luqa 8 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

lmasiḥ d‑usmun‑ns

¹ tiġurdin n‑mayan iddu yasuɛ ar‑itkka timdinin ula iduran ar‑itbrraḥ s‑lh̬bar ifulkin f‑tgldit n‑rbbi. ar‑dids‑tmunun imḥḍarn‑ns s‑sin d‑mraw,

² ntni d‑kra n‑tmġarin lli‑ijjujji yasuɛ zġ‑tmuḍan‑nsnt issufġ zġ‑gisnt ljnun ʷh̬šnnin. tlla maryam lli‑mi‑ttinin ullt‑magdala, issufġ zġ‑gis ssa ljnun.

³ tili yuwanna tamġart n‑h̬uzi lli‑igan amġar ġ‑tgmmi n‑ugllid hirudus. tili susanna d‑tiyyaḍ ggutnin, ar‑tɛawannt yasuɛ d‑imḥḍarn‑ns zġ‑ma‑igan winsnt.

lmɛna n‑wamud d‑ikalln

⁴ aškin‑d mddn s‑dar yasuɛ zġ‑tmdinin kullutnt n‑tmazirt‑an. lliġ‑d‑fllas‑munn s‑kigan yut‑asn lmɛna‑yad yini‑asn:

⁵ «hay‑afllaḥ iffuġ a‑n‑iluḥ amud. lliġ‑t‑iluḥ iḍr‑n kra ġ‑uġaras, akʷln fllas mddn, grun‑t igḍaḍ.

⁶ iḍr‑n kra f‑isli. lliġ‑d‑imġi yiqar ašku ur‑dars aman.

⁷ iḍr‑n kra ġ‑uzggʷar, iġli d‑uzggʷar iššqajji‑t.

⁸ iḍr‑n kra ġ‑wakal ifulkin imġi‑d ifk ṣṣabt, ifk f‑miyya n‑twal.» izayd yasuɛ yall awal‑ns yini‑asn: «wanna dar imzgan a‑srsn‑isflid, illa fllas a‑isfld.»

⁹ sqsan‑t imḥḍarn‑ns f‑lmɛna‑yad.

¹⁰ yini‑asn yasuɛ: «kunni ityawfka‑yawn a‑tissanm f‑tgldit n‑rbbi ma‑intln f‑wiyyaḍ. imma ntni, ġir s‑lmɛni a‑s‑rad‑asn‑ityawnna. ġmklli ityaran, ‹rad‑tmnadn walaynni ur‑rad‑ẓrn yat. rad‑sflidn walaynni ur‑rad‑fhmn yat.›

¹¹ «ġmkad a‑tga lmɛna‑yad. amud iga awal n‑rbbi.

¹² ġwalli iḍrn ġ‑uġaras iga zund mddn lli‑sfldnin i‑wawal yašk‑id iblis ikkis awal zġ‑ih̬f‑nsn baš a‑ur‑amnn njmn.

¹³ imma ġwalli iḍrn ġ‑isli iga zund mddn lli‑sfldnin i‑wawal frḥn srs walaynni ur‑ikšim‑wawal‑an s‑uwl‑nsn. amnn ġir kra n‑uwssan ard tili tassast s‑knukin.

¹⁴ imma ġwalli iḍrn ġ‑uzggʷar iga zund mddn lli‑sfldnin i‑wawal, ddun ilmma asin tiġufiwin n‑ddunit‑ad lhun s‑wayda ršqn s‑tġawsiwin yaḍni. ġayan a‑iššqajjin awal aylliġ ur‑d‑yiwi ṣṣabt.

¹⁵ walaynni ġwalli iḍrn ġ‑wakal ifulkin iga zund mddn lli‑sfldnin i‑wawal n‑rbbi amẓn‑t s‑nniyt n‑uwl‑nsn iġusn, ar‑srs‑skarn bla‑da‑trmayn, fkn ṣṣabt‑nsn.

lmɛna l‑lqndil

¹⁶ «ur‑illi ma‑issrġan lqndil idl‑t s‑tkint nġd a‑t‑in‑ig ġ‑ddu tisi. walaynni f‑iggi n‑mani yattuyn a‑f‑ra‑t‑in‑isrs, baš a‑tban tifawt i‑kullu wanna‑d‑ikšmn.

¹⁷ kullu ma‑intln, ra‑t‑ẓrn mddn tigira. kullu ma‑idln, ra‑t‑zzudfn ssbayynn‑t‑id.

