matta 17 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

iban‑d musa ula iliyya i‑lmasiḥ

¹ zrin sḍiṣ‑uwssan, iddu yasuɛ yawi dids bṭrus d‑yaɛqub d‑gʷmas yuḥanna, ġlin waḥdutn s‑yan‑uwrir yattuyn.

² tbddl ssift n‑yasuɛ ġ‑lgddam‑nsn, ar‑issmrqiqiy‑uwdm‑ns zund tafukt, wrrint‑tmlsa‑ns mllulnt bahra zund tifawt n‑wass.

³ ġakudan ẓran nnabi musa ula nnabi iliyya ar‑sawaln d‑yasuɛ.

⁴ inkr bṭrus yini‑as: «wa‑siditnnġ, ifulki a‑nili ġid. is‑trit ad‑awn‑nskr kraḍ iḥšaš, yan‑nnk d‑yan n‑musa d‑yan n‑iliyya?»

⁵ sul a‑isawal s‑d‑fllasn‑tgguz yat‑tmdlut issmrġan tdl‑tn. isawl‑d yan‑wawal zġ‑tmdlut yini: «ġwad iga iwi iɛzzan. nttan a‑s‑bahra‑frḥġ. sflidat srs.»

⁶ lliġ sllan imḥḍarn i‑mayan ḍrn s‑wakal f‑uwdmawn‑nsn, ggʷdn bahra.

⁷ imma yasuɛ ifta‑d s‑darsn isrs fllasn afus‑ns yini‑asn: «nkrat. ad‑ur‑tiksaḍm.»

⁸ lliġ ssmaqqln ur‑ẓrin yan, abla yasuɛ waḥdut.

⁹ lliġ‑d‑ftan ġ‑ugsar n‑uwrir, yuṣṣa‑tn yasuɛ: «ad‑ur‑tinim i‑yan f‑ma‑tẓram ard‑d‑inkr yus n‑bnadm zġ‑lmut.»

¹⁰ sqsan‑t imḥḍarn‑ns: «mah̬ aylliġ a‑ttinin imslmdn n‑ššrɛ iqqan‑d nnabi iliyya a‑d‑yašk izwur‑d ġwalli igan lmasiḥ?»

¹¹ yini‑asn: «s‑ṣṣaḥt iliyya a‑d‑izwarn a‑ijjujad kraygatt kra.

¹² walaynni rad‑awn‑iniġ, yuška‑d‑yad iliyya, ur‑t‑ukʷzn mddn. skrn srs kullu ġaylli ran. ġmkan a‑s‑rad‑rfufnġ ula nkki lli‑igan yus n‑bnadm f‑ufus‑nsn.»

¹³ ssnn imḥḍarn ġakudan izd yuḥanna amsddam a‑f‑a‑yasn‑isawal.

lmasiḥ ijjujji afruh̬ amjnun

¹⁴ lliġ wrrin s‑dar mddn yaḍni, yašk‑id yan‑urgaz iḍr‑d ġ‑lgddam n‑yasuɛ yini‑as:

¹⁵ «wa‑sidi, ḥnnu ġ‑iwi. han illa‑gis‑uslay ar‑bahra‑itrfufun. mnnawt‑twal a‑n‑iṭṭar ġ‑lɛafit ula ġ‑waman.

¹⁶ iwiġ‑t‑id i‑imḥḍarn‑nnk walaynni ur‑ẓḍarn ntni a‑t‑jjujjin.»

¹⁷ isawl yasuɛ yini‑asn: «wa‑tasut‑ad ijlan, ur‑akkʷ‑trit a‑tamnt. mnšk a‑ra‑sul‑didun‑qamaġ? mnšk a‑rad‑didun‑ṣbrġ? awiyat‑t‑id s‑dari.»

¹⁸ yamr ljnn, iffuġ zġ‑gis s‑ijji‑ufruh̬ ḥayna.

¹⁹ aškin‑d imḥḍarn s‑dar yasuɛ waḥdutn sqsan‑t: «mah̬ aylliġ ur‑nẓḍar nkkʷni a‑t‑nssufġ?»

²⁰ yini‑asn: «ašku idrus liman‑nnun. lḥqq a‑rad‑awn‑iniġ, iġ‑gigun‑illa liman unšk n‑taqqayt imẓẓin l‑lh̬rdl, ra‑tinim i‑uwrir‑ad ‹itti zġ‑ġid s‑ġin› ra‑iskr s‑mad‑as‑tnnam. ur‑ra‑yili kra mi ur‑tẓḍarm.

²¹ walaynni wan ljnn‑an, ur‑ra‑itffuġ abla iġ‑taẓumm ar‑ttḍalabm rbbi.»

isawl‑daġ lmasiḥ f‑lmut‑ns

²² munn‑daġ imḥḍarn d‑yasuɛ ġ‑tmazirt n‑jalil, isawl srsn yini‑asn: «nkki lli‑igan yus n‑bnadm ra‑yyi‑n‑dḥin s‑gr ifassn n‑mddn

²³ nġn‑iyi, nkrġ‑d ilmma ġ‑wis kraḍ‑uwssan.» imma ntni ṭiyyr‑asn bahra f‑ma‑inna.

lmɛjizt n‑tslmt d‑uqarid

²⁴ ddun ilmma s‑tmdint n‑kafrnaḥum. aškin‑d ġwilli tamẓnin ššrd n‑tgmmi n‑rbbi, lkmn‑d bṭrus inin‑as: «is‑ur‑a‑yakka‑umslmd‑nnun ššrd n‑tgmmi n‑rbbi?»

²⁵ yini‑asn: «ar‑t‑yakka.» lliġ‑d‑iruḥ bṭrus tigmmi isawl srs yasuɛ, izwur‑as ġ‑wawal isqsa‑t: «manwi tġalt a‑simɛan, ar‑zgisn‑tamẓn igldan n‑ddunit ššrd ula ḍabiyt? izd zġ‑tarwa‑nsn nġd zġ‑wiyyaḍ?»

²⁶ yini‑as bṭrus: «zġ‑wiyyaḍ.» izayd yasuɛ yini‑as: «ula ġmkan ur‑illi f‑tarwa n‑tgldit.

²⁷ walaynni a‑stt‑ur‑nssṭiyyar i‑mddn‑an. zayd s‑umda, tluḥt‑n yat tukṭṭ ġ‑waman. taslmt tamzwarut nna‑di‑tumẓt, trẓmt imi‑ns ra‑n‑taft yan‑uqarid. awi‑t tfrut srs mad‑aġ‑ḍfarn nkki ula kiyi.»