marqus 4 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

lmɛna n‑wamud d‑ikalln

¹ izayd yasuɛ ar‑isslmad ġ‑tama n‑umda. munn‑d fllas mddn ggutnin aylliġ‑t‑id‑iqqan a‑ikšm s‑tanawt, iskiws gis ġ‑umda, akmurn‑d mddn ar tama n‑waman.

² ar‑tn‑isslmad s‑lmɛni f‑tġawsiwin ggutnin, yini‑asn:

³ «sfldat, hay‑afllaḥ iffuġ a‑n‑iluḥ amud.

⁴ lliġ‑t‑iluḥ iḍr‑n kra ġ‑uġaras aškin‑d igḍaḍ grun‑t.

⁵ iḍr‑n kra ġ‑gr iẓran ġ‑illiġ idrus‑wakal, imġi‑d ḥayna ašku ur‑t‑bahra‑idil‑wakal.

⁶ walaynni lliġ‑di‑tġli tafukt, tjdr‑t, yiqar ašku ur dars iẓuran.

⁷ iḍr‑n kra ġ‑uzggʷar, iġli d‑uzggʷar iššqajji‑t ur‑d‑yiwi ṣṣabt.

⁸ iḍr‑n kra ġ‑wakal ifulkin, imġi‑d yimġur ifk ṣṣabt, ifk yan kraḍ id‑mraw, ifk wayyaḍ sḍiṣ id‑mraw, ifk wayyaḍ miyya.»

⁹ yini‑asn: «wanna dar imzgan a‑srsn‑isflid, illa fllas a‑isfld.»

¹⁰ lliġ iffuġ yasuɛ zġ‑gr mddn‑an ggutnin aškin‑d dars imḥḍarn‑ns s‑sin d‑mraw, ntni d‑wiyyaḍ zġ‑usmun‑ns, sqsan‑t f‑lmɛni‑ad.

¹¹ yini‑asn yasuɛ: «kunni ityawfka‑yawn a‑tissanm f‑tgldit n‑rbbi ma‑intln f‑mddn yaḍni. imma ġwin n‑brra rad‑asn‑kullu‑ityawnna s‑lmɛni.

¹² ġmklli ityaran ‹rad‑bahra‑tmnadn walaynni ur‑rad‑issann mad‑mnadn. rad‑bahra‑sflidn walaynni ur‑rad‑fhmn ma‑mi‑sfldn. ur‑rin a‑d‑sri‑wrrin a‑fllasn‑ssittiġ ddnub‑nsn.›»

¹³ izayd yini‑asn: «is‑ur‑tssinm ula lmɛna‑yad? mamnk a‑s‑ra‑tissanm lmɛni yaḍni kullutnt?

¹⁴ afllaḥ iga‑t wad izraɛn awal n‑rbbi.

¹⁵ kra n‑mddn gan zund amud lli‑iḍrn ġ‑uġaras. lliġ sfldn i‑wawal yašk‑id šiṭan, ikkis‑asn awal lli‑darsn‑illan.

¹⁶ kra n‑mddn gan zund amud lli‑iḍrn ġ‑gr iẓran. sfldn i‑wawal amẓn‑t ḥayna, frḥn srs.

¹⁷ walaynni ur‑ikšim‑wawal‑an s‑uwl‑nsn. qaman ġir kra n‑uwssan ard tili tassast nġd tarfufnt f‑ssibt n‑wawal s‑knukin.

¹⁸ kra n‑mddn gan zund amud lli‑iḍrn ġ‑uzggʷar. sfldn i‑wawal

¹⁹ walaynni ddan asin tiġufiwin n‑ddunit lhun s‑wayda irin tiġawsiwin yaḍni. ġayan a‑iššqajjin awal‑an aylliġ ur‑d‑yiwi ṣṣabt.

²⁰ walaynni kra n‑mddn gan zund amud lli‑iḍrn ġ‑wakal ifulkin. sfldn i‑wawal n‑rbbi skrn srs fkn ṣṣabt. ifk yan kraḍ id‑mraw, ifk wayyaḍ sḍiṣ id‑mraw, ifk wayyaḍ miyya.»

lqndil d‑lɛbrt

²¹ isawl‑daġ yasuɛ yini‑asn: «is‑ra‑di‑tawim lqndil a‑ti‑tsrsm ġ‑ddu lɛbrt nġd ġ‑ddu tisi? is‑urd f‑iggi n‑mani yattuyn a‑f‑ra‑t‑in‑tsrsm?

