matta 24 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

maylli ra‑ijru i‑tgmmi n‑rbbi

¹ iffuġ yasuɛ zġ‑tgmmi n‑rbbi iftu. munn dids imḥḍarn‑ns, mln‑as iġurban mqqurnin n‑tgmmi n‑rbbi.

² imma ntta inna‑yasn: «kullu mayd ttmnadm, lḥqq a‑rad‑awn‑iniġ, rad‑kullu‑ityawgar s‑wakal. ur‑ra‑gis‑iqama‑uẓru f‑uẓru.»

maylli‑s‑ra‑tggʷru i‑ddunit‑ad

³ lliġ iskiws yasuɛ ġ‑uwrir n‑zzitun aškin‑d dars imḥḍarn‑ns waḥdutn sqsan‑t: «ini‑aġ managu a‑ra‑yili ġayd‑s‑tnnit? ma‑ra‑ig tamatart n‑is‑d‑yakmur‑wass lli‑ġ‑ra‑di‑twrrit kiyi ula isiggʷra n‑ddunit?»

⁴ isawl yasuɛ yini‑asn: «awiyat‑stt ġ‑ih̬f‑nnun a‑kʷn‑ur‑ijlu yan.

⁵ ašku ggutn ġwilli ra‑d‑yašk asin‑d ism‑inu, kud yan ar‑ittini izd nttan a‑igan lmasiḥ. ntni rad‑jllun mddn ggutnin.

⁶ ra‑tsfldm f‑imaġn ula lh̬barat n‑imaġn. rarat lɛaql a‑ur‑tġuwḍm, ašku iqqan‑d a‑yili ġayan, walaynni ur‑ta‑d‑iruḥ isiggʷra.

⁷ ra‑di‑tnkr‑tqbilt s‑tqbilt tnkr‑d‑tgldit s‑tgldit, yili‑uġni ilint zznzalat ġ‑kra n‑tmizar.

⁸ walaynni kullu ġayan iga ġir azbbar amzwaru n‑tlalit.

⁹ «ġakudan ra‑kʷn‑dḥayn s‑lmḥkamat ar‑kʷn‑ssrfufunn nġn‑kʷn. ra‑kʷn‑tkrhun ġ‑kullu timizar n‑ddunit f‑ssibt n‑ma‑tgam winu.

¹⁰ iggut gigun ma‑ra‑tut‑tbayḍḍrt iḍr ġ‑uwssan‑an. ra‑n‑idḥay kra kra, ar‑itkrhu kra kra.

¹¹ ggutn id‑bu‑tkrkas lli‑ra‑d‑yašk ar‑ttinin is‑gan lanbiya, ar‑jllun kigan d‑mddn.

¹² rad‑bahra‑ttigat lh̬ʷšant ard idrusn ġwilli dar tqama lḥnant ġ‑uwl‑nsn.

¹³ imma wanna ibiddn izga ar isiggʷra ra‑injm.

¹⁴ ra‑ttbrraḥm ġ‑kullu ddunit s‑lh̬bar ifulkin n‑tgldit n‑ignna ard lkmnt tugga‑nnun kraygatt tamazirt. ġakudan a‑ra‑d‑iruḥ isiggʷra.

rad‑ilin‑uwssan šqanin

¹⁵ «ra‑tẓrm tajlh̬it lli‑ifnnun tnkr ġ‑udġar amẓlay n‑rbbi, ġmklli inna nnabi danyal ġayd izrin. wanna yaqran, illa fllas a‑yissan lmɛna.

¹⁶ ġakudan winna llanin ġ‑tmazirt n‑yudaya, iqqan‑tn‑d ad‑rwln s‑idrarn.

¹⁷ wanna illan ġ‑iggi n‑tgmmi, iqqan‑t‑id a‑ur‑ikšm a‑d‑yasi kra.

¹⁸ wanna‑n‑illan ġ‑igran, iqqan‑t‑id a‑ur‑iwrri tiġurdin a‑d‑yawi timlsit‑ns.

¹⁹ rad‑bahra‑šqun‑uwssan‑an f‑tilli gisn rbbunin ula tilli gisn ssngaynin.

²⁰ ḍalbat i‑rbbi a‑ur‑awn‑di‑tašk‑trula‑yan ġ‑tgrst ula ġ‑wass n‑usunfu.

²¹ ašku ra‑tili‑tnukmut ġ‑uwssan‑an, ur‑jju‑tlli zund nttat zġ‑isizwar n‑ddunit sul s‑ġilad, ula rad‑daġ‑tili zund nttat.

²² mrad is‑ur‑issidrus rbbi ussan‑an ur‑ra‑injm yan. walaynni f‑ssibt n‑mddn‑ns lli‑iẓli, hati issidrus ussan‑an f‑ssibt‑nsn.

²³ «ġakudan iġ‑awn‑inna kra n‑yan ‹ha‑lmasiḥ illa ġid› nġd ‹hatin illa ġin› a‑t‑ur‑tamnm.

²⁴ ašku rad‑d‑nkrn kra n‑mddn, kud yan ar‑ittini f‑ih̬f‑ns izd lmasiḥ a‑iga nġd kra n‑nnabi, walaynni ar‑sskirkisn. rad‑skarn timitar mqqurnin d‑lmɛjizat iġ‑ufan ad‑jllun ula ġwilli ganin win rbbi.

²⁵ hati nniġ‑awn‑t ur‑ta‑ijri.

