luqa 9 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

lmasiḥ yuzn imḥḍarn‑ns s‑sin d‑mraw

¹ iġr‑d yasuɛ i‑imḥḍarn‑ns s‑sin d‑mraw s‑dars, ifk‑asn taḥkimt d‑tẓḍḍart ad‑ssufuġn kullu ljnun ar‑jjujjin timuḍan.

² yazn‑tn a‑ttidun ar‑tbrraḥn f‑tgldit n‑rbbi ar‑jjujjin mddn.

³ yini‑asn: «a‑ur‑tasim yat i‑uġaras. a‑ur‑tawim aɛmud nġd aqʷrab nġd aġrum nġd iqaridn nġd sin iqšban.

⁴ tigmmi nna‑s‑tkšmm, gawrat gis ar akud nna‑ra‑tmuddum zġ‑tmdint‑an.

⁵ tamdint nna‑kʷn‑ur‑irin, ffuġat zġ‑gis tssusm agdrur n‑iḍarn‑nnun, ad‑asn‑ig tamatart ma‑ġ‑a‑swingimn.»

⁶ ġakudan ad‑ftan imḥḍarn ar‑tkkan iduran ar‑tbrraḥn s‑lh̬bar ifulkin ar‑jjujjin mddn ġ‑kraygatt mani.

aduhdu n‑hirudus

⁷ isfld‑ugllid hirudus f‑kullu ma‑iskar yasuɛ, iduhdu ašku ar‑ttinin kra n‑mddn: «yuḥanna amsddam ayad, inkr‑d zġ‑lmut.»

⁸ ar‑ttinin wiyyaḍ: «iban‑d‑daġ nnabi iliyya.» ar‑ttinin wiyyaḍ: «iwrri‑d kra n‑yan zġ‑lanbiya n‑zman.»

⁹ imma hirudus inna: «yuḥanna bbiġ‑as ih̬f, walaynni ma‑iga ġwad f‑sfldġ i‑tġawsiwin‑ad?» yiri bahra a‑iẓr yasuɛ.

lmasiḥ iššuša smmus id‑walf

¹⁰ lliġ‑d‑wrrin irqqasn s‑dar yasuɛ inin‑as f‑kullu mad‑skrn. yawi‑tn waḥdutn ddun s‑tsga n‑yat‑tmdint lli‑mi‑ttinin bitṣayda.

¹¹ sfldn mddn ggutnin f‑manis idda ḍfurn‑t. ifrḥ srsn yasuɛ ar‑asn‑isawal f‑tgldit n‑rbbi, ijjujji ġwilli uḍnnin.

¹² lliġ idda‑wass aškin‑d dars imḥḍarn‑ns s‑sin d‑mraw inin‑as: «azn mddn ad‑ddun s‑iduran d‑igran‑ad akmurnin ad‑afn mad‑šttan ula maniġ a‑nssan, ašku ur‑illi yat ġ‑lh̬la‑yad.»

¹³ imma yasuɛ irur‑asn: «fkat‑asn kunni mad‑šttan.» inin‑as: «ur‑darnnġ ġir smmust‑tngʷal d‑snat‑tslmin. is‑zginnġ‑trit a‑nddu a‑d‑nsġ amššu i‑mddn‑ad kullutn?»

¹⁴ ašku illa ġin ma‑itggan smmus id‑walf n‑urgaz. isawl‑daġ yasuɛ yini i‑imḥḍarn‑ns: «ssgawrat mddn, tgm‑tn d‑tġamatin. ad‑ilin smmus id‑mraw ġ‑kraygatt taġamt.»

¹⁵ skrn ma‑s‑asn‑inna ssgawrn‑tn kullutn.

¹⁶ yasi yasuɛ smmust‑tngʷal‑lli d‑tslmin‑lli s‑snat, yall alln‑ns s‑ignwan iškr rbbi ibbi‑tnt, ifk i‑imḥḍarn‑ns a‑n‑srasn i‑mddn.

¹⁷ ššn kullutn aylliġ šbɛan. ssmunn‑d tuffaẓ lli‑d‑qamanin, ɛmmrn snat d‑mrawt n‑tasllit.

bṭrus ifka tugga‑ns f‑lmasiḥ

¹⁸ yan‑wass ar‑itẓalla yasuɛ waḥdut, aškin‑d dars imḥḍarn‑ns. isqsa‑tn: «ma‑flla‑ttinin mddn, mad‑giġ nkki?»

¹⁹ inin‑as: «kra gisn ar‑ittini tgit yuḥanna amsddam. kra ar‑ittini tgit nnabi iliyya. kra ar‑ittini tgit kra n‑yan zġ‑lanbiya n‑zman inkr‑d iwrri‑d.»

²⁰ yini‑asn yasuɛ: «imma kunni, ma‑flla‑ttinim? mad‑giġ nkki?» isawl‑d bṭrus yini‑as: «tgit lmasiḥ n‑rbbi.»

