luqa 5 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

imḥḍarn imzwura

¹ yan‑wass ibidd yasuɛ ġ‑tama n‑umda n‑ganisaraṭ, ar‑t‑ssnukmun mddn ggutnin ar‑ttirin ad‑dars‑sfldn i‑wawal n‑rbbi.

² iẓr snat‑tanawin ttrsnt f‑wakal ġ‑tama n‑umda, fln‑tnt ingʷmarn n‑islman, ar‑siridn ššbayk‑nsn.

³ ikšm yasuɛ s‑yat ġ‑tanawin, tg tin simɛan, iḍalb‑t a‑stt‑in‑išškšm imikk s‑waman. igawr ġ‑tanawt ar‑isslmad mddn.

⁴ lliġ ikmml awal‑ns yini i‑simɛan: «zayd‑n s‑ugʷns ar tadrut tgrm‑n ššbayk‑nnun a‑di‑tgmmrm islman.»

⁵ isawl simɛan yini‑as: «iḍ kullut ar‑nkkat tammara a‑sidi, ur‑numẓ yat. walaynni lliġ‑ti‑tnnit kiyi ra‑n‑grġ ššbayk.»

⁶ grn‑tnt‑in ġakudan, s‑tnt‑in‑ufan ɛmmrnt s‑islman ggutnin aylliġ rad‑bbint.

⁷ sillfn‑in i‑imddukkʷal‑nsn ġ‑tanawt yaḍni ad‑d‑aškin ad‑asn‑ɛawnn. lliġ‑tn‑d‑ruḥn ar‑didsn‑ssmunun islman aylliġ ɛmmrnt snat tanawin‑lli, ftunt ad‑ddmnt.

⁸ imma simɛan bṭrus, lliġ iẓra mayd ijran iḍr‑n f‑ifaddn n‑yasuɛ yini‑as: «wa‑sidi, ngara didi. argaz yʷh̬šnn ad‑giġ.»

⁹ ašku iḍr‑as lɛjb ġ‑tuggt n‑islman lli‑d‑umẓn.

¹⁰ ar‑tɛjjabn imddukkʷal‑ns yaɛqub d‑yuḥanna tarwa n‑zabdi ula ntni. imma yasuɛ isawl s‑simɛan yini‑as: «ad‑ur‑tiksaṭṭ. ġilad s‑uflla mddn a‑ra‑ttgmmart.»

¹¹ ssufġn tanawin‑nsn s‑wakal, fln kullu ma‑darsn‑illan, munn d‑yasuɛ.

lmasiḥ ijjujji anjdam

¹² yan‑wass illa yasuɛ ġ‑yat‑tmdint, yašk‑id dars yan‑unjdam yuḍn bahra. lliġ iẓra yasuɛ iḍr ġ‑dar iḍarn‑ns iḍalb‑t bahra yini: «wa‑sidi, tẓḍart a‑yyi‑tssġust iġ‑trit.»

¹³ iggr‑as yasuɛ s‑ufus‑ns yini‑as: «riġ nkki. ġus.» ġakudan yitti zġ‑gis ljdam iġus.

¹⁴ yuṣṣa‑t yasuɛ yini‑as: «a‑ur‑tinit i‑yan f‑mayad, walaynni ddu tmlt ih̬f‑nnk i‑unmġur n‑tgmmi n‑rbbi, tfkt‑as f‑usġus‑nnk tiġrsi lli‑f‑yuṣṣa musa, a‑tg tugga i‑mddn.»

¹⁵ walaynni ar‑fllas‑sawaln mddn s‑uggʷar, awin lh̬bar s‑kraygatt mani. ar‑di‑ttaškin s‑kigan baš ad‑sfldn i‑iwaliwn‑ns jjin dars zġ‑tmuḍan‑nsn.

¹⁶ imma ntta ar‑tn‑ifal iddu s‑mani ih̬wan a‑n‑gis‑iẓẓall.

lmasiḥ ijjujji akušam

¹⁷ yan‑wass yasuɛ ar‑isslmad mