marqus 11 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

ikšm lmasiḥ s‑urušalim

¹ akmurn‑in s‑tmdint n‑urušalim. lliġ lkmn awrir n‑zzitun ġ‑tsga n‑bitfaji d‑bitɛanya, yazn yasuɛ sin zġ‑imḥḍarn‑ns

² yini‑asn: «zaydat s‑uduwwar‑an l‑lgddam‑nnun. kšmat srs, ra‑n‑tafm yan‑usnus iqqnn, ur‑jju‑fllas‑ini yan. fsyat‑as tawim‑t‑id.

³ iġ‑awn‑inna kra n‑yan ‹mayd tnawlm?› tinim‑as ‹ira‑t siditnnġ, yan imikk ra‑t‑id‑irar.›»

⁴ ddun afn‑in asnus iqqn ġ‑uġaras ġ‑tama n‑imi n‑yat‑tgmmi. fsin‑as‑d.

⁵ sawln srsn ġwilli biddnin ġin inin‑asn: «mayd tnawlm? mah̬ a‑tfsim i‑usnus‑ad?»

⁶ rarn‑asn s‑ġmklli‑s‑asn‑inna yasuɛ, adjn‑tn.

⁷ awin‑d asnus i‑yasuɛ grn‑in fllas islhamn‑nsn, ini fllas.

⁸ munn‑d mddn ggutnin, ar‑sswan islhamn‑nsn ġ‑uġaras. kra gisn ar‑d‑itbbi tiṣṭṭwin zġ‑isġarn n‑igran ar‑tnt‑sswan ġ‑uġaras.

⁹ frḥn bahra ġwilli zwarnin i‑yasuɛ ġ‑uġaras ula ġwilli‑as‑ggʷranin, ar‑talln awal‑nsn ar‑ttinin: «huṣanna, ambarki a‑iga ġwad‑d‑yuškan s‑ism n‑sidi rbbi.

¹⁰ tambarkit a‑tga‑tgldit n‑babatnnġ dawd lli‑d‑yuškan. huṣanna ġ‑ignna yattuyn.»

tazart lli‑ur‑iskirn lġllt

¹¹ ilkm yasuɛ tamdint n‑urušalim, ikšm s‑tgmmi n‑rbbi ar‑itmnad ġ‑kullu ma‑gis‑illan. iffuġ ilmma ntta d‑imḥḍarn‑ns s‑sin d‑mraw, iddu s‑bitɛanya ašku yaġ‑uzal.

¹² ndid azkka lliġ ffuġn zġ‑bitɛanya inġ‑t laẓ.

¹³ iẓr‑n yat tazart izgzawn ġ‑tuggugt. iftu srs a‑ur‑imil yaf‑n gis kra. lliġ‑tt‑iruḥ ur‑n‑gis‑yufi ġir ifrawn ašku urd azmz n‑ikuzarn ayan.

¹⁴ yini‑as: «zayd a‑ur‑sar‑zgim‑išš yan lġllt.» sfldn imḥḍarn‑ns i‑ma‑inna.

lmasiḥ ar‑iṭṭay imznzn zġ‑tgmmi n‑rbbi

¹⁵ lkmn‑d‑daġ tamdint n‑urušalim, ikšm yasuɛ s‑tgmmi n‑rbbi. inkr ar‑zgis‑iṭṭay ġwilli gis zznzanin ula ġwilli gis saġnin. igllb lmyadi n‑willi tṣrrafnin iqaridn, igllb lkʷrasa n‑willi zznzanin itbirn.

¹⁶ ur‑yudji yan a‑yasi ma‑inzzan ġ‑tgmmi n‑rbbi.

¹⁷ ibdu ar‑tn‑isslmad yini‑asn: «is‑ur‑ityara ġ‑warra n‑rbbi ‹tigmmi‑nu rad‑as‑ttinim tigmmi n‑tẓallit i‑mddn n‑kullu timizar?› imma kunni, hati trurm‑tt tga ifri n‑imh̬h̬arn.»

¹⁸ sfldn‑as inmġurn n‑tgmmi n‑rbbi d‑imslmdn n‑ššrɛ, bdun ar‑siggiln s‑mamnk a‑s‑ra‑t‑hlkn. ksuḍn zġ‑gis ašku ar‑tɛjjabn mddn kullutn ġ‑ulmmud‑ns.

¹⁹ lliġ‑di‑tlkm‑tdggʷat iffuġ yasuɛ d‑imḥḍarn‑ns zġ‑tmdint n‑urušalim.

almmud l‑lmasiḥ i‑imḥḍarn‑ns

²⁰ zikk ṣbaḥ n‑ndid azkka lliġ zrin ġ‑uġaras ẓrn tazart‑lli, tqqur zġ‑iẓuran‑ns.

²¹ ikti‑d bṭrus yini i‑yasuɛ: «way‑amslmd, ssmaqql. tazart lli‑mi‑tdɛit, hatti tqqur.»

²² isawl yasuɛ yini‑asn: «amnat s‑rbbi.

²³ lḥqq a‑rad‑awn‑iniġ, wanna innan i‑uwrir‑ad ‹itti zġ‑ġid tḍrt‑n ġ‑umda,› iġ‑yumn is‑ra‑yili maylli‑s‑inna bla iškka ġ‑uwl‑ns, hati rad‑as‑yili.

²⁴ f‑mayad a‑f‑rad‑awn‑iniġ, kullu ma‑tḍalbm iġ‑a‑ttẓallam i‑rbbi, amnat is‑rad‑awn‑ityawfka, hati rad‑awn‑yili.

^25-26 ġakud nna‑tbiddm ar‑ttẓallam, ṣamḥat i‑wanna gigun iskrn kra yʷh̬šnn, baš ad‑awn‑iṣamḥ babatun lli‑illan ġ‑ignna ula kunni f‑ddnub‑nnun.»

asqsi f‑ma‑d‑yuznn lmasiḥ

²⁷ aškin‑d‑daġ s‑tmdint n‑urušalim. lliġ a‑ifttu yasuɛ ġ‑tgmmi n‑rbbi mnaggarn‑t‑id inmġurn n‑tgmmi n‑rbbi d‑imslmdn n‑ššrɛ d‑imġarn n‑tmazirt.

²⁸ inin‑as: «ma‑k‑id‑yuznn a‑tskart kullu ġayad? awal n‑mi ayd‑s‑a‑ti‑tskart?»

²⁹ isawl yasuɛ yini‑asn: «ula nkki ra‑kʷn‑sqsaġ yan‑usqsi. rarat‑iyi‑d iniġ‑awn ma‑yyi‑d‑yuznn ad‑skarġ mayad.

³⁰ yuḥanna, ma‑t‑id‑yuznn a‑issddam mddn? izd rbbi nġd bnadm? rarat‑iyi‑d.»

³¹ bdun ar‑ssmqsan i‑ngratsn ar‑ttinin: «iġ‑nenna ‹rbbi a‑t‑id‑yuznn› rad‑aġ‑yini ‹mah̬ aylliġ ur‑tuminm mad‑awn‑inna?›

³² walaynni izd‑nnit‑a‑nini ‹bnadm a‑t‑id‑yuznn›?» ntni ksuḍn zġ‑mddn, ašku ar‑kullu‑ttinin izd yuḥanna yan‑nnabi a‑iga.

³³ sawln ilmma inin‑as: «ur‑nssin ma‑t‑id‑yuznn.» irar‑asn yasuɛ: «ula nkki ur‑rad‑awn‑iniġ ma‑yyi‑d‑yuznn ad‑skarġ kullu mayad.»