matta 27 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

ibidd lmasiḥ ġ‑lgddam n‑bilaṭus

¹ lliġ ifaw zzman munn‑d inmġurn n‑tgmmi n‑rbbi d‑imġarn n‑tmazirt‑an kullutn, mšawarn f‑mamnk a‑rad‑nġn yasuɛ.

² krfn‑t awin‑t dḥin‑t‑in i‑bilaṭus lḥakm n‑rruman.

yahuda inġa ih̬f‑ns

³ imma yahuda lli‑izznzan yasuɛ, lliġ isfld is‑fllas‑ḥkamn s‑lmut tʷgraẓ‑t. yawi kraḍ id‑mraw n‑uqarid‑lli n‑nnuqrt, irar‑tn i‑inmġurn d‑imġarn

⁴ yini‑asn: «hati ddnub ayd skrġ. zznziġ i‑lmut yan ur‑iskirn kra yʷh̬šnn.» rarn‑as: «mad‑aġ‑gis‑illan nkkʷni? dbbr i‑ih̬f‑nnk.»

⁵ iddu yahuda iluḥ‑n iqaridn ġ‑tgmmi n‑rbbi, iffuġ yagʷl ih̬f‑ns s‑yan‑izikr immt.

⁶ asin inmġurn iqaridn‑an inin: «ur‑ḥllan a‑tn‑in‑ng ġ‑ṣṣnduq n‑tgmmi n‑rbbi ašku atig n‑idammn ad‑gan.»

⁷ mšawarn‑daġ i‑ngratsn, sġn srsn ‹igr n‑ufh̬h̬ar› a‑gis‑tmḍaln iġribn.

⁸ sul s‑ġassad ar‑ttinin mddn i‑igr‑an ‹akal n‑idammn›.

⁹ ġmkad a‑s‑yuwfa‑wawal n‑nnabi irmiyya lli‑innan: «rad‑d‑mšaškan mddn‑an n‑ayt‑rbbi a‑d‑fllas‑fkn atig n‑kraḍ id‑mraw n‑uqarid n‑nnuqrt, awin‑tn ilmma

¹⁰ sġn srsn igr n‑ufh̬h̬ar. ġmkad a‑yyi‑yuṣṣa sidi rbbi.»

bilaṭus iḥkam f‑lmasiḥ s‑lmut

¹¹ ibidd yasuɛ ġ‑lgddam l‑lḥakm bilaṭus. isqsa‑t lḥakm yini‑as: «is‑tgit agllid n‑ayt‑yudaya?» irar‑as yasuɛ: «kiyi a‑t‑innan.»

¹² nkrn inmġurn n‑tgmmi n‑rbbi d‑imġarn n‑tmazirt ar‑srs‑taštkkan s‑kigan d‑tġawsiwin, imma ntta ur‑asn‑irur s‑yat.

¹³ yini‑as bilaṭus: «is‑ur‑tsfldt i‑mnnawt‑tġawsiwin ayd‑fllak‑ttinin?»

¹⁴ imma ntta ifssa ur‑asn‑irur s‑yat aylliġ itɛjjb bilaṭus bahra.

¹⁵ ikka‑ttin lḥakm ġ‑kraygatt lɛid n‑usurf ar‑asn‑gis‑irẓẓm i‑yan‑uḥbbas nna‑ran.

¹⁶ illa yan ġ‑lḥbs ġ‑uwssan‑an ism‑ns barabbas, ityawssan bahra.

¹⁷ lliġ‑d‑munn mddn ggutnin, isqsa‑tn bilaṭus: «manwa tram ad‑awn‑as‑rẓmġ, izd barabbas nġd yasuɛ lli‑mi‑ttinim lmasiḥ?»

¹⁸ ašku bilaṭus issn inmġurn‑nsn is‑ḥsadn yasuɛ, ġayan ka‑f‑t‑id‑dḥin.

¹⁹ walaynni ġ‑tasaɛt‑an sul iskiws bilaṭus ġ‑lkursi l‑lḥukm s‑d‑srs‑tuzn‑tmġart‑ns tini‑as‑d: «ad‑ur‑tkšmt ssuq n‑urgaz‑an ifulkin, ašku tuška‑yyi‑d taġuft iggutn ġassad f‑ssibt‑ns ġ‑yat‑twargit.»

²⁰ imma inmġurn n‑tgmmi n‑rbbi d‑imġarn n‑tmazirt‑an zuydn sshiyysn mddn baš a‑t‑ḍalbn ad‑asn‑d‑irẓm i‑barabbas idḥi‑n yasuɛ s‑lmut.

²¹ isqsa‑tn‑daġ lḥakm: «manwa tram ġ‑sin‑ad ad‑awn‑as‑rẓmġ?» rarn‑as: «barabbas.»

