marqus 14 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

skrn inmġurn f‑ad‑nġn lmasiḥ

¹ sin‑uwssan a‑iqaman i‑lɛid n‑usurf d‑uwssan n‑urh̬ṣiṣ. ar‑siggiln inmġurn n‑tgmmi n‑rbbi d‑imslmdn n‑ššrɛ mamnk a‑rad‑amẓn yasuɛ s‑lḥilt a‑t‑nġn.

² walaynni nnan i‑ngratsn: «urd ġ‑uwssan l‑lɛid baš a‑ur‑duyn mddn.»

tamġart lli‑d‑yiwin tujjut

³ illa yasuɛ ġ‑uduwwar n‑bitɛanya, iskiws ar‑ištta ġ‑tgmmi n‑simɛan lli‑sttin‑ikkan iga anjdam. tkšm‑d dars yat‑tmġart tusi‑d yat‑tbuqqalt n‑uẓru tili‑gis‑tujjut n‑nardin iṣfan, iggut‑bahra‑watig‑ns. trẓ imi n‑tbuqqalt tffi‑tt‑id f‑ih̬f n‑yasuɛ.

⁴ imma ġwilli llanin ġin, kra gisn ibzg fllas inin i‑ngratsn: «mah̬ a‑tjla tujjut‑ad?

⁵ mrad is‑tnza ra‑di‑tawi uggʷar n‑kraḍ id‑miyya n‑nnuqrt, nfk‑tn i‑imẓlaḍ.» bdun ar‑fllas‑ssngmugn.

⁶ imma yasuɛ inna‑yasn: «adjat‑stt. mah̬ aylliġ dids tšqam? hatti tskr gigi afulki.

⁷ imẓlaḍ rad‑bdda‑didun‑ilin. ġakud nna‑tram ra‑tafm ma‑s‑a‑gisn‑tskarm lh̬ir. imma nkki ur‑rad‑bdda‑didun‑iliġ.

⁸ hatti tskr maylli mi tufa. nttat tzwar tẓġur ddat‑inu i‑umḍḍal.

⁹ lḥqq a‑rad‑awn‑iniġ, innaġ a‑tbrraḥn mddn s‑lh̬bar‑ad ifulkin ġ‑kullu ddunit, ra‑ttinin f‑mayd tskr h̬tad, ar‑tt‑id‑srs‑kttin.»

iskr yahuda f‑a‑izznz lmasiḥ

¹⁰ ġakudan inkr yahuda ish̬aryuṭ lli‑igan yan zġ‑sin d‑mraw n‑umḥḍar, iddu s‑dar inmġurn n‑tgmmi n‑rbbi baš ad‑asn‑izznz yasuɛ.

¹¹ lliġ sfldn i‑mad‑asn‑inna, frḥn inin‑as ad‑as‑fkn iqaridn. iwrri ar‑iswingim mamnk a‑ra‑tn‑iɛawn ad‑amẓn yasuɛ.

imḥḍarn jjujadn imnsi n‑usurf

¹² ilkm‑d‑wass amzwaru n‑uwssan n‑urh̬ṣiṣ lli‑ġ‑a‑qqrsn mddn i‑ilqqaġn. sqsan‑t imḥḍarn‑ns: «mani trit a‑srs‑nddu ad‑ak‑n‑gis‑njjujad imnsi l‑lɛid n‑usurf?»

¹³ yazn sin zġ‑imḥḍarn‑ns ġakudan, yini‑asn: «zaydat s‑tmdint. ra‑tmnaggarm yan‑urgaz yusi‑d agdur n‑waman.

¹⁴ ḍfurat‑t s‑tgmmi nna‑s‑ikšm, tinim i‑bu‑tgmmi‑an ‹hati inna‑yak‑d‑umslmd, maniġ illa‑uḥanu lli‑ġ‑rad‑ššġ imnsi n‑usurf nkki d‑imḥḍarn‑inu?›

¹⁵ rad‑awn‑iml yan‑uḥanu n‑uflla imqqurn iswan ingaddan. ġin a‑ġ‑rad‑aġ‑tjjujadm.»

