luqa 6 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

asqsi f‑wass n‑usunfu

¹ yan‑wass n‑usunfu ifta yasuɛ ġ‑igran ġ‑gr imndi. ar‑tkkisn imḥḍarn‑ns tizlfin ar‑tnt‑jjmjurun ġ‑gr ifassn‑nsn ar‑tnt‑šttan.

² sawln srsn kra n‑ifarisin inin‑asn: «mah̬ aylliġ a‑tskarm ġ‑wass n‑usunfu ġaylli ur‑gis‑iḥllan?»

³ irar‑asn yasuɛ: «is‑ur‑tġrim f‑dawd ma‑iskr ġakud lliġ‑t‑inġa laẓ bahra, ntta d‑willi dids munnin?

⁴ ikšm s‑tgmmi n‑rbbi, yasi aġrum lli‑ityawfkan i‑rbbi. ur‑iḥlla i‑umššu abla i‑inmġurn n‑tgmmi n‑rbbi. išš‑t dawd ifk‑t i‑usmun‑ns.»

⁵ izayd yasuɛ yini‑asn: «imma nkki lli‑igan yus n‑bnadm, giġ sidis n‑wass n‑usunfu.»

argaz lli‑mi‑immut‑ufus

⁶ yan‑wass n‑usunfu yaḍni ikšm yasuɛ s‑tgmmi n‑tẓallit ar‑isslmad. illa ġin yan‑urgaz immut‑as‑ufus afasi.

⁷ ilin kra n‑imslmdn n‑ššrɛ d‑ifarisin ran ad‑afn ġ‑yasuɛ ma‑s‑a‑yas‑ṣraḍn. gabln‑t ad‑ẓrn is‑ra‑t‑ijjujji ġ‑wass n‑usunfu.

⁸ imma yasuɛ issn iswingimn‑nsn, isawl s‑urgaz lli‑mi‑immut‑ufus yini‑as: «ašk‑id s‑wammas.» inkr‑d ibidd ġ‑wammas‑nsn.

⁹ izayd yasuɛ isqsa mddn‑an: «iniyat‑iyi, ma‑iḥllan ġ‑wass n‑usunfu? a‑nskar ma‑ifulkin nġd a‑nskar ma‑yʷh̬šnn? izd a‑njjnjm yan nġd a‑t‑nhlk?»

¹⁰ igrawl gisn kullutn, isawl ilmma s‑urgaz‑lli yini‑as: «mdi‑d afus‑nnk.» imdi‑as‑t‑id s‑ijji idus‑ufus‑ns.

¹¹ imma ntni nkrn‑d gisn iriyn, bdun ar‑tmšawarn i‑ngratsn f‑ma‑rad‑skrn i‑yasuɛ.

sin d‑mraw n‑urqqas

¹² yan‑wass ġ‑uwssan‑an iġli yasuɛ s‑yan‑uwrir a‑iẓẓall. izzri iḍ kullut ar‑itẓalla ar‑itḍalab rbbi.

¹³ lliġ‑d‑iġli‑wass iġr‑d i‑imḥḍarn‑ns s‑dars. isti zġ‑gisn sin d‑mraw, ig‑tn d‑irqqasn‑ns.

¹⁴ isti simɛan ifk‑as ism l‑ljdid ‹bṭrus›, isti andraws gʷmas n‑simɛan. isti yaɛqub d‑yuḥanna d‑filibbus d‑bartulamaws

¹⁵ d‑matta d‑tuma d‑yaɛqub yus n‑ḥalfa d‑simɛan lli‑mi‑ttinin ‹awaṭani›

¹⁶ d‑yahuda yus n‑yaɛqub, ntni d‑yahuda ish̬aryuṭ lli‑ra‑izznz yasuɛ tigira.

ar‑isslmad lmasiḥ ar‑ijjujji

¹⁷ lliġ‑d‑igguz yasuɛ d‑irqqasn‑ns, ibidd ġ‑yan‑udġar yastwan. munn‑d fllas kigan d‑imḥḍarn‑ns d‑mddn yaḍni ggutnin. uškan‑d zġ‑tsgiw n‑yudaya ula urušalim ula zġ‑tmdinin n‑ṣur d‑ṣayda lli‑llanin ġ‑tama n‑umda imqqurn.

