matta 22 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

lmɛna n‑ayt‑tmġra

¹ isawl‑daġ yasuɛ s‑lmɛni yini‑asn:

² «tagldit n‑ignna tga zund yan‑ugllid iskr tamġra i‑yus.

³ yazn ih̬ddamn‑ns ad‑d‑ġrn i‑willi tyawɛraḍnin, imma ntni ur‑rin ad‑d‑aškin s‑tmġra.

⁴ yazn ilmma kra n‑ih̬ddamn yaḍni yuṣṣa‑tn ad‑inin i‑willi tyawɛraḍnin ‹ha‑tirmt tujad, ġrsġ i‑imugayn ula i‑igayzn ḍninin. yujad kullu, aškad‑d s‑tmġra.›

⁵ imma ntni rẓmn i‑ih̬f‑nsn ur‑d‑uškin, iddu kra s‑igran‑ns, iddu kra s‑twuri‑ns,

⁶ nkrn wiyyaḍ amẓn ih̬ddamn‑an ssrfufnn‑tn nġn‑tn.

⁷ ṭiyyr‑as i‑ugllid bahra, yazn imh̬zniyn‑ns hlkn imnġan‑an, jdrn tamdint‑nsn.

⁸ yini ilmma i‑ih̬ddamn‑ns ‹tamġra tujad, walaynni ur‑tt‑sthllan ġwilli mi ɛrḍġ.

⁹ zaydat ġilad s‑iswak, tɛrḍm i‑kullu wanna‑n‑tufam, tawim‑tn‑d s‑tmġra.›

¹⁰ ġakudan ffuġn ih̬ddamn s‑tswak ssmunn‑d kullu ma‑n‑ufan, gn‑iyt wid ʷh̬šnnin ula wid šwanin, aylliġ tɛmmr‑tgmmi n‑tmġra s‑inbgiwn.

¹¹ ikka ma‑ikka, ikšm‑ugllid a‑issmaqql ayt‑tmġra, s‑n‑iẓra yan‑urgaz ġ‑gratsn ur‑ilsi timlsit n‑tmġra.

¹² isqsa‑t‑ugllid: ‹wa‑gu‑darnnġ, mamnk a‑di‑tkšmt s‑ġid bla timlsit n‑tmġra?› imma ntta ġir ifssa.

¹³ yini‑ugllid i‑ih̬ddamn‑ns ‹krfat‑t zġ‑ifassn ula iḍarn, tluḥm‑t‑in ġ‑tillas aggugnin. ġin a‑ġ‑rad‑allan ar‑tgẓaẓn uh̬san‑nsn.›

¹⁴ han iggut ma‑mi‑iɛrḍ rbbi, yidrus ma‑iẓli ad‑gn wins.»

asqsi f‑ḍabiyt i‑qayṣr

¹⁵ ddun ilmma ifarisin ar‑tmšawarn i‑ngratsn f‑mamnk a‑rad‑ssmuttln yasuɛ f‑wawal‑ns.

¹⁶ aznn‑d dars kra n‑mddn‑nsn d‑kra n‑imddukkʷal n‑ugllid hirudus inin‑as: «way‑amslmd, nssn izd lḥqq ayd ttinit, ar‑tsslmadt aġaras n‑rbbi ġmklli iga. ur‑a‑tskart f‑mad‑swingimn mddn, ašku ur‑a‑ttmnadt udmawn n‑mddn.

¹⁷ imma ġilad ma‑ra‑tinit? is‑iḥlla a‑nakka ḍabiyt i‑qayṣr nġd uhu?»

¹⁸ imma yasuɛ issn tanuwwašt lli‑gisn‑illan, yini‑asn: «wa‑id‑bu‑sin‑uwdmawn, mah̬ a‑yyi‑ttarmm?

¹⁹ mlat‑iyi‑d yan‑uqarid n‑ḍabiyt.» fkn‑as‑d yan‑uqarid.

²⁰ yini‑asn: «win‑mit a‑iga‑uwdm‑ad d‑ism‑ad gis illan?»

²¹ inin‑as: «win qayṣr.» irar‑asn yasuɛ: «fkat i‑qayṣr ma‑igan win qayṣr, tfkm i‑rbbi ma‑igan win rbbi.»

