matta 6 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

almmud f‑ifulkitn

¹ «rarat lɛaql a‑ur‑ttirim a‑tskarm ifulkitn‑nnun ġ‑lgddam n‑mddn baš a‑kʷn‑ẓrn. ašku iġ‑a‑tskarm ġmkan ur‑rad‑awn‑tili kra l‑lbaraka dar babatun lli‑illan ġ‑ignna.

² iġ‑tfkit i‑kra n‑umẓluḍ, a‑ur‑tutt nnaqus baš a‑k‑ẓrn mddn. han ġmkan ad‑skarn ayt‑sin‑uwdmawn ġ‑tgʷmma n‑tẓallit ula ġ‑tswak baš a‑tn‑alġn wiyyaḍ. lḥqq a‑rad‑awn‑iniġ, mayan ka‑rad‑asn‑yili.

³ imma kiyi ġakud nna‑ra‑tfkt i‑imẓlaḍ, a‑ur‑yissan‑ufus‑nnk aẓlmaḍ ma‑iskr‑ufasi.

⁴ akka ġ‑tntla, tili‑ak lbaraka dar babak lli‑itmnadn kullu ma‑intln.

almmud f‑tẓallit

⁵ «iġ‑ra‑tẓẓallm a‑ur‑tgm zund ayt‑sin‑uwdmawn lli‑dar‑iɛzza ad‑tbddadn ar‑tẓallan ġ‑tgʷmma n‑tẓallit ula ġ‑gr‑tswak baš a‑tn‑ẓrn mddn. lḥqq a‑rad‑awn‑iniġ, mayan ka‑rad‑asn‑yili.

⁶ imma kiyi ġakud nna‑trit a‑tẓẓallt, kšm s‑tḥanut‑nnk tqqnt tiflut tẓẓallt i‑babak lli‑intln, ra‑k‑ibark babak lli‑iẓrran ma‑intln.

⁷ ġakud nna‑ttẓallam a‑ur‑tssigatm iwaliwn h̬wanin ġmklli skarn ġwilli tẓallanin i‑ilahat yaḍni, ġaln izd s‑tuggt n‑iwaliwn a‑s‑rad‑asn‑sfldn.

⁸ a‑ur‑tgm zund ntni, ašku babatun issn ma‑kʷn‑ih̬ṣṣan ur‑ta‑yas‑ti‑tḍalbm.

⁹ «imma kunni tẓallayat ġmkad: ‹wa‑babatnnġ lli‑illan ġ‑ignna, a‑yili luqr i‑ism‑nnk,

¹⁰ tašk‑id‑tgldit‑nnk, yili ma‑k‑irḍan ġ‑ddunit ġmklli illa ġ‑ignna.

¹¹ fk‑aġ‑d ġassad aġrum i‑wass‑ad,

¹² tṣamḥt‑aġ f‑lh̬ʷšant lli‑nskr, ġmklli nṣamḥ i‑willi ginnġ skrnin ma‑yʷh̬šnn.

¹³ ssanf‑aġ i‑ma‑rad‑aġ‑ijllu, tjjnjmt‑aġ zġ‑iblis.›

¹⁴ «iġ‑a‑ttṣamaḥm i‑mddn f‑ddnub lli‑gigun‑skarn, rad‑awn‑iṣamḥ babatun n‑ignna.

¹⁵ walaynni iġ‑ur‑a‑ttṣamaḥm i‑wiyyaḍ f‑ddnub lli‑gigun‑skarn, ur‑rad‑awn‑iṣamḥ babatun f‑ddnub‑nnun.

almmud f‑uẓum

¹⁶ «iġ‑a‑ttaẓumm a‑ur‑tskarm zund ayt‑sin‑uwdmawn lli‑kkrsnin ignzi‑nsn baš ad‑ssbayynn i‑mddn is‑aẓumn. lḥqq a‑rad‑awn‑iniġ, mayan ka‑rad‑asn‑yili.

