matta 26 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

skrn inmġurn f‑ad‑nġn lmasiḥ

¹ lliġ ikmml yasuɛ iwaliwn‑ad kullutn, yini i‑imḥḍarn‑ns:

² «tssnm izd sin‑uwssan a‑iqaman i‑lɛid n‑usurf. ġakudan a‑ra‑yyi‑n‑dḥin nkki lli‑igan yus n‑bnadm a‑yyi‑nġn f‑uggjdi.»

³ munn‑d inmġurn n‑tgmmi n‑rbbi d‑imġarn n‑tmazirt‑an ġ‑tgmmi n‑qayafa lli‑igan anmġur ihiyyan n‑tgmmi n‑rbbi.

⁴ mšawarn f‑mamnk a‑s‑rad‑amẓn yasuɛ s‑lḥilt a‑t‑nġn.

⁵ walaynni nnan i‑ngratsn: «urd ġ‑uwssan l‑lɛid baš a‑ur‑duyn mddn.»

tamġart lli‑d‑yusin tabuqqalt n‑tujjut

⁶ illa yasuɛ ġ‑uduwwar n‑bitɛanya ġ‑tgmmi n‑simɛan lli‑sttin‑ikkan iga anjdam,

⁷ iskiws ar‑ištta. tkšm‑d dars yat‑tmġart tusi‑d yat‑tbuqqalt n‑uẓru tili gis tujjut iṣfan, iggut‑bahra‑watig‑ns. tffi‑tt‑id f‑ih̬f n‑yasuɛ.

⁸ lliġ ẓran imḥḍarn ma‑tskr, bzgn fllas, inin i‑ngratsn: «mah̬ a‑stti‑tjla?

⁹ mrad is‑tnza tujjut‑ad ra‑di‑tawi kigan, nfk‑t i‑imẓlaḍ.»

¹⁰ imma yasuɛ issn mad‑swangmn yini‑asn: «mah̬ aylliġ tšqam d‑tmġart‑ad? hatti tskr gigi afulki.

¹¹ imẓlaḍ rad‑bdda‑didun‑ilin, imma nkki ur‑rad‑bdda‑didun‑iliġ.

¹² hatti tujjut‑ad flla tffi, tẓġur srs ddat‑inu i‑umḍḍal.

¹³ lḥqq a‑rad‑awn‑iniġ, innaġ a‑tbrraḥn mddn s‑lh̬bar‑ad ifulkin ġ‑kullu ddunit, ra‑ttinin f‑mayd tskr h̬tad, ar‑tt‑id‑srs‑kttin.»

iskr yahuda f‑a‑izznz lmasiḥ

¹⁴ ġakudan a‑inkr yan zġ‑gr sin d‑mraw n‑umḥḍar, ism‑ns yahuda ish̬aryuṭ, iddu s‑dar inmġurn n‑tgmmi n‑rbbi.

¹⁵ yini‑asn: «mnšk a‑rad‑iyi‑tfkm ad‑awn‑t‑zznzġ?» fkn‑as kraḍ id‑mraw n‑uqarid n‑nnuqrt.

¹⁶ ġakudan a‑iwrri ar‑iswingim mamnk a‑ra‑tn‑iɛawn ad‑amẓn yasuɛ.

imḥḍarn jjujadn imnsi n‑usurf

¹⁷ ilkm‑d‑wass amzwaru ġ‑uwssan n‑urh̬ṣiṣ. aškin‑d imḥḍarn s‑dar yasuɛ sqsan‑t: «mani trit ad‑ak‑n‑gis‑njjujad imnsi l‑lɛid n‑usurf?»

¹⁸ yini‑asn: «zaydat s‑dar flan ġ‑tmdint tinim‑as ‹hati inna‑yak‑d‑umslmd: tlkm‑d tasaɛt‑inu. rad‑ššġ imnsi n‑usurf ġ‑tgmmi‑nnk, nkki d‑imḥḍarn‑inu.›»

¹⁹ skrn imḥḍarn s‑ma‑f‑tn‑yuṣṣa yasuɛ, jjujadn imnsi n‑usurf.