²² yini‑asn bilaṭus: «ma‑tram a‑t‑skrġ i‑yasuɛ lli‑mi‑ttinim lmasiḥ?» rarn‑as kullutn: «a‑ityaggal f‑uggjdi.»

²³ yini‑asn: «mah̬? ma‑iskr yʷh̬šnn?» imma ntni ar‑ssġuyyun s‑uggʷar ar‑ttinin: «a‑ityaggal f‑uggjdi a‑immt.»

²⁴ iẓr bilaṭus is‑ur‑isugir yat, ġir zuydn mddn duyn s‑uggʷar. yasi‑d aman isird ifassn‑ns ġ‑lgddam‑nsn yini‑asn: «ha‑nkki ur‑flla‑llin idammn n‑urgaz‑ad. ẓrat kunni ma‑ra‑tskrm.»

²⁵ rarn‑as kullutn: «a‑fllannġ‑ilin idammn‑ns nkkʷni d‑tarwa‑nnġ.»

²⁶ irẓm‑asn ġakudan i‑barabbas. imma yasuɛ, issġurš‑t issufġ‑t a‑immt f‑uggjdi.

ṭṭnẓ lli‑izrin f‑lmasiḥ

²⁷ nkrn iɛskrin l‑lḥakm awin yasuɛ s‑ṭuẓẓunt l‑lqṣr, ssmunn‑d kullu lɛskr lli‑illan ġin.

²⁸ kkisn‑as timlsit‑ns sslsn‑as yan‑uslham iẓggʷaġn,

²⁹ skrn yan‑ttaj zġ‑uzggʷar gn‑as‑t f‑ih̬f, gn‑as yat‑tġanimt ġ‑ufus‑ns afasi. ar‑ṭṭarn f‑ifaddn‑nsn ġ‑lgddam‑ns ar‑gis‑ḍṣṣan ar‑ttinin: «sslam fllak ay‑agllid n‑ayt‑yudaya.»

³⁰ ar‑fllas‑ssufusn, asin taġanimt‑lli ar‑t‑in‑srs‑kkatn f‑ih̬f.

³¹ lliġ gis šbɛan taḍṣa, kkisn‑as aslham sslsn‑as timlsit‑ns, awin‑t a‑t‑nġn f‑uggjdi.

lmasiḥ f‑uggjdi

³² lliġ ffuġn ntni, mnaggarn yan‑urgaz gu‑kurini ism‑ns simɛan, amrn‑t a‑yasi aggjdi n‑yasuɛ.

³³ lkmn adġar lli‑mi‑ttinin ‹gulguta›. tga lmɛna‑ns ‹adġar n‑tʷh̬šašt n‑ih̬f›.

³⁴ irin ad‑fkn i‑yasuɛ aman n‑waḍil iktin lli‑ġ‑illa‑usafar ismmumn, imma ntta lliġ‑t‑imḍi yagʷi a‑t‑isu.

³⁵ qqnn‑t f‑uggjdi alln‑t. bḍun timlsa‑ns i‑ngratsn grn‑d fllasnt asġar.

³⁶ gawrn ġin ḍufn‑t.

³⁷ gn yat talluḥt ġ‑nnig ih̬f‑ns a‑tml aṣraḍ lli‑s‑as‑ṣrḍn, ityara gis: «ġwad iga yasuɛ agllid n‑ayt‑yudaya.»

³⁸ awin‑d sin imh̬h̬arn agʷln‑tn f‑iggjda, yan f‑ufasi n‑yasuɛ d‑yan f‑uẓlmaḍ‑ns.

³⁹ ar‑t‑rggmn mddn lli‑zraynin, ar‑ssmussun ih̬fawn‑nsn ar‑as‑ttinin:

⁴⁰ «wa‑kiyi lli‑ra‑ih̬lu tigmmi n‑rbbi tbnut‑stt ġ‑kraḍ‑uwssan, jjnjm ih̬f‑nnk. gguz‑d zġ‑uggjdi iġ‑tgit yus n‑rbbi.»

⁴¹ ġmkad‑daġ a‑s‑a‑gis‑teṭnaẓn inmġurn n‑tgmmi n‑rbbi d‑imslmdn n‑ššrɛ d‑imġarn n‑tmazirt ar‑ttinin:

⁴² «hati ijjnjm wiyyaḍ walaynni ur‑iẓḍar a‑ijjnjm ih̬f‑ns. izd agllid n‑ayt‑rbbi a‑iga? iniyat‑as a‑d‑igguz zġ‑uggjdi ġilad baš a‑srs‑namn.

⁴³ hatin isstamn ġ‑rbbi, ig ih̬f‑ns d‑yus n‑rbbi. iniyat‑as a‑t‑ijjnjm rbbi ġilad iġ‑fllas‑irḍa.»

⁴⁴ ula imh̬h̬arn lli‑dids‑tyaggalnin f‑iggjda ar‑t‑rggmn ula ntni.

lmut l‑lmasiḥ

⁴⁵ lliġ tlkm tasaɛt tis snat d‑mrawt, ḍrnd‑d tillas f‑tmazirt‑an kullutt ar tasaɛt tis kraṭṭ n‑tdggʷat.

