matta 12 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

asqsi f‑wass n‑usunfu

¹ yan‑wass ġ‑uwssan‑an, iga ass n‑usunfu, ifta yasuɛ ġ‑igran ġ‑gr imndi. inġ laẓ imḥḍarn‑ns, bdun ar‑tkkisn tizlfin ar‑šttan.

² ẓrn‑tn kra n‑ifarisin inin‑as‑d: «ẓr imḥḍarn‑nnk, ar‑skarn ġ‑wass n‑usunfu ġaylli ur‑gis‑iḥllan.»

³ isawl yasuɛ yini‑asn: «is‑ur‑tġrim f‑dawd ma‑iskr lliġ‑t‑bahra‑inġa laẓ, ntta d‑willi dids munnin?

⁴ ikšm s‑tgmmi n‑rbbi išš aġrum lli‑ityawfkan i‑rbbi, ur‑iḥlla a‑t‑išš ntta ula asmun‑ns. ġir inmġurn n‑tgmmi n‑rbbi a‑mi‑iḥlla.

⁵ is‑ur‑tġrim ġ‑ššrɛ n‑musa f‑mamnk a‑th̬damn inmġurn n‑tgmmi n‑rbbi ġ‑wass n‑usunfu? walaynni ur‑tn‑iẓi rbbi f‑mayan.

⁶ imma ġilad rad‑awn‑iniġ, illa ġid ma‑yugʷrn tigmmi n‑rbbi.

⁷ ityara ġ‑warra n‑rbbi ‹riġ darun lḥnant, urd tiġrsi.› mrad is‑tssnm lmɛna n‑wawal‑an, ikun ur‑tḥkamm f‑ġwid ur‑skirnin kra yʷh̬šnn.

⁸ imma nkki lli‑igan yus n‑bnadm, giġ sidis n‑wass n‑usunfu.»

lmasiḥ ijjujji ġ‑wass n‑usunfu

⁹ iftu yasuɛ ikšm s‑tgmmi n‑tẓallit.

¹⁰ illa ġin yan‑urgaz immut‑as‑ufus. ilin ula kra n‑mddn ran ad‑afn ġ‑yasuɛ ma‑s‑a‑yas‑ṣraḍn. sqsan‑t: «is‑iḥlla a‑tjjujjit ġ‑wass n‑usunfu?»

¹¹ isawl yasuɛ yini‑asn: «is‑gigun‑illa ma‑iṭṭafn alqqaġ iḍr‑as‑n ġ‑ugḍi ġ‑wass n‑usunfu ifl‑t ġin? is‑ur‑ra‑t‑id‑iġwi yasi‑t‑id?

¹² walaynni iɛzza bnadm dar rbbi uggʷar n‑ulqqaġ. hati iḥlla a‑nskar afulki ġ‑wass n‑usunfu.»

¹³ isawl ilmma s‑urgaz‑lli yini‑as: «mdi‑d afus‑nnk.» imdi‑as‑t‑id s‑ijji idus zund wayyaḍ.

¹⁴ ffuġn ifarisin ġakudan, ar‑tmšawarn i‑ngratsn f‑mamnk a‑rad‑nġn yasuɛ.

ah̬ddam n‑rbbi

¹⁵ issn yasuɛ mad‑qṣadn, iftu zġ‑ġin. ḍfurn‑t mddn ggutnin, ijjujji kullu ma‑ġ‑llant‑tmuḍan,

¹⁶ yini‑asn a‑ur‑fllas‑sawaln.

¹⁷ ġmkad a‑s‑yuwfa ma‑inna rbbi ġayd izrin f‑imi n‑nnabi išaɛya inna:

¹⁸ «hay‑ah̬ddam‑inu lli‑ẓliġ. nttan a‑dari‑iɛzzan, frḥġ srs bahra. ra‑t‑ɛmmrġ s‑rruḥ‑inu, ar‑itbrraḥ i‑kullu ayt‑tmizar s‑lḥqq lli‑rad‑asn‑yili.

¹⁹ ur‑ra‑itjaḥad ula‑da‑itġuwwat. ur‑ra‑itall awal‑ns ġ‑tswak.

