marqus 1 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

¹ lh̬bar ifulkin n‑yasuɛ lmasiḥ yus n‑rbbi.

² ibda ġmklli ityaran ġayd izrin f‑ufus n‑nnabi išaɛya, inna rbbi: «rad‑aznġ arqqas‑inu ad‑ak‑izwur ijjujad‑ak aġaras‑nnk.

³ ha‑yan‑wawal ar‑itbrraḥ ġ‑lh̬la ar‑ittini ‹jjujadat aġaras n‑siditnnġ, tssnmm tiġarasin‑ns.›»

tabrraḥt n‑yuḥanna

⁴ ġmkan a‑s‑d‑iban yuḥanna amsddam ġ‑lh̬la ar‑itbrraḥ ar‑ittini: «flat kullu ma‑tskarm yʷh̬šn, tddmm ġ‑waman, baš ad‑awn‑iṣamḥ rbbi f‑ddnub‑nnun.»

⁵ ffuġn‑d s‑dars mddn ggutnin zġ‑tmazirt n‑yudaya d‑imzdġn n‑tmdint n‑urušalim, ar‑tqrran s‑ddnub‑nsn, ddmn kullutn f‑ufus‑ns ġ‑wasif n‑urdun.

⁶ yuḥanna ar‑ilssa taḍut n‑irɛaman ar‑yaggs s‑ubkkas n‑ilm, ar‑ištta tamurġi d‑tammnt l‑lh̬la.

⁷ ar‑itbrraḥ ar‑ittini: «ra‑d‑yašk tigira‑nu yan yugʷr‑iyi. ur‑sthllaġ ad‑knuġ ad‑rẓmġ ifalan n‑turẓiyin‑ns.

⁸ nkki ssddmġ‑kʷn ġ‑waman, imma ntta ra‑kʷn‑issddm s‑rruḥ lqudus n‑rbbi.»

udum l‑lmasiḥ f‑ufus n‑yuḥanna

⁹ yan‑wass ġ‑uwssan‑an iffuġ yasuɛ tamdint n‑naṣira lli‑illan ġ‑tmazirt n‑jalil, yašk‑id iddm ġ‑wasif n‑urdun f‑ufus n‑yuḥanna.

¹⁰ ġir inkr‑d zġ‑waman s‑iẓra ignwan rẓmn, igguz‑d fllas rruḥ lqudus n‑rbbi zund yan‑utbir,

¹¹ isawl‑d yan‑wawal zġ‑ignwan yini: «kiyi tgit iwi iɛzzan. frḥġ srk bahra.»

šiṭan yurm lmasiḥ

¹² iddu yasuɛ idḥi‑t rruḥ lqudus ġakudan s‑lh̬la.

¹³ ikka‑n ġ‑dar luḥuš ġ‑lh̬la kkuẓ id‑mraw n‑wass, ar‑t‑itarm šiṭan, ar‑ti‑tɛawann lmalayka.

imḥḍarn imzwura

¹⁴ lliġ ityamaẓ yuḥanna ġ‑lḥbs yašk‑id yasuɛ s‑tmazirt n‑jalil ar‑itbrraḥ s‑lh̬bar ifulkin n‑rbbi

¹⁵ ar‑ittini: «ikmml zzman, takmur‑d‑tgldit n‑rbbi. flat kullu ma‑tskarm yʷh̬šn, tġwim ġ‑lh̬bar‑ad ifulkin.»

¹⁶ iftu ġ‑tama n‑umda n‑jalil, iẓr simɛan ntta d‑gʷmas andraws. ingʷmarn n‑islman ad‑gan. grn‑in ššbkt ġ‑umda.

¹⁷ isawl yasuɛ yini‑asn: «aškad‑d munat didi, rarġ‑kʷn a‑tgm ingʷmarn n‑mddn.»

¹⁸ fln ššbayk‑nsn ġakudan, munn dids.

¹⁹ izayd iftu yan imikk s‑n‑iẓra yaɛqub yus n‑zabdi ntta d‑gʷmas yuḥanna. llan ġ‑tanawt‑nsn ar‑tɛdaln ššbayk.

²⁰ iġr‑asn ġakudan, fln‑in babatsn zabdi ġ‑tanawt ntta d‑ih̬ddamn‑ns, munn d‑yasuɛ.

lmasiḥ issufġ ljnn yʷh̬šnn

²¹ ruḥn tamdint n‑kafrnaḥum. ġ‑wass n‑usunfu ikšm yasuɛ s‑tgmmi n‑tẓallit ar‑isslmad mddn.

²² ar‑tɛjjabn ġ‑ulmmud‑ns ašku ar‑srsn‑isawal ġmklli dars lḥqq ad‑asn‑yini ma‑tn‑d‑iqqann a‑t‑skarn. ur‑igi ntta zund imslmdn n‑ššrɛ.