¹⁸ awiyat‑stt ġ‑mayd mi tsflidm, ašku wanna dar illa, rad‑as‑izayd rbbi. imma wanna ur‑dar‑illi, rad‑as‑ikkis ula maylli‑s‑iġal is‑dars‑illa.»

aytmas l‑lmasiḥ d‑innas

¹⁹ tašk‑id innas n‑yasuɛ d‑aytmas, ur‑ufin maniġ a‑t‑in‑lkkmn ašku ggutn mddn lli‑fllas‑munnin.

²⁰ yini‑as‑d yan: «ha‑innak d‑aytmak biddn‑in ġ‑brra. ran a‑k‑ẓrn.»

²¹ imma ntta inna‑yasn: «inna d‑aytma gan‑tn ġwid sflidnin i‑wawal n‑rbbi ar‑srs‑skarn.»

lmasiḥ yumr aḍu d‑umda

²² yan‑wass ikšm yasuɛ s‑yat‑tanawt ntta d‑imḥḍarn‑ns, yini‑asn: «a‑nddu s‑tsga‑yan yaḍni n‑umda.» ffuġn ftun f‑waman.

²³ lliġ a‑ttidun ign yasuɛ. inkr‑d‑waḍu ġ‑tasaɛt‑an iduy‑umda aylliġ a‑ttɛmmar tanawt s‑waman, tftu a‑tddm.

²⁴ ddun imḥḍarn ssfaqn‑t inin‑as: «wa‑sidi, wa‑sidi, ha‑yaġ ra‑nhlk.» inkr yasuɛ yamr aḍu ula taḍangiwin, s‑zgan kullu, iwrri‑umda ihnna bahra.

²⁵ yini ilmma i‑imḥḍarn‑ns: «is‑ur‑tuminm?» imma ntni ġuwḍn ar‑bahra‑tɛjjabn ar‑ttinin i‑ngratsn: «ma‑iga ġwad aylliġ a‑itamr aḍu d‑umda, ar‑skarn s‑wawal‑ns?»

lmasiḥ ijjujji amjnun

²⁶ lkmn tamazirt n‑garasa, taggug f‑tmazirt n‑jalil ġ‑tsga yaḍni n‑umda.

²⁷ iffuġ yasuɛ zġ‑tanawt s‑t‑id‑imnaggar yan‑urgaz gu‑tmdint‑an, llan gis ljnun. kigan a‑ur‑ilssa yat. ur‑a‑ittiri tigmmi, ar‑izddġ ġir ġ‑gr ismḍal.

²⁸ lliġ iẓra yasuɛ yut s‑yat‑tġuyyit iḍr ġ‑dar iḍarn‑ns iġuwwt yini‑as: «wa‑yasuɛ yus n‑rbbi amattuy, ma‑illan ġ‑griyi didk? ḍalbġ‑ak, ḍalbġ‑ak a‑ur‑iyi‑tssrfufnt.»

²⁹ ašku yasuɛ yumr ljnn a‑zgis‑iffuġ. argaz‑an, mnnawt‑twal a‑t‑yumẓ ljnn. ar‑ti‑tgabaln mddn ar‑t‑kkrfn zġ‑ifassn ula iḍarn s‑ssnasl ula lgyud, walaynni ar‑itbbi ssnasl, ar‑t‑idḥay ljnn s‑lh̬la.

³⁰ isqsa‑t yasuɛ ġakudan: «ma‑iga ism‑nnk?» yini‑as: «iga ism‑inu ‹mnnaw›.» ašku ggutn ljnun lli‑gis‑llanin.

³¹ ḍalbn‑t ljnun bahra a‑tn‑ur‑iṭṭay s‑tdrut n‑wakal.

³² ttyawksa ġ‑uwrir‑an yat‑tuwrut iggutn n‑walfan. ḍalbn‑t ljnun bahra a‑tn‑yadj ad‑kšmn s‑walfan, yadj‑tn.

³³ ffuġn zġ‑urgaz kšmn s‑walfan, tazzl‑tuwrut s‑jjhd zġ‑ujarif s‑umda, h̬sin‑in kullutn.

³⁴ lliġ ẓran imksawn ma‑ijran rwln awin lh̬bar i‑mddn ġ‑tmdint ula igran.

³⁵ ffuġn‑d mddn ad‑ẓrn ma‑illan, aškin‑d s‑dar yasuɛ afn‑d argaz lli‑zġ‑ffuġn ljnun iskiws ġ‑dar iḍarn n‑yasuɛ ils timlsit‑ns yili s‑ih̬f‑ns. d‑ntni ksuḍn.

³⁶ imma ġwilli ẓranin ma‑ijran nnan‑asn f‑mamnk a‑ijji‑umjnun.

