matta 21 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

ikšm lmasiḥ s‑urušalim

¹ akmurn‑in s‑tmdint n‑urušalim. lliġ lkmn awrir n‑zzitun ġ‑tsga n‑bitfaji, yazn yasuɛ sin zġ‑imḥḍarn‑ns

² yini‑asn: «zaydat s‑uduwwar‑an l‑lgddam‑nnun. ra‑n‑tafm yat‑tġiyyult tqqn nttat d‑usnus‑ns. fsiyat‑asn tawim‑tn‑d s‑dari.

³ iġ‑kʷn‑isqsa kra n‑yan, tinim‑as ‹ira‑tn siditnnġ,› ra‑kʷn‑yadj a‑tn‑di‑tawim.»

⁴ ijra kullu mayad baš a‑yafu ma‑inna rbbi f‑ils n‑nnabi ġayd izrin inna:

⁵ «iniyat i‑tmdint n‑ayt‑rbbi, hay‑agllid‑nnm yuška‑d srm. yudr i‑ih̬f‑ns, ini f‑uġiyyul ula f‑usnus n‑tġiyyult.»

⁶ ddun imḥḍarn skrn ġmklli‑s‑asn‑inna yasuɛ.

⁷ awin‑d taġiyyult d‑usnus, grn‑in fllasn islhamn‑nsn, ini fllasn yasuɛ.

⁸ munn‑d mddn ggutnin, ar‑sswan islhamn‑nsn ġ‑uġaras. kra gisn ar‑d‑itbbi tiṣṭṭwin zġ‑isġarn, ar‑tnt‑sswan ġ‑uġaras.

⁹ frḥn bahra ġwilli zwarnin i‑yasuɛ ġ‑uġaras ula ġwilli‑as‑ggʷranin, ar‑talln awal‑nsn ar‑ttinin: «huṣanna i‑yus n‑dawd. ambarki a‑iga ġwad‑d‑yuškan s‑ism n‑sidi rbbi. huṣanna ġ‑ignna yattuyn.»

¹⁰ lliġ‑n‑ilkm yasuɛ urušalim, tqrbl‑tmdint kullutt. ar‑ssmqsan mddn i‑ngratsn: «ma‑iga ġwad?»

¹¹ sawln‑d kullu willi dids munnin ar‑ttinin: «ġwad iga nnabi yasuɛ gu‑naṣira ġ‑jalil.»

lmasiḥ ar‑iṭṭay imznzn zġ‑tgmmi n‑rbbi

¹² ikšm yasuɛ s‑tgmmi n‑rbbi, inkr ar‑zgis‑iṭṭay ġwilli gis zznzanin ar‑gis‑saġn. igllb lmyadi n‑willi tṣrrafnin iqaridn, igllb lkʷrasa n‑willi zznzanin itbirn.

¹³ yini‑asn: «han ityara ġ‑warra n‑rbbi ‹tigmmi‑nu rad‑as‑ttinim tigmmi n‑tẓallit.› imma kunni, hati trurm‑tt tga ifri n‑imh̬h̬arn.»

¹⁴ aškin‑d dars ibukaḍn d‑ikušamn ġ‑tgmmi n‑rbbi, ijjujji‑tn.

¹⁵ imma inmġurn n‑tgmmi n‑rbbi d‑imslmdn n‑ššrɛ, ṭiyyr‑asn bahra lliġ ẓran lmɛjizat lli‑iskr, ẓrn tarwa mẓẓinin ar‑talln awal‑nsn ġ‑tgmmi n‑rbbi ar‑ttinin: «huṣanna i‑yus n‑dawd.»

¹⁶ sawln ilmma s‑yasuɛ inin‑as: «is‑ur‑tsfldt i‑mayd ttinin mddn‑ad?» irar‑asn yasuɛ: «sfldġ‑asn. imma kunni is‑ur‑tġrim arra n‑rbbi lli‑innan ‹tfkit i‑iḥšmay d‑wazzann a‑ki‑talġn s‑nniyt d‑lḥqq›?»

