matta 28 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

tankra l‑lmasiḥ zġ‑lmut

¹ lliġ izri‑wass n‑usunfu, zikk ṣbaḥ n‑wass l‑lḥdd, tnkr maryam ullt‑magdala d‑maryam‑lli yaḍni ddunt ad‑ẓrnt amḍḍal.

² s‑immussa‑wakal ġ‑tasaɛt‑an s‑jjhd, igguz‑d yal‑lmalak n‑sidi rbbi zġ‑ignwan, issknuki ifir zġ‑imi n‑umḍḍal, igawr fllas.

³ ar‑issmrqiqiy lmalak zund usmann tmllul‑tmlsit‑ns zund adfl.

⁴ ggʷdn imh̬zniyn lli‑ḍufnin amḍḍal ar‑trgigiyn s‑tawda, ḍrn s‑wakal zund iġ‑mmutn.

⁵ isawl lmalak s‑tmġarin yini‑asnt: «ad‑ur‑tiksaḍmt. ssnġ is‑a‑tsiggilmt yasuɛ lli‑immutn f‑uggjdi.

⁶ ur‑sul‑illi ġid ašku inkr‑n ġmklli‑s‑inna. aškamd‑d a‑tẓrmt illiġ‑t‑id‑srsn.»

⁷ yini‑asnt ilmma: «ddwamt ġilad s‑dar imḥḍarn‑ns, tinimt‑asn is‑d‑inkr zġ‑lmut. ra‑kʷn‑izwur s‑tmazirt n‑jalil. ġin a‑ġ‑ra‑ti‑tẓrm. ha‑yyi nniġ‑awnt‑t.»

⁸ ffuġnd‑d‑tmġarin ḥayna zġ‑dar‑umḍḍal, ggʷdnt s‑lfrḥ iggutn. ddunt ar‑tazzalnt ad‑awint lh̬bar i‑imḥḍarn‑ns.

⁹ sul llant ġ‑uġaras s‑asnt‑iban yasuɛ yini‑asnt: «ad‑awnt‑tili sslamt.» ruḥnt‑in ḍrnt‑as‑n f‑iḍarn sjdnt‑as.

¹⁰ yini‑asnt yasuɛ: «ad‑ur‑tiksaḍmt. zaydamt tinimt i‑aytma ad‑ddun s‑jalil. ġin a‑ġ‑ra‑yyi‑ẓrn.»

tugga n‑imh̬zniyn

¹¹ lliġ ddant‑tmġarin, iwrri kra zġ‑imh̬zniyn lli‑ḍufnin amḍḍal s‑tmdint, inin i‑inmġurn n‑tgmmi n‑rbbi f‑ma‑ijran.

¹² munn‑d ntni d‑imġarn n‑tmazirt mšawarn i‑ngratsn, fkn i‑imh̬zniyn iqaridn

¹³ uṣṣan‑tn inin‑asn: «iniyat i‑mddn ‹uškan‑d imḥḍarn‑ns ġ‑iyḍ, afn‑aġ‑d ngn, akʷrn ddat‑ns.›

¹⁴ a‑ur‑tiksaḍm zġ‑lḥakm. iġ‑iffuġ isfld i‑ġayan, ra‑t‑nssfhm is‑ur‑fllawn‑illi yat.»

¹⁵ amẓn iqaridn, skrn ġmklli‑tn‑uṣṣan. ilin iwaliwn‑ad ġ‑dar ayt‑yudaya sul s‑ġassad.

iban lmasiḥ i‑imḥḍarn‑ns

¹⁶ nkrn ilmma imḥḍarn s‑yan d‑mraw, ddun s‑tmazirt n‑jalil s‑uwrir lli‑s‑asn‑inna yasuɛ.

¹⁷ ẓrn‑t ġin ḍrn s‑wakal sjdn‑as, walaynni illa sul gisn ma‑iškkan.

¹⁸ imma yasuɛ iruḥ‑tn yini‑asn: «hati ġ‑ufus‑inu a‑ġ‑ityawfka kullu ma‑illan ġ‑ignwan ula ġ‑wakal.

¹⁹ ddwat ġilad s‑kraygatt tamazirt, trarm mddn ad‑gn imḥḍarn‑inu, tssddmm‑tn ġ‑waman s‑ism n‑baba d‑yus d‑rruḥ lqudus,

²⁰ ar‑tn‑tsslmadm ad‑skarn kullu ma‑f‑kʷn‑uṣṣaġ. ha‑yyi bdda didun ar isiggʷra n‑ddunit.»