matta 11 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

asqsi n‑yuḥanna amsddam

¹ lliġ ikmml yasuɛ iwaliwn‑an lli‑s‑yuṣṣa imḥḍarn‑ns s‑sin d‑mraw, iddu ar‑itbrraḥ ar‑isslmad ġ‑tmdinin n‑tmazirt‑an.

² imma yuḥanna amsddam illa ġ‑lḥbs. lliġ isfld f‑ma‑iskar lmasiḥ, yazn kra n‑imḥḍarn‑ns a‑t‑sqsan:

³ «izd kiyin a‑igan ġwalli ra‑d‑yašk, nġd a‑sul‑ntql s‑yan yaḍni?»

⁴ isawl yasuɛ yini‑asn: «zaydat tinim i‑yuḥanna f‑ma‑mi‑tsfldm ula ma‑tẓram.

⁵ ha‑ibukaḍn ar‑ttisfiwn, ikušamn ar‑fttun, injdamn ar‑tġusn, iḍrḍar ar‑sflidn, ġwilli mmutnin ar‑d‑nkkrn ula imẓlaḍ ar‑tn‑ilkkm lh̬bar ifulkin.

⁶ ambarki a‑iga wanna ur‑gigi‑yufin ma‑f‑a‑yas‑ṭiyyar.»

⁷ lliġ ftan ntni, isawl yasuɛ f‑yuḥanna i‑mddn ggutnin lli‑d‑fllas‑munnin. isqsa‑tn: «ġakud lliġ a‑ttidum s‑lh̬la ma‑tram a‑tẓrm? izd kra n‑taẓẓmayt ar‑tt‑issmussu‑waḍu?

⁸ ma‑s‑a‑ttidum? izd a‑tẓrm kra n‑urgaz ilsan ibrdan šwanin? han ġwilli dar ibrdan šwanin, ġ‑tgʷmma n‑igldan a‑ġ‑llan.

⁹ walaynni ma‑s‑a‑ttidum? is‑urd yan‑nnabi a‑ttirim a‑ti‑tẓrm? rad‑awn‑iniġ, iga yan imqqurn ġ‑lanbiya.

¹⁰ ašku yuḥanna a‑f‑ityara ġ‑warra n‑rbbi ‹hati rad‑aznġ arqqas‑inu ad‑ak‑izwur, ijjujad‑ak aġaras‑nnk.›

¹¹ lḥqq a‑rad‑awn‑iniġ, ur‑illi ġ‑tarwa n‑tmġarin yan yugʷrn yuḥanna amsddam. imma wad kullu imẓẓin ġ‑tgldit n‑ignna, yugʷr yuḥanna.

¹² «zġ‑uwssan n‑yuḥanna amsddam sul s‑ġassad mmaġn mddn ad‑kšmn s‑tgldit n‑ignna, ar‑ttirin ayt‑imiġ a‑stt‑ġwin s‑jjhd.

¹³ kkan‑ttin lanbiya ula ššrɛ n‑musa ar‑kullu‑malan awal n‑rbbi i‑mddn aylliġ‑d‑yuška yuḥanna.

¹⁴ walaynni iġ‑tram a‑tamnm awal‑nsn, tissanm izd yuḥanna a‑igan ‹nnabi iliyya› lli‑s‑nnan ra‑d‑yašk.

¹⁵ wanna dar imzgan a‑srsn‑isflid, illa fllas a‑isfld.

¹⁶ «walaynni ma‑s‑rad‑awn‑ssrwasġ tasut‑ad? trwas tarwa lli‑skiwsnin ġ‑ssuq ar‑n‑aqran i‑imddukkʷal‑nsn ar‑ttinin

¹⁷ ‹nut‑awn taɛuwwatt ur‑a‑ttḥušm, nasi‑awn amarg ur‑a‑tallam.›

¹⁸ yuška‑d yuḥanna ur‑a‑ištta ula‑da‑issa, ar‑fllas‑ttinin ‹illa gis yal‑ljnn.›

¹⁹ aškġ‑d nkki lli‑igan yus n‑bnadm ar‑šttaġ ar‑ssaġ, ar‑flla‑ttinin ‹ġwad iga bu‑udis ig askayri, ig amddakkʷl n‑ayt‑nkkas d‑wiyyaḍ ʷh̬šnnin.› walaynni taḥkimt n‑rbbi, kullu willi srs skarnin ar‑tt‑in‑tafan tʷġẓan.»

ass l‑lḥsab

²⁰ ġakudan ar‑itẓi yasuɛ ayt‑tmdinin lli‑ġ‑iskr kigan d‑lmɛjizat‑ns, ašku ur‑rin ad‑fln kullu mad‑skarn yʷh̬šn.

²¹ yini‑asn: «taguḍi a‑rad‑awn‑yili ay‑ayt‑kurazin. taguḍi a‑rad‑awn‑yili ay‑ayt‑bitṣayda. han lmɛjizat lli‑skrġ ġ‑darun, mrad is‑tnt‑skrġ ġ‑tmdinin n‑ṣur d‑ṣayda, ikun lsan lh̬iš ġakudan, gn iġd f‑ih̬fawn‑nsn, fln kullu mad‑skarn yʷh̬šn.

²² rad‑awn‑iniġ, ra‑fllawn‑išqu‑wass l‑lḥsab uggʷar n‑ayt‑ṣur d‑ayt‑ṣayda.

²³ imma kunni ay‑ayt‑kafrnaḥum, is‑tram a‑tlkm ignwan? han ra‑kʷn‑in‑iluḥ rbbi ġ‑tdrut n‑wakal. han lmɛjizat lli‑skrġ ġ‑darun, mrad is‑tnt‑skrġ ġ‑tmdint n‑sadum, ikun tqama sul s‑ġassad.

²⁴ rad‑awn‑iniġ, ra‑fllawn‑išqu‑wass l‑lḥsab uggʷar n‑ayt‑sadum.»

aškad‑d sri tsunfum

²⁵ iẓẓall yasuɛ ġ‑tasaɛt‑an yini: «wa‑baba, sidis n‑ignna d‑wakal, ulġġ‑k ašku tssntlt tiġawsiwin‑ad f‑ayt‑lɛaql d‑lfhmt tssmlt‑tnt i‑ibujadiyn.

²⁶ ašku ġmkad a‑s‑trḍit a‑baba.»

²⁷ yini ilmma: «ġ‑ddu‑ufus‑inu a‑ġ‑iga baba kullu ma‑illan. ur‑illi ma‑issnn yus n‑rbbi abla babas, ula illa ma‑issnn baba abla nkki lli‑igan yus d‑willi qṣadġ ad‑asn‑t‑mlġ.

²⁸ aškad‑d sri, a‑kullu willi kkatnin tammara asin taẓayt išqan, ssunfuġ‑awn.

²⁹ gat‑n fllawn iḥlasn‑inu ar‑zgigi‑ttlmadm, ašku ihnna‑uwl‑inu iɛmmr s‑ṣṣbr, tafm gigi asunfu i‑ih̬f‑nnun.

³⁰ hati rh̬an iḥlasn‑inu, ifssus‑usitti lli‑rad‑flawn‑srsġ.»