marqus 15 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

ibidd lmasiḥ ġ‑lgddam n‑bilaṭus

¹ lliġ ifaw zzman munn‑d inmġurn n‑tgmmi n‑rbbi d‑imġarn n‑tmazirt d‑imslmdn n‑ššrɛ, ntni d‑imġarn l‑lmḥkama kullutn, mšawarn f‑ma‑rad‑skrn. krfn yasuɛ awin‑t dḥin‑t‑in i‑bilaṭus lḥakm n‑rruman.

² isqsa‑t bilaṭus: «is‑tgit agllid n‑ayt‑yudaya?» irar‑as yasuɛ: «kiyi a‑t‑innan.»

³ nkrn inmġurn n‑tgmmi n‑rbbi ar‑srs‑taštkkan s‑kigan d‑tġawsiwin.

⁴ yini‑as bilaṭus: «is‑ur‑ra‑di‑trart s‑yat? ẓr mnnawt‑tġawsiwin ayd‑fllak‑ttinin.»

⁵ imma yasuɛ ur‑inni yat aylliġ itɛjjb bilaṭus.

bilaṭus iḥkam f‑lmasiḥ s‑lmut

⁶ ikka‑ttin lḥakm ġ‑kraygatt lɛid n‑usurf ar‑asn‑gis‑irẓẓm i‑yan‑uḥbbas nna‑ran.

⁷ illa yan ġ‑lḥbs ġ‑uwssan‑an, ism‑ns barabbas. ityamaẓ ntta d‑wiyyaḍ lliġ ssnkrn uduy f‑ssulṭa n‑rruman, nġn kra n‑mddn.

⁸ munn‑d mddn ggutnin ar‑tḍalabn bilaṭus ad‑asn‑iskr ġmklli‑bdda‑iskar ġ‑lɛid.

⁹ isqsa‑tn bilaṭus: «is‑tram ad‑awn‑rẓmġ i‑ugllid n‑ayt‑yudaya?»

¹⁰ ašku bilaṭus issn inmġurn n‑tgmmi n‑rbbi is‑ḥsadn yasuɛ, ġayan ka‑f‑t‑id‑dḥin.

¹¹ walaynni inmġurn sshiyysn mddn ġ‑tasaɛt‑an baš a‑t‑ḍalbn ad‑asn‑d‑irẓm i‑barabbas.

¹² yini‑asn bilaṭus: «ma‑tram a‑t‑skrġ i‑ġwad mi ttinim agllid n‑ayt‑yudaya?»

¹³ rarn‑as ar‑ssġuyyun: «agʷl‑t f‑uggjdi.»

¹⁴ isqsa‑tn bilaṭus: «mah̬? ma‑iskr yʷh̬šnn?» imma ntni ar‑ssġuyyun s‑uggʷar ar‑ttinin: «agʷl‑t f‑uggjdi a‑immt.»

¹⁵ bilaṭus ira a‑irḍu mddn, irẓm‑asn i‑barabbas, imma yasuɛ, issġurš‑t issufġ‑t a‑immt f‑uggjdi.

ṭṭnẓ lli‑izrin f‑lmasiḥ

¹⁶ awin‑t iɛskrin s‑ṭuẓẓunt n‑tgmmi imqqurn lli‑mi‑ttinin lqṣr, ssmunn‑d kullu lɛskr lli‑illan ġin.

¹⁷ sslsn‑as yan‑uslham iẓggʷaġn, skrn yan‑ttaj zġ‑uzggʷar gn‑as‑t f‑ih̬f.

¹⁸ ar‑fllas‑tsllamn ar‑ttinin: «sslam fllak ay‑agllid n‑ayt‑yudaya.»

¹⁹ ar‑t‑kkatn f‑ih̬f s‑yat‑tġanimt ar‑fllas‑ssufusn ar‑ṭṭarn f‑ifaddn‑nsn ġ‑lgddam‑ns.

²⁰ lliġ gis šbɛan taḍṣa, kkisn‑as aslham aẓggʷaġ sslsn‑as timlsit‑ns, ssufġn‑t a‑t‑nġn f‑uggjdi.

lmasiḥ f‑uggjdi

²¹ amẓn yan‑urgaz imun‑d d‑uġaras, bḥra‑d‑yuška zġ‑brra, inin‑as a‑yasi aggjdi n‑yasuɛ. iga ism‑ns simɛan gu‑kurini, ig babas n‑alaksandrus d‑rufus.

²² awin‑d yasuɛ s‑udġar lli‑mi‑ttinin ‹gulguta›. tga lmɛna‑ns ‹adġar n‑tʷh̬šašt n‑ih̬f.›

²³ irin ad‑as‑fkn aman n‑waḍil iktin lli‑ġ‑illa‑usafar l‑lmurr, imma ntta ur‑t‑iswi.

²⁴ qqnn‑t ġ‑uggjdi alln‑t. bḍun timlsa‑ns i‑ngratsn grn‑d fllasnt asġar, kraygatt yan d‑ma‑ra‑yawi.

²⁵ tga tasaɛt tis tẓa n‑ṣṣbaḥ lliġ‑t‑ugʷln f‑uggjdi.

²⁶ skrn yat talluḥt a‑tml aṣraḍ lli‑s‑as‑ṣrḍn, ityara gis «agllid n‑ayt‑yudaya.»

