marqus 2 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

lquwwa l‑lmasiḥ

¹ iwrri‑d yasuɛ s‑tmdint n‑kafrnaḥum. zrin kra n‑uwssan s‑sfldn mddn is‑illa ġ‑tgmmi.

² munn‑d fllas mddn ggutnin aylliġ ur‑iqama kra n‑uġẓu ġ‑ugʷns ula ġ‑imi n‑brra. ar‑tn‑isslmad s‑wawal n‑rbbi.

³ aškin‑d kkuẓ mddn asin‑d yan‑urgaz ikušmn.

⁴ ur‑ẓḍarn a‑t‑in‑ssakmurn i‑yasuɛ ašku tɛmmr‑tgmmi s‑mddn ggutnin. ġlin ilmma s‑ukfaf, ssittin yan‑uwzun ġ‑iggi n‑illiġ illa yasuɛ, rẓmn anqubbi, zzugzn‑in imjdin lli‑f‑ign‑ukušam.

⁵ yasuɛ iẓra mamnk a‑bahra‑srs‑umnn, isawl s‑ukušam yini‑as: «way‑iwi, ittin fllak ddnub‑nnk.»

⁶ llan ġin kra n‑imslmdn n‑ššrɛ, gawrn ar‑swingimn d‑ih̬f‑nsn:

⁷ «mah̬ a‑isawl ġwad s‑ġmkad? awal l‑lkufr ayd inna. ma‑iẓḍarn a‑issitti ddnub abla rbbi waḥdut?»

⁸ imma yasuɛ issn ġ‑rruḥ‑ns ma‑ġ‑a‑swingimn, yini‑asn: «mah̬ aylliġ a‑tswingimm d‑ih̬fawn‑nnun ġmkad?

⁹ ma‑gisn‑irh̬an, ad‑iniġ i‑ġwad ikušmn ‹ittin fllak ddnub‑nnk› nġd ad‑iniġ ‹nkr, tasit imjdin‑nnk ar‑ttidut›?

¹⁰ walaynni rad‑awn‑mlġ is‑dari taẓḍḍart ġ‑ddunit ad‑ssittiġ ddnub, nkki lli‑igan yus n‑bnadm.» igrawl ġ‑ukušam yini‑as:

¹¹ «nniġ‑ak, nkr tasit imjdin‑nnk, tddut s‑tgmmi‑nnk.»

¹² inkr ġakudan yasi imjdin‑ns iffuġ ġ‑lgddam n‑mddn‑an. ar‑tɛjjabn kullutn ar‑talġn rbbi ar‑ttinin: «ur‑jju‑nẓri zund mayad.»

iġra‑d lmasiḥ i‑lawi

¹³ iffuġ‑daġ yasuɛ s‑tama n‑umda, aškin‑d dars mddn ggutnin ar‑tn‑isslmad.

¹⁴ iftu yan imikk iẓr lawi yus n‑ḥalfa iskiws ġ‑illiġ a‑tamẓn iqaridn n‑nkkas. yini‑as: «ašk‑id, mun didi.» inkr lawi imun dids.

išša lmasiḥ d‑id‑bu‑nkkas

¹⁵ igawr yasuɛ d‑imḥḍarn‑ns ġ‑tgmmi n‑lawi, idru d‑id‑bu‑nkkas ggutnin d‑wiyyaḍ ʷh̬šnnin. iggut gisn ma‑itmunun d‑yasuɛ.

¹⁶ imma imslmdn n‑ššrɛ l‑lmdhb n‑ifarisin, lliġ‑t‑ẓran ar‑ištta d‑mddn ʷh̬šnnin d‑willi tamẓnin nkkas, sqsan imḥḍarn‑ns: «mah̬ aylliġ a‑ištta d‑id‑bu‑nkkas d‑mddn‑an ʷh̬šnnin?»

¹⁷ lliġ isfld yasuɛ i‑mad‑nnan yini‑asn: «urd ġwilli dusnin a‑iḥtajjan aṭbib walaynni ġwilli uḍnnin. ur‑d‑uškiġ a‑n‑ġrġ i‑willi ġalnin is‑fulkin, walaynni uškiġ‑d a‑n‑ġrġ i‑willi ʷh̬šnnin.»

asqsi f‑uẓum

¹⁸ ġ‑uwssan‑an ar‑taẓumn imḥḍarn n‑yuḥanna amsddam, ntni d‑ifarisin. aškin‑d kra n‑mddn sqsan yasuɛ: «mah̬ aylliġ a‑taẓumn imḥḍarn n‑yuḥanna ntni d‑ifarisin, imma imḥḍarn‑nnk kiyi ur‑a‑taẓumn?»

¹⁹ isawl yasuɛ yini‑asn: «is‑ẓḍarn ayt‑tmġra ad‑aẓumn d‑usli didsn? iġ‑sul‑didsn‑illa‑usli ur‑ẓḍarn ad‑aẓumn.

²⁰ walaynni rad‑d‑aškin‑uwssan lli‑ġ‑ra‑fllasn‑yitti‑usli. ġ‑uwssan‑an a‑ġ‑rad‑taẓumn.

²¹ ur‑illi ma‑ignnun tadġart n‑ttub l‑ljdid f‑tmlsit taqdimt. iġ‑iskr ġmkan ra‑tkkis‑tdġart l‑ljdid zġ‑tqdimt tbbi s‑uggʷar.

²² ur‑illi ma‑itggan aman n‑waḍil iktin l‑ljdid ġ‑ilmawn iqdimn. iġ‑iskr ġmkan rad‑stġn‑waman l‑ljdid ilmawn iqdimn ffin‑waman h̬srn ilmawn. walaynni ar‑tggan aman n‑waḍil l‑ljdid ġ‑ilmawn l‑ljdid.»

asqsi f‑wass n‑usunfu

²³ yan‑wass n‑usunfu ifta yasuɛ d‑imḥḍarn‑ns ġ‑igran ġ‑gr imndi. lliġ a‑ttidun ar‑tkkisn imḥḍarn tizlfin.

²⁴ sawln‑d kra n‑ifarisin inin‑as: «ẓr, mah̬ aylliġ a‑skarn ġ‑wass n‑usunfu ġaylli ur‑gis‑iḥllan?»

²⁵ irar‑asn yasuɛ: «is‑ur‑tġrim f‑dawd ma‑iskr ġakud lliġ‑t‑bahra‑inġa laẓ, ntta d‑willi dids munnin?

²⁶ ikšm s‑tgmmi n‑rbbi ġ‑uwssan n‑abyatar anmġur n‑tgmmi n‑rbbi, išš aġrum lli‑ityawfkan i‑rbbi. ur‑iḥlla a‑t‑išš yan abla inmġurn n‑tgmmi n‑rbbi. išša‑t dawd ifk‑t i‑usmun‑ns.»

²⁷ izayd yasuɛ yini‑asn: «rbbi iskr ass n‑usunfu f‑ssibt n‑bnadm, urd bnadm f‑ssibt n‑wass n‑usunfu.

²⁸ mayad a‑f‑giġ sidis ula n‑wass n‑usunfu, nkki lli‑igan yus n‑bnadm.»