²² han kullu ma‑intln ra‑t‑ẓrn mddn tigira, d‑kullu ma‑idln ra‑t‑zzudfn.

²³ yan dar imzgan a‑srsn‑isflid, illa fllas a‑isfld.»

²⁴ izayd yini‑asn: «rarat lɛaql s‑mayd mi tsflidm. hati s‑lɛbrt lli‑s‑a‑ttɛbbarm a‑s‑rad‑awn‑ityawɛbbar ityawfka‑yawn s‑uggʷar.

²⁵ ašku wanna dar illa, rad‑as‑izayd rbbi, imma wanna ur‑dar‑illi, rad‑as‑ikkis ula maylli dars illan.»

lmɛna n‑wamud lli‑d‑imġin

²⁶ izayd yasuɛ yini‑asn: «ġmkad a‑tga‑tgldit n‑rbbi. tga zund yan‑urgaz ar‑itluḥ amud ġ‑wakal.

²⁷ ar‑igan ar‑inkkr ġ‑iyḍ ula azal, imġi‑d‑wamud ar‑itimġur, imma argaz‑an ur‑issin mamnk.

²⁸ hati akal a‑t‑id‑issmġayn. ġ‑isizwar gant agʷlas, yan kra gnt tizlfin, ġ‑isiggʷra gnt ṭumẓẓin ɛmmrnin.

²⁹ iġ‑nwant‑ṭmẓẓin ra‑d‑yasi asmmawd ašku truḥ‑tmgra.»

lmɛna n‑taqqayt imẓẓin

³⁰ yini‑asn yasuɛ: «ma‑s‑ra‑nssrwas tagldit n‑rbbi? mal‑lmɛna a‑s‑ra‑fllas‑nsawl?

³¹ trwas yat taqqayt l‑lh̬rdl. lliġ‑n‑tḍr ġ‑wakal, tmẓẓi f‑kullu taqqayin n‑imadn lli‑llanin.

³² walaynni yan kra ar‑di‑ttmġay ar‑ttimġur, twrri tagʷr kullu imndi. ar‑tskar tiṣṭṭwin mqqurnin aylliġ a‑srsnt‑kššmn igḍaḍ n‑ignwan, zdġn ġ‑umalu‑ns.»

³³ ar‑srsn‑isawal yasuɛ s‑lmɛni ggutnin zund h̬tid, yawi‑asn‑d awal n‑rbbi s‑unšknna mi ẓḍarn a‑t‑fhmn.

³⁴ mddn‑an ġir s‑lmɛni a‑s‑a‑srsn‑isawal. walaynni imḥḍarn‑ns, lliġ llan waḥdutn ar‑asn‑imala tiġawsiwin‑ad kullutnt baš a‑tnt‑issann ġmklli gant.

lmasiḥ yumr aḍu d‑umda

³⁵ lliġ tlkm‑tdggʷat n‑ġassan yini‑asn: «a‑nddu s‑tsga‑yan yaḍni n‑umda.»

³⁶ fln mddn ġin, kšmn imḥḍarn s‑tanawt lli‑ġ‑illa yasuɛ. munn didsn kra n‑mddn ġ‑tanawin yaḍni.

³⁷ ġakudan inkr‑d‑waḍu itjhhdn, attuynt taḍangiwin ar‑kkatnt tanawt aylliġ a‑ttɛmmar s‑waman.

³⁸ yasuɛ illa ġ‑tġurdin ġ‑tanawt, isrs ih̬f‑ns f‑yat lmh̬dda, ign. ssfaqn‑t imḥḍarn‑ns inin‑as: «is‑ur‑ak‑ginnġ‑illi yat ra‑nhlk?»

³⁹ inkr yasuɛ yamr aḍu a‑ifssa, yini i‑umda: «zga, thnnat.» s‑ibbi‑waḍu iwrri‑umda ihnna bahra.

⁴⁰ yini i‑imḥḍarn‑ns: «mah̬ aylliġ tksuḍm? is‑ur‑tuminm?»

⁴¹ imma ntni ggʷdn s‑uggʷar ar‑ttinin i‑ngratsn: «ma‑iga ġwad aylliġ a‑srs‑isflid‑waḍu ula amda?»