marqus 8 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

lmasiḥ iššuša kkuẓ id‑walf

¹ yan‑wass ġ‑uwssan‑an, lliġ‑d‑munn‑daġ mddn ggutnin ur‑darsn‑illi mad‑šttan. iġr‑d yasuɛ i‑imḥḍarn‑ns s‑dars yini‑asn:

² «ha‑mddn‑ad qaman gigi bahra, ašku kraḍ‑uwssan ayd didi llan, ur‑darsn mad‑šttan.

³ iġ‑tn‑uznġ s‑tgʷmma‑nsn, d‑ntni inġa‑tn laẓ, rad‑tġašan ġ‑uġaras, ašku kra gisn yuška‑d zġ‑tuggag.»

⁴ inin‑as imḥḍarn‑ns: «maniġ ra‑naf aġrum ġ‑lh̬la‑yad ma‑s‑a‑nššbaɛ kullu mddn‑ad?»

⁵ isqsa‑tn yasuɛ: «mnnawt‑tngʷal ad‑darun?» inin‑as: «ssa.»

⁶ yuṣṣa mddn ad‑skiwsn s‑wakal, yasi ssa n‑tngʷal‑lli iškr rbbi ibbi‑tnt, ifk i‑imḥḍarn a‑tnt‑aṭṭun. bḍun‑tnt f‑mddn.

⁷ ilint darsn kra n‑tslmin drusnin. iškr rbbi yini i‑imḥḍarn a‑tnt‑bḍun ula ntnti.

⁸ ššn kullu mddn‑an aylliġ šbɛan. ssmunn‑d tuffaẓ lli‑d‑qamanin, ɛmmrn ssa n‑tryalin.

⁹ ġwilli ššanin rad‑gn ma‑itggan kkuẓ id‑walf. ġakudan imsafaḍ didsn yasuɛ,

¹⁰ ikšm s‑tanawt ntta d‑imḥḍarn‑ns, ssudun ġ‑umda s‑tsgiw n‑dalmanuta.

ifarisin ḍalbn yat‑tmatart

¹¹ aškin‑d ifarisin s‑dar yasuɛ, irin ad‑dids‑tmjaḥadn. ḍalbn zġ‑gis kra l‑lmɛjizt ad‑asn‑tg tamatart n‑izd rbbi a‑t‑id‑yuznn, irin a‑t‑armn.

¹² indr yasuɛ ġ‑rruḥ‑ns yini: «mah̬ aylliġ a‑ttḍalab tasut‑ad yat‑tmatart? lḥqq a‑rad‑awn‑iniġ, ur‑ra‑ttyawfka kra n‑tmatart i‑tasut‑ad.»

¹³ ifl‑tn ikšm‑daġ s‑tanawt issudu s‑tsga yaḍni n‑umda.

tah̬mirt n‑ifarisin d‑tin hirudus

¹⁴ ttun imḥḍarn ur‑d‑didsn‑iwin aġrum. ur‑darsn ġir yat‑tngult ġ‑tanawt.

¹⁵ isawl srsn yasuɛ yini‑asn: «ẓrat, rarat lɛaql‑nnun zġ‑th̬mirt n‑ifarisin ula tah̬mirt n‑hirudus.»

¹⁶ bdun ar‑ssmqsan i‑ngratsn ar‑ttinin: «ur‑darnnġ aġrum. mayan a‑f‑inna awal‑ad.»

¹⁷ issn yasuɛ mad‑swangmn, yini‑asn: «mah̬ aylliġ a‑tssmqsam ġmkad f‑uġrum ur‑darun‑illi? is‑ur‑ta‑tssinm ula tfhmm? is‑qqurn ih̬fawn‑nnun?

¹⁸ is‑darun alln ur‑a‑ttmnadm? is‑darun imzgan ur‑a‑tsflidm? is‑ur‑a‑tswingimm?

¹⁹ iniyat‑iyi, lliġ bbiġ smmust‑tngʷal i‑smmus id‑walf, mnnawt tislla a‑tusim ɛmmrnt s‑tuffaẓ?» inin‑as: «snat d‑mrawt.»

²⁰ yini‑asn: «lliġ bbiġ ssa n‑tngʷal i‑kkuẓ id‑walf, mnnawt‑tryal a‑tusim ɛmmrnt s‑tuffaẓ?» inin‑as: «ssa.»

