marqus 10 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

isawl lmasiḥ f‑ṭṭlaq

¹ iffuġ yasuɛ zġ‑ġin ik tisgiw n‑yudaya ilkm tasga yaḍni n‑wasif n‑urdun. munn‑d fllas mddn ggutnin ar‑tn‑isslmad ġmklli‑bdda‑isslmad ġ‑inna ikka.

² aškin‑d kra n‑ifarisin irin a‑t‑armn inin‑as: «is‑iḥlla i‑urgaz a‑ifru i‑tmġart‑ns?»

³ yini‑asn: «ma‑s‑kʷn‑yuṣṣa musa?»

⁴ inin‑as: «musa yudja argaz a‑yara tabrat l‑lfra ifru‑as.»

⁵ irar‑asn yasuɛ: «yura‑yawn awal‑an ašku qqurn‑uwlawn‑nnun,

⁶ walaynni ur‑igi ġmkad ġ‑isizwar n‑ddunit. ġmklli ityaran ‹rbbi iskr awtm d‑tawtmt.›

⁷ ityara‑daġ ‹mayan a‑f‑ra‑ifl‑urgaz babas d‑innas imun d‑tmġart‑ns.

⁸ hatnin sin rad‑wrrin gn yat ddat.› ur‑sul‑gin sin walaynni yat ddat ad‑gan.

⁹ f‑mayan a‑f‑rad‑awn‑iniġ, aynna issmun rbbi, a‑t‑ur‑ibḍu bnadm.»

¹⁰ lliġ wrrin s‑tgmmi sqsan‑t imḥḍarn‑ns f‑tġawsa‑yad.

¹¹ isawl yasuɛ yini‑asn: «wanna ifran i‑tmġart‑ns itahl yat yaḍni, hatin izna fllas.

¹² iġ‑tfra‑tmġart i‑urgaz‑ns itahl‑tt yan yaḍni, hatin zzna ayan tskr ula nttat.»

lmasiḥ ibark tarwa mẓẓinin

¹³ ar‑di‑ttaškin mddn ar‑di‑tawin tarwa mẓẓinin, irin yasuɛ a‑n‑fllasn‑isrs ifassn‑ns ibark‑tn. nkrn imḥḍarn rarn‑tn inin‑asn: «a‑tn‑d‑ur‑tawim.»

¹⁴ imma yasuɛ, lliġ iẓra mayan ṭiyyr‑as yini‑asn: «adjat tarwa mẓẓinin a‑d‑dari‑aškin. a‑tn‑ur‑tḥṣarm, ašku zund ġwid a‑mi‑tlla‑tgldit n‑rbbi.

¹⁵ lḥqq a‑rad‑awn‑iniġ, wanna ur‑irin a‑ikšm s‑tgldit n‑rbbi zund arraw imẓẓin ur‑ra‑srs‑ikšm.»

¹⁶ yasi‑tn ilmma f‑ifaddn‑ns isrs fllasn ifassn‑ns ibark‑tn.

asqsi n‑bu‑wayda

¹⁷ inkr yasuɛ, ra‑d‑iffuġ s‑uġaras s‑d‑yuzzl yan‑urgaz iḍr f‑ifaddn ġ‑lgddam‑ns isqsa‑t: «way‑amslmd ifulkin, ma‑rad‑skrġ baš ad‑ṭṭafġ tudrt l‑lih̬rt?»

¹⁸ isawl yasuɛ yini‑as: «mah̬ aylliġ‑iyi‑tgit d‑wad ifulkin? ur‑illi yan ifulkin abla rbbi waḥdut.

¹⁹ kiyi tssnt luṣiyat, ‹a‑ur‑tnġt, a‑ur‑tznut, a‑ur‑takʷrt, a‑ur‑tfkt tugga n‑tkrkas, a‑ur‑tġʷššut. awi‑tt ġ‑babak d‑innak.›»

²⁰ isawl‑urgaz yini‑as: «way‑amslmd, mayad kullut ar‑t‑skarġ zġ‑lliġ mẓẓiġ sul s‑ġilad.»