¹⁶ ffuġn imḥḍarn, ddun s‑tmdint afn‑in ġmklli‑asn‑inna. jjujadn imnsi n‑usurf.

iskiws lmasiḥ d‑imḥḍarn‑ns

¹⁷ truḥ‑d‑tdggʷat, ilkm yasuɛ tigmmi ntta d‑imḥḍarn‑ns s‑sin d‑mraw.

¹⁸ lliġ skiwsn ar‑šttan yini‑asn: «lḥqq a‑rad‑awn‑iniġ, ra‑yyi‑izznz yan ġ‑gratun, kunni lli‑didi‑šttanin.»

¹⁹ ṭiyyr‑asn bahra, bdun ar‑t‑sqsan kullutn, kud yan ar‑ittini: «yak, urd nkki?»

²⁰ yini‑asn: «iga yan zġ‑sin d‑mraw lli‑didi‑dranin ġ‑uruku‑ad.

²¹ ha‑yus n‑bnadm ra‑immt ġmklli fllas ityaran, walaynni taguḍi a‑ra‑yili i‑urgaz lli‑izznzan yus n‑bnadm. yuf‑as i‑urgaz‑an mrad is‑ur‑akkʷ‑ilul.»

imnsi n‑siditnnġ

²² lliġ a‑šttan yasi yasuɛ tangult, iškr rbbi ibbi‑tt, ifk‑asn‑tt yini‑asn: «amẓat. h̬tad tga ddat‑inu.»

²³ yasi lkas, iškr rbbi ifk‑asn‑t. sun zġ‑gis kullutn.

²⁴ yini‑asn: «ġwid gan idammn‑inu lli‑ra‑iffi f‑ssibt n‑mddn ggutnin baš ad‑gn lɛhd l‑ljdid ġ‑gratun d‑rbbi.

²⁵ lḥqq a‑rad‑awn‑iniġ, ur‑sul‑rad‑suġ zġ‑lġllt n‑waḍil ar ass lli‑ġ‑ra‑t‑suġ zġ‑ljdid ġ‑tgldit n‑rbbi.»

isawl lmasiḥ f‑ma‑ra‑ijru i‑bṭrus

²⁶ asin ilmma yan‑umarg zġ‑imurign n‑rbbi, ffuġn s‑uwrir n‑zzitun.

²⁷ yini‑asn yasuɛ: «ha‑kunni ra‑yyi‑kullu‑tflm, ašku ityara ‹rad‑utġ amksa, mzrnt‑uwlli.›

²⁸ walaynni tigira n‑ma‑d‑nkrġ zġ‑lmut ra‑kʷn‑zwurġ s‑tmazirt n‑jalil.»

²⁹ isawl bṭrus yini‑as: «wah̬h̬a‑k‑kullu‑fln ur‑sar‑k‑filġ nkki.»

³⁰ imma yasuɛ irur‑as: «lḥqq a‑rad‑ak‑iniġ, ġ‑iḍ‑ad ur‑ra‑iġr‑ufullus snat‑twal ard tinit kraṭṭ‑twal ur‑iyi‑tssint.»

³¹ imma ntta inna‑yas s‑jjhd: «wah̬h̬a rad‑didk‑mmtġ ur‑rad‑iniġ ur‑k‑ssinġ.» ġmkad ad‑nnan kullutn.

ar‑itẓalla lmasiḥ f‑ih̬f‑ns

³² aškin‑d s‑yan‑udġar lli‑mi‑ttinin ‹gatsimani›. yini yasuɛ i‑imḥḍarn‑ns: «gawrat ġid, rad‑ẓẓallġ.»

³³ yawi dids bṭrus d‑yaɛqub d‑yuḥanna. iġuwḍ yasuɛ ġ‑tasaɛt‑an, mmaġn iswingimn bahra ġ‑uwl‑ns.

³⁴ yini‑asn: «tẓẓay flla taġuft‑ad ar lmut. gawrat ġid tawzm.»