²⁷ awin‑d sin imh̬h̬arn agʷln‑tn f‑iggjda yan f‑ufasi n‑yasuɛ d‑yan f‑uẓlmaḍ‑ns.

²⁸ ġmkan a‑yuwfa ma‑ityaran ġ‑warra n‑rbbi lli‑innan «ra‑t‑gn d‑yan zġ‑willi ffuġnin zġ‑wawal n‑rbbi.»

rgmn lmasiḥ

²⁹ ar‑t‑rggmn mddn lli‑zraynin ar‑ssmussun ih̬fawn‑nsn ar‑as‑ttinin: «wa‑kiyi lli‑ra‑ih̬lu tigmmi n‑rbbi tbnut‑stt ġ‑kraḍ‑uwssan,

³⁰ jjnjm ih̬f‑nnk tgguzd‑d zġ‑uggjdi.»

³¹ ġmkad‑daġ a‑s‑a‑gis‑teṭnaẓn inmġurn n‑tgmmi n‑rbbi i‑ngratsn ntni d‑imslmdn n‑ššrɛ ar‑ttinin: «hati ijjnjm wiyyaḍ walaynni ur‑iẓḍar a‑ijjnjm ih̬f‑ns.

³² iniyat‑as a‑d‑igguz lmasiḥ‑ad agllid n‑ayt‑rbbi zġ‑uggjdi baš a‑t‑nẓr namn srs.» ula ġwilli dids tyaggalnin f‑iggjda ar‑t‑rggmn ula ntni.

lmut l‑lmasiḥ

³³ lliġ tlkm tasaɛt tis snat d‑mrawt ḍrnd‑d tillas f‑tmazirt‑an kullutt ar tasaɛt tis kraṭṭ n‑tdggʷat.

³⁴ tasaɛt tis kraṭṭ yut yasuɛ s‑yat‑tġuyyit itjhhdn yini: «aluy, aluy, lama šabaqtani?» tga lmɛna‑ns «wa‑rbbi‑nu, wa‑rbbi‑nu, mah̬ a‑yyi‑tflt?»

³⁵ kra zġ‑willi biddnin ġin, lliġ‑as‑sfldn inin: «hati ar‑yaqra i‑nnabi iliyya.»

³⁶ yazzl yan iɛmmr‑d yan‑ušrwiḍ s‑waman l‑lh̬ll ig‑t ġ‑yat‑tġanimt imdi‑t‑in i‑yasuɛ a‑isu, yini‑asn: «zgayat, a‑nẓr is‑ra‑d‑yašk iliyya a‑t‑id‑izzugz.»

³⁷ imma yasuɛ yut s‑yat‑tġuyyit itjhhdn issufġ rruḥ‑ns.

³⁸ ġakudan yut‑ušrrig lh̬amiya n‑tḥanut tamẓlayt ġ‑tgmmi n‑rbbi, tbḍu f‑sin zġ‑uflla ar izdar.

³⁹ imma lqbṭan n‑iɛskrin lli‑ibiddn ġ‑tama n‑yasuɛ, lliġ iẓra mamnk a‑yut s‑tġuyyit issufġ rruḥ‑ns, yini: «s‑ṣṣaḥt iga‑urgaz‑ad yus n‑rbbi.»

⁴⁰ llant ġin kra n‑tmġarin biddnt ġ‑tuggugt ar‑tmnadnt kullu ma‑ijran. tlla gisnt maryam ullt‑magdala, d‑maryam innas n‑aytmatn yaɛqub imẓẓin d‑yusf, ntnti d‑saluma.

⁴¹ kkant‑sttin ar‑tmununt d‑yasuɛ ar‑ti‑tɛawannt lliġ illa ġ‑jalil. ilint ġin tiyyaḍ ggutnin lli‑d‑dids‑uškanin s‑urušalim.

timḍlt l‑lmasiḥ

^42-43 ġassan ar‑tujadn mddn i‑lɛid, ig ass lli‑iqaman i‑wass n‑usunfu. lliġ‑di‑truḥ‑tdggʷat yašk‑id yusf gu‑rama. iga ntta yan zġ‑imġarn l‑lmḥkama, ar‑ti‑tuqqarn mddn. ula ntta ar‑itrju tagldit n‑rbbi a‑di‑tašk. izɛm ikšm s‑dar bilaṭus iḍalb zġ‑gis ddat n‑yasuɛ.

⁴⁴ itɛjjb bilaṭus lliġ isfld is‑yad‑immut. iġr i‑lqbṭan n‑iɛskrin isqsa‑t: «mnšk ayd‑s‑immut?»

⁴⁵ lliġ‑as‑t‑inna lqbṭan ifk ilmma ddat i‑yusf.

⁴⁶ isġ‑d yusf lkttan išwan, izzugz‑d ddat n‑yasuɛ zġ‑uggjdi issmuttl‑tt, isrs‑tt‑in ġ‑yan‑umḍḍal, iga ifri ityawġza ġ‑ujarif. issknuki‑d yan‑ifir iqqn srs imi n‑umḍḍal.

⁴⁷ ar‑n‑gis‑ttmnad maryam ullt‑magdala d‑maryam innas n‑yusf, ẓrnt illiġ‑n‑tettrs ddat n‑yasuɛ.