marqus 16 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

tankra l‑lmasiḥ zġ‑lmut

¹ lliġ izri‑wass n‑usunfu, tnkr maryam ullt‑magdala d‑maryam innas n‑yaɛqub ntnti d‑saluma, sġnt isafarn n‑tujjut baš ad‑ddunt ad‑ẓġurnt ddat n‑yasuɛ.

² zikk ṣbaḥ n‑wass l‑lḥdd, bḥra‑di‑tġli tafukt, ftunt s‑umḍḍal.

³ ar‑ttinint i‑ngratsnt: «ma‑rad‑aġ‑issknuki ifir zġ‑imi n‑ifri?» ašku imqqur bahra.

⁴ allnt alln‑nsnt s‑n‑ẓrant ifir yitti zġ‑imi.

⁵ kšmnt s‑umḍḍal afnt‑n yan‑uɛyyal iskiws f‑ufasi, ilsa aslham imlluln. lliġ‑t‑ẓrant ggʷdnt bahra.

⁶ imma ntta isawl yini‑asnt: «ad‑ur‑tiksaḍmt. ar‑tsiggilmt yasuɛ gu‑naṣira lli‑immutn f‑uggjdi. ur‑sul‑illi ġid, hati inkr‑n. ẓramt, ha‑illiġ‑t‑id‑srsn.

⁷ imma ġilad, ddwamt tsslkmmt awal‑ad i‑imḥḍarn‑ns ntni d‑bṭrus, tinimt‑asn: ‹yasuɛ ra‑kʷn‑izwur s‑tmazirt n‑jalil. ġin a‑ġ‑ra‑ti‑tẓrm ġmklli‑s‑awn‑inna.›»

⁸ ffuġnd‑d‑tmġarin zġ‑umḍḍal ar‑srsnti‑tkkat tawda ar‑trgigiynt. rwlnt ur‑nnint yat i‑yan ašku ksuḍnt bahra.

iban lmasiḥ i‑maryam ullt‑magdala

⁹ lliġ‑d‑inkr yasuɛ zikk ṣbaḥ n‑wass l‑lḥdd, iban‑d zwar i‑maryam ullt‑magdala lli‑zġ‑issufġ ssa l‑ljnun,

¹⁰ tddu tini‑t i‑imḥḍarn‑ns. ntni taġ‑tn‑tguḍi bahra ar‑allan.

¹¹ tini‑asn: «iwrri iddr, ẓriġ‑t nkki.» imma ntni ur‑tt‑uminn.

iban lmasiḥ i‑sin zġ‑imḥḍarn‑ns

¹² tiġurdin n‑mayan iban‑d yasuɛ s‑mamnk yaḍni i‑sin zġ‑gisn lliġ ftan ġ‑uġaras s‑iduran ġ‑brra n‑tmdint.

¹³ wrrin‑d inin‑t i‑wiyyaḍ, walaynni ur‑tn‑uminn ula ntni.

iban lmasiḥ i‑imḥḍarn‑ns s‑yan d‑mraw

¹⁴ ġ‑isiggʷra iban‑d yasuɛ i‑yan d‑mraw n‑umḥḍar lliġ skiwsn ar‑šttan. iẓi‑tn ašku qqurn ih̬fawn‑nsn ur‑uminn, ula sfldn s‑willi‑t‑ẓranin lliġ‑d‑inkr zġ‑lmut.

¹⁵ yini‑asn ġakudan: «ffuġat ar‑ttidum s‑ddunit kullutt, ar‑ttbrraḥm s‑lh̬bar‑ad ifulkin i‑kullu mddn.

¹⁶ wanna yumnn iddm ġ‑waman, hati ra‑injm. wanna ur‑yuminn, ra‑fllas‑yili lḥukm n‑rbbi.

¹⁷ ra‑ifk rbbi timitar‑ad i‑willi umnnin, rad‑ssufuġn ljnun s‑ism‑inu, rad‑sawaln s‑iwaliwn l‑ljdid.

¹⁸ iġ‑usin ilgmmaḍn ula iġ‑swan kra inqqan ur‑ra‑tn‑iḍrru. rad‑srasn ifassn‑nsn f‑imuḍan jjin.»

ityalal lmasiḥ s‑ignna

¹⁹ siditnnġ yasuɛ, tiġurdin n‑ma‑srsn‑isawl, ityalal s‑ignna iskiws f‑ufasi n‑rbbi.

²⁰ imma ntni ffuġn ar‑tbrraḥn ġ‑kraygatt mani, ar‑tn‑itɛawan siditnnġ ar‑izzga iwaliwn‑nsn s‑tmitar lli‑iskar f‑ufus‑nsn.