²¹ issmaqql gis yasuɛ iḥubbu‑t, yini‑as: «yat‑tġawsa ad‑ak‑iqaman. zayd tzznzt kullu mad‑dark‑illan, tfkt‑t i‑imẓlaḍ yili‑ak‑wayda ġ‑ignna. taškid‑d ilmma tmunt didi.»

²² imma ntta tʷgraẓ‑t f‑wawal‑ad, iddu ṭiyyr‑as ašku iggut‑wayda‑ns bahra.

awal l‑lmasiḥ f‑wayda d‑tgldit n‑rbbi

²³ igrawl‑d yasuɛ issmaqql ġ‑imḥḍarn‑ns yini‑asn: «mnšk a‑s‑išqa f‑willi dar iggut‑wayda ad‑kšmn s‑tgldit n‑rbbi.»

²⁴ ggʷdn imḥḍarn f‑wawal‑ad. izayd yasuɛ yini‑asn: «wa‑tarwa, mnšk a‑s‑išqa ad‑kšmn s‑tgldit n‑rbbi.

²⁵ ra‑irh̬u f‑urɛam a‑ikšm zġ‑tiṭ n‑tasmi ula ikšm yan dar ayda iggutn s‑tgldit n‑rbbi.»

²⁶ ggʷdn s‑uggʷar ar‑ttinin i‑ngratsn: «iġ‑iga ġmkad ma‑ra‑yiẓḍar a‑injm?»

²⁷ issmaqql gisn yasuɛ yini‑asn: «ġ‑dar bnadm ur‑iẓḍar a‑yili walaynni ġ‑dar rbbi. ašku ur‑illi kra mi ur‑iẓḍar rbbi a‑t‑iskr.»

²⁸ inkr bṭrus yini‑as: «ha‑nkkʷni nfl‑n kullu ma‑darnnġ‑illan, našk‑id nmun didk.»

²⁹ yini‑asn yasuɛ: «lḥqq a‑rad‑awn‑iniġ, wanna‑n‑ifln tigmmi‑ns nġd aytmas nġd istmas nġd babas nġd innas nġd tarwa‑ns nġd igran‑ns f‑ssibt‑inu ula f‑ssibt l‑lh̬bar‑ad ifulkin

³⁰ rad‑as‑yili ma‑yugʷrn mayan f‑miyya n‑twal ġilad ġ‑ddunit‑ad, tigʷmma d‑aytmatn d‑taytmatin d‑innatin d‑tarwa d‑igran ntni d‑trfufnt, tili‑as ġ‑lih̬rt tudrt idumn.

³¹ walaynni kigan d‑imzwura a‑ra‑iggʷru, d‑kigan d‑imggura a‑ra‑izwur.»

isawl lmasiḥ tis kraṭṭ‑twal f‑lmut‑ns

³² munn d‑uġaras akmurn‑in s‑tmdint n‑urušalim, izwur‑asn yasuɛ. ġuwḍn imḥḍarn‑ns, imma mddn lli‑asn‑ggʷranin ksuḍn. yawi‑daġ imḥḍarn‑ns s‑sin d‑mraw, isawl srsn f‑ġaylli rad‑as‑ijru, yini‑asn:

³³ «sfldat, ra‑nddu s‑urušalim. imma nkki lli‑igan yus n‑bnadm, ra‑yyi‑n‑dḥin s‑gr ifassn n‑inmġurn n‑tgmmi n‑rbbi d‑imslmdn n‑ššrɛ. rad‑flla‑ḥkamn s‑lmut fkn‑iyi i‑ibrraniyn.

³⁴ ra‑gigi‑teṭnaẓn ssufsn flla ssġuršn‑iyi nġn‑iyi. walaynni ġ‑wis kraḍ‑uwssan rad‑d‑nkrġ zġ‑lmut.»

yaɛqub d‑yuḥanna ḍalbn zġ‑lmasiḥ

³⁵ yašk‑id yaɛqub d‑yuḥanna tarwa n‑zabdi s‑dar yasuɛ inin‑as: «way‑amslmd, nra ad‑aġ‑tskrt kra.»

