marqus 7 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

lɛadat n‑willi zrinin

¹ munn‑d ifarisin f‑yasuɛ ntni d‑kra n‑imslmdn n‑ššrɛ lli‑d‑uškanin zġ‑tmdint n‑urušalim.

² ẓran kra zġ‑imḥḍarn‑ns ar‑šttan aġrum s‑ifassn‑nsn sul ḥrmn, ašku ur‑tn‑sirdn ġmklli siridn mddn‑an.

³ ifarisin d‑ayt‑yudaya kullutn, iġ‑ur‑bahra‑sirdn ifassn‑nsn ur‑rad‑ššn. ntni ar‑skarn s‑lɛada n‑imġarn lli‑zrinin.

⁴ ġakud nna‑d‑uškan zġ‑ssuq ur‑rad‑ššn ard sirdn. ggutnt lɛadat yaḍni lli‑tamẓn, ar‑siridn lkisan d‑tmkilin d‑irukutn n‑wanas d‑ibrdan.

⁵ sqsan‑t ifarisin d‑imslmdn n‑ššrɛ inin‑as: «mah̬ aylliġ ur‑a‑fttun imḥḍarn‑nnk f‑lɛada n‑imzwura‑nnġ lli‑zrinin? ha‑ntni ar‑šttan aġrum s‑ifassn‑nsn sul ḥrmn.»

⁶ isawl yasuɛ yini‑asn: «wa‑id‑bu‑sin‑uwdmawn, s‑lḥqq a‑s‑fllawn‑inna rbbi f‑imi n‑nnabi išaɛya, inna ‹mddn‑ad ar‑iyi‑talġn s‑ils‑nsn, imma ul‑nsn yaggug‑n flla.

⁷ bla lfaytt a‑yyi‑tɛbadn ašku ur‑a‑sslmadn ġ‑ulmmud‑nsn abla tinbaḍin n‑bnadm.›

⁸ ha‑kunni ar‑tfalm luṣiyat n‑rbbi, ar‑tamẓm lɛadat n‑bnadm.»

⁹ izayd yini‑asn: «ġmkad a‑s‑a‑ttanfm i‑luṣiyat n‑rbbi baš a‑tskarm s‑lɛadat‑nnun.

¹⁰ yuṣṣa‑kʷn musa inna ‹awi‑tt ġ‑babak d‑innak.› yini‑daġ ‹wanna irgmn babas nġd innas illa fllas a‑immt.›

¹¹ imma kunni, iġ‑inna kra n‑yan i‑babas nġd innas ‹fkiġ i‑rbbi maylli tram ad‑awn‑t‑fkġ, win rbbi a‑iga,›

¹² iġ‑inna awal‑ad ar‑as‑ttinim a‑ur‑sul‑iskar yat f‑babas d‑innas.

¹³ ġmkad a‑s‑a‑ttanfm i‑wawal n‑rbbi s‑lɛada‑nnun. kigan d‑tġawsiwin a‑tskarm zund ġayad.»

ġaylli issḥramn bnadm

¹⁴ iġr‑daġ yasuɛ i‑mddn s‑dars yini‑asn: «sfldat‑iyi kullukn a‑tissanm.

¹⁵ ur‑illi yat ġ‑brra n‑bnadm iẓḍarn a‑t‑issḥrm iġ‑srs‑ikšm. walaynni ġaylli‑d‑itffuġn zġ‑bnadm, nttan a‑t‑issḥramn.

¹⁶ yan dar imzgan a‑srsn‑isflid, illa fllas a‑isfld.»

¹⁷ lliġ ifl mddn‑an ikšm s‑tgmmi, sqsan‑t imḥḍarn‑ns f‑lmɛna‑yad.

¹⁸ yini‑asn: «izd ula kunni ur‑tfhimm? is‑ur‑tssinm izd kullu ma‑ikššmn s‑bnadm zġ‑brra ur‑iẓḍar a‑t‑issḥrm?

