matta 5 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

almmud l‑lmasiḥ ġ‑iggi n‑uwrir

¹ lliġ iẓra yasuɛ mddn ggutnin uškan‑d s‑dars, iġli s‑yan‑uwrir iskiws, munn‑d fllas imḥḍarn‑ns.

² ibdu ar‑tn‑isslmad yini:

³ «imbarkin ad‑gan ġwilli ssḥssanin is‑ur‑gin yat, ašku ntni a‑mi‑tlla‑tgldit n‑ignna.

⁴ imbarkin ad‑gan ġwilli allanin, ašku ntni a‑mi‑ra‑isfiḍ rbbi imṭṭawn‑nsn.

⁵ imbarkin ad‑gan ġwilli tṣbarnin, ašku ntni a‑ra‑išškšm rbbi s‑kullu timih̬ar‑ns.

⁶ imbarkin ad‑gan ġwilli yaġ laẓ ula irifi i‑ma‑irḍan rbbi, ašku ntni a‑ra‑išbɛ.

⁷ imbarkin ad‑gan ġwilli tḥnnunin ġ‑wiyyaḍ, ašku ntni a‑f‑ra‑d‑iḥnnu rbbi.

⁸ imbarkin ad‑gan ġwilli dar ul iġusn, ašku ntni a‑ra‑iẓr rbbi.

⁹ imbarkin ad‑gan ġwilli skarnin sslamt, ašku ntni a‑ra‑ig rbbi d‑tarwa‑ns.

¹⁰ imbarkin ad‑gan ġwilli trfufunnin f‑ssibt n‑ma‑irḍan rbbi, ašku ntni a‑mi‑tlla‑tgldit n‑ignna.

¹¹ imbarkin a‑tgam iġ‑kʷn‑rgmn mddn ssrfufnn‑kʷn inin fllawn kullu ma‑yʷh̬šnn s‑tkrkas f‑ssibt n‑ma‑tgam winu.

¹² thnnayat tfrḥm bahra, ašku tggut lbaraka lli‑rad‑awn‑yili ġ‑ignna. han ġmkan ad‑ssrfufnn ula lanbiya lli‑kʷn‑d‑zwarnin.

lmɛna n‑tisnt d‑tifawt

¹³ «kunni tgam tisnt n‑ddunit. walaynni iġ‑tlmus tisnt ma‑s‑ra‑stti‑tssmarġm? ur‑sul‑tgi i‑yat. ra‑stt‑in‑luḥn mddn ġ‑brra akʷln fllas.

¹⁴ kunni tgam tifawt n‑ddunit. tamdint nna‑illan f‑iggi n‑uwrir ur‑tẓḍar a‑tntl.

¹⁵ ur‑a‑ssrġan mddn lqndil a‑t‑in‑srsn ġ‑ddu lɛbrt, walaynni f‑iggi n‑mani yattuyn a‑f‑a‑t‑in‑srasn baš ad‑isfiwn kullu ayt‑tgmmi.

¹⁶ ġmkad a‑s‑d‑iqqan tifawt‑nnun a‑tisfiw ġ‑lgddam n‑mddn, baš ad‑ẓrn afulki lli‑tskarm alġn babatun lli‑illan ġ‑ignna.

almmud f‑ššrɛ n‑musa

¹⁷ «ad‑ur‑tġalm is‑d‑uškiġ ad‑ssittiġ ššrɛ n‑musa ula arratn l‑lanbiya. ur‑d‑uškiġ a‑tn‑ssittiġ. uškiġ‑d a‑tn‑kmmlġ.

¹⁸ lḥqq a‑rad‑awn‑iniġ, kullu mad‑qaman ignwan d‑wakal ur‑ra‑yitti kra l‑lḥrf nġd kra n‑tnqiṭṭ zġ‑ššrɛ ard yafu kullu ma‑gis‑illan.

¹⁹ wanna issunfn kra l‑luṣit imẓẓin zġ‑luṣiyat‑ad n‑ššrɛ isslmd i‑mddn ad‑as‑anfn, ra‑ig nttan wad kullu imẓẓin ġ‑tgldit n‑ignna. imma wanna iskarn s‑luṣiyat‑ad isslmd mddn ad‑srsnt‑skarn, ra‑ig nttan wad imqqurn ġ‑tgldit n‑ignna.

²⁰ rad‑awn‑iniġ, iġ‑ur‑trḍim rbbi uggʷar n‑imslmdn n‑ššrɛ d‑ifarisin ur‑akkʷ‑ra‑tiẓḍarm a‑tkšmm s‑tgldit n‑ignna.

almmud f‑taẓit d‑uṣraḍ

²¹ «tsfldm is‑inna musa i‑willi zrinin ‹a‑ur‑tnġt. wanna inġan, ra‑fllas‑ittut lḥukm.›

²² imma nkki rad‑awn‑iniġ, kullu wanna ikurhan gʷmas, illa fllas lḥukm. d‑wanna irgmn gʷmas iqqan‑t‑id a‑izri zġ‑lmḥkama, d‑wanna‑yas‑innan ‹kiyi wašš a‑tgit› isthlla lɛafit n‑jhnnama.

²³ iġ‑tiwit kra n‑twafka s‑tgmmi n‑rbbi tswangmd‑d is‑tskrt kra yʷh̬šnn ġ‑gʷmak,

²⁴ fl‑n tawafka‑nnk ġ‑tama n‑uẓru n‑tġrsi, tddut tṣalḥt d‑gʷmak, twrrid‑d ilmma tfkt tawafka‑nnk i‑rbbi.