¹⁷ imma kiyi ġakud nna‑ttaẓumt sird udm‑nnk tsrft azzar‑nnk

¹⁸ a‑ur‑yissan yan is‑taẓumt abla babak lli‑intln. ra‑k‑ibark babak lli‑itmnadn kullu ma‑intln.

ayda n‑ignna

¹⁹ «a‑ur‑tssmunum ayda ġ‑ddunit‑ad illiġ ra‑ti‑tšš‑twukka tġwi‑t tanigt ġzn‑in srs imh̬h̬arn a‑t‑akʷrn.

²⁰ walaynni ssmunwat‑n ayda ġ‑ignna illiġ ur‑ra‑ti‑tšš‑twukka ula tġwi‑t tanigt ula ġzan srs imh̬h̬arn a‑t‑akʷrn.

²¹ ašku innaġ illa‑wayda‑nnk a‑ġ‑ra‑yili‑uwl‑nnk.

lqndil n‑ddat

²² «tiṭ n‑bnadm a‑igan lqndil n‑ddat‑ns. iġ‑tsfaw tiṭ, ra‑tili ddat kullutt ġ‑tifawt.

²³ iġ‑ur‑tsfaw tiṭ, ra‑tili ddat kullutt ġ‑tillas. walaynni iġ‑th̬si tifawt lli‑gik‑illan, mnšk a‑s‑rad‑igatnt tillas‑nnk.

ismgan n‑wayda

²⁴ «ur‑ra‑yiẓḍar yan a‑iqasa sin id‑sidis. imma ra‑ikrhu yan yiri wayyaḍ, nġd ra‑ituqqar yan iḥgr wayyaḍ. ur‑ra‑tiẓḍarm a‑tgm ismgan n‑rbbi d‑win‑wayda.

a‑ur‑ttasim taġuft

²⁵ «rad‑awn‑iniġ, a‑ur‑tasim taġuft i‑tudrt‑nnun f‑ma‑ra‑tššm ula ma‑ra‑tsum, ula i‑ddat‑nnun f‑ma‑rad‑as‑tlsm. is‑ur‑tuf tudrt amššu? is‑ur‑tuf ddat timlsit?

²⁶ ẓrat igḍaḍ n‑ignwan, ur‑a‑kkrzn ula‑da‑mggrn ula‑da‑ssmunun ṣṣabt ġ‑iḥuna, walaynni babatun n‑ignna ar‑asn‑yakka amššu lli‑ḥtajjan. imma kunni is‑ur‑dars‑tɛzzam uggʷar n‑igḍaḍ?

²⁷ ma‑iẓḍarn a‑izayd tasaɛt i‑tudrt‑ns s‑taġuft lli‑yusi?

²⁸ mah̬ aylliġ a‑ttasim taġuft f‑malssa? ẓrat ijddign n‑tagant mamnk a‑di‑tmġayn. ur‑a‑kkatn tammara ula‑da‑ẓṭṭan,

²⁹ walaynni rad‑awn‑iniġ, suliman s‑lhibt n‑tgldit‑ns ur‑jju‑ilsi zund yan zġ‑ijddign‑ad.

³⁰ ar‑isslsa rbbi tuga n‑tagant lli‑itmġayn ġassad ttyawgar‑n azkka ġ‑takat. is‑ur‑ra‑kʷn‑issls ula kunni s‑uggʷar? is‑ur‑tuminm s‑rbbi?

³¹ a‑ur‑tasim taġuft ula‑da‑ttinim ‹ma‑ra‑nšš?› ula ‹ma‑ra‑nsu?› ula ‹ma‑ra‑nls?›

³² han ġwilli ur‑ssinnin rbbi, tiġawsiwin‑an a‑s‑lhan. imma kunni, babatun n‑ignna issn is‑tnti‑tḥtajjam kullutnt.

³³ lhwat zwar s‑tgldit n‑rbbi ula s‑ma‑t‑irḍan s‑awn‑izuyd kullu tiġawsiwin‑an yaḍni.

³⁴ a‑ur‑ttasim taġuft i‑uzkka, ašku azkka iẓḍar i‑taġuft‑ns. tqadda‑tmmara n‑ġassad bla‑di‑tzuydm tin‑uzkka.