³⁵ izayd iftu yan imikk iḍr s‑wakal iẓẓall yini: «ssitti flla tasaɛt‑ad n‑urfufn iġ‑tẓḍar a‑titti.»

³⁶ iẓẓall‑daġ yini: «abba wa‑baba, ur‑illi kra mi ur‑tẓḍart a‑ti‑tskrt. kkis flla lkas‑ad n‑urfufn, walaynni a‑yili ma‑trit, urd mad‑riġ nkki.»

ṭṭasn imḥḍarn

³⁷ iwrri yasuɛ yaf‑tn‑in ṭṭasn. isawl s‑bṭrus yini‑as: «wa‑simɛan, is‑teṭṭast? is‑ur‑tẓḍart a‑tawzt yat tasaɛt?

³⁸ awzat tḍalbm rbbi a‑kʷn‑issanf i‑kullu ma‑ra‑kʷn‑ijllu. hati ul n‑bnadm ar‑ittiri a‑iskar afulki, imma ddat‑ns tḍɛf.»

³⁹ iddu‑daġ a‑iẓẓall yini ġmklli inna tawala tamzwarut.

⁴⁰ iwrri yaf‑tn‑in ṭṭasn, inra‑tn iṭs. ur‑ssinn ma‑rad‑as‑inin.

⁴¹ iwrri tis kraṭṭ‑twal yini‑asn: «ṭṭasat ġila tsunfum. yuwda ġunškad, tlkm‑d tasaɛt. inza yus n‑bnadm s‑gr ifassn n‑mddn ʷh̬šnnin.

⁴² nkrat a‑nddu. ha‑walli‑yyi‑izznzan yuška‑d.»

ityamaẓ lmasiḥ

⁴³ sul a‑isawal s‑d‑iruḥ yahuda lli‑igan yan zġ‑sin d‑mraw n‑umḥḍar. munn‑d dids kigan d‑mddn asin‑d lkmami d‑iɛmad. uznn‑tn‑d inmġurn n‑tgmmi n‑rbbi d‑imslmdn n‑ššrɛ d‑imġarn n‑tmazirt‑an.

⁴⁴ ġwalli izznzan yasuɛ imla‑yasn‑yad tamatart‑ad, yini‑asn: «wanna ssudnġ, ġwan a‑t‑igan. amẓat‑t tawim‑t tḍufm‑t.»

⁴⁵ yašk‑id yahuda iftu s‑dar yasuɛ yini‑as: «way‑amslmd», issudn‑t.

⁴⁶ grn‑in fllas ifassn amẓn‑t.

⁴⁷ inkr ilmma yan zġ‑willi llanin d‑yasuɛ ildi‑d lkummit, yut ah̬ddam n‑unmġur n‑tgmmi n‑rbbi ibbi‑as amẓẓuġ.

⁴⁸ isawl yasuɛ yini‑asn: «ma‑s‑di‑tffuġm s‑lkmami d‑iɛmad a‑yyi‑tġwim zund iġ‑giġ amh̬h̬ar?

⁴⁹ lliġ‑n‑bdda didun kraygatt ass ar‑sslmadġ ġ‑tgmmi n‑rbbi, ur‑iyi‑tumẓm ġ‑uwssan‑an. walaynni ijra ġmkad baš a‑yafu ma‑ityaran ġ‑warratn n‑rbbi.»

⁵⁰ ġakudan rwln kullu imḥḍarn, fln yasuɛ.

⁵¹ iḍfur‑t‑sul yan‑uɛyyal ur‑ilsi ġir aḥayk.

⁵² ġwin‑t mddn‑an, imma ntta ifl aḥayk irwl ur‑ilsi yat.

ibidd lmasiḥ ġ‑lmḥkama

⁵³ awin yasuɛ s‑dar‑unmġur n‑tgmmi n‑rbbi, munn‑d inmġurn kullutn d‑imġarn n‑tmazirt d‑imslmdn n‑ššrɛ.

⁵⁴ imma bṭrus iḍfar‑t zġ‑tuggugt, ikšm s‑wammas n‑tgmmi n‑unmġur, iskiws d‑imh̬zniyn ġ‑dar lɛafit ar‑didsn‑irqqa.