³⁷ nkrn mddn‑an n‑ayt‑garasa ġakudan, ḍalbn zġ‑yasuɛ a‑iffuġ tamazirt‑nsn ašku ksuḍn bahra. ikšm yasuɛ s‑tanawt a‑iwrri.

³⁸ imma ġwalli‑zġ‑ffuġn ljnun iḍalb yasuɛ bahra a‑t‑yadj a‑dids‑imun. imma yasuɛ yuzn‑t yini‑as:

³⁹ «wrri s‑tgmmi tinit‑asn f‑mad‑ak‑iskr rbbi.» iddu‑urgaz‑an ar‑itlulli ġ‑tmdint kullutt ar‑isawal f‑mad‑as‑iskr yasuɛ.

lmasiḥ ijjujji illis n‑yayrus d‑tmġart lli‑iggrn i‑tmlsit‑ns

⁴⁰ iwrri‑d yasuɛ s‑tsga‑yad n‑umda. frḥn mddn lliġ‑t‑ẓran ašku ar‑kullu‑srs‑tqln.

⁴¹ yašk‑id yan‑urgaz ism‑ns yayrus, iga yan zġ‑imġarn n‑tgmmi n‑tẓallit. iḍr‑d ġ‑dar iḍarn n‑yasuɛ iḍalb‑t bahra a‑dids‑imun s‑tgmmi‑ns

⁴² ašku ar‑as‑ttmtat illis, ur‑dars abla nttat. tg illis n‑sin d‑mraw n‑usggʷas. iftu yasuɛ imun dids, walaynni ar‑t‑bahra‑ssnukmun mddn zġ‑kraygatt tasga.

⁴³ tili ġ‑gratsn yat‑tmġart tuḍn, illa‑bdda‑gis‑usggʷrd n‑idammn sin d‑mraw n‑usggʷas. tfka kullu ma‑dars‑illan i‑iṭbibn, walaynni ur‑iẓḍar yan a‑stt‑ijjujji.

⁴⁴ tzri zġ‑gr mddn aylliġ truḥ tiġurdin n‑yasuɛ. tggr i‑tama n‑tmlsit‑ns, s‑bbin idammn tjji.

⁴⁵ yini‑asn yasuɛ: «mad‑iyi‑d‑iggrn?» ar‑kullu‑ttinin: «urd nkki, urd nkki.» yini‑as bṭrus: «hati a‑sidi, ggutn mddn‑ad ar‑k‑id‑ssnukmun ar‑k‑dḥayn bahra.»

⁴⁶ imma yasuɛ inna: «iggr‑iyi‑d kra n‑yan, ašku ssḥssaġ is‑zgigi‑tffuġ kra l‑lbaraka.»

⁴⁷ lliġ tssn‑tmġart‑lli is‑ur‑tẓḍar a‑tssntal mayd‑as‑ijran, tašk‑id tḍr ġ‑dar iḍarn n‑yasuɛ ar‑ttrgigiy s‑tawda. tini‑as ġ‑lgddam n‑mddn‑an kullutn ma‑f‑as‑tggr ula mamnk a‑s‑tjji ḥayna.

⁴⁸ yini‑as yasuɛ: «way‑illi, tjjit ġilad ašku tumnt. zayd s‑sslamt.»

⁴⁹ sul a‑dids‑isawal yasuɛ s‑d‑yuška yan zġ‑tgmmi n‑umġar yayrus, yini‑as: «han illik tmmut. a‑ur‑sul‑tssiḥlt amslmd.»

⁵⁰ isfld yasuɛ i‑ma‑inna, isawl s‑yayrus yini‑as: «ad‑ur‑tiksaṭṭ. ġir amn, ra‑tjji.»

⁵¹ lliġ ilkm yasuɛ tigmmi n‑yayrus ur‑yudji yan a‑dids‑ikšm abla bṭrus d‑yuḥanna d‑yaɛqub ntni d‑babas n‑tfruh̬t d‑innas.

⁵² kullu willi llanin ġin ar‑allan ar‑ssġuyyun. imma yasuɛ inna‑yasn: «ad‑ur‑tallam. han ur‑tmmut. ġir tgn.»

⁵³ ar‑gis‑ḍṣṣan ašku ssnn is‑tmmut.

⁵⁴ imma yasuɛ yumẓ‑as ġ‑ufus iġr‑as yini: «wa‑tafruh̬t, nkr‑d.»

⁵⁵ twrri‑tt‑id rruḥ‑ns tbidd f‑iḍarn‑ns. yini‑asn: «fkat‑as ma‑tštta.»

⁵⁶ tɛjjbn ayt‑dars bahra, imma yasuɛ yuṣṣa‑tn ad‑ur‑inin i‑yan f‑ma‑ijran.