²⁰ taẓẓmayt nna‑ibrin, ur‑ra‑stt‑ibbi. ula tiftilt nna‑iskarn aggu, ur‑ra‑stt‑issh̬si, ard izzga lḥqq ġ‑kraygatt mani.

²¹ ġ‑ism‑ns a‑ġ‑ra‑n‑rjun kullu ayt‑tmizar.»

kra n‑mddn ur‑ssinn ma‑iga yasuɛ

²² uškan‑d kra n‑mddn ġ‑uwssan‑an, awin‑as‑d yan‑urgaz ibukḍn, ig aẓnẓum yili gis yal‑ljnn. ijjujji‑t yasuɛ, iwrri‑uẓnẓum ar‑isawal yisfiw.

²³ ggutn ġwilli‑t‑ẓranin, iḍr‑asn lɛjb kullutn ar‑ssmqsan i‑ngratsn ar‑ttinin: «izd ġwad a‑igan yus n‑dawd lli‑s‑a‑ntql?»

²⁴ imma ifarisin, lliġ sfldn f‑ma‑iskr ar‑ttinin: «ġwad, ġir s‑tḥkimt n‑bɛl‑zabul agllid l‑ljnun a‑s‑a‑issufuġ ljnun.»

²⁵ imma yasuɛ issn iswingimn‑nsn yini‑asn: «tagldit nna‑itmmaġn d‑ih̬f‑ns ra‑th̬lu. tamdint nġd tigmmi nna‑itmmaġn d‑ih̬f‑ns ur‑tẓḍar a‑tqama.

²⁶ ula šiṭan, iġ‑a‑issufuġ šiṭan, hati ar‑itmmaġ d‑ih̬f‑ns. mamnk a‑ra‑tqama‑tgldit‑ns?

²⁷ walaynni iġd s‑tḥkimt n‑bɛl‑zabul a‑s‑a‑ssufuġġ ljnun, iniyat‑iyi ma‑s‑a‑tn‑ssufuġn ayt‑darun? ntni a‑rad‑awn‑iml is‑tjlam.

²⁸ walaynni iġd s‑rruḥ n‑rbbi a‑s‑a‑ssufuġġ ljnun, issanat is‑d‑darun‑tuška‑tgldit n‑rbbi.

²⁹ «ma‑iẓḍarn a‑ikšm s‑tgmmi n‑yan idusn a‑d‑yakʷr ayda‑ns iġ‑ur‑zwar‑ikrs ġwalli idusn? iġ‑t‑ikrs, ġakudan a‑rad‑as‑d‑yakʷr ayda‑ns.

³⁰ han wanna ur‑didi‑illin, iga ḍiḍḍ‑inu. d‑wanna ur‑didi‑issmunun, ar‑izzmzar.

³¹ f‑mayad a‑f‑rad‑awn‑iniġ, kullu ddnub n‑bnadm ula kullu tirggam nna‑s‑rgmn rbbi, iẓḍar ad‑asn‑iṣamḥ fllasn, walaynni yan irggmn rruḥ lqudus ur‑sar‑as‑fllas‑iṣamḥ.

³² wanna isawln ġ‑yus n‑bnadm, iẓḍar rbbi ad‑as‑iṣamḥ. walaynni yan irggmn rruḥ lqudus, ur‑rad‑as‑iṣamḥ, la ġ‑ddunit ula ġ‑lih̬rt.

lh̬zin l‑lh̬ʷšant ula win‑ufulki

³³ «iġ‑tfulki lġllt, tissanm is‑tfulki‑tsġart. iġ‑tʷh̬šn lġllt, tissanm is‑tʷh̬šn‑tsġart. ašku zġ‑lġllt‑ns a‑zġ‑a‑ttyawssan‑tsġart.

³⁴ wa‑tarwa n‑ifaġrn, mamnk a‑ra‑tiẓḍarm a‑tsawalm s‑ufulki d‑kunni tʷh̬šnm? hati aynna‑s‑iɛmmr‑uwl a‑s‑a‑d‑isawal imi.