¹⁸ irin ad‑sflidn i‑iwaliwn‑ns jjin zġ‑tmuḍan‑nsn. ġakudan ar‑ijjujji ula ġwilli ssrfufunn ljnun ʷh̬šnnin.

¹⁹ ar‑di‑takmurn mddn kullutn ad‑as‑ggrn, ašku ar‑zgis‑ttffuġ lbaraka. ar‑tn‑ijjujji kullutn.

lbaraka ula taguḍi

²⁰ issmaqql yasuɛ ġ‑imḥḍarn‑ns yini‑asn: «imbarkin a‑tgam a‑willi ḥtajjanin, ašku kunni a‑mi‑tlla‑tgldit n‑rbbi.

²¹ imbarkin a‑tgam a‑willi yaġ laẓ ġilad, ašku kunni a‑ra‑išbɛ. imbarkin a‑tgam a‑willi allanin ġilad, ašku kunni a‑ra‑iḍṣṣa.

²² imbarkin a‑tgam iġ‑kʷn‑kurhan mddn ssufġn‑kʷn rgmn‑kʷn ar‑fllawn‑ttinin ‹kunni tʷh̬šnm› f‑ssibt n‑ma‑tgam win yus n‑bnadm.

²³ thnnayat iġ‑a‑skarn ġmkan, tfrḥm bahra, ašku tggut lbaraka lli‑rad‑awn‑yili ġ‑ignna. han ġmkan ad‑skrn imzwura‑nsn i‑lanbiya lli‑zrinin.

²⁴ «walaynni taguḍi a‑rad‑awn‑yili, a‑willi dar iggut‑wayda, ašku tkmml taġamt l‑lh̬ir‑nnun.

²⁵ taguḍi a‑rad‑awn‑yili, a‑willi šbɛanin ġilad, ašku ra‑kʷn‑yaġ laẓ. taguḍi a‑rad‑awn‑yili, a‑willi ḍṣṣanin ġilad, ašku ra‑kʷn‑tigʷraẓ ar‑tallam.

²⁶ taguḍi a‑rad‑awn‑yili iġ‑a‑kʷn‑talġn kullu mddn. han ġmkan ad‑skrn imzwura‑nsn i‑ayt‑tkrkas lli‑ittinin izd lanbiya ad‑gan.

ḥnnwat ġ‑inuwwašn‑nnun

²⁷ «wa‑kunni‑ad sri isflidn, rad‑awn‑iniġ, ḥnnwat ġ‑inuwwašn‑nnun. skrat afulki ġ‑willi‑kʷn‑kurhanin.

²⁸ ḍalbat rbbi a‑ibark ġwilli‑kʷn‑rgmnin, tḍalbm‑t a‑irḥm ġwilli‑kʷn‑ssrfufnnin.

²⁹ iġ‑k‑yut yan f‑umadl, mdi‑as‑n wayyaḍ. iġ‑ak‑yiwi yan aslham‑nnk, adj‑t a‑yawi ula aqššab.

³⁰ kullu wanna zgik iḍalbn, fk‑as. d‑wanna yiwin ma‑igan winnk, a‑t‑ur‑tḍalbt a‑t‑id‑irar.

³¹ skarat d‑mddn ġmklli tram a‑t‑didun‑skarn.

³² iġ‑a‑ttḥnnum ġ‑willi gigun tḥnnunin, man afulki tskrm? ašku ġwilli ʷh̬šnnin ar‑tḥnnun ula ntni ġ‑willi gisn tḥnnunin.

³³ iġ‑a‑tskarm lh̬ir ġ‑willi gigun skarnin lh̬ir, man afulki tskrm? ašku ġwilli ʷh̬šnnin ula ntni ar‑skarn ġmkan.

³⁴ «iġ‑a‑trṭṭlm i‑willi‑s‑tssnm is‑rad‑awn‑tn‑d‑rarn tigira, man afulki tskrm? ašku ġwilli ʷh̬šnnin ar‑rṭṭln ula ntni i‑wiyyaḍ ʷh̬šnnin a‑d‑darsn‑tamẓn ġunšk lli‑asn‑rḍln.

³⁵ walaynni ḥnnwat ġ‑inuwwašn‑nnun, ar‑asn‑tskarm lh̬ir. rṭṭlat bla‑da‑tswingimm a‑tamẓm arṭṭal‑nnun tigira. ġmkad a‑s‑ra‑tgm tarwa n‑rbbi amattuy, tili‑awn lbaraka iggutn. ašku ntta ar‑itfulki d‑willi‑t‑ur‑tškarnin d‑willi skarnin ma‑yʷh̬šnn.