²⁶ ġakudan iġ‑awn‑nnan ‹hatin ġ‑lh̬la› a‑ur‑tffuġm s‑ġin. iġ‑awn‑nnan ‹hati ġ‑ugʷns n‑tgmmi› a‑tn‑ur‑tamnm.

²⁷ ašku ġmklli kkatn‑uwsmann ġ‑ššrq ar‑n‑ttisfiwn i‑lġrb, ġmkan a‑rad‑d‑aškġ nkki lli‑igan yus n‑bnadm.

²⁸ innaġ illa miḍrus, a‑ġ‑a‑n‑tmunun igadrn.

ġmkad a‑ra‑d‑iwrri lmasiḥ

²⁹ «ġakudan tigira n‑tnukmut n‑uwssan‑an, ra‑tllas tafukt, ur‑ra‑ifaw‑wayyur. rad‑ḍrn itran zġ‑ignwan, tyattaynt tifawin n‑ignwan.

³⁰ ġakudan a‑ra‑di‑tban‑tmatart n‑yus n‑bnadm ġ‑ignwan, ar‑allan kullu imzdġn n‑ddunit, ẓrn‑iyi ftiġ‑d ġ‑gr imdla n‑ignwan s‑lquwwa d‑lmjd iggutn.

³¹ ra‑ittut nnffar itjhhdn, aznġ lmalayka‑nu ad‑ssmunn ġwilli ganin winu zġ‑kraygatt tasga, zġ‑ttmi n‑ddunit ar ttmi yaḍni.

managu a‑ra‑yili mayad?

³² «hati tazart a‑zġ‑ra‑tissanm lmɛna. iġ‑lggʷiġnt‑tṣṭṭwin‑ns tssufġ‑d tifrawin‑ns tissanm is‑d‑yakmur ṣṣif.

³³ ġmkan a‑ra‑yili. iġ‑tẓram kullu timitar‑ad s‑awn‑nniġ, tissanm is‑d‑yakmur, hatin ġ‑imi.

³⁴ lḥqq a‑rad‑awn‑iniġ, ur‑ra‑tzri tasut‑ad ard kullu ijru mayad.

³⁵ rad‑ittin ignwan d‑wakal, walaynni ur‑sar‑ittin iwaliwn‑inu.

³⁶ walaynni ass‑an ula tasaɛt‑an, ur‑tn‑issin yan, la lmalayka n‑ignna ula yus n‑bnadm. ġir baba lli‑illan ġ‑ignna, nttan waḥdut a‑issnn.

³⁷ «zund ġaylli illan ġ‑uwssan n‑nuḥ a‑ra‑yili ġ‑uwssan‑an ġ‑rad‑d‑aškġ nkki lli‑igan yus n‑bnadm.

³⁸ ġ‑uwssan n‑nuḥ, ur‑ta‑d‑ġlin‑waman f‑ddunit, ar‑šttan ar‑ssan ar‑ttahaln ar‑ttahalnt, ar ass lli‑ġ‑ikšm nuḥ s‑wanaw.

³⁹ mddn‑an ur‑tt‑gis‑iwin aylliġ ġlin‑waman tyawhlakn kullutn. ġmkan a‑ra‑ijru ġ‑wass‑an ġ‑rad‑d‑aškġ nkki lli‑igan yus n‑bnadm.

⁴⁰ ġakudan rad‑ilin sin irgazn ġ‑igr, ra‑yitti yan iqama yan.

⁴¹ rad‑ilint snat‑tmġarin ar‑ẓẓaḍnt s‑uzrg, ra‑titti yat tqama yat.

⁴² ḍufat ašku ur‑tssinm man ass a‑ra‑d‑yašk siditun.

⁴³ rad‑awn‑iniġ, mrad is‑issn bu‑tgmmi man tasaɛt ġ‑iyḍ a‑ra‑d‑yašk‑umh̬h̬ar, rad‑bahra‑iḍuf. ur‑ra‑t‑yadj a‑inqb tigmmi‑ns.

⁴⁴ ula kunni illa fllawn a‑bdda‑tujadm, ašku ra‑d‑yašk yus n‑bnadm ġ‑kra n‑tasaɛt lli‑ur‑tġalm.

ah̬ddam ifulkin

⁴⁵ «manwa igan ah̬ddam ifulkin bab‑lɛaql? nttan a‑mi‑ra‑ifl sidis tigmmi ġ‑ddu‑ufus‑ns, baš a‑yakka i‑ih̬ddamn yaḍni ad‑šttan kraygatt yan ġ‑tasaɛt‑ns.

⁴⁶ ambarki a‑iga‑uh̬ddam nna‑mi‑d‑iwrri sidis yaf‑t‑id ar‑iskar mayan.

⁴⁷ lḥqq a‑rad‑awn‑iniġ, rad‑as‑ifl sidis ayda‑ns kullut ġ‑ddu‑ufus‑ns.

⁴⁸ walaynni iġ‑yʷh̬šn‑uh̬ddam‑an yini d‑ih̬f‑ns ‹imaṭl‑n sidi›

⁴⁹ ar‑ikkat ih̬ddamn yaḍni ar‑ištta ar‑issa d‑willi ssnufulnin ih̬fawn‑nsn s‑tissi,

⁵⁰ han ra‑d‑iwrri sidis ġ‑yan‑wass lli‑f‑ur‑iskir ula yat tasaɛt lli‑ur‑iġal.

⁵¹ ġakudan ra‑t‑ibri sidis, ig‑t‑in d‑ayt‑sin‑uwdmawn ġ‑illiġ allan ar‑tgẓaẓn uh̬san‑nsn.»