matta 4 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

iblis yurm lmasiḥ

¹ iddu yasuɛ ġakudan, yawi‑t rruḥ lqudus s‑lh̬la a‑t‑itarm iblis.

² kkuẓ id‑mraw n‑wass a‑yaẓum ġ‑iyḍ ula azal, aylliġ iwrri yaġ‑t laẓ bahra.

³ yašk‑id srs ilmma iblis, yini‑as: «iġ‑tgit yus n‑rbbi, ini i‑iẓran‑ad ad‑wrrin gn aġrum.»

⁴ irar‑as yasuɛ: «han ityara ġ‑warra n‑rbbi ‹urd aġrum ka‑s‑a‑itddr bnadm, walaynni s‑kraygatt awal nna‑d‑yuškan zġ‑dar rbbi.›»

⁵ yawi‑t ilmma iblis s‑tmdint n‑urušalim, issbidd‑t f‑iggi n‑ukfaf n‑tgmmi n‑rbbi

⁶ yini‑as: «iġ‑tgit yus n‑rbbi luḥ‑n ih̬f‑nnk s‑iyzdar, ašku ityara ‹ra‑d‑yazn lmalayka‑ns a‑k‑gabln. ra‑k‑asin f‑ifassn‑nsn baš a‑ur‑ilkm‑uḍar‑nnk kra n‑uẓru.›»

⁷ irar‑as yasuɛ: «han ityara ‹a‑ur‑tarmt rbbi sidik.›»

⁸ yawi‑t ilmma iblis issġli‑t s‑yan‑udrar yattuyn, iml‑as kullu tiglday n‑ddunit ula lmjd‑nsnt,

⁹ yini‑as: «rad‑ak‑fkġ kullu mayad iġ‑tḍrt f‑ifaddn‑nnk tsjdt‑iyi.»

¹⁰ irar‑as yasuɛ: «itti‑n zġ‑gigi a‑šiṭan, ašku ityara ‹rbbi sidik a‑mi‑ttsjadt, d‑nttan waḥdut a‑ttɛbadt.›»

¹¹ ifl‑t iblis ġakudan, aškin‑d dars lmalayka ar‑ti‑tɛawann.

ġmkad a‑s‑igra lmasiḥ ġ‑tbrraḥt‑ns

¹² lliġ isfld yasuɛ is‑ityamaẓ yuḥanna amsddam ġ‑lḥbs, iwrri s‑tmazirt n‑jalil.

¹³ lliġ‑n‑ilkm ur‑iqama ġ‑naṣira walaynni izri izdġ ġ‑tmdint n‑kafrnaḥum, tlla ġ‑tama n‑umda ġ‑tsga n‑zabulun ula naftali.

¹⁴ ġmkan a‑s‑yuwfa‑wawal n‑nnabi išaɛya inna:

¹⁵ «way‑akal n‑zabulun d‑wakal n‑naftali lli‑iwalan amda ġ‑tsga yaḍni n‑urdun. wa‑tamazirt n‑jalil tazdġt n‑ibrraniyn.

¹⁶ han ġwin gawrnin ġ‑tillas a‑iẓran tifawt iggutn. ġwin zdġnin ġ‑tmazirt n‑umalu l‑lmut, ntni a‑f‑tsfaw tifawt.»

¹⁷ ġakudan a‑igra yasuɛ ar‑itbrraḥ ar‑ittini: «flat kullu ma‑tskarm yʷh̬šn, ašku takmur‑d‑tgldit n‑ignna.»

imḥḍarn imzwura

¹⁸ iftu yasuɛ ġ‑tama n‑umda n‑jalil, iẓr sin aytmatn, simɛan lli‑mi‑ttinin bṭrus d‑gʷmas andraws. ingʷmarn n‑islman ad‑gan, grn‑in ššbkt ġ‑umda.

¹⁹ isawl srsn yasuɛ yini‑asn: «aškad‑d munat didi, rarġ‑kʷn a‑tgm ingʷmarn n‑mddn.»

²⁰ ġakudan fln ššbayk‑nsn, munn dids.

²¹ izayd iftu yan imikk s‑n‑iẓra sin aytmatn yaḍni, yaɛqub yus n‑zabdi d‑gʷmas yuḥanna. llan ġ‑tanawt ntni d‑babatsn zabdi ar‑tɛdaln ššbayk. iġr‑asn yasuɛ,

²² fln‑in tanawt ula babatsn ġakudan, munn dids.

ar‑isslmad lmasiḥ ar‑ijjujji

²³ izayd yasuɛ ar‑itkka tamazirt n‑jalil kullutt, ar‑isslmad ġ‑tgʷmma n‑tẓallit, ar‑itbrraḥ s‑lh̬bar ifulkin n‑tgldit n‑ignna, ar‑ijjujji mddn zġ‑kraygatt tamaḍunt ula kraygatt aṭṭan nna‑gisn‑illan.

²⁴ sfldn fllas kullu mddn ġ‑tmazirt n‑suriyya, awin‑as‑d kullu ma‑ihršn s‑mknna tga‑tmaḍunt ula aṭṭan, gn‑iyt ikušamn nġd imjnan nġd ġwilli issṭar‑uslay, ijjujji‑tn kullutn.

²⁵ ḍfurn‑t mddn ggutnin, uškan‑d zġ‑tsgiw n‑jalil d‑tmazirt n‑mrawt‑tmdinin d‑urušalim d‑tmazirt n‑yudaya ula zġ‑tsga yaḍni n‑wasif n‑urdun.