²⁰ truḥ‑d‑tdggʷat iskiws yasuɛ a‑išš d‑imḥḍarn‑ns s‑sin d‑mraw.

²¹ lliġ a‑šttan yini‑asn: «lḥqq a‑rad‑awn‑iniġ, ra‑yyi‑izznz yan ġ‑gratun.»

²² ṭiyyr‑asn bahra, bdun ar‑t‑sqsan kullutn, kud yan ar‑ittini: «yak, urd nkki a‑sidi?»

²³ yini‑asn: «yan zġ‑willi didi dranin ġ‑uruku‑ad a‑ra‑yyi‑izznz.

²⁴ ha‑yus n‑bnadm ra‑immt ġmklli fllas ityaran, walaynni taguḍi a‑ra‑yili i‑urgaz lli‑izznzan yus n‑bnadm. yuf‑as i‑urgaz‑an mrad is‑ur‑akkʷ‑ilul.»

²⁵ isawl yahuda lli‑ra‑t‑izznz yini‑as: «izd nkki a‑sidi?» irar‑as: «kiyi a‑t‑innan.»

imnsi n‑siditnnġ

²⁶ lliġ a‑šttan yasi yasuɛ tangult, iškr rbbi ibbi‑tt, ifk‑tt i‑imḥḍarn‑ns yini‑asn: «amẓat tššm. h̬tad tga ddat‑inu.»

²⁷ yasi lkas, iškr rbbi ifk‑asn‑t yini‑asn: «swat zġ‑gis kullukn.

²⁸ ġwid gan idammn‑inu lli‑ra‑iffi f‑ssibt n‑mddn ggutnin baš ad‑gn lɛhd l‑ljdid ġ‑gratun d‑rbbi ma‑s‑a‑fllawn‑issitti ddnub‑nnun.

²⁹ rad‑awn‑iniġ, ur‑sul‑rad‑suġ zġ‑lġllt n‑waḍil ar ass lli‑ġ‑ra‑t‑didun‑suġ zġ‑ljdid ġ‑tgldit n‑baba rbbi.»

isawl lmasiḥ f‑ma‑ra‑ijru i‑bṭrus

³⁰ asin ilmma yan‑umarg zġ‑imurign n‑rbbi, ffuġn s‑uwrir n‑zzitun.

³¹ yini‑asn yasuɛ: «ha‑kunni ġ‑iḍ‑ad ra‑yyi‑kullu‑tflm, ašku ityara ‹rad‑utġ amksa, tmzr‑tuwrut n‑uwlli.›

³² walaynni tigira n‑mad‑d‑nkrġ zġ‑lmut ra‑kʷn‑zwurġ s‑tmazirt n‑jalil.»

³³ isawl bṭrus yini‑as: «wah̬h̬a‑k‑kullu‑fln, ur‑sar‑k‑filġ nkki.»

³⁴ imma yasuɛ irur‑as: «lḥqq a‑rad‑ak‑iniġ, ġ‑iḍ‑ad ur‑ra‑iġr‑ufullus ard tinit kraṭṭ‑twal ur‑iyi‑tssint.»

³⁵ yini‑as bṭrus: «wah̬h̬a rad‑didk‑mmtġ, ur‑rad‑iniġ ur‑k‑ssinġ.» ġmkad ad‑nnan imḥḍarn kullutn.

ar‑itẓalla lmasiḥ f‑ih̬f‑ns

³⁶ ġakudan idda didsn yasuɛ s‑yan‑udġar lli‑mi‑ttinin ‹gatsimani›, yini i‑imḥḍarn‑ns: «gawrat ġid. rad‑ftuġ yan imikk ad‑ẓẓallġ.»

³⁷ yawi dids bṭrus d‑sin tarwa n‑zabdi. iġuwḍ yasuɛ ġ‑tasaɛt‑an, mmaġn iswingimn bahra ġ‑uwl‑ns.

³⁸ yini‑asn: «tẓẓay flla taġuft‑ad ar lmut. gawrat ġid tawzm didi.»

³⁹ izayd iftu yan imikk iḍr f‑uwdm‑ns s‑wakal iẓẓall yini: «wa‑baba, ssitti flla lkas‑ad n‑urfufn iġ‑iẓḍar a‑yitti. walaynni a‑yili ma‑trit, urd mad‑riġ nkki.»

