matta 20 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

lmɛna n‑ih̬ddamn ġ‑igr n‑waḍil

¹ «tagldit n‑ignna tga zund yan‑urgaz bab n‑igr, iffuġ zikk ṣbaḥ a‑d‑ikru ih̬ddamn i‑igr‑ns n‑waḍil.

² imšaška‑d d‑ih̬ddamn ad‑asn‑ifk yan‑uqarid i‑wass, yazn‑tn ilmma s‑igr‑ns.

³ iffuġ‑daġ ġ‑tasaɛt tis tẓa, iẓr wiyyaḍ biddn ġ‑tasuqt ur‑a‑skarn yat.

⁴ yini‑asn: ‹aškad‑d th̬dmm ula kunni ġ‑igr n‑waḍil, rad‑awn‑fkġ tiġrad nna‑yawn‑igan.› ddun ula ntni s‑igr.

⁵ iffuġ‑daġ ġ‑tasaɛt tis snat d‑mrawt, ula ġ‑tis kraṭṭ n‑tdggʷat, iskr‑daġ ġmkan.

⁶ ma‑d‑yad‑truḥ tasaɛt tis smmust n‑tdggʷat iddu‑daġ s‑tasuqt, iẓr kra n‑mddn sul biddn ġin. yini‑asn: ‹mah̬ aylliġ tbiddm ġid ass kullut ur‑a‑tskarm yat?›

⁷ inin‑as: ‹ur‑aġ‑yiwi yan.› yini‑asn: ‹wah̬h̬a, aškad‑d ula kunni th̬dmm ġ‑igr‑inu n‑waḍil.›

⁸ lliġ‑n‑tḍr tafukt isawl bab n‑igr s‑ungabal‑ns yini‑as: ‹ġr‑d i‑ih̬ddamn tfkt‑asn tiġrad‑nsn, tbdut zġ‑willi ggʷranin ġ‑twuri ard tlkmt ġwilli zwarnin.›

⁹ ġakudan uškan‑d dars imggura lli‑ur‑kšimnin ar tis smmust n‑tdggʷat, ifk i‑kraygatt yan gisn yan‑uqarid.

¹⁰ aškin‑d ilmma ġwilli zwarnin, ġaln is‑rad‑asn‑ifk uggʷar, walaynni ifka‑yasn yan‑uqarid i‑yan zund wiyyaḍ.

¹¹ bdun ar‑tngmugn f‑bab n‑igr

¹² inin‑as: ‹ġwid ggʷranin ur‑h̬dimn ġir yat tasaɛt, walaynni tfkit‑asn ġunšk lli‑aġ‑tfkit nkkʷni lli‑iklan ar‑nkkat tammara ass kullut ġ‑tafukt‑ad iḥrran.›

¹³ irar‑asn bab n‑igr, yini i‑yan gisn: ‹wa‑gʷma, ur‑ak‑ukʷiġ f‑yat. is‑urd yan‑uqarid a‑f‑d‑didi‑tmšaškat?

¹⁴ amẓ ma‑igan winnk tddut. ašku riġ ad‑fkġ i‑ġwad iggʷran zund kiyi.

¹⁵ is‑ur‑izri ad‑skarġ mad‑riġ s‑ma‑igan winu? is‑tusit tanuwwašt f‑ssibt n‑mad‑skrġ afulki?›»

¹⁶ yini‑asn yasuɛ: «ġmkad a‑s‑rad‑zwurn imggura, ggʷrun imzwura.»

isawl lmasiḥ tis kraṭṭ‑twal f‑lmut‑ns

¹⁷ imun yasuɛ d‑uġaras n‑tmdint n‑urušalim. yawi sin d‑mraw n‑umḥḍar‑ns waḥdutn, isawl srsn ġ‑uġaras yini‑asn:

