matta 7 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

a‑ur‑tḥkamm f‑yan

¹ «a‑ur‑tinim f‑yan is‑yʷh̬šn, a‑ur‑fllawn‑yini rbbi is‑tʷh̬šnm.

² ašku ġaylli ttinim f‑wiyyaḍ a‑ra‑fllawn‑ityawnna, ula lɛbrt lli‑s‑a‑ttɛbbarm i‑wiyyaḍ a‑s‑rad‑awn‑ityawɛbbar.

³ mah̬ a‑n‑ttmnadt arftus imẓẓin lli‑n‑illan ġ‑tiṭ n‑gʷmak, ur‑tt‑akkʷ‑tiwit ġ‑tggjdit lli‑illan ġ‑tiṭ‑nnk?

⁴ mamnk a‑trit a‑tinit i‑gʷmak ‹adj‑iyi ad‑ak‑d‑ssittiġ arftus‑an a‑k‑illan ġ‑tiṭ,› imma kiyi tlla‑yak‑tggjdit ġ‑tiṭ?

⁵ wa‑bu‑sin‑uwdmawn, ssitti zwar taggjdit zġ‑tiṭ‑nnk, baš a‑tẓrt mamnk a‑di‑tssittit arftus zġ‑tiṭ n‑gʷmak.

⁶ «a‑ur‑takkam i‑iḍan ma‑igan win rbbi, a‑ur‑nkrn akʷin‑d fllawn. a‑ur‑ttluḥm ljuhr‑nnun ġ‑lgddam n‑walfan, a‑ur‑t‑aḍḍrn s‑iḍarn‑nsn.

ḍalbat, sigglat, ssḍuqqrat

⁷ «ḍalbat rbbi rad‑awn‑ifk, sigglat dars ra‑tafm, ssḍuqqrat‑n srs rad‑awn‑irẓm.

⁸ ašku kullu wanna‑t‑iḍalbn rad‑as‑ifk, d‑wanna dars isiggiln ra‑dars‑yaf, d‑wanna‑n‑issḍuqqurn rad‑as‑irẓm.

⁹ is‑gigun‑illa ma‑mi‑iḍalb yus aġrum ifk‑as aẓru?

¹⁰ nġd iḍalb‑as aslm ifk‑as algmmaḍ?

¹¹ ẓrat kunni, wah̬h̬a da‑tskarm ma‑yʷh̬šnn tissanm a‑tfkm timih̬ar fulkinin i‑tarwa‑nnun. uggʷar n‑mayan a‑ra‑yakka babatun n‑ignna ma‑ifulkin i‑willi‑ti‑tḍalabnin.

¹² skarat d‑kullu mddn ġmknna tram a‑t‑didun‑skarn. awal‑ad a‑issmunn kullu ma‑ityaran ġ‑ššrɛ ula lanbiya.

lmɛna n‑imi inukman

¹³ «kšmat ġ‑imi inukman. han yusɛa imi yaḍni lli‑itawin s‑lhalak, irh̬u‑uġaras‑ns, iggut ma‑gis‑ikššmn.

¹⁴ walaynni inukma imi lli‑itawin s‑tudrt, išqu‑uġaras‑ns, idrus ma‑t‑itafan.

lmɛna n‑tsġarin d‑lġllt‑nsnt

¹⁵ «rarat lɛaql ašku rad‑d‑darun‑aškin kra n‑mddn ar‑ttinin is‑gan lanbiya walaynni ar‑sskirkisn. uššann ad‑gan, lsn‑d srun timlsit n‑uwlli baš a‑kʷn‑ġwin.

¹⁶ imma ntni zġ‑lġllt‑nsn a‑zġ‑ra‑tn‑ttissanm, ašku ur‑a‑yakka‑uzggʷar aḍil, ula‑da‑takka‑tskra ikuzarn.

¹⁷ tasġart ifulkin ar‑tskar lġllt ifulkin. tasġart yʷh̬šnn ar‑tskar lġllt yʷh̬šnn.

¹⁸ ur‑tẓḍar‑tsġart ifulkin a‑tfk lġllt yʷh̬šnn, ula tẓḍar‑tsġart yʷh̬šnn a‑tfk lġllt ifulkin.

¹⁹ walaynni kraygatt tasġart nna‑ur‑yakkan lġllt ifulkin, ra‑stt‑ibbi‑ufllaḥ iluḥ‑tt‑in ġ‑lɛafit.

²⁰ ġmkan a‑rad‑gn ula ntni, zġ‑lġllt‑nsn a‑zġ‑ra‑tn‑ttissanm.

ma‑ra‑ikšm s‑tgldit n‑ignna?

²¹ «han urd kullu wanna‑yyi‑ittinin ‹wa‑sidi, wa‑sidi› a‑ra‑ikšm s‑tgldit n‑ignna. ur‑ra‑srs‑ikšm abla ġwilli skarnin ma‑ittiri baba lli‑illan ġ‑ignna.

²² iggut ma‑rad‑iyi‑yini ġ‑wass l‑lḥsab ‹wa‑sidi wa‑sidi, ha‑yaġ s‑ism‑nnk a‑s‑nsawl s‑iwaliwn n‑rbbi. s‑ism‑nnk a‑s‑nssufġ ljnun. s‑ism‑nnk a‑s‑nskr kigan d‑lmɛjizat.›

²³ ġakudan rad‑asn‑iniġ ‹ur‑akkʷ‑kʷn‑ssinġ. ittiyat‑n zġ‑gigi kunni lli‑iskarn lh̬ʷšant.›

lmɛna n‑snat‑tgʷmma

²⁴ «kullu wanna isfldn i‑iwaliwn‑ad‑inu ar‑srsn‑iskar, irwas argaz iṭṭafn lɛaql, ibna tigmmi‑ns f‑isli.

²⁵ ar‑iṣwaḍ‑waḍu ar‑iṭṭar‑unẓar ingi‑d‑wasif ar‑kkatn tigmmi, walaynni ur‑tt‑ssḍirn ašku izga llsas‑ns f‑isli.

²⁶ imma kullu wanna isfldn i‑iwaliwn‑ad‑inu ur‑a‑srsn‑iskar, irwas argaz inufln, ibna tigmmi‑ns f‑umlal.

²⁷ iṣuḍ‑waḍu iḍr‑unẓar ingi‑d‑wasif utn tigmmi tḍr‑d, th̬lu kullutt.»

²⁸ lliġ ikmml yasuɛ iwaliwn‑ad, ar‑bahra‑tɛjjabn mddn ġ‑ulmmud‑ns,

²⁹ ašku ar‑srsn‑isawal ġmklli dars lḥqq ad‑asn‑ittini ma‑tn‑d‑iqqann a‑t‑skarn. ur‑igi ntta zund imslmdn‑nsn n‑ššrɛ.