²³ ġ‑tasaɛt‑an illa ġ‑tgmmi n‑tẓallit yan‑urgaz lli‑ġ‑illa yal‑ljnn yʷh̬šnn bahra.

²⁴ yut s‑yat‑tġuyyit yini: «wa‑yasuɛ gu‑naṣira, ma‑illan ġ‑gratnnġ didk? is‑di‑tuškit ad‑aġ‑thlkt? ssnġ ma‑tgit kiyi. amẓlay n‑rbbi a‑tgit.»

²⁵ isawl yasuɛ yamr ljnn yini‑as: «fssa, tffuġt zġ‑gis.»

²⁶ issmḥakka‑t ljnn bahra, yut s‑yat‑tġuyyit itjhhdn iffuġ zġ‑gis.

²⁷ ar‑tɛjjabn mddn kullutn ar‑ssmqsan i‑ngratsn ar‑ttinin: «ma‑iga mayad? kra n‑ulmmud l‑ljdid ayad. hati dars taẓḍḍart iggutn aylliġ a‑itamr ljnun ʷh̬šnnin, ar‑skarn s‑wawal‑ns.»

²⁸ ġakudan ar‑bahra‑sawaln mddn f‑yasuɛ, awin lh̬bar‑ns s‑kraygatt mani ġ‑tmazirt n‑jalil kullutt.

taḍggʷalt n‑simɛan

²⁹ lliġ iffuġ zġ‑tgmmi n‑tẓallit yašk‑id s‑tgmmi n‑simɛan d‑andraws. kšmn srs ntni d‑yaɛqub d‑yuḥanna.

³⁰ afn‑in taḍggʷalt n‑simɛan tgn tuḍn s‑tawla, inin‑as fllas.

³¹ yakmur s‑tama‑ns yamẓ‑as ġ‑ufus issnkr‑tt‑id. titti zgis tawla, tnkr ar‑fllasn‑ttsh̬h̬ar.

lmasiḥ ijjujji imuḍan ggutnin

³² ġ‑tdggʷat n‑ġassan lliġ‑n‑tḍr tafukt aškin‑d mddn s‑dar yasuɛ, awin‑as‑d imuḍan kullutn ula ġwilli‑ġ‑llan ljnun.

³³ munn‑d kullu ayt‑tmdint ġ‑imi n‑tgmmi.

³⁴ ijjujji imuḍan ggutnin zġ‑kullu timuḍan lli‑gisn‑llanin issufġ kigan d‑ljnun. ur‑yudji ljnun a‑fllas‑sawaln, ašku ssnn ntni ma‑iga.

tabrraḥt l‑lmasiḥ ġ‑jalil

³⁵ inkr‑d yasuɛ ġ‑tillas n‑ṣṣbaḥ, iffuġ iftu s‑yan mani ġ‑ur‑illi yan, ar‑ġin‑itẓalla.

³⁶ iḍfur‑t simɛan d‑willi dids llanin.

³⁷ lliġ‑t‑in‑ufan inin‑as: «ha‑mddn kullutn ar‑srk‑siggiln.»

³⁸ imma yasuɛ irur‑asn: «a‑nddu s‑iduran‑an yaḍni a‑n‑tbrraḥġ ġin‑daġ, ašku mayad a‑f‑d‑uškiġ.»

³⁹ izayd ar‑itkka kullu tamazirt n‑jalil ar‑itbrraḥ ġ‑tgʷmma n‑tẓallit ar‑issufuġ ljnun.

lmasiḥ ijjujji anjdam

⁴⁰ yan‑wass yuška‑d dars yan‑unjdam, iḍr ġ‑lgddam‑ns iḍalb‑t bahra yini‑as: «tẓḍart a‑yyi‑tssġust iġ‑trit.»

⁴¹ iḥnnu gis yasuɛ bahra, iggr‑as s‑ufus‑ns, yini‑as: «riġ nkki. ġus.»

⁴² ġakudan yitti zġ‑gis ljdam iġus.

⁴³ yazn‑t yasuɛ yuṣṣa‑t s‑lmɛqul

⁴⁴ yini‑as: «rar lɛaql ad‑ur‑tinit yat i‑yan, walaynni ddu tmlt ih̬f‑nnk i‑unmġur n‑tgmmi n‑rbbi tfkt f‑usġus‑nnk tiġrsi lli‑f‑yuṣṣa musa, a‑tg tugga i‑mddn.»

⁴⁵ imma ntta iffuġ ġakudan ar‑isawal bahra f‑yasuɛ, ar‑itawi lh̬bar n‑mad‑as‑ijran aylliġ ur‑sul‑iẓḍar yasuɛ a‑ikšm ibayyn s‑kra n‑uduwwar. iqama ġ‑lh̬la ar‑n‑dars‑ttaškin mddn zġ‑kraygatt tasga.