³⁶ tḥnnwat ġ‑wiyyaḍ ġmklli itḥnnu rbbi babatun.

a‑ur‑tḥkamm f‑yan

³⁷ a‑ur‑tinim f‑yan is‑yʷh̬šn, a‑ur‑fllawn‑yini rbbi is‑tʷh̬šnm. a‑ur‑tḥkamm f‑yan, a‑ur‑fllawn‑iḥkam rbbi. ṣamḥat i‑wiyyaḍ f‑ad‑awn‑iṣamḥ rbbi.

³⁸ akkayat i‑wiyyaḍ f‑a‑yawn‑yakka rbbi s‑lɛbrt imqqurn iɛmmrn immussan ttyadar, ra‑n‑tffi ġ‑ušlliq‑nnun. ašku s‑lɛbrt lli‑s‑a‑ttɛbbarm a‑s‑rad‑awn‑ityawɛbbar.»

³⁹ izayd yasuɛ yut‑asn lmɛna‑yad isqsa‑tn: «is‑iẓḍar‑ubukaḍ a‑izwur i‑ubukaḍ? is‑ur‑ra‑n‑ḍrn s‑sin ġ‑ugḍi?

⁴⁰ amḥḍar ur‑yugʷr amslmd‑ns, walaynni kraygatt amḥḍar iġ‑ikmml almmud‑ns ra‑ig zund amslmd‑ns.

⁴¹ mah̬ a‑n‑ttmnadt arftus imẓẓin ġ‑tiṭ n‑gʷmak ur‑tt‑akkʷ‑tiwit ġ‑tggjdit lli‑illan ġ‑tiṭ‑nnk?

⁴² mamnk a‑trit a‑tinit i‑gʷmak ‹adj‑iyi a‑gʷma, ad‑ak‑d‑ssittiġ arftus‑an a‑k‑illan ġ‑tiṭ,› imma kiyi ur‑akkʷ‑tẓrit taggjdit lli‑illan ġ‑tiṭ‑nnk? wa‑bu‑sin‑uwdmawn, ssitti‑zwar taggjdit zġ‑tiṭ‑nnk baš a‑tẓrt mamnk a‑tssittit arftus zġ‑tiṭ n‑gʷmak.

kraygatt tasġart d‑lġllt‑ns

⁴³ «tasġart ifulkin ur‑a‑takka lġllt yʷh̬šnn. tasġart yʷh̬šnn ur‑a‑takka lġllt ifulkin.

⁴⁴ kraygatt tasġart, zġ‑lġllt‑ns a‑zġ‑a‑ttyawssan. ur‑a‑ntkkis ikuzarn zġ‑uzggʷar, ula‑da‑ntkkis aḍil zġ‑ušddir.

⁴⁵ yan ifulkin, ar‑d‑issufuġ ma‑ifulkin zġ‑lh̬zin n‑ufulki lli‑issmun ġ‑uwl‑ns. yan yʷh̬šnn, ar‑d‑issufuġ ma‑yʷh̬šnn zġ‑lh̬zin l‑lh̬ʷšant lli‑issmun ġ‑uwl‑ns. ašku aynna‑s‑iɛmmr‑uwl a‑s‑a‑isawal imi.

lmɛna n‑snat‑tgʷmma

⁴⁶ «mah̬ aylliġ a‑yyi‑ttinim ‹wa‑sidi wa‑sidi› walaynni ur‑a‑tskarm s‑wawal‑inu?

⁴⁷ kullu wanna‑d‑dari‑yuškan isfld i‑iwaliwn‑ad‑inu ar‑srsn‑iskar, rad‑awn‑mlġ ma‑irwas.

⁴⁸ irwas argaz lli‑ibnan tigmmi, iġza bahra izzugz llsas f‑isli. lliġ‑d‑ingi‑wasif yut tigmmi ur‑tt‑issmussi ašku idus llsas‑ns.

⁴⁹ imma wanna isfldn i‑iwaliwn‑ad‑inu ur‑a‑srsn‑iskar, irwas argaz lli‑ibnan tigmmi‑ns f‑wakal ur‑iġza llsas. lliġ‑d‑ingi‑wasif yut tigmmi tḍr‑d, th̬lu kullutt.»