matta 2 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

uškan‑d imajusin ad‑ẓrn lmasiḥ

¹ ilul yasuɛ ġ‑uwssan n‑ugllid hirudus ġ‑tmdint n‑bitlaḥm ġ‑tmazirt n‑yudaya. uškan‑d kra n‑imajusin zġ‑ššrq ġ‑uwssan‑an s‑tmdint n‑urušalim

² ar‑sqsan: «maniġ illa ġwalli‑d‑iluln a‑ig agllid n‑ayt‑yudaya? nẓra itri‑ns ġ‑ššrq, našk‑id ad‑as‑nsjd.»

³ lliġ isfld hirudus i‑mayd nnan, ṭiyyr‑as bahra ntta d‑kullu ayt‑urušalim.

⁴ issmun‑d inmġurn n‑tgmmi n‑rbbi d‑imslmdn n‑ššrɛ kullutn isqsa‑tn: «maniġ ra‑ilal lmasiḥ n‑rbbi?»

⁵ inin‑as: «ġ‑bitlaḥm ġ‑tmazirt n‑yudaya, ašku ġmkad a‑ityaran f‑ufus n‑nnabi inna:

⁶ ‹wa‑bitlaḥm ġ‑tmazirt n‑yudaya, urd kmmin a‑iggʷran ġ‑tmdinin n‑yudaya, ašku zġ‑gim a‑zġ‑ra‑d‑yašk‑unmġur lli‑ra‑iks mddn‑inu n‑ayt‑yaɛqub.›»

⁷ yazn hirudus ġakudan mad‑d‑itawin imajusin s‑dars s‑tntla. isqsa‑tn: «managu ad‑awn‑iban itri?»

⁸ yazn‑tn ilmma s‑bitlaḥm yini‑asn: «zaydat tsigglm s‑warraw‑an ġ‑kraygatt mani. ġakud nna‑ti‑tufam tawim‑iyi‑d lh̬bar baš ad‑dduġ ad‑as‑n‑sjdġ ula nkki.»

^9-10 lliġ sfldn ntni i‑mad‑asn‑inna‑ugllid, munn‑daġ d‑uġaras‑nsn. iban‑asn‑d‑daġ itri lli‑yadlli‑ẓran ġ‑ššrq, frḥn bahra s‑lfrḥ iggutn. izwur‑asn itri aylliġ ilkm iggi n‑illiġ illa‑uḥšmi, ibidd.

¹¹ kšmn ntni s‑tgmmi, s‑ẓran aḥšmi d‑innas maryam. ḍrn f‑ifaddn‑nsn, knun s‑wakal ġ‑lgddam‑ns. rẓmn itlsan‑nsn, fkn‑as tiwafkiw n‑uwrġ d‑lbh̬ur d‑tujjut l‑lmurr.

¹² iml‑asn rbbi ġakudan ġ‑twargit a‑ur‑wrrin s‑dar hirudus. amẓn ilmma aġaras yaḍni s‑tmazirt‑nsn.

tarula s‑miṣr

¹³ lliġ ddan ntni iban‑d yal‑lmalak n‑sidi rbbi i‑yusf ġ‑twargit yini‑as: «nkr tawit aḥšmi d‑innas trwlm s‑tmazirt n‑miṣr, tqamam‑n ġin ard‑ak‑iniġ a‑di‑twrrim, ašku hirudus ra‑isiggil s‑uḥšmi‑ad a‑t‑inġ.»

¹⁴ inkr yusf ġ‑iḍ‑an yawi aḥšmi d‑innas ftun s‑miṣr.

¹⁵ qaman ġin aylliġ immut hirudus. ġmkad a‑s‑yuwfa maylli inna sidi rbbi f‑ils n‑nnabi ġayd izrin: «zġ‑miṣr a‑zġ‑d‑ġriġ i‑iwi.»

hirudus inġa iḥšmay

¹⁶ imma hirudus, lliġ issn is‑t‑ġḍrn imajusin, nkrn‑d gis iriyn. yazn s‑bitlaḥm inġ kullu iḥšmin ġ‑tsgiw‑an zġ‑sin isggʷasn d‑ma‑ikkan ddawatsn, ašku issn zġ‑imajusin managu ad‑asn‑iban itri.

¹⁷ ġakudan a‑yuwfa ma‑inna nnabi irmiyya ġayd izrin:

¹⁸ «taġuyyit a‑mi‑n‑nsfld ġ‑tmdint n‑rama, ar‑ssġuyyun ar‑tnuwwaḥn. ar‑talla raḥil f‑tarwa‑ns, ur‑tẓḍar a‑tṣbr ašku ur‑sul‑llin.»

wrrin s‑naṣira

¹⁹ lliġ immut hirudus iban yal‑lmalak n‑sidi rbbi ġ‑twargit i‑yusf ġ‑miṣr yini‑as:

²⁰ «nkr tawit aḥšmi d‑innas twrrim s‑tmazirt n‑ayt‑rbbi. ašku ġwilli ranin ad‑nġn aḥšmi, hatnin mmutn.»

²¹ inkr ilmma yawi aḥšmi d‑innas s‑tmazirt n‑ayt‑rbbi.

²² walaynni lliġ isfld yusf is‑iwrri arh̬ilaws iġli s‑tgldit n‑babas hirudus ġ‑tsgiw n‑yudaya, yiksaḍ ur‑iẓḍar a‑iddu s‑ġin. iml‑as rbbi ġ‑twargit is‑t‑id‑iqqan a‑izri s‑tsgiw n‑jalil,

²³ iddu izdġ ġ‑tmdint n‑naṣira. ġmkad a‑s‑yuwfa maylli nnan lanbiya: «rad‑as‑ttinin i‑lmasiḥ ‹gu‑naṣira›.»