⁴⁰ iwrri s‑dar imḥḍarn yaf‑tn‑in ṭṭasn. isawl s‑bṭrus yini‑as: «is‑ur‑tẓḍarm a‑didi‑tawzm yat tasaɛt?

⁴¹ awzat tḍalbm rbbi a‑kʷn‑issanf i‑kullu ma‑ra‑kʷn‑ijllu. hati ul n‑bnadm ar‑ittiri a‑iskar afulki, imma ddat‑ns tḍɛf.»

⁴² iddu tis snat‑twal iẓẓall yini: «wa‑baba, iġ‑ur‑iẓḍar ad‑iyi‑yanf lkas‑ad bla‑t‑swiġ, a‑yili ma‑trit kiyi.»

⁴³ iwrri‑daġ yaf‑tn‑in ṭṭasn, inra‑tn iṭs.

⁴⁴ ifl‑tn iddu tis kraṭṭ‑twal iẓẓall yini ġmklli inna tiwaliw timzwura.

⁴⁵ iwrri ilmma s‑dar imḥḍarn‑ns yini‑asn: «ṭṭasat ġila tsunfum. hati tlkm‑d tasaɛt. inza yus n‑bnadm s‑gr ifassn n‑mddn ʷh̬šnnin.

⁴⁶ nkrat a‑nddu. ha‑walli‑yyi‑izznzan yuška‑d.»

ityamaẓ lmasiḥ

⁴⁷ sul a‑isawal s‑d‑iruḥ yahuda lli‑igan yan zġ‑sin d‑mraw n‑umḥḍar. munn‑d dids kigan d‑mddn asin‑d lkmami d‑iɛmad. uznn‑tn‑d inmġurn n‑tgmmi n‑rbbi d‑imġarn n‑tmazirt‑an.

⁴⁸ ġwalli izznzan yasuɛ imla‑yasn‑yad tamatart‑ad yini‑asn «wanna ssudnġ, ġwan a‑t‑igan. amẓat‑t.»

⁴⁹ yašk‑id yahuda iftu s‑dar yasuɛ yini‑as: «sslam ay‑amslmd,» issudn‑t.

⁵⁰ isawl yasuɛ yini‑as: «way‑amddakkʷl‑inu, izd mayad a‑f‑di‑tuškit s‑ġid?» lkmn‑t‑in wiyyaḍ, grn‑in ifassn fllas amẓn‑t.

⁵¹ inkr ilmma yan zġ‑willi llanin d‑yasuɛ ildi‑d lkummit‑ns, yut ah̬ddam n‑unmġur n‑tgmmi n‑rbbi ibbi‑as amẓẓuġ.

⁵² imma yasuɛ inna‑yas: «rar lkummit‑an s‑uġlaf‑ns. han kullu wanna yusin lkummit, s‑lkummit a‑s‑ra‑immt.

⁵³ is‑ur‑tssinm is‑ẓḍarġ ad‑ḍalbġ baba rbbi, yazn‑iyi‑d uggʷar n‑sin d‑mraw n‑ukabar l‑lmalayka?

⁵⁴ walaynni iġ‑skrġ mayan, mamnk a‑rad‑afun‑warratn n‑rbbi lli‑mlanin is‑d‑iqqan a‑ijru kullu mayad?»

⁵⁵ isawl yasuɛ ġakudan s‑mddn‑an ggutnin yini‑asn: «ma‑s‑di‑tffuġm s‑lkmami d‑iɛmad a‑yyi‑tġwim zund iġ‑giġ amh̬h̬ar? gawrġ‑n‑bdda ġ‑tgmmi n‑rbbi kraygatt ass ar‑sslmadġ, ur‑iyi‑tumẓm ġ‑uwssan‑an.

⁵⁶ walaynni ijra kullu mayad baš a‑yafu ma‑ityaran ġ‑warratn l‑lanbiya.» ġakudan rwln kullu imḥḍarn‑ns fln‑t.

ibidd lmasiḥ ġ‑lmḥkama

⁵⁷ ġwilli umẓnin yasuɛ iwin‑t s‑dar qayafa anmġur n‑tgmmi n‑rbbi, munn‑d imslmdn n‑ššrɛ d‑imġarn n‑tmazirt kullutn.

