marqus 3 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

ijjujji lmasiḥ ġ‑wass n‑usunfu

¹ ikšm‑daġ yasuɛ s‑tgmmi n‑tẓallit. illa ġin yan‑urgaz immut‑as‑ufus.

² ilin kra n‑mddn ran ad‑afn ġ‑yasuɛ ma‑s‑a‑yas‑ṣraḍn, gabln‑t ad‑ẓrn is‑ra‑t‑ijjujji ġ‑wass n‑usunfu.

³ isawl yasuɛ s‑walli mi immut‑ufus yini‑as: «ašk‑id s‑wammas.»

⁴ isawl ilmma s‑wiyyaḍ yini‑asn: «ma‑iḥllan ġ‑wass n‑usunfu? a‑nskar ma‑ifulkin nġd a‑nskar ma‑yʷh̬šnn? izd a‑njjnjm yan nġd a‑t‑nhlk?» imma ntni fssan.

⁵ igrawl gisn ṭiyyr‑as tʷgraẓ‑t ašku qqurn‑uwlawn‑nsn bahra. isawl s‑urgaz‑lli yini‑as: «mdi‑d afus‑nnk.» imdi‑as‑t‑id s‑ijji, idus‑ufus‑ns.

⁶ ffuġn ifarisin ġakudan, ddun ar‑tmšawarn d‑imddukkʷal n‑ugllid hirudus f‑mamnk a‑rad‑nġn yasuɛ.

isawl lmasiḥ i‑mddn ġ‑tama n‑umda

⁷ iftu yasuɛ d‑imḥḍarn‑ns s‑umda, ḍfurn‑t mddn ggutnin zġ‑tmazirt‑an n‑jalil.

⁸ lliġ sfldn wiyyaḍ f‑ma‑iskr, aškin‑d zġ‑yudaya d‑tmdint n‑urušalim ula tamazirt n‑idumiyya d‑tsga yaḍni n‑wasif n‑urdun ula tisgiw n‑ṣur d‑ṣayda.

⁹ yini ilmma yasuɛ i‑imḥḍarn‑ns ad‑as‑d‑awin yat tanawt, a‑tili ġ‑tama‑ns baš a‑srs‑ikšm iġ‑t‑ssnukman mddn bahra.

¹⁰ ašku ġ‑uwssan‑an ar‑ijjujji mddn ggutnin aylliġ a‑d‑fllas‑ṭṭarn kullu ma‑ġ‑llant‑tmuḍan baš ad‑as‑ggrn.

¹¹ ula ljnun ġakud nna‑t‑ẓran ḍrn‑d ġ‑dar iḍarn‑ns ar‑ssġuyyun ar‑ttinin: «kiyi tgit yus n‑rbbi.»

¹² imma yasuɛ ar‑tn‑itamr a‑ur‑inin i‑yan f‑ma‑iga.

sin d‑mraw n‑urqqas

¹³ iġli yasuɛ s‑yan‑uwrir iġr‑d i‑willi ira, aškin‑d s‑dars.

¹⁴ isti sin d‑mraw ad‑gn irqqasn‑ns, baš ad‑dids‑tmunun yazn‑tn ilmma a‑tbrraḥn

¹⁵ tili‑asn‑tẓḍḍart ad‑ssufuġn ljnun.

¹⁶ isti simɛan, ifk‑as ism l‑ljdid ‹bṭrus›.

¹⁷ isti yaɛqub yus n‑zabdi d‑yuḥanna gʷmas n‑yaɛqub, ifk‑asn ism l‑ljdid ‹bu‑anarjis›, tga lmɛna‑ns ‹tarwa n‑iggig›.

¹⁸ isti andraws d‑filibbus d‑bartulamaws d‑matta d‑tuma d‑yaɛqub yus n‑ḥalfa d‑taddaws d‑simɛan awaṭani,

¹⁹ ntni d‑yahuda ish̬aryuṭ lli‑ra‑izznz yasuɛ tigira.

kra n‑mddn ur‑ssinn ma‑iga yasuɛ

²⁰ iwrri‑d yasuɛ ġakudan s‑tgmmi. munn‑d‑daġ fllas mddn ggutnin aylliġ ur‑akkʷ‑ẓḍarn ad‑ššn aġrum.

²¹ ula aytmas n‑yasuɛ sfldn fllas. aškin‑d ntni a‑t‑awin ašku nnan: «iffuġ ih̬f‑ns.»

²² imma imslmdn n‑ššrɛ lli‑d‑uškanin zġ‑tmdint n‑urušalim, ar‑ttinin: «illa gis ‹bɛl‑zabul.› hati s‑tḥkimt n‑ugllid l‑ljnun a‑s‑a‑issufuġ ljnun.»

²³ imma yasuɛ iġra‑yasn‑d s‑dars, ar‑srsn‑isawal s‑lmɛni yini‑asn: «mamnk a‑ra‑yiri šiṭan a‑issufuġ ih̬f‑ns?

²⁴ iġ‑a‑ttmmaġ yat‑tgldit d‑ih̬f‑ns ur‑ra‑tqama‑tgldit‑an.

²⁵ iġ‑a‑ttmmaġ yat‑tgmmi d‑ih̬f‑ns ur‑ra‑tqama‑tgmmi‑an.

²⁶ ula šiṭan, iġ‑immaġ d‑ih̬f‑ns ur‑ra‑iqama walaynni ra‑iḍr.

²⁷ ur‑iẓḍar yan a‑ikšm s‑tgmmi n‑yan‑idusn a‑d‑yakʷr ayda‑ns iġ‑ur‑zwar‑ikrs ġwalli idusn. iġ‑t‑ikrs, ġakudan a‑rad‑as‑d‑yakʷr tigmmi‑ns.

²⁸ «lḥqq a‑rad‑awn‑iniġ, kullu ddnub n‑bnadm, iẓḍar rbbi ad‑asn‑iṣamḥ fllasn, ula tirggam lli‑s‑a‑rggmn rbbi.

²⁹ walaynni yan irggmn rruḥ lqudus ur‑sar‑as‑fllas‑iṣamḥ. ntta rad‑bdda‑fllas‑yili lḥukm n‑rbbi.»

³⁰ isawl ġmkad ašku ar‑ttinin: «illa gis yan‑rruḥ yʷh̬šnn.»

aytmas l‑lmasiḥ d‑innas

³¹ tašk‑id innas n‑yasuɛ d‑aytmas, biddn‑d ġ‑brra n‑tgmmi, aznn‑d mad‑as‑d‑yaqran.

³² imma ntta sutln‑as mddn, iskiws ġ‑wammas‑nsn. inin‑as‑d: «ha‑innak d‑aytmak ġ‑brra, ar‑srk‑siggiln.»

³³ isawl yasuɛ yini‑asn: «ma‑igan inna ula aytma?»

³⁴ issmaqql ġ‑willi dids skiwsnin yini‑asn: «ha‑inna d‑aytma.

³⁵ ašku wanna iskarn ma‑ira rbbi, nttan a‑igan gʷma ig ulltma ig inna.»