⁴⁶ tasaɛt tis kraṭṭ yut yasuɛ s‑yat‑tġuyyit itjhhdn yini: «aluy, aluy, lama šabaqtani?» tga lmɛna‑ns «wa‑rbbi‑nu, wa‑rbbi‑nu, mah̬ a‑yyi‑tflt?»

⁴⁷ kra zġ‑willi biddnin ġin, lliġ‑as‑sfldn inin: «hati ar‑yaqra i‑nnabi iliyya.»

⁴⁸ yazzl yan gisn yasi‑d yan‑ušrwiḍ iɛmmr‑t s‑waman l‑lh̬ll ig‑t ġ‑yat‑tġanimt imdi‑t‑in i‑yasuɛ a‑isu.

⁴⁹ inin wiyyaḍ: «zgayat, a‑nẓr is‑ra‑d‑yašk iliyya a‑t‑ijjnjm.»

⁵⁰ imma yasuɛ yut‑daġ s‑yat‑tġuyyit itjhhdn idḥi rruḥ‑ns.

⁵¹ ġakudan yut‑ušrrig lh̬amiya n‑tḥanut tamẓlayt ġ‑tgmmi n‑rbbi, tbḍu f‑sin zġ‑uflla ar izdar. immass‑wakal stġn ijarifn,

⁵² rẓmn ismḍal nkrn kigan d‑imẓlayn n‑rbbi lli‑mmutnin.

⁵³ ntni, lliġ‑d‑inkr yasuɛ zġ‑lmut, ffuġn‑d zġ‑ismḍal kšmn‑d s‑tmdint n‑urušalim, ẓrn‑tn mddn ggutnin.

⁵⁴ imma lqbṭan n‑iɛskrin d‑willi dids ḍufnin yasuɛ, lliġ ẓran akal ar‑itmussu ula kullu mayd ijran, iksaḍn bahra ar‑ttinin: «s‑ṣṣaḥt iga ġwad yus n‑rbbi.»

⁵⁵ ilint‑ġin‑tmġarin ggutnin, biddnt ġ‑tuggugt ar‑tmnadnt kullu ma‑ijran. munnd‑d ntnti d‑yasuɛ zġ‑tmazirt n‑jalil ar‑ti‑tɛawannt.

⁵⁶ tlla gisnt maryam ullt‑magdala, d‑maryam innas n‑aytmatn yaɛqub d‑yusf, tili ula innas n‑tarwa n‑zabdi.

timḍlt l‑lmasiḥ

⁵⁷ lliġ‑di‑truḥ‑tdggʷat yašk‑id yan‑urgaz ism‑ns yusf. iga gu‑rama, iggut dars lh̬ir, ig ula ntta amḥḍar n‑yasuɛ.

⁵⁸ ikšm s‑dar bilaṭus iḍalb zġ‑gis ddat n‑yasuɛ, yamr bilaṭus ad‑as‑tt‑fkn.

⁵⁹ iddu yusf yawi ddat issmuttl‑tt ġ‑lkttan išwan iġusn,

⁶⁰ isrs‑tt‑in ġ‑umḍḍal‑ns l‑ljdid ityawġza ġ‑ujarif. issknuki‑d yan‑ifir imqqurn iqqn srs imi n‑umḍḍal iddu.

⁶¹ tili ġin maryam ullt‑magdala d‑maryam‑lli yaḍni, gawrnt ġ‑lgddam n‑umḍḍal.

tiḍaf n‑imh̬zniyn f‑umḍḍal

⁶² izri‑wass‑an ġ‑ujadn i‑lɛid. munn‑d inmġurn n‑tgmmi n‑rbbi d‑ifarisin, ddun s‑dar bilaṭus

⁶³ inin‑as: «a‑sidi, ur‑nttu ma‑inna bu‑tkrkas‑an lliġ sul iddr, inna ‹ġ‑wis kraḍ‑uwssan rad‑d‑nkrġ zġ‑lmut.›

⁶⁴ nḍalb‑k ġilad a‑taznt iɛskrin a‑n‑ḍufn amḍḍal‑ns ard izri wis kraḍ‑uwssan, a‑ur‑imil ddun imḥḍarn‑ns akʷrn ddat inin is‑d‑inkr zġ‑lmut, jlun mddn uggʷar n‑ġmklli jlan.»

⁶⁵ irar‑asn bilaṭus: «hatin darun imh̬zniyn. zaydat tḍufm kunni ġmknna tram.»

⁶⁶ ddun ilmma, ġwin tiḍaf f‑umḍḍal, ɛllmn ifir baš ad‑issann is‑illa ma‑t‑irẓẓmn, ssbiddn imh̬zniyn ġ‑lgddam‑ns.