matta 13 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

lmɛna n‑wamud d‑ikalln

¹ ġassan iffuġ yasuɛ zġ‑tgmmi, iftu igawr ġ‑tama n‑umda.

² munn‑d fllas mddn ggutnin aylliġ‑t‑id‑iqqan a‑ikšm s‑yat tanawt. iskiws gis, biddn mddn‑an kullutn ġ‑tama n‑waman.

³ ibdu ar‑tn‑isslmad s‑lmɛni f‑kigan d‑tġawsiwin. yini‑asn: «hay‑afllaḥ iffuġ a‑n‑iluḥ amud.

⁴ lliġ‑t‑iluḥ iḍr‑n kra ġ‑uġaras aškin‑d igḍaḍ grun‑t.

⁵ iḍr‑n kra ġ‑gr iẓran ġ‑illiġ idrus‑wakal, imġi‑d ḥayna ašku ur‑t‑bahra‑idil‑wakal.

⁶ walaynni lliġ‑di‑tġli tafukt tjdr‑t, yiqar ašku ur dars iẓuran.

⁷ iḍr‑n kra ġ‑uzggʷar, iġli d‑uzggʷar iššqajji‑t.

⁸ iḍr‑n kra ġ‑wakal ifulkin ifk ṣṣabt. ifk yan miyya, ifk yan sḍiṣ id‑mraw, ifk yan kraḍ id‑mraw.

⁹ wanna dar imzgan a‑srsn‑isflid, illa fllas a‑isfld.»

¹⁰ aškin‑d dars imḥḍarn‑ns sqsan‑t: «mah̬ aylliġ a‑srsn‑tsawalt s‑lmɛni?»

¹¹ yini‑asn yasuɛ: «kunni ityawfka‑yawn a‑tissanm f‑tgldit n‑rbbi ma‑intln, imma ntni ur‑asn‑ityawfka.

¹² ašku wanna dar illa, rad‑as‑izayd rbbi, yili‑as uggʷar. imma wanna ur‑dar‑illi, rad‑as‑ikkis ula maylli dars illan.

¹³ mayad a‑f‑a‑srsn‑sawalġ s‑lmɛni. ašku ar‑tmnadn ur‑a‑ẓrran yat, ar‑sflidn ur‑a‑tsllan i‑yat ula‑da‑tfhamn yat.

¹⁴ illa gisn ġaylli‑f‑inna rbbi f‑imi n‑nnabi išaɛya inna: ‹rad‑bahra‑tsflidm walaynni ur‑ra‑tfhmm ma‑mi‑tsfldm. rad‑bahra‑ttmnadm walaynni ur‑ra‑tissanm ma‑tmnadm.

¹⁵ wrrin mddn‑an iqqur ih̬f‑nsn, ẓẓayn imzgan‑nsn, qqnnt‑walln‑nsn. ur‑rin ad‑ẓrnt‑walln‑nsn ula sfldn imzgan‑nsn ula fhmn ġ‑ih̬f‑nsn. ur‑rin ad‑d‑sri‑wrrin a‑tn‑jjujjiġ.›

¹⁶ imma kunni, timbarkiyin ad‑gant‑walln‑nnun ašku ar‑ẓrrant. imbarkin ad‑gan imzgan‑nnun ašku ar‑sflidn.

¹⁷ lḥqq a‑rad‑awn‑iniġ, ggutn lanbiya d‑mddn rḍanin rbbi ẓuẓḍn ad‑ẓrn mayd tẓrram walaynni ur‑t‑ẓrin, ẓuẓḍn ad‑sfldn i‑mayd mi tsflidm walaynni ur‑as‑sfldn.

¹⁸ «ġmkad a‑tga lmɛna n‑ufllaḥ.

¹⁹ amud lli‑iḍrn ġ‑uġaras, iga ntta zund yan isfldn i‑wawal n‑tgldit n‑ignna ur‑t‑ifhim. yašk‑id iblis ikkis‑as awal lli‑illan ġ‑ih̬f‑ns.

²⁰ imma amud lli‑iḍrn ġ‑gr iẓran, iga ntta zund yan isfldn i‑wawal yamẓ‑t ḥayna ifrḥ srs,

²¹ walaynni ur‑ikšim‑wawal‑an s‑uwl‑ns. iqama ġir kra n‑uwssan ard tili tassast nġd tarfufnt f‑ssibt n‑wawal s‑iknuki.