¹⁸ «sfldat, ra‑nddu s‑urušalim. imma nkki lli‑igan yus n‑bnadm, ra‑yyi‑dḥin s‑gr ifassn n‑inmġurn n‑tgmmi n‑rbbi d‑imslmdn n‑ššrɛ. rad‑flla‑ḥkamn s‑lmut,

¹⁹ fkn‑iyi i‑ibrraniyn a‑gigi‑teṭnaẓn ssġuršn‑iyi agʷln‑iyi f‑uggjdi ard mmtġ. walaynni ġ‑wis kraḍ‑uwssan rad‑d‑nkrġ zġ‑lmut.»

innas n‑yaɛqub d‑yuḥanna tḍalb zġ‑lmasiḥ

²⁰ tašk‑id innas n‑tarwa n‑zabdi s‑dar yasuɛ, nttat d‑tarwa‑ns s‑sin. tknu s‑wakal ġ‑lgddam‑ns tḍalb‑t ad‑as‑ifk kra.

²¹ irar‑as: «ma‑trit ad‑am‑t‑fkġ?» tini‑as: «fk i‑sin tarwa‑yad‑inu ad‑skiwsn yan f‑ufasiy‑nnk d‑yan f‑uẓlmaḍ‑nnk ġakud lliġ ra‑tkšmt s‑tgldit‑nnk.»

²² isawl yasuɛ yini‑asn: «ur‑tssinm mayd tḍalbm. is‑tẓḍarm a‑tsum lkas n‑urfufn lli‑rad‑suġ nkki?» inin‑as: «nẓḍar‑as.»

²³ irar‑asn yasuɛ: «s‑ṣṣaḥt, lkas lli‑rad‑suġ nkki ra‑ti‑tsum kunni, walaynni askiws f‑ufasiy‑inu ula f‑uẓlmaḍ‑inu ur‑igi winu baš a‑t‑fkġ abla i‑willi‑mi‑t‑iskr baba rbbi.»

²⁴ lliġ sfldn mraw yaḍni i‑mayd nnan sin aytmatn‑an, bzgn fllasn.

²⁵ imma yasuɛ iġra‑yasn‑d kullutn yini‑asn: «tssnm igldan n‑ddunit‑ad ar‑tḥkamn f‑ayt‑tmizar‑nsn, tissanm inmġurn‑nsn ar‑tamrn mddn ad‑skarn s‑iwaliwn‑nsn.

²⁶ imma kunni a‑ur‑yili ġmkan ġ‑gratun. wanna iran a‑gigun‑yimġur, illa fllas a‑ig ah̬ddam‑nnun.

²⁷ d‑wanna gigun iran a‑izwur, illa fllas a‑ig ismg i‑wiyyaḍ.

²⁸ ula nkki lli‑igan yus n‑bnadm, ur‑d‑uškiġ ad‑flla‑th̬damn mddn. uškiġ‑d ad‑th̬damġ, fkġ tudrt‑inu ad‑fukkuġ ma‑iggutn.»

lmasiḥ ijjujji sin ibukaḍn

²⁹ zrin ilmma zġ‑tmdint n‑ariḥa, ḍfurn‑t mddn ggutn.

³⁰ ilin ġin sin ibukaḍn gawrn ġ‑tama n‑uġaras. lliġ sfldn izd yasuɛ ayd izrin, ar‑tġuwwatn ar‑ttinin: «wa‑yus n‑dawd, ḥnnu ginnġ.»

³¹ akʷin gisn mddn inin‑asn ad‑fssan. imma ntni zuydn ar‑tġuwwatn s‑uggʷar ar‑ttinin: «wa‑sidi, ḥnnu ginnġ a‑yus n‑dawd.»

³² ibidd yasuɛ iġr‑asn‑d s‑dars yini‑asn: «ma‑tram ad‑awn‑t‑skrġ?»

³³ inin‑as: «wa‑sidi, a‑nisfiw.»

³⁴ qaman ġ‑yasuɛ bahra. iggr i‑walln‑nsn, isfiwn ġakudan. nkrn ḍfurn‑t ġ‑uġaras.