⁵⁸ iḍfur‑t bṭrus zġ‑tuggugt ar ammas n‑tgmmi n‑unmġur, ikšm ula ntta iskiws d‑imh̬zniyn a‑iẓr ma‑ra‑ijru.

⁵⁹ imma inmġurn n‑tgmmi n‑rbbi d‑imġarn l‑lmḥkama kullutn ar‑siggiln s‑kra n‑tugga n‑tkrkas f‑yasuɛ ma‑f‑a‑t‑nqqan.

⁶⁰ nkrn kigan d‑mddn ar‑fllas‑sskirkisn, walaynni ur‑gisn‑ufin kra n‑tugga izgan. ġ‑isiggʷra nkrn sin inagan

⁶¹ inin: «argaz‑ad nsfld‑as inna ‹nkki ẓḍarġ ad‑h̬luġ tigmmi n‑rbbi bnuġ‑tt‑daġ ġ‑kraḍ‑uwssan.›»

⁶² ibidd‑unmġur n‑tgmmi n‑rbbi isqsa yasuɛ: «is‑ur‑ra‑d‑fllasn‑trart s‑yat? mayd‑fllak‑ttinin ġwid ġ‑tugga‑nsn?»

⁶³ imma yasuɛ ġir ifssa. isawl‑daġ‑unmġur yini‑as: «giġ‑n srk rbbi lli‑iddrn. ini‑aġ, izd kiyi a‑igan lmasiḥ yus n‑rbbi?»

⁶⁴ irar‑as yasuɛ: «kiyi a‑t‑innan. walaynni rad‑awn‑iniġ, yan imikk ra‑tẓrm yus n‑bnadm iskiws f‑ufasi n‑rbbi itjhhdn, iftu‑d ġ‑gr imdla n‑ignwan.»

⁶⁵ lliġ isfld‑unmġur n‑tgmmi n‑rbbi i‑mayad, ibbi timlsa‑ns yini‑asn: «lkufr ayad. ma‑sul‑nra inagan? kunni tsfldm ġilad i‑wawal‑ns l‑lkufr.

⁶⁶ ma‑fllas‑tnnam?» rarn‑as: «iqqan‑t‑id a‑immt.»

⁶⁷ ssufsn ġ‑uwdm‑ns ar‑t‑kkatn. kra yut‑t s‑ibariqn

⁶⁸ ar‑as‑ttinin: «wa‑kiyi‑ad igan lmasiḥ, iġ‑tgit nnabi ml‑aġ manwa‑k‑yutn.»

bṭrus inakr lmasiḥ

⁶⁹ imma bṭrus sul igawr ġ‑brra ġ‑wammas n‑tgmmi. tašk‑id yat‑th̬ddamt tini‑as: «ula kiyi tllit d‑yasuɛ gu‑jalil.»

⁷⁰ irar‑as ntta ġ‑lgddam n‑willi‑d‑illa: «ur‑ssinġ ma‑s‑tnnit.»

⁷¹ iffuġ s‑uġgʷmmi. tẓr‑t yat‑th̬ddamt yaḍni, tini i‑willi biddnin ġin: «ġwad illa d‑yasuɛ gu‑naṣira.»

⁷² irar‑daġ bṭrus s‑tgallit: «ur‑ssinġ argaz‑an.»

⁷³ yan imikk s‑as‑nnan ġwilli biddnin ġin: «s‑ṣṣaḥt tgit kiyi zġ‑gisn, ašku ar‑tsawalt ġmklli sawaln ayt‑jalil.»

⁷⁴ inkr bṭrus ar‑itgalla ar‑ittini s‑jjhd: «nkki ur‑ssinġ argaz‑an f‑a‑tsawalm.» iġr‑ufullus ġakudan.

⁷⁵ ikti‑d bṭrus maylli‑s‑as‑inna yasuɛ: «ur‑ra‑iġr‑ufullus ard tinit kraṭṭ‑twal ur‑iyi‑tssint.» iffuġ ar‑yalla bahra.