matta 19 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

isawl lmasiḥ f‑ṭṭlaq

¹ lliġ ikmml yasuɛ ma‑ittini i‑mddn‑an, iffuġ jalil iddu s‑tmazirt n‑yudaya s‑tsga yaḍni n‑wasif n‑urdun.

² ḍfurn‑t mddn ggutnin ar‑ġin‑ijjujji imuḍan.

³ aškin‑d kra n‑ifarisin irin a‑t‑armn, inin‑as: «is‑iḥlla a‑ifru‑urgaz i‑tmġart‑ns f‑ssibt nna‑dars‑illan?»

⁴ irar‑asn yasuɛ: «is‑ur‑tġrim f‑rbbi mamnk a‑ih̬lq bnadm ġ‑isizwar? iskr awtm d‑tawtmt,

⁵ yini fllasn ‹mayad a‑f‑ra‑ifl‑urgaz babas d‑innas imun d‑tmġart‑ns. hatnin sin rad‑wrrin gn yat ddat.›

⁶ ur‑sul‑gin sin walaynni yat ddat ad‑gan. f‑mayan a‑f‑rad‑awn‑iniġ, aynna issmun rbbi, a‑t‑ur‑ibḍu bnadm.»

⁷ sqsan‑t ilmma inin‑as: «iġ‑iga ġmkad, mah̬ aylliġ yuṣṣa musa f‑tbrat l‑lfra, a‑stt‑yara‑urgaz ifru i‑tmġart‑ns?»

⁸ irar‑asn yasuɛ: «yudj‑kʷn musa a‑tfrum i‑tmġart‑nnun ašku qqurn‑uwlawn‑nnun, walaynni ur‑igi ġmkan ġ‑isizwar.

⁹ rad‑awn‑iniġ, wanna ifran i‑tmġart‑ns f‑kra yaḍni bla zzna itahl tayyaḍ, hatin izna.»

¹⁰ inin‑as imḥḍarn: «iġ‑iga ġmkad ġ‑gr‑urgaz d‑tmġart‑ns, yuf‑as a‑ur‑akkʷ‑itahl.»

¹¹ irar‑asn yasuɛ: «awal‑ad, ur‑ra‑t‑irin abla ġwilli mi ifka rbbi a‑t‑irin.

¹² llan lasbab lli‑ur‑ra‑yadj mddn ad‑tahln. kra gisn ilul ġmkan. kra skrn‑as mddn ġmkan. kra yagʷi a‑itahl ašku ira a‑ilhu d‑ih̬f‑ns ġir s‑tgldit n‑ignna. wanna iẓḍarn a‑iqbl awal‑ad, iqbl‑t.»

lmasiḥ ibark tarwa mẓẓinin

¹³ aškin‑d kra n‑mddn ġ‑tasaɛt‑an awin‑d tarwa mẓẓinin, irin yasuɛ a‑n‑fllasn‑isrs ifassn‑ns ibark‑tn. nkrn imḥḍarn‑ns rarn‑tn inin‑asn: «a‑tn‑d‑ur‑tawim.»

¹⁴ imma yasuɛ inna‑yasn: «adjat tarwa mẓẓinin a‑d‑dari‑aškin. a‑tn‑ur‑tḥṣarm, ašku zund ġwid a‑mi‑tlla‑tgldit n‑ignna.»

¹⁵ isrs fllasn ifassn‑ns. ifl‑tn ġakudan iddu s‑mani yaḍni.

isawl lmasiḥ d‑uɛyyal bu‑wayda

¹⁶ yašk‑id yan‑uɛyyal s‑dar yasuɛ yini‑as: «way‑amslmd, man afulki a‑rad‑skrġ baš ad‑ṭṭafġ tudrt l‑lih̬rt?»

¹⁷ isawl yasuɛ yini‑as: «mah̬ a‑yyi‑tsqsat f‑ufulki? yan waḥdut a‑igan afulki. iġ‑trit a‑tkšmt s‑tudrt, skar s‑luṣiyat‑ns.»

¹⁸ isqsa‑t‑uɛyyal: «mal‑luṣiyat?» yini‑as yasuɛ: «‹a‑ur‑tnġt. a‑ur‑tznut. a‑ur‑takʷrt, a‑ur‑tfkt tugga n‑tkrkas.›

¹⁹ ‹awi‑tt ġ‑babak d‑innak.› ‹tirit adjar‑nnk zund ih̬f‑nnk.›»

²⁰ isawl‑uɛyyal yini‑as: «mayad ar‑t‑skarġ kullut. ma‑yyi‑sul‑ih̬ṣṣan?»

²¹ yini‑as yasuɛ: «iġ‑trit a‑tgt wad ikmmln, zayd tzznzt kullu mad‑dark‑illan, tfkt‑t i‑imẓlaḍ yili‑ak‑wayda ġ‑ignna. taškid‑d ilmma tmunt didi.»

²² lliġ isfld‑uɛyyal i‑mayad, iddu ṭiyyr‑as ašku iggut‑wayda‑ns.

²³ isawl yasuɛ s‑imḥḍarn‑ns yini‑asn: «lḥqq a‑rad‑awn‑iniġ, rad‑bahra‑išqu i‑yan dar iggut‑wayda a‑ikšm s‑tgldit n‑ignna.

²⁴ iniġ‑awn, ra‑irh̬u f‑urɛam a‑ikšm zġ‑tiṭ n‑tasmi ula ikšm yan dar ayda iggutn s‑tgldit n‑rbbi.»

²⁵ lliġ sfldn imḥḍarn i‑mayad, ggʷdn bahra, ar‑ttinin i‑ngratsn: «iġ‑iga ġmkad ma‑ra‑yiẓḍar a‑injm?»

²⁶ issmaqql gisn yasuɛ yini‑asn: «ġ‑dar bnadm ur‑iẓḍar a‑yili. imma rbbi, ur‑illi kra mi ur‑iẓḍar a‑t‑iskr ntta.»

²⁷ isawl bṭrus yini‑as: «ha‑nkkʷni nfl‑n kullu ma‑darnnġ‑illan, našk‑id nmun didk. ma‑rad‑aġ‑yili nkkʷni?»

²⁸ yini‑asn yasuɛ: «lḥqq a‑rad‑awn‑iniġ, ġakud lliġ rad‑gawrġ nkki lli‑igan yus n‑bnadm f‑lɛrš l‑lmjd‑inu ġ‑ddunit l‑ljdid, ra‑tgawrm ula kunni lli‑didi‑itmunun f‑sin d‑mraw l‑lɛrš ar‑ttḥkamm f‑kullu ayt‑rbbi.

²⁹ kullu wanna‑n‑ifln tigmmi‑ns nġd aytmas nġd istmas nġd babas nġd innas nġd tarwa‑ns nġd igran‑ns f‑ssibt‑inu, rad‑as‑yili ma‑yugʷrn mayan f‑miyya n‑twal, iṭṭaf tudrt idumn.

³⁰ walaynni kigan d‑imzwura a‑ra‑iggʷru, d‑kigan d‑imggura a‑ra‑izwur.»