²² lliġ sfldn i‑mayad ar‑gis‑tɛjjabn, ddun fln‑t.

asqsi f‑tnkra zġ‑lmut

²³ aškin‑d dars ġassan kra n‑iṣadduqin. ntni ġ‑lmdhb‑nsn ar‑ttinin «ur‑illi ma‑ra‑d‑inkr zġ‑lmut.» sqsan‑t:

²⁴ «way‑amslmd, inna musa ‹iġ‑immut kra n‑yan ifl‑d tamġart‑ns bla tarwa, illa f‑gʷmas n‑urgaz‑an a‑stt‑itahl a‑dids‑iskr tarwa f‑ism n‑gʷmas lli‑immutn.›

²⁵ llan darnnġ ssa n‑aytmatn. yiwi‑umzwaru tamġart immt bla tarwa, ifl tamġart‑ns i‑gʷmas.

²⁶ immt wis sin bla tarwa ula ntta d‑wis kraḍ, aylliġ‑tt‑iwin kullutn s‑ssa ur‑d‑filn tarwa.

²⁷ ġ‑isiggʷra tmmt‑tmġart.

²⁸ ini‑aġ ġilad, ġ‑tnkra lli‑ġ‑rad‑nkrn kullutn, tamġart n‑manwa ġ‑ssa‑yad a‑ra‑tg? hatti tkka‑ttin tga tamġart‑nsn kullutn.»

²⁹ isawl yasuɛ yini‑asn: «ġayad a‑f‑tjlam, ašku ur‑tssinm arratn n‑rbbi ula tssnm taẓḍḍart n‑rbbi.

³⁰ ġakud lliġ rad‑nkrn ur‑ra‑tahaln ula‑da‑tahalnt, walaynni zund lmalayka n‑ignna a‑rad‑gn.

³¹ imma tankra n‑willi mmutnin, is‑ur‑tġrim ma‑fllas‑inna rbbi?

³² inna ‹nkki giġ rbbi n‑ibrahim, gġ rbbi n‑isḥaq, gġ rbbi n‑yaɛqub.› awal‑an imla‑yaġ is‑ddrn ntni ġ‑lgddam n‑rbbi, wah̬h̬a mmutn.»

³³ lliġ sfldn mddn‑an ggutnin i‑mayd inna yasuɛ, tɛjjbn ġ‑ulmmud‑ns.

ma‑igan luṣit ihiyyan?

³⁴ munn‑d fllas ifarisin lliġ sfldn f‑mamnk a‑issfssa iṣadduqin.

³⁵ inkr yan‑umslmd n‑ššrɛ zġ‑gisn, yiri a‑yarm yasuɛ ġ‑wawal‑ns. isqsa‑t:

³⁶ «way‑amslmd, mal‑luṣit a‑kullu‑ihiyyan ġ‑ššrɛ n‑rbbi?»

³⁷ isawl yasuɛ yini‑as: «‹a‑ttirit rbbi sidik zġ‑ttmi n‑ih̬f‑nnk d‑ttmi n‑uwl‑nnk d‑ttmi l‑lɛaql‑nnk.›

³⁸ h̬tad a‑igan luṣit imqqurn ihiyyan.

³⁹ trwas‑tt tis snat, ‹a‑ttirit adjar‑nnk zund ih̬f‑nnk.›

⁴⁰ snat luṣiyat‑ad a‑igan llsas n‑kullu ma‑illan ġ‑ššrɛ d‑warratn l‑lanbiya.»

asqsi f‑ma‑iga lmasiḥ

⁴¹ ġakudan sul dars qaman ifarisin, isqsa‑tn yasuɛ:

⁴² «ma‑ttinim kunni f‑walli igan lmasiḥ? tasut n‑mi a‑zġ‑ra‑ig?» inin‑as: «zġ‑tasut n‑ugllid dawd.»

⁴³ irar‑asn yasuɛ: «imma dawd, lliġ‑t‑iguwwd rruḥ lqudus a‑isawl f‑lmasiḥ, ig‑t d‑sidis

⁴⁴ inna ‹ha‑sidi rbbi inna i‑sidi, skiws f‑ufasiy‑inu ard gġ inuwwašn‑nnk ġ‑ddu iḍarn‑nnk.›

⁴⁵ ha‑dawd s‑ih̬f‑ns ibdr ġwalli igan lmasiḥ, ig‑t d‑sidis. mamnk a‑ra‑ig ġir yan zġ‑tasut‑ns?»

⁴⁶ ur‑iẓḍar yan ad‑as‑d‑irar awal. zġ‑ġassan ur‑sul‑izɛm yan a‑t‑isqsa.