³⁵ yan ifulkin, ar‑d‑issufuġ ma‑ifulkin zġ‑lh̬zin n‑ufulki‑ns. imma yan yʷh̬šnn, ar‑d‑issufuġ ma‑yʷh̬šnn zġ‑lh̬zin l‑lh̬ʷšant‑ns.

³⁶ rad‑awn‑iniġ, rad‑rarn mddn lḥsab ġ‑wass l‑lḥukm f‑kraygatt awal ih̬wan lli‑s‑nnan.

³⁷ f‑iwaliwn‑nnun a‑f‑rad‑awn‑yili rrḍa. f‑iwaliwn‑nnun a‑f‑rad‑awn‑yili lhalak.»

tamatart n‑nnabi yuna

³⁸ sawln‑d ilmma kra n‑imslmdn n‑ššrɛ d‑ifarisin inin‑as: «way‑amslmd, nra a‑dark‑nẓr kra l‑lmɛjizt ad‑aġ‑tg tamatart n‑izd rbbi a‑k‑id‑yuznn.»

³⁹ imma ntta irur‑asn: «tasut yʷh̬šnn ifsadn ayad, tḍalb tamatart. ur‑rad‑as‑ttyawfka kra n‑tmatart abla tamatart n‑nnabi yuna.

⁴⁰ ġmklli‑n‑ikka yuna kraḍ‑uwssan d‑kraḍ‑waḍan ġ‑waḥlig n‑uslm imqqurn, ġmkan a‑rad‑iyi‑ijru ula nkki lli‑igan yus n‑bnadm. ra‑n‑kġ kraḍ‑uwssan d‑kraḍ‑waḍan ġ‑tdrut n‑wakal.

⁴¹ walaynni rad‑nkrn ayt‑ninwa ġ‑wass l‑lḥsab ġ‑gr mddn n‑tasut‑ad, aštkkan srsn, ašku fln ntni kullu mad‑skarn yʷh̬šn ġakud lliġ sfldn i‑tbrraḥt n‑yuna. imma ġilad illa ġid ma‑yugʷrn yuna.

⁴² ra‑tnkr‑tgllitt l‑ljanub ġ‑wass l‑lḥsab ġ‑gr mddn n‑tasut‑ad, taštkka srsn, ašku tuška‑d nttat zġ‑ttmi n‑ddunit a‑tsfld i‑tḥkimt n‑suliman. imma ġilad illa ġid ma‑yugʷrn suliman.

ljnn lli‑itffuġn zġ‑bnadm

⁴³ «iġ‑iffuġ ljnn zġ‑kra n‑bnadm, ra‑izray ġ‑lh̬la ġ‑ur‑llin‑waman, ar‑isiggil s‑maniġ a‑izddġ. iġ‑ur‑yufi man,

⁴⁴ ra‑yini d‑ih̬f‑ns: ‹rad‑wrriġ s‑tgmmi lli‑ġ‑ttin‑kkiġ.› yašk‑id yaf‑d tigmmi th̬wa ttyaras tngadda.

⁴⁵ iddu ilmma yawi‑d dids ssa l‑ljnun yaḍni lli‑t‑yugʷrn ġ‑lh̬ʷšant, kšmn kullutn zdġn ġ‑urgaz‑an ard iwrri isiggʷra‑ns yʷh̬šn f‑isizwar‑ns. ġmkad a‑ra‑yili i‑tasut‑ad yʷh̬šnn.»

aytmas l‑lmasiḥ d‑innas

⁴⁶ ar‑sul‑isawal yasuɛ s‑di‑tuška innas d‑aytmas, biddn‑d ġ‑brra ḍalbn a‑dids‑sawln.

⁴⁷ yini‑as‑d yan zġ‑gr willi‑as‑sflidnin: «ha‑innak d‑aytmak biddn‑in ġ‑brra, ḍalbn a‑didk‑sawln.»

⁴⁸ imma ntta inna‑yasn: «ma‑igan inna ula aytma?»

⁴⁹ imdi afus‑ns s‑dar imḥḍarn‑ns yini‑asn: «ha‑inna d‑aytma.

⁵⁰ ašku wanna iskarn ma‑ira baba rbbi n‑ignna, nttan a‑igan gʷma, ig ulltma, ig inna.»