³⁶ yini‑asn: «ma‑tram ad‑awn‑t‑skrġ?»

³⁷ inin‑as: «fk‑aġ a‑nskiws yan f‑ufasiy‑nnk d‑yan f‑uẓlmaḍ‑nnk ġakud lliġ ra‑tkšmt s‑lmjd n‑tgldit‑nnk.»

³⁸ isawl yasuɛ yini‑asn: «ur‑tssinm mayd tḍalbm. is‑tẓḍarm a‑tsum lkas n‑urfufn lli‑rad‑suġ nkki, tddmm s‑udum lli‑s‑rad‑ddmġ?»

³⁹ inin‑as: «nẓḍar‑as.» irar‑asn yasuɛ: «s‑ṣṣaḥt, lkas lli‑rad‑suġ nkki ra‑ti‑tsum kunni, ula udum lli‑s‑rad‑ddmġ ra‑srs‑tddmm,

⁴⁰ walaynni askiws f‑ufasiy‑inu ula f‑uẓlmaḍ‑inu ur‑igi winu baš a‑t‑fkġ abla i‑willi‑mi‑t‑iskr rbbi.»

⁴¹ sfldn mraw yaḍni i‑mayd inna yaɛqub d‑yuḥanna, bzgn fllasn.

⁴² imma yasuɛ iġra‑yasn‑d kullutn yini‑asn: «tssnm ġwilli ganin igldan n‑ddunit‑ad ar‑tḥkamn f‑ayt‑tmizar‑nsn, tissanm inmġurn‑nsn ar‑tamrn mddn ad‑skarn s‑iwaliwn‑nsn.

⁴³ imma kunni a‑ur‑yili ġmkan ġ‑gratun. wanna iran a‑gigun‑yimġur, illa fllas a‑ig ah̬ddam‑nnun.

⁴⁴ d‑wanna gigun iran a‑izwur, illa fllas a‑ig ismg i‑kullu wiyyaḍ.

⁴⁵ ula nkki lli‑igan yus n‑bnadm, ur‑d‑uškiġ ad‑flla‑th̬damn mddn. uškiġ‑d ad‑th̬damġ, fkġ tudrt‑inu ad‑fukkuġ ma‑iggutn.»

lmasiḥ ijjujji abukaḍ bartimaws

⁴⁶ lkmn tamdint n‑ariḥa. lliġ iffuġ yasuɛ zġ‑ariḥa ntta d‑imḥḍarn‑ns d‑mddn ggutnin, yili ġin yan‑ubukaḍ ism‑ns bartimaws yus n‑timaws, igawr ġ‑tama n‑uġaras ar‑itḍalab.

⁴⁷ lliġ isfld izd yasuɛ gu‑naṣira ayd izrin ar‑itġuwwat ar‑ittini: «wa‑yasuɛ yus n‑dawd, ḥnnu gigi.»

⁴⁸ akʷin gis mddn inin‑as a‑ifssa. imma ntta izuyd ar‑itġuwwat s‑uggʷar ar‑ittini: «wa‑yasuɛ yus n‑dawd, ḥnnu gigi.»

⁴⁹ ibidd yasuɛ yini i‑mddn‑an: «ġrat‑as‑d.» ġrn‑d i‑ubukaḍ inin‑as: «ġir thnna. tnkrt, hati iġra‑yak‑d s‑dars.»

⁵⁰ yakʷi‑ubukaḍ iluḥ aslham‑ns, yašk‑id s‑dar yasuɛ.

⁵¹ isqsa‑t yasuɛ: «ma‑trit ad‑ak‑t‑skrġ?» yini‑as‑ubukaḍ: «wa‑sidi, ad‑isfiwġ.»

⁵² isawl yasuɛ yini‑as: «zayd ġilad, ha‑kiyi tjjit ašku tumnt.» yisfiw ġakudan, iḍfur yasuɛ ġ‑uġaras.