²² imma amud lli‑iḍrn ġ‑uzggʷar, iga ntta zund yan isfldn i‑wawal, walaynni idda yasi tiġufiwin n‑ddunit ilhu s‑wayda. ġayan a‑iššqajjin awal aylliġ ur‑d‑yiwi ṣṣabt.

²³ walaynni amud lli‑iḍrn ġ‑wakal ifulkin, iga ntta zund yan isfldn i‑wawal ifhm‑t, ifk ṣṣabt. ra‑yili ma‑ifkan miyya, yili ma‑ifkan sḍiṣ id‑mraw, yili ma‑ifkan kraḍ id‑mraw.»

lmɛna n‑wazkkun ġ‑igr

²⁴ izayd yasuɛ yut‑asn lmɛna‑yad yaḍni yini‑asn: «tagldit n‑ignna tga zund yan‑urgaz ifta iluḥ‑n amud ifulkin ġ‑igr‑ns.

²⁵ lliġ ign ġ‑iyḍ yašk‑id yan‑unuwwaš‑ns, iluḥ‑n wazkkun ġ‑gr irdn, iddu ifl‑t.

²⁶ lliġ‑d‑mġin irdn ssufġn tizlfin, imġi didsn wazkkun.

²⁷ aškin‑d ih̬ddamn s‑dar bab n‑igr inin‑as: ‹wa‑sidi, is‑urd amud ifulkin a‑tgit ġ‑igr‑nnk? mani‑d‑ikka wazkkun‑ad?›

²⁸ yini‑asn: ‹kra n‑unuwwaš a‑iskrn ġayad.› inin‑as ih̬ddamn: ‹is‑trit a‑nddu nsussi nssukf wazkkun‑an?›

²⁹ irar‑asn: ‹uhu, a‑ur‑tssukfm wazkkun a‑ur‑imil tssukfm dids irdn.

³⁰ adjat‑tn ad‑kullu‑mqqurn ard truḥ‑tmgra. ġakudan rad‑iniġ i‑išuwwaln: ssmunat‑zwar wazkkun tgm‑t d‑taggʷatin baš a‑ijdr, tzaydm ilmma tmgrm irdn tssmunm‑tn‑d ġ‑uḥanu‑nu.›»

lmɛna n‑taqqayt imẓẓin

³¹ yut‑asn lmɛna‑yad yaḍni yini‑asn: «tagldit n‑ignna tga zund yat taqqayt l‑lh̬rdl, yiwi‑tt yan‑urgaz iẓẓu‑tt ġ‑wakal‑ns.

³² nttat tmẓẓi f‑kullu taqqayin lli‑llanin, walaynni iġ‑di‑tmġi ra‑tagʷr išddran kullutn, twrri tg tasġart. ar‑di‑ttaškin igḍaḍ n‑ignwan ar‑zddġn ġ‑gr‑tṣṭṭwin‑ns.»

lmɛna n‑th̬mirt

³³ yut‑asn‑daġ lmɛna‑yad yaḍni yini‑asn: «tagldit n‑ignna tga zund tah̬mirt lli‑di‑tusi yat‑tmġart tg‑tt‑in ġ‑kraṭṭ lɛbrat mqqurnin n‑uggurn, tsskti lɛjin kullut.»

³⁴ kullu mayad, s‑lmɛni a‑s‑t‑inna yasuɛ i‑mddn ggutnin lli‑d‑fllas‑munnin. ur‑a‑srsn‑isawal abla s‑lmɛni.

³⁵ ġmkad a‑s‑yuwfa‑wawal n‑nnabi lli‑innan: «s‑lmɛni a‑s‑rad‑asn‑sawlġ, mlġ‑asn ma‑intln zġ‑isizwar n‑ddunit.»

isawl lmasiḥ f‑lmɛna n‑wazkkun ġ‑igr

³⁶ ġakudan ifl yasuɛ mddn‑an ikšm s‑tgmmi, aškin‑d dars imḥḍarn‑ns inin‑as: «ml‑aġ ma‑tqṣadt s‑lmɛna n‑wazkkun ġ‑igr.»

³⁷ isawl yasuɛ yini‑asn: «ġwalli iluḥn amud ifulkin iga‑t yus n‑bnadm,

³⁸ igr tga‑t ddunit. aqqayn n‑wamud ifulkin gan‑tn ayt‑tgldit n‑ignna, imma aqqayn n‑wazkkun gan‑tn ayt‑iblis.