²¹ yuṣṣa‑tn s‑lmɛqul ad‑ur‑inin mayad i‑yan.

isawl lmasiḥ f‑lmut‑ns

²² yini‑asn: «ha‑nkki lli‑igan yus n‑bnadm iqqan‑iyi‑d ad‑bahra‑rfufnġ. ra‑yyi‑n‑luḥn imġarn n‑tmazirt d‑inmġurn n‑tgmmi n‑rbbi d‑imslmdn n‑ššrɛ. ra‑yyi‑nġn, walaynni wis kraḍ‑uwssan ra‑d‑nkrġ zġ‑lmut.»

²³ yini‑asn kullutn: «wanna iran ad‑didi‑yili, iqqan‑t‑id a‑ittu ih̬f‑ns ar‑itasi aggjdi‑ns kraygatt ass ar‑didi‑itmunu.

²⁴ ašku wanna iran a‑ijjnjm tudrt‑ns ra‑stt‑ijlu, imma wanna ijlan tudrt‑ns f‑ssibt‑inu ra‑stt‑ijjnjm.

²⁵ ma‑ra‑yili i‑bnadm iġ‑iwrri iṭṭaf ddunit kullutt ijlu ih̬f‑ns ih̬sr‑t?

²⁶ wanna ittinin ġ‑gr mddn ur‑iyi‑issin ula issn awal‑inu, rad‑iniġ ur‑t‑ssinġ ula nkki lli‑igan yus n‑bnadm, ġakud lliġ rad‑d‑aškġ s‑lmjd‑inu ula lmjd n‑baba rbbi ula win lmalayka‑ns n‑ignna.

²⁷ lḥqq a‑rad‑awn‑iniġ, illa ġ‑ġwid biddnin ġid ma‑ur‑ra‑immt ard iẓr tagldit n‑rbbi tuška‑d.»

iban‑d musa ula iliyya i‑lmasiḥ

²⁸ izri ma‑itggan tam‑uwssan tigira n‑mayan, iftu yasuɛ iġli s‑yan‑uwrir a‑iẓẓall, yawi dids bṭrus d‑yuḥanna d‑yaɛqub.

²⁹ lliġ a‑itẓalla tbddl ssift n‑uwdm‑ns, wrrint‑tmlsa‑ns mllulnt bahra aylliġ a‑ssmrqiqiynt.

³⁰ biddn‑d dids sin irgazn ar‑dids‑sawaln, gan nnabi musa ula nnabi iliyya.

³¹ bann‑d s‑tifawt l‑lmjd, ar‑sawaln d‑yasuɛ f‑mamnk a‑ra‑iffuġ ddunit ikmml ma‑gis‑iqṣad rbbi ġ‑urušalim.

³² imma bṭrus d‑willi dids llanin, yiwi‑tn‑iyṭṣ. lliġ‑d‑faqn ẓrn lmjd n‑yasuɛ ntta d‑sin irgazn lli‑dids‑biddnin.

³³ iftu musa d‑iliyya ad‑fln yasuɛ s‑isawl bṭrus yini‑as: «wa‑sidi, ifulki a‑nili ġid. ad‑awn‑nskr kraḍ iḥšaš, yan‑nnk d‑yan n‑musa d‑yan n‑iliyya?» ntta ur‑issin ma‑ittini.

³⁴ sul a‑isawal s‑d‑fllasn‑tgguz yat‑tmdlut tdl‑tn. iksaḍn imḥḍarn lliġ‑d‑fllasn‑iḍr‑umalu.

³⁵ ġakudan isawl‑d yan‑wawal zġ‑tmdlut yini‑asn: «ġwad iga iwi amẓlay. sflidat srs.»

³⁶ ġir ifssa‑wawal‑an s‑ẓran yasuɛ iqama waḥdut. ġ‑uwssan‑an ur‑sawln imḥḍarn f‑mad‑ẓran ula nnan‑t i‑yan.

lmasiḥ ijjujji afruh̬ amjnun

³⁷ ndid azkka gguzn‑d zġ‑uwrir, mnaggarn‑t‑in mddn ggutnin.

³⁸ inkr yan‑urgaz ġ‑gratsn iġr‑d i‑yasuɛ yini‑as: «way‑amslmd, ašk‑id ad‑iyi‑tẓrt iwi. ur‑dari abla nttan,

³⁹ yili gis yal‑ljnn. akud nna‑t‑iġwi ljnn ar‑bahra‑issġuyyu, ar‑srs‑ikkat ar‑t‑ibrri ard‑as‑d‑ik‑ukškuš imi, ur‑sul‑a‑ittiri ad‑as‑irẓm.

⁴⁰ ḍalbġ bahra zġ‑imḥḍarn‑nnk a‑t‑zgis‑ssufġn, walaynni ur‑ẓḍarn.»

⁴¹ isawl yasuɛ yini‑asn kullutn: «wa‑tasut‑ad ijlan, ur‑akkʷ‑trit a‑tamnt. mnšk a‑ra‑sul‑didun‑qamaġ? mnšk a‑rad‑didun‑ṣbrġ? awi‑d yuk s‑dari.»

