marqus 9 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

¹ isawl yasuɛ yini‑asn: «lḥqq a‑rad‑awn‑iniġ, illa ġ‑ġwid biddnin ġid ma‑ur‑ra‑immt ard iẓr tagldit n‑rbbi tuška‑d s‑lquwwa.»

iban‑d musa ula iliyya i‑lmasiḥ

² zrin sḍiṣ‑uwssan, iddu yasuɛ yawi dids bṭrus d‑yaɛqub d‑yuḥanna, ġlin s‑yan‑uwrir yattuyn waḥdutn. tbddl ssift n‑yasuɛ ġ‑lgddam‑nsn.

³ wrrint‑tmlsa‑ns mllulnt bahra aylliġ a‑ssmrqiqiynt. ur‑illi ġ‑ddunit‑ad ma‑iẓḍarn a‑tnt‑isird ard mllulnt ġmkan.

⁴ ġakudan ẓran nnabi iliyya ula nnabi musa ar‑sawaln d‑yasuɛ.

⁵ inkr bṭrus yini‑as: «wa‑sidi, ifulki a‑nili ġid. is‑trit ad‑awn‑nskr kraḍ iḥšaš, yan‑nnk d‑yan n‑musa d‑yan n‑iliyya?»

⁶ ur‑issin ma‑ittini, ašku ggʷdn bahra.

⁷ ġakudan tgguz‑d fllasn yat‑tmdlut tdl‑tn. isawl‑d yan‑wawal zġ‑tmdlut yini‑asn: «ġwad iga iwi iɛzzan. sflidat srs.»

⁸ ġakudan grawln ġmk d‑ġmk walaynni ur‑sul‑ẓrin yan didsn, abla yasuɛ waḥdut.

⁹ lliġ‑d‑ftan ġ‑ugsar n‑uwrir yuṣṣa‑tn yasuɛ: «ad‑ur‑tinim i‑yan f‑ma‑tẓram ard‑d‑nkrġ nkki lli‑igan yus n‑bnadm zġ‑lmut.»

¹⁰ ḥḍun awal‑ad ġ‑ih̬fawn‑nsn ar‑ssmqsan i‑ngratsn f‑ma‑tga lmɛna‑yad «rad‑nkrġ zġ‑lmut.»

¹¹ sqsan‑t ilmma: «mah̬ aylliġ a‑ttinin imslmdn n‑ššrɛ iqqan‑d nnabi iliyya a‑d‑yašk izwur‑d ġwalli igan lmasiḥ?»

¹² yini‑asn yasuɛ: «s‑ṣṣaḥt iliyya a‑d‑izwarn a‑ijjujad kraygatt kra. imma yus n‑bnadm, is‑ur‑fllas‑ityara rad‑bahra‑irfufn, luḥn‑t‑in mddn?

¹³ walaynni rad‑awn‑iniġ, yuška‑d‑yad iliyya, skrn srs kullu ġaylli ran, ġmklli fllas ityaran.»

lmasiḥ ijjujji afruh̬ amjnun

¹⁴ lliġ wrrin s‑dar imḥḍarn yaḍni, ẓrn‑in darsn mddn ggutnin sutln‑asn, ar‑didsn‑tmjaḥadn kra n‑imslmdn n‑ššrɛ.

¹⁵ imma mddn‑an, lliġ ẓran yasuɛ tɛjjbn kullutn, azzln‑d s‑dars ar‑fllas‑tsllamn.

¹⁶ imma ntta isqsa‑tn: «ma‑f‑a‑didsn‑ttmjaḥadm?»

¹⁷ isawl yan zġ‑gr mddn‑an yini‑as: «way‑amslmd, iwiġ‑ak‑d iwi, illa gis yal‑ljnn aẓnẓum.

¹⁸ innaġ‑t‑iġwi ar‑srs‑ikkat ard‑as‑d‑ik‑ukškuš imi, ar‑itgẓaẓ uh̬san‑ns iqar. ḍalbġ imḥḍarn‑nnk a‑t‑ssufġn walaynni ur‑ẓḍarn.»

¹⁹ isawl yasuɛ yini‑asn: «wa‑tasut‑ad, ur‑akkʷ‑trit a‑tamnt. mnšk a‑ra‑sul‑didun‑qamaġ? mnšk a‑rad‑didun‑ṣbrġ? awiyat‑t‑id s‑dari.»

²⁰ awin‑as‑t‑id. ġir iẓra‑t ljnn s‑yut s‑ufruh̬, iḍr s‑wakal ar‑itknuki ik‑as‑d‑ukškuš imi.

²¹ isawl yasuɛ s‑babas isqsa‑t: «mnšk ayad s‑a‑itgga ġmkad?» yini‑as: «zġ‑mẓẓiy‑ns.

²² mnnawt‑twal a‑t‑in‑itluḥ ġ‑takat ula ġ‑waman baš a‑t‑ihlk. walaynni iġ‑tẓḍart a‑tskrt kra, ḥnnu ginnġ tɛawnt‑aġ.»

²³ yini‑as yasuɛ: «ma‑s‑tnnit ‹iġ‑tẓḍart›? yan yumnn, ur‑illi kra mi ur‑iẓḍar a‑t‑iskr.»

²⁴ irar‑as babas n‑ufruh̬ s‑jjhd yini‑as: «ha‑yyi umnġ. ɛawn‑iyi ad‑amnġ s‑uggʷar.»