²¹ yini‑asn: «is‑ur‑ta‑tfhimm?»

lmasiḥ ijjujji abukaḍ

²² lkmn bitṣayda, aškin‑d kra n‑mddn awin‑d yan‑ubukaḍ i‑yasuɛ, ḍalbn‑t bahra ad‑as‑iggr.

²³ yamẓ yasuɛ i‑ubukaḍ ġ‑ufus yawi‑t s‑brra n‑uduwwar, issufs‑as‑n ġ‑walln‑ns isrs fllas ifassn‑ns. isqsa‑t: «is‑tẓrit kra?»

²⁴ abukaḍ yull‑d alln‑ns yini‑as: «ẓriġ mddn zund isġarn ar‑fttun.»

²⁵ isrs‑n‑daġ yasuɛ ifassn f‑walln‑ns. issmaqql‑d‑urgaz ġakudan yisfiw, iẓr kraygatt kra ibayyn‑as.

²⁶ yazn‑t yasuɛ yini‑as: «zri s‑tgmmi‑nnk. ad‑ur‑twrrit s‑uduwwar.»

tugga n‑bṭrus f‑lmasiḥ

²⁷ izayd yasuɛ iddu ntta d‑imḥḍarn‑ns s‑iduran ġ‑tsgiw n‑qayṣriyya filibbi. isawl didsn ġ‑uġaras isqsa‑tn: «ma‑flla‑ttinin mddn, mad‑giġ nkki?»

²⁸ sawln imḥḍarn inin‑as: «kra ar‑ittini tgit yuḥanna amsddam, kra ar‑ittini tgit nnabi iliyya, kra ar‑ittini tgit kra n‑yan zġ‑lanbiya n‑zman.»

²⁹ yini‑asn yasuɛ: «imma kunni, ma‑flla‑ttinim? mad‑giġ nkki?» isawl bṭrus yini‑as: «tgit lmasiḥ n‑rbbi.»

³⁰ yuṣṣa‑tn ad‑ur‑inin mayad i‑yan.

isawl lmasiḥ f‑urfufn‑ns ula lmut

³¹ ibdu yasuɛ ar‑imala i‑imḥḍarn‑ns ma‑rad‑as‑ijru yini‑asn: «ha‑nkki lli‑igan yus n‑bnadm, iqqan‑iyi‑d ad‑bahra‑rfufnġ. ra‑yyi‑n‑luḥn imġarn n‑tmazirt d‑inmġurn n‑tgmmi n‑rbbi d‑imslmdn n‑ššrɛ. ra‑yyi‑nġn, walaynni wis kraḍ‑uwssan ra‑d‑nkrġ zġ‑lmut.»

³² ġmkad a‑s‑asn‑inna, ur‑fllasn‑issntil yat. yawi‑t ilmma bṭrus a‑t‑iẓi f‑wawal‑ad.

³³ igrawl‑d yasuɛ, issmaqql ġ‑imḥḍarn‑ns. issfssa bṭrus yini‑as: «itti‑n zġ‑gigi a‑šiṭan, ašku ur‑a‑tskart s‑ma‑ira rbbi, walaynni s‑ma‑ira bnadm ka‑s‑a‑tskart.»

³⁴ iġr‑d yasuɛ i‑mddn s‑dars ntni d‑imḥḍarn‑ns yini‑asn: «wanna iran a‑didi‑yili, iqqan‑t‑id a‑ittu ih̬f‑ns, yasi aggjdi‑ns, imun didi.

³⁵ wanna iran a‑ijjnjm tudrt‑ns ra‑stt‑ijlu. imma wanna ijlan tudrt‑ns f‑ssibt‑inu ula f‑ssibt l‑lh̬bar‑ad ifulkin, ra‑stt‑ijjnjm.

³⁶ ma‑ra‑yili i‑bnadm iġ‑iwrri iṭṭaf ddunit kullutt ih̬sr ih̬f‑ns?

³⁷ ma‑ra‑ifk bnadm baš a‑ijjnjm ih̬f‑ns?

³⁸ wanna innan ur‑iyi‑issin ula issn awal‑inu ġ‑gr mddn n‑tasut‑ad ijlan yʷh̬šnn, rad‑iniġ ur‑t‑ssinġ ula nkki lli‑igan yus n‑bnadm ġakud lliġ rad‑d‑aškġ d‑lmalayka n‑ignna s‑lmjd n‑rbbi baba.»