⁴² iftu‑d‑ufruh̬ s‑dar yasuɛ s‑srs‑yut ljnn akal issmḥakka‑t. isawl‑daġ yasuɛ yamr ljnn a‑zgis‑iffuġ, ijjujji‑t irar‑t i‑babas.

⁴³ tɛjjbn mddn‑an kullutn ar‑ttinin: «mnšk ayd‑s‑tggut‑tẓḍḍart n‑rbbi.» sul a‑tɛjjabn mddn ġ‑kullu mayd iskr yasuɛ, s‑isawl s‑imḥḍarn‑ns yini‑asn:

isawl‑daġ lmasiḥ f‑lmut‑ns

⁴⁴ «sfldat i‑ma‑rad‑awn‑iniġ. ha‑nkki lli‑igan yus n‑bnadm, ra‑yyi‑n‑dḥin s‑gr ifassn n‑mddn.»

⁴⁵ walaynni imḥḍarn ur‑ssinn ma‑ira ad‑asn‑iml s‑wawal‑ad. tntl fllasn lmɛna‑ns aylliġ ur‑t‑fhimn, iksaḍn ur‑ẓḍarn a‑t‑fllas‑sqsan.

isawl lmasiḥ d‑imḥḍarn‑ns

⁴⁶ bdun imḥḍarn ar‑tmjaḥadn i‑ngratsn f‑manwa gisn a‑ra‑ig anmġur.

⁴⁷ yasuɛ issn mamnk ad‑swingimn, yawi‑d yan‑warraw imẓẓin issbidd‑t ġ‑tama‑ns

⁴⁸ yini‑asn: «wanna iqbln arraw‑ad imẓẓin s‑ism‑inu, hati iqbl‑iyi. d‑wanna‑yyi‑iqbln, iqbl ġwalli‑yyi‑d‑yuznn. ašku wanna kullu gigun imẓẓin, nttan a‑igan wad imqqurn.»

⁴⁹ yini‑as yuḥanna: «wa‑sidi, nẓra yan‑urgaz ar‑issufuġ ljnun s‑ism‑nnk. ur‑t‑nudji ašku ur‑a‑didnnġ‑itmunu.»

⁵⁰ irar‑as yasuɛ: «a‑t‑ur‑tḥṣarm, ašku wanna‑kʷn‑ur‑itḍaḍḍan, hatin iga zġ‑gigun.»

ayt‑samira ur‑rin lmasiḥ

⁵¹ lliġ‑d‑yakmur‑uzmz lli‑ġ‑ra‑ityattay yasuɛ s‑ignna, iġwi ġ‑ih̬f‑ns iskr f‑urušalim.

⁵² yazn kra n‑irqqasn a‑t‑zwurn s‑tmazirt n‑samira, baš ad‑kšmn s‑yan‑uduwwar ad‑as‑gis‑jjujadn maniġ a‑inssa.

⁵³ walaynni ayt‑tmazirt‑an ur‑t‑rin ašku ssnn izd urušalim a‑f‑iskr.

⁵⁴ imma imḥḍarn‑ns yaɛqub d‑yuḥanna, lliġ ẓran ġayan inin‑as: «wa‑sidi, is‑trit a‑nġr s‑ignwan a‑d‑fllasn‑tgguz lɛafit thlk‑tn?»

⁵⁵ igrawl gisn yasuɛ issfssa‑tn.

⁵⁶ ftun ilmma s‑yan‑uduwwar yaḍni.

ma‑ra‑imun d‑lmasiḥ?

⁵⁷ lliġ a‑ttidun ġ‑uġaras yini‑as yan‑urgaz: «rad‑didk‑munġ s‑innas ra‑tddut.»

⁵⁸ irar‑as yasuɛ: «ibuġaġ darsn tansiwin‑nsn, ula igḍaḍ n‑ignwan darsn usudn‑nsn, imma yus n‑bnadm ur‑dars maniġ a‑isras agayyu‑ns.»

⁵⁹ yini yasuɛ i‑yan yaḍni: «ašk‑id, mun didi.» imma ntta inna‑yas: «a‑sidi, adj‑iyi zwar ad‑wrriġ ard‑n‑mḍlġ baba.»

⁶⁰ irar‑as yasuɛ: «fl ġwilli ur‑ṭṭafnin tudrt a‑n‑mḍln winna‑yasn‑mmutnin. zayd kiyi, ar‑ttawit lh̬bar i‑mddn f‑tgldit n‑rbbi.»

⁶¹ yašk‑id yan yaḍni yini‑as: «rad‑didk‑munġ a‑sidi, walaynni adj‑iyi zwar a‑n‑msafaḍġ d‑ayt‑tgmmi.»

⁶² irar‑as yasuɛ: «wanna yumẓn ġ‑uwallu issmaqql‑n tiġurdin ur‑akkʷ‑igi i‑tgldit n‑rbbi.»