³⁹ anuwwaš lli‑tn‑in‑iluḥn iga‑t iblis. tamgra tga isiggʷra n‑ddunit, išuwwaln gan lmalayka.

⁴⁰ ġmklli ssmunn wazkkun a‑ijdr ġ‑lɛafit, ġmkan a‑ra‑ijru ġ‑isiggʷra n‑ddunit.

⁴¹ ašku yus n‑bnadm ra‑yazn lmalayka‑ns, ssittin zġ‑tgldit‑ns kullu ma‑issṭarn mddn ula kullu ma‑iskarn lh̬ʷšant,

⁴² luḥn‑tn‑in ġ‑ufarnu l‑lɛafit. ġin a‑ġ‑rad‑allan ar‑tgẓaẓn uh̬san‑nsn.

⁴³ imma ġwilli‑f‑irḍa rbbi, ġakudan a‑rad‑isfiwn zund tafukt ġ‑tgldit n‑babatsn. wanna dar imzgan a‑srsn‑isflid, illa fllas a‑isfld.

tagldit n‑ignna

⁴⁴ «tagldit n‑ignna tga zund lknz ityawmḍaln ġ‑igr, yaf‑t‑in yan‑urgaz iḥḍu‑t‑daġ. iddu ifrḥ bahra, izznz kullu ma‑dars‑illan, isġ igr‑an.

⁴⁵ «tagldit n‑ignna tga zund ttajr ar‑isiggil s‑ljuhr iġʷlan.

⁴⁶ lliġ yufa yat taljuhrt iggut‑bahra‑watig‑ns, iddu izznz kullu ma‑dars‑illan isġ taljuhrt‑an.

⁴⁷ «tagldit n‑ignna tga zund ššbkt, luḥn‑tt‑in ingʷmarn ġ‑umda ssmunn‑d gis kraygatt rrhḍ n‑islman.

⁴⁸ lliġ tɛmmr ššbkt awin‑tt‑id s‑wakal, gawrn ar‑ẓlayn ġwilli šwanin ar‑tn‑tgan ġ‑tislla, imma ġwilli ʷh̬šnnin luḥn‑tn‑in.

⁴⁹ ġmkan a‑ra‑ijru ġ‑isiggʷra n‑ddunit. rad‑ddun lmalayka ẓlin mddn ʷh̬šnnin zġ‑gr willi rḍanin rbbi,

⁵⁰ luḥn‑tn‑in ġ‑ufarnu l‑lɛafit. ġin a‑ġ‑rad‑allan ar‑tgẓaẓn uh̬san‑nsn.»

⁵¹ yini‑asn yasuɛ: «is‑tfhmm kullu tiġawsiwin‑ad ġila?» inin‑as: «nfhm‑tnt.»

⁵² izayd yini‑asn: «kraygatt amslmd lli‑ilmdn f‑tgldit n‑ignna, iga zund bu‑tgmmi lli‑d‑issufuġn zġ‑lh̬zin‑ns ma‑igan l‑ljdid ula ma‑igan aqdim.»

lmasiḥ d‑ayt‑tmazirt‑ns

⁵³ lliġ ikmml yasuɛ kullu lmɛni‑ad, iftu zġ‑ġin,

⁵⁴ iwrri‑d s‑tmazirt‑ns. ar‑isslmad ġ‑tgmmi n‑tẓallit, ar‑gis‑tɛjjabn mddn ar‑ttinin: «argaz‑ad, mani‑d‑kullu‑srs‑tkka‑tḥkimt‑ad ula lmɛjizat‑ad iskar?

⁵⁵ is‑urd yus n‑unjjar ayad? is‑urd maryam a‑igan innas? is‑urd yaɛqub d‑yusf d‑simɛan d‑yahuda a‑igan aytmas?

⁵⁶ is‑urd istmas kullutnt ayd‑didnnġ‑illan ġid? imma kullu mayad, mani‑d‑srs‑ikka?»

⁵⁷ ntni bzgn fllas. imma yasuɛ inna‑yasn: «nnabi nna‑illan ar‑ti‑tuqqarn mddn, walaynni ur‑a‑ti‑tuqqarn ayt‑tmazirt‑ns d‑ayt‑tgmmi‑ns.»

⁵⁸ ur‑ġin‑iskir kra l‑lmɛjizat ggutnin, ašku ur‑rin ad‑srs‑amnn.