¹⁷ ifl‑tn ġakudan iffuġ tamdint, iddu s‑uduwwar n‑bitɛanya ins ġin.

tazart lli‑ur‑iskirn lġllt

¹⁸ zikk ṣbaḥ iwrri‑d yasuɛ s‑tmdint, yaġ‑t laẓ.

¹⁹ iẓr‑n yat tazart ġ‑tama n‑uġaras, iftu srs walaynni ur‑n‑gis‑yufi ġir ifrawn. yini‑as: «zayd a‑ur‑sar‑gim‑tili lġllt.» tiqar tazart ġakudan.

²⁰ lliġ ẓran imḥḍarn‑ns mayan, iḍr‑asn lɛjb inin: «mamnk a‑s‑tqqur tazart‑ad ḥayna?»

²¹ isawl yasuɛ yini‑asn: «lḥqq a‑rad‑awn‑iniġ, iġ‑tumnm bla tškkam ra‑tskrm zund mad‑skrġ i‑tazart‑ad, rad‑nnit‑tskarm uggʷar n‑mayad. iġ‑tnnam i‑uwrir‑ad ‹itti zġ‑ġid tḍrt‑n ġ‑umda› rad‑as‑yili mad‑as‑tnnam.

²² ġakud nna‑ttẓallam rad‑awn‑yili kullu ma‑tḍalbm iġ‑nnit‑tumnm.»

asqsi f‑ma‑d‑yuznn lmasiḥ

²³ ikšm‑daġ yasuɛ s‑tgmmi n‑rbbi ar‑gis‑isslmad. aškin‑d inmġurn d‑imġarn n‑tmazirt‑an sqsan‑t: «ma‑k‑id‑yuznn a‑tskart kullu ġayad? awal n‑mi ayd‑s‑a‑ti‑tskart?»

²⁴ isawl yasuɛ yini‑asn: «ula nkki ra‑kʷn‑sqsaġ yan‑usqsi. rarat‑iyi‑d iniġ‑awn ma‑yyi‑d‑yuznn ad‑skarġ mayad.

²⁵ yuḥanna, ma‑t‑id‑yuznn a‑issddam mddn? izd rbbi nġd bnadm?» bdun ntni ar‑ssmqsan i‑ngratsn ar‑ttinin: «iġ‑nenna ‹rbbi a‑t‑id‑yuznn› rad‑aġ‑yini ‹mah̬ aylliġ ur‑tuminm mad‑awn‑inna?›

²⁶ walaynni iġ‑nenna ‹bnadm a‑t‑id‑yuznn› ra‑niksaḍ zġ‑mddn‑an ggutnin, ašku ar‑kullu‑ttinin izd yuḥanna yan‑nnabi a‑iga.»

²⁷ sawln ilmma inin‑as: «ur‑nssin ma‑t‑id‑yuznn.» irar‑asn yasuɛ: «ula nkki ur‑rad‑awn‑iniġ ma‑yyi‑d‑yuznn ad‑skarġ kullu mayad.»

lmɛna n‑urgaz d‑sin tarwa‑ns

²⁸ izayd yini‑asn: «ma‑ra‑tinim? ha‑yan‑urgaz, dars sin tarwa. iftu dar‑umzwaru yini‑as: ‹zayd a‑iwi, th̬dmt ġassad ġ‑igr n‑waḍil.›

²⁹ imma ntta irur‑as: ‹ur‑riġ.› ik imikk tʷgraẓ‑t f‑wawal‑an iddu ih̬dm.

³⁰ iftu‑urgaz ilmma dar wis sin tarwa‑ns, yini‑as ġmklli inna i‑umzwaru. irar‑as yus‑lli wis sin: ‹ha‑yyi ddiġ a‑sidi,› walaynni ur‑iddi.»