²⁵ iġ‑ak‑iṣrḍ kra n‑yan, mšaškad‑d dids ġ‑uġaras ur‑ta‑tlkimm lmḥkama, a‑ur‑k‑in‑idḥi‑umṣraḍ‑nnk i‑lqaḍi, idḥi‑k lqaḍi i‑umh̬zni, iluḥ‑k‑in ġ‑lḥbs.

²⁶ lḥqq a‑rad‑ak‑iniġ, ur‑ra‑di‑tffuġt zġ‑ġin ard tfrut taqaritt iggʷran.

almmud f‑zzna

²⁷ «tsfldm is‑inna musa ‹a‑ur‑tznut.›

²⁸ imma nkki rad‑awn‑iniġ, wanna issmaqqln ġ‑kra n‑tmġart išthu‑tt, han izna srs ġ‑uwl‑ns.

²⁹ iġ‑a‑k‑tssṭar tiṭ‑nnk tafasit, ssukf‑tt‑id tluḥt‑stt. yuf a‑k‑ih̬ṣṣa yan‑ugzzum ġ‑ddat‑nnk ula a‑n‑kullu‑ttyawgar ddat‑nnk ġ‑jhnnama.

³⁰ iġ‑a‑k‑issṭar‑ufus‑nnk afasi, bbi‑t tluḥt‑t. yuf a‑k‑ih̬ṣṣa yan‑ugzzum ġ‑ddat‑nnk ula a‑kullu‑tddu ddat‑nnk s‑jhnnama.

almmud f‑ṭṭlaq

³¹ «inna‑daġ musa ‹wanna ifran i‑tmġart‑ns iqqan‑t‑id ad‑as‑ifk tabrat l‑lfra.›

³² imma nkki rad‑awn‑iniġ, wanna ifran i‑tmġart‑ns f‑kra yaḍni bla zzna, hati irur‑tt a‑tznu. d‑wanna itahln tanna‑d‑ifran, han zzna ayn iskr.

almmud f‑tgallit

³³ «tsfldm is‑inna musa i‑willi zrinin ‹a‑ur‑tffuġt f‑maylli‑s‑tggullit s‑rbbi. illa fllak a‑tssafut tagallit‑nnk.›

³⁴ imma nkki rad‑awn‑iniġ, a‑ur‑ttgallam, la s‑ignna ašku iga lɛrš n‑rbbi,

³⁵ ula s‑ddunit ašku tga aẓru lli‑f‑isrs iḍarn‑ns, ula s‑urušalim ašku tga tamdint n‑ugllid imqqurn.

³⁶ ula tggullit s‑ih̬f‑nnk ašku ur‑tẓḍart a‑trart yan‑unẓaḍ a‑ig umlil nġd iḍili.

³⁷ illa fllawn a‑ig‑wawal‑nnun ‹iyah› nġd ‹uhu›. aynna tzuydm i‑mayan, han iblis a‑d‑ikka.

almmud f‑ṣṣbr

³⁸ «tsfldm is‑inna musa ‹tiṭ s‑tiṭ, ula ah̬s s‑wah̬s.›

³⁹ imma nkki rad‑awn‑iniġ, a‑ur‑tmmaġm d‑yan gigun iskrn ma‑yʷh̬šnn. iġ‑k‑yut yan f‑umadl afasi, gllb‑as‑n aẓlmaḍ.

⁴⁰ iġ‑ak‑iṣrḍ yan yiri ad‑ak‑yawi aqššab, fk‑as ula aslham.

⁴¹ iġ‑k‑yumr kra n‑yan ad‑as‑tasit taġawsa‑ns yan kilimitr, ddu dids sin.

⁴² wanna‑zgik‑iḍalbn, fk‑as. d‑wanna‑d‑yuškan ad‑as‑trḍlt, a‑ur‑ti‑trart bla yat.

ḥnnwat ġ‑inuwwašn‑nnun

⁴³ «tsfldm is‑inna musa ‹a‑tḥnnut ġ‑umddakkʷl‑nnk, tkrhut anuwwaš‑nnk.›

⁴⁴ imma nkki rad‑awn‑iniġ, ḥnnwat ġ‑inuwwašn‑nnun, tḍalbm rbbi a‑irḥm ġwilli‑kʷn‑ssrfufnnin.

⁴⁵ ġmkad a‑s‑ra‑tgm zund babatun lli‑illan ġ‑ignna, ašku ntta ar‑d‑issaqlay tafukt‑ns f‑willi ʷh̬šnnin ula f‑willi fulkinin, ar‑d‑yakka anẓar i‑willi skarnin s‑wawal‑ns ula ġwilli ur‑srs‑skarnin.

⁴⁶ iġ‑a‑ttḥnnum ġir ġ‑willi gigun tḥnnunin, mal‑lbaraka a‑rad‑awn‑yili? is‑urd ġmkan ad‑skarn ayt‑nkkas ula ntni?

⁴⁷ iġd ġir imddukkʷal‑nnun a‑da‑ttnsallamm, man afulki tskrm uggʷar n‑mddn yaḍni? is‑urd ġmkan ad‑skarn ula ġwilli ur‑ssinnin rbbi?

⁴⁸ imma kunni, illa fllawn a‑tfulkim s‑ufulki ikmmln, ġmklli kullu ifulki babatun n‑ignna.