⁵⁵ imma inmġurn n‑tgmmi n‑rbbi d‑imġarn l‑lmḥkama kullutn ar‑siggiln s‑tugga f‑yasuɛ baš a‑t‑nġn, walaynni ur‑ufin yat.

⁵⁶ kigan d‑mddn ar‑fllas‑akkan tugga n‑tkrkas, walaynni ur‑ngaddant tugga‑nsn.

⁵⁷ inkr kra gisn ar‑sskirkisn inin:

⁵⁸ «nkkʷni nsfld‑as inna ‹nkki rad‑h̬luġ tigmmi‑ad n‑rbbi ityawskarn s‑ifassn n‑bnadm, bnuġ ġ‑kraḍ‑uwssan yat yaḍni ur‑ityawskarn s‑ifassn n‑bnadm.›»

⁵⁹ ula ġmkad‑daġ, ur‑ngaddant tugga‑nsn.

⁶⁰ ibidd‑unmġur n‑tgmmi n‑rbbi ġ‑wammas‑nsn, isqsa yasuɛ: «is‑ur‑ra‑d‑fllasn‑trart s‑yat? mayd‑fllak‑ttinin ġwid ġ‑tugga‑nsn?»

⁶¹ imma yasuɛ ġir ifssa, ur‑inni yat. isqsa‑t‑daġ‑unmġur: «izd kiyi a‑igan lmasiḥ yus n‑umbarki?»

⁶² yini‑as yasuɛ: «nkki a‑t‑igan. ra‑tẓrm yus n‑bnadm iskiws f‑ufasi n‑rbbi itjhhdn, iftu‑d ġ‑imdla n‑ignwan.»

⁶³ lliġ‑as‑isfld‑unmġur n‑tgmmi n‑rbbi, ibbi timlsa‑ns yini‑asn: «ma‑sul‑nra inagan‑ad?

⁶⁴ kunni tsfldm i‑wawal‑ns l‑lkufr. ma‑fllas‑tnnam?» ḥkamn fllas kullutn inin: «iqqan‑t‑id a‑immt.»

⁶⁵ inkr kra gisn ar‑fllas‑ssufusn ar‑as‑daln udm ar‑t‑kkatn s‑ibariqn ar‑as‑ttinin: «wa‑nnabi, ml‑aġ manwa‑k‑yutn.» amẓn‑t imh̬zniyn ar‑t‑kkatn.

bṭrus inakr lmasiḥ

⁶⁶ imma bṭrus illa‑sul ġ‑iyzdar ġ‑wammas n‑tgmmi. tašk‑id yat‑th̬ddamt n‑unmġur n‑tgmmi n‑rbbi

⁶⁷ tẓr bṭrus ar‑irqqa, tssmaqql gis tini‑as: «ula kiyi tllit d‑yasuɛ gu‑naṣira.»

⁶⁸ irar‑as nttan: «ur‑ssinġ, ur‑fhimġ ma‑s‑tnnit.» iffuġ s‑uġgʷmmi. iġr‑ufullus ġakudan.

⁶⁹ tẓr‑t‑daġ‑th̬ddamt‑lli, tini fllas i‑willi biddnin ġin: «ġwad iga yan zġ‑gisn.»

⁷⁰ irar‑daġ bṭrus: «uhu.» yan imikk s‑as‑nnan ġwilli biddnin ġin: «s‑ṣṣaḥt tgit kiyi zġ‑gisn ašku gu‑jalil a‑tgit.»

⁷¹ inkr bṭrus ar‑itgalla ar‑ittini s‑jjhd: «nkki ur‑ssinġ argaz‑ad f‑a‑tsawalm.»

⁷² iġr‑ufullus ġakudan tis snat‑twal. ikti‑d bṭrus maylli‑s‑as‑inna yasuɛ «ur‑ra‑iġr‑ufullus snat‑twal ard tinit kraṭṭ‑twal ur‑iyi‑tssint.» iswangm‑d awal‑an ar‑yalla.