³¹ isqsa‑tn yasuɛ: «manwa ġ‑sin‑ad a‑iskrn ma‑ira babas?» inin‑as: «amzwaru.» irar‑asn yasuɛ: «lḥqq a‑rad‑awn‑iniġ, ar‑kʷn‑zggurunt‑tmgganin d‑ayt‑nkkas s‑tgldit n‑rbbi.

³² yuška‑d darun yuḥanna iml‑awn aġaras n‑ufulki, ur‑ti‑tuminm. imma ayt‑nkkas d‑tmgganin, ntni umnn yuḥanna. tẓrm‑tn ar‑ti‑tamnn, sul ur‑trim a‑ti‑tamnm kunni twrrim‑d s‑uġaras.»

lmɛna n‑ih̬ʷmmaṣn d‑igr n‑waḍil

³³ yini‑asn yasuɛ: «sfldat i‑yat lmɛna yaḍni. ha‑yan‑urgaz iẓẓa aḍil ġ‑igr‑ns, isslulli‑as ifrig iġza agʷḍi i‑lmɛṣṣrt ibnu yal‑lbrj, ifl‑t i‑ih̬ʷmmaṣn iftu imuddu.

³⁴ lliġ‑d‑iruḥ‑uzmz l‑lġllt, yazn kra n‑ih̬ddamn‑ns s‑dar ih̬ʷmmaṣn ad‑as‑d‑awin ma‑t‑id‑yuškan ġ‑lġllt.

³⁵ walaynni ih̬ʷmmaṣn ġwin ih̬ddamn‑an, ssġuršn yan gisn, nġn yan, utn yan s‑iẓran.

³⁶ yazn‑asn ilmma kra n‑ih̬ddamn yaḍni uggʷar n‑willi zwarnin, skrn‑asn ula ntni ġmklli skrn i‑imzwura.

³⁷ ġ‑isiggʷra yazn‑asn yus, yini d‑ih̬f‑ns ‹rad‑uqqrn iwi.›

³⁸ walaynni ih̬ʷmmaṣn‑an, lliġ ẓran yus mšawarn i‑ngratsn inin ‹ġwad a‑ra‑iwrt igr. aškad‑d a‑t‑nnġ ig lwrt winnġ.›

³⁹ ġwin‑t luḥn‑t‑in s‑brra n‑igr nġn‑t.»

⁴⁰ isqsa‑tn yasuɛ: «ma‑ra‑iskr bab n‑igr i‑ih̬ʷmmaṣn‑an ġakud nna‑d‑iwrri.»

⁴¹ inin‑as: «ra‑ihlk mddn‑an ʷh̬šnnin s‑yat lmut yʷh̬šnn, ifk igr i‑ih̬ʷmmaṣn yaḍni lli‑rad‑as‑yakka lġllt ġ‑uzmz‑ns.»

⁴² irar‑asn yasuɛ: «is‑ur‑tġrim ma‑ityaran ġ‑warra n‑rbbi? ‹aẓru lli‑n‑luḥn ibnnayn, nttan a‑iwrrin iga ih̬f n‑uġẓu. mayad, sidi rbbi a‑t‑iskrn. nẓra‑t ar‑gis‑ntɛjjab.›

⁴³ f‑mayan a‑f‑rad‑awn‑iniġ, ra‑kʷn‑issufġ rbbi zġ‑tgldit‑ns, ifk‑tt i‑mddn yaḍni lli‑ra‑yakka lġllt‑ns.

⁴⁴ imma aẓru‑ad, wanna fllas iḍrn ra‑irẓ, d‑wanna‑f‑iḍr ra‑t‑ilbj d‑wakal.»

⁴⁵ lliġ sfldn inmġurn n‑tgmmi n‑rbbi d‑ifarisin i‑lmɛni‑ad, issann izd fllasn a‑f‑isawl yasuɛ.

⁴⁶ irin a‑t‑amẓn walaynni ksuḍn zġ‑mddn, ašku ar‑kullu‑ttinin izd yan‑nnabi a‑iga.