²⁵ imma yasuɛ iẓra mddn ar‑d‑darsn‑tazzaln, yamr ljnn yini‑as: «wa‑ljnn aẓnẓum aḍrḍur, nniġ‑ak ffuġ zġ‑gis, a‑srs‑daġ‑ur‑tkšmt.»

²⁶ yut ljnn s‑yat‑tġuyyit issmḥakka afruh̬ iffuġ. iwrri‑ufruh̬ zund iġ‑immut aylliġ iggut ma‑innan: «hati immut.»

²⁷ imma yasuɛ yumẓ‑as ġ‑ufus issnkr‑t‑id, ibidd f‑iḍarn‑ns.

²⁸ ġakudan ikšm yasuɛ s‑tgmmi, ntta d‑imḥḍarn‑ns waḥdutn. sqsan‑t: «mah̬ aylliġ ur‑nẓḍar nkkʷni a‑t‑nssufġ?»

²⁹ yini‑asn: «wan ljnn‑an ur‑ra‑ti‑tssufuġm abla iġ‑a‑ttḍalabm rbbi.»

isawl‑daġ lmasiḥ f‑lmut‑ns

³⁰ ffuġn zġ‑ġin zrin f‑tmazirt n‑jalil. ur‑iri yasuɛ a‑fllas‑issann mddn,

³¹ ašku ar‑isslmad imḥḍarn‑ns, yini‑asn: «nkki lli‑igan yus n‑bnadm ra‑yyi‑n‑dḥin s‑gr ifassn n‑mddn nġn‑iyi. walaynni ġ‑wis kraḍ‑uwssan ra‑d‑nkrġ zġ‑lmut.»

³² imma ntni ur‑ssinn ma‑ira ad‑asn‑iml s‑wawal‑ad, iksaḍn ur‑ẓḍarn a‑t‑fllas‑sqsan.

ma‑ra‑ig anmġur?

³³ ruḥn kafrnaḥum. yili yasuɛ d‑imḥḍarn‑ns ġ‑tgmmi, isqsa‑tn: «ma‑f‑a‑di‑tsawalm i‑ngratun ġ‑uġaras?»

³⁴ imma ntni fssan, ašku ġ‑uġaras ar‑d‑sawaln i‑ngratsn f‑manwa gisn a‑ra‑ig anmġur.

³⁵ iskiws yasuɛ iġr‑d i‑sin d‑mraw n‑umḥḍar s‑dars yini‑asn: «wanna iran a‑izwur, illa fllas a‑kullu‑iggʷru, ig ah̬ddam i‑wiyyaḍ.»

³⁶ yamẓ‑d yan‑warraw imẓẓin yawi‑t‑id s‑wammas‑nsn, yasi‑t ġ‑iġil‑ns yini‑asn:

³⁷ «wanna iqbln yan‑warraw imẓẓin zund ġwad s‑ism‑inu, hati iqbl‑iyi. d‑wanna‑yyi‑iqbln, urd nkki ka‑iqbl, hatin iqbl ula ġwalli‑yyi‑d‑yuznn.»

ma‑zginnġ‑igan?

³⁸ yini‑as yuḥanna: «way‑amslmd, nẓra yan‑urgaz ar‑issufuġ ljnun s‑ism‑nnk. ur‑t‑nudji ašku ur‑a‑didnnġ‑itmunu.»

³⁹ irar‑as yasuɛ: «adjat‑t, ašku yan iskrn kra l‑lmɛjizt s‑ism‑inu ur‑ra‑yiẓḍar ġakudan a‑gigi‑irgm.

⁴⁰ ašku wanna‑yaġ‑ur‑itḍaḍḍan, hatin iga zġ‑ginnġ.

⁴¹ lḥqq a‑rad‑awn‑iniġ, wanna‑yawn‑ifkan lkas n‑waman s‑ism‑inu f‑ssibt n‑ma‑tgam win lmasiḥ, rad‑as‑tili lbaraka‑ns.»

ġaylli issṭarn bnadm

⁴² «wanna issḍrn yan zġ‑imẓẓiyn‑ad lli‑sri‑umnnin, yuf‑as mrad is‑as‑ityaggal‑uẓru n‑uzrg imqqurn ġ‑umggrḍ‑ns ityawgar‑n ġ‑umda.

^43-44 iġ‑a‑k‑issṭar‑ufus‑nnk, bbi‑t. yuf‑ak a‑tkšmt s‑tudrt bla afus ula a‑tddut s‑jhnnama s‑sin ifassn, s‑lɛafit lli‑ur‑ra‑ih̬si.

^45-46 iġ‑a‑k‑issṭar‑uḍar‑nnk, bbi‑t. yuf‑ak a‑tkšmt s‑tudrt tgit abiḍar ula a‑dark‑ilin sin iḍarn ttyawgart‑n ġ‑jhnnama.

⁴⁷ iġ‑a‑k‑tssṭar tiṭ‑nnk ssukf‑tt‑id. yuf‑ak a‑tkšmt s‑tgldit n‑rbbi tgit abukaḍ ula a‑dark‑ilint snat‑walln ttyawgart‑n ġ‑lɛafit n‑jhnnama

⁴⁸ ġ‑illiġ ur‑a‑ttmtat‑twukka‑nsn ula‑da‑gis‑th̬ssi lɛafit,

⁴⁹ ra‑imarġ kraygatt yan s‑lɛafit.

⁵⁰ tfulki tisnt, walaynni iġ‑tlmus tisnt ma‑s‑ra‑stti‑tssmarġm? ṭṭafat tisnt ġ‑ih̬fawn‑nnun, tgm s‑sslamt i‑ngratun.»