¹⁹ ašku urd ul a‑s‑a‑ikššm walaynni s‑waḥlig, ar‑izray zġ‑ddat s‑lh̬la.» imla yasuɛ s‑wawal‑ad is‑iḥlla kullu mad‑šttan mddn.

²⁰ izayd yini‑asn: «ġaylli‑d‑itffuġn zġ‑bnadm nttan a‑t‑issḥramn,

²¹ ašku zġ‑ugʷns n‑uwl n‑bnadm, a‑zġ‑a‑di‑tffuġn iswingimn ʷh̬šnnin d‑lfsad d‑tmh̬h̬art d‑tnaġa d‑zzna

²² d‑ṭṭmaɛ d‑lmunkr d‑lġʷšš d‑ššhwat d‑tnuwwašt d‑tkndawt d‑lkibr d‑unufl.

²³ kullu lh̬ʷšanat‑ad ar‑di‑tffuġnt zġ‑ugʷns n‑bnadm ar‑t‑ssḥramnt.»

tamġart lli‑yumnn bahra

²⁴ inkr yasuɛ iffuġ zġ‑ġin iftu s‑tsga n‑ṣur d‑ṣayda. ikšm s‑yat‑tgmmi. ur‑iri a‑t‑akʷzn mddn, walaynni ur‑iẓḍar a‑irgs.

²⁵ ġakudan tsfld fllas yat‑tmġart, dars illis imẓẓin illa‑yas gis yal‑ljnn yʷh̬šnn bahra. tašk‑id tḍr‑d ġ‑dar iḍarn n‑yasuɛ.

²⁶ tga nttat tabrranit tg ullt‑finiqiyya zġ‑tmazirt n‑ššam. tḍalb‑t bahra a‑issufġ ljnn zġ‑illis,

²⁷ imma yasuɛ inna‑yas: «adj tarwa ad‑zwar‑šbɛan, ašku ur‑išwi a‑namẓ aġrum n‑tarwa nluḥ‑t‑in i‑iyḍan.»

²⁸ tsawl‑d nttat tini‑as: «wa‑sidi, ula iḍan ġ‑ddu lmida ar‑šttan ibruziyn lli‑ṭṭarnin i‑tarwa.»

²⁹ yini‑as yasuɛ ġakudan: «f‑ssibt n‑wawal‑ad s‑iyi‑tnnit, nniġ‑am zayd s‑tgmmi. han ljnn iffuġ zġ‑illim.»

³⁰ tftu s‑tgmmi‑ns taf‑n tafruh̬t tgn f‑tisi, iffuġ zġ‑gis ljnn.

lmasiḥ ijjujji atitaw aḍrḍur

³¹ iwrri‑d yasuɛ ġakudan zġ‑tsga‑yan n‑ṣur, izri zġ‑ṣayda ula tamazirt n‑mrawt‑tmdinin, iruḥ‑d s‑umda n‑jalil.

³² aškin‑d dars kra n‑mddn awin‑as‑d yan‑urgaz iga atitaw aḍrḍur. ḍalbn‑t a‑fllas‑isrs afus‑ns.

³³ yawi‑t yasuɛ zġ‑gr mddn waḥdut. ig‑n iḍuḍan‑ns ġ‑imzgan n‑urgaz, issufs f‑iḍuḍan‑ns iggr‑n i‑ils n‑urgaz.

³⁴ yall alln‑ns s‑ignwan yut s‑unfus‑ns, yini‑as: «ifata.» tga lmɛna‑ns ‹rẓm›.

³⁵ ġakudan rẓmn imzgan‑ns ifsi ils‑ns, isawl inm‑wawal‑ns.

³⁶ yuṣṣa yasuɛ mddn‑an ad‑ur‑inin i‑yan f‑mayd ijran, walaynni kra‑s‑a‑tn‑ituṣṣa ntni ar‑tawin lh̬bar‑ns bahra.

³⁷ ar‑tɛjjabn s‑uggʷar ar‑ttinin: «kullu ma‑iskar ifulki. hati ar‑itrara iḍrḍar ar‑sflidn ula iẓnẓam ar‑sawaln.»