isfld yasuɛ i‑mayad itɛjjb, yini i‑willi dids munnin: «lḥqq a‑rad‑awn‑iniġ, ur‑jju‑ufiġ kra n‑yan yumnn zund ġwad, ula ġ‑gr ayt‑rbbi.

¹¹ rad‑awn‑iniġ, ggutn ibrraniyn lli‑ra‑d‑yašk zġ‑ššrq ula lġrb munn‑d d‑ibrahim d‑isḥaq d‑yaɛqub f‑imnsi imqqurn n‑tgldit n‑ignna.

¹² imma ġwilli‑f‑iqṣad rbbi ġayd izrin ad‑gn ayt‑tgldit‑ns, ra‑tn‑iluḥ ġ‑tillas aggugnin. ġin a‑ġ‑rad‑allan ar‑tgẓaẓn uh̬san‑nsn.»

¹³ yini ilmma yasuɛ i‑lqbṭan: «zayd s‑tgmmi. rad‑ak‑yili ġmklli tumnt.» ġakudan a‑ijji‑uh̬ddam‑ns.

lmasiḥ ijjujji mddn ggutnin

¹⁴ iftu yasuɛ s‑tgmmi n‑bṭrus, yaf‑n taḍggʷalt n‑bṭrus tgn, tuḍn s‑tawla.

¹⁵ iggr‑as i‑ufus, titti zgis tawla, tnkr ar‑fllas‑ttsh̬h̬ar.

¹⁶ lliġ‑di‑truḥ‑tdggʷat awin‑d i‑yasuɛ mddn ggutnin lli‑ġ‑llan ljnun. ar‑zgisn‑issufuġ ljnun s‑yan‑wawal, ijjujji kullu willi uḍnnin.

¹⁷ ġmkan a‑s‑yuwfa‑wawal n‑nnabi išaɛya inna «nttan a‑issittin timuḍan‑nnġ, yasi aṭṭan‑nnġ.»

ma‑ra‑imun d‑lmasiḥ?

¹⁸ iẓr yasuɛ mddn ggutnin munn‑d fllas, yini i‑imḥḍarn‑ns f‑ad‑skrn ad‑dids‑ssudun s‑tsga yaḍni n‑umda,

¹⁹ s‑d‑dars‑yuška yan‑umslmd n‑ššrɛ yini‑as: «way‑amslmd, rad‑didk‑munġ s‑innas ra‑tddut.»

²⁰ irar‑as yasuɛ yini‑as: «ibuġaġ darsn tansiwin‑nsn, ula igḍaḍ n‑ignwan darsn usudn‑nsn, imma yus n‑bnadm ur‑dars maniġ a‑isras agayyu‑ns.»

²¹ isawl‑d ilmma yan yaḍni zġ‑gr willi dids itmunun yini‑as: «wa‑sidi, adj‑iyi zwar ad‑wrriġ ard‑n‑mḍlġ baba.»

²² imma yasuɛ inna‑yas: «ašk‑id mun didi. fl ġwilli ur‑ṭṭafnin tudrt a‑n‑mḍln winna‑yasn‑mmutnin.»

lmasiḥ yumr aḍu d‑umda

²³ ikšm yasuɛ s‑tanawt, ssudun dids imḥḍarn‑ns.

²⁴ ġakudan inkr‑d‑waḍu itjhhdn, attuynt taḍangiwin ar‑kkatnt tanawt aylliġ a‑ttɛmmar s‑waman. imma yasuɛ ign.

²⁵ ddun imḥḍarn ssfaqn‑t inin‑as: «jjnjm‑aġ a‑sidi. ha‑yaġ ra‑nhlk.»

²⁶ yini‑asn yasuɛ: «mah̬ aylliġ tksuḍm? is‑ur‑tuminm?» inkr yamr aḍu ula taḍangiwin ad‑zgan, s‑iwrri‑umda ihnna bahra.

²⁷ iḍr‑asn lɛjb ar‑ttinin: «ma‑iga‑urgaz‑ad aylliġ a‑srs‑isflid‑waḍu ula amda?»

lmasiḥ ijjujji sin imjnan

²⁸ lliġ ilkm yasuɛ tamazirt n‑gadara ġ‑tsga yaḍni n‑umda, ffuġn‑d dars sin irgazn zġ‑gr ismḍal. llan gisn ljnun, šqun bahra. ur‑iẓḍar yan a‑ik aġaras‑an.

²⁹ ġuwwtn s‑jjhd inin‑as‑d: «wa‑yus n‑rbbi, ma‑illan ġ‑gratnnġ didk? is‑di‑tuškit ad‑aġ‑tssrfufnt ur‑ta‑d‑ilkim‑uzmz?»

³⁰ ttyawksa ġin yat‑tuwrut iggutn n‑walfan, ur‑n‑bahra‑taggug.

³¹ ḍalbn‑t ljnun bahra inin‑as: «iġ‑aġ‑tssufġt, taznt‑aġ a‑nkšm s‑walfan‑an.»

³² irar‑asn: «zaydat.» ffuġn zġ‑irgazn, kšmn s‑walfan. tazzl‑tuwrut ġakudan s‑jjhd zġ‑ujarif s‑umda, h̬sin‑in kullu ġ‑waman.

³³ rwln imksawn, wrrin s‑tmdint, awin lh̬bar f‑kullu mayan ula f‑ma‑ijran i‑imjnan.

³⁴ aškin‑d kullu ayt‑tmdint ad‑ẓrn yasuɛ. lliġ‑t‑in‑mnaggarn ḍalbn‑t bahra a‑iffuġ tamazirt‑nsn.