matta 16 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

ifarisin ḍalbn yat‑tmatart

¹ aškin‑d kra n‑ifarisin d‑kra n‑mddn l‑lmdhb n‑iṣadduqin, irin ad‑armn yasuɛ. ḍalbn zġ‑gis a‑iskr kra l‑lmɛjizt ad‑asn‑tg tamatart n‑izd rbbi a‑t‑id‑yuznn.

² imma ntta isawl yini‑asn: «ha‑kunni ġ‑tdggʷat ar‑ttinim ‹ra‑iṣfu lḥal azkka ašku ẓggʷaġn ignwan.›

³ ula zikk ṣbaḥ ar‑ttinim ‹ra‑yili‑unẓar ġassad ašku ẓggʷaġn imdla ġ‑ignwan.› kunni tssnm lmɛni n‑ignwan, walaynni ur‑akkʷ‑tssinm lmɛna n‑kullu mayd darun ijran ġ‑uwssan‑ad.

⁴ tasut yʷh̬šnn ifsadn ayad, tḍalb tamatart. ur‑rad‑as‑ttyawfka kra n‑tmatart abla tamatart n‑nnabi yuna.» ifl‑tn ilmma iddu.

tah̬mirt n‑ifarisin d‑iṣadduqin

⁵ lliġ lkmn tasga yaḍni n‑umda ktin‑d imḥḍarn ur‑didsn‑iwin aġrum.

⁶ yini‑asn yasuɛ: «awiyat‑stt ġ‑ih̬f‑nnun, trarm lɛaql zġ‑th̬mirt n‑ifarisin d‑iṣadduqin.»

⁷ imma ntni ar‑ssmqsan i‑ngratsn ar‑ttinin: «ur‑d‑niwi aġrum, mayan a‑f‑inna awal‑ad.»

⁸ issn yasuɛ ma‑ttinin, yini‑asn: «mah̬ aylliġ a‑tssmqsam ġmkad f‑uġrum ur‑darun‑illi? is‑ur‑tuminm?

⁹ is‑ur‑ta‑tfhimm? is‑ur‑di‑tswangmm smmust‑tngʷal lli‑bbiġ i‑smmus id‑walf, ula mnšk n‑tasllit a‑tusim n‑tuffaẓ?

¹⁰ nġd ssa n‑tngʷal lli‑bbiġ i‑kkuẓ id‑walf, ula mnšk n‑tryalt a‑tusim n‑tuffaẓ?

¹¹ mah̬ ur‑tssinm is‑urd aġrum a‑f‑a‑sawalġ lliġ‑awn‑nniġ ‹rarat lɛaql‑nnun zġ‑th̬mirt n‑ifarisin d‑iṣadduqin›?»

¹² fhmn imḥḍarn ġakudan is‑urd tah̬mirt n‑uġrum a‑f‑asn‑inna a‑zgis‑traran lɛaql walaynni almmud n‑ifarisin d‑iṣadduqin.

tugga n‑bṭrus f‑lmasiḥ

¹³ izayd yasuɛ iddu s‑tsgiw n‑qayṣriyya filibbi. isqsa imḥḍarn‑ns: «ma‑ttinin mddn f‑yus n‑bnadm? mad‑giġ nkki?»

¹⁴ sawln imḥḍarn inin‑as: «kra ar‑ittini tgit yuḥanna amsddam. kra ar‑ittini tgit nnabi iliyya. kra ar‑ittini tgit irmiyya nġd kra n‑yan zġ‑lanbiya n‑zman.»

¹⁵ yini‑asn yasuɛ: «imma kunni, ma‑flla‑ttinim? mad‑giġ nkki?»

¹⁶ isawl simɛan bṭrus yini‑as: «tgit lmasiḥ yus n‑rbbi lli‑iddrn.»

¹⁷ yini‑as yasuɛ: «ambarki a‑tgit a‑simɛan yus n‑yuna, ašku urd bnadm ad‑ak‑imlan mayad, walaynni imla‑yak‑t baba rbbi lli‑illan ġ‑ignna.

¹⁸ rad‑ak‑iniġ, kiyi tgit ‹bṭrus›, tgt aẓru lli‑f‑rad‑bnuġ amnaggar‑inu, d‑ur‑sar‑t‑nrint lquwwat l‑lmut.

¹⁹ rad‑ak‑fkġ tisura n‑tgldit n‑ignna. aynna tkrst ġ‑ddunit ityawkras ġ‑ignna, d‑aynna tfsit ġ‑ddunit ityawfsay ġ‑ignna.»

²⁰ yuṣṣa imḥḍarn‑ns ilmma yini‑asn s‑lmɛqul: «a‑ur‑tinim i‑yan izd nkkin a‑igan lmasiḥ lli‑s‑a‑tqln.»

isawl lmasiḥ f‑urfufn‑ns ula lmut

²¹ zġ‑ġassan a‑ibda yasuɛ ar‑imala i‑imḥḍarn‑ns ma‑rad‑as‑ijru, yini‑asn: «iqqan‑iyi‑d ad‑dduġ s‑tmdint n‑urušalim, rfufnġ bahra f‑ufus n‑imġarn n‑tmazirt d‑inmġurn n‑tgmmi n‑rbbi d‑imslmdn n‑ššrɛ. ra‑yyi‑nġn, walaynni wis kraḍ‑uwssan ra‑d‑nkrġ zġ‑lmut.»

²² yawi‑t ilmma bṭrus a‑t‑iẓi f‑wawal‑ad yini‑as: «ad‑ak‑yili lh̬ir a‑sidi, ula ijra‑yak ġayan.»

²³ igrawl‑d gis yasuɛ yini‑as: «itti‑n zġ‑gigi a‑šiṭan. tabayḍḍrt ad‑iyi‑tgit. ašku ur‑a‑tskart s‑ma‑ira rbbi, walaynni s‑ma‑ira bnadm ka‑s‑a‑tskart.»

²⁴ izayd yasuɛ isawl s‑imḥḍarn‑ns yini‑asn: «wanna iran a‑didi‑yili, iqqan‑t‑id a‑ittu ih̬f‑ns, yasi aggjdi‑ns, imun didi.

²⁵ wanna iran a‑ijjnjm tudrt‑ns ra‑stt‑ijlu. imma wanna ijlan tudrt‑ns f‑ssibt‑inu, ra‑stt‑yaf.

²⁶ ma‑ra‑yili i‑bnadm iġ‑iwrri iṭṭaf ddunit kullutt ih̬sr ih̬f‑ns? ma‑ra‑ifk bnadm baš a‑ijjnjm ih̬f‑ns?

²⁷ imma nkki lli‑igan yus n‑bnadm rad‑d‑aškġ s‑lmjd n‑baba rbbi d‑lmalayka‑nu, baš ad‑rarġ i‑kraygatt yan f‑ma‑iskr.

²⁸ lḥqq a‑rad‑awn‑iniġ, illa ġ‑ġwid biddnin ġid ma‑ur‑ra‑immt ard iẓr yus n‑bnadm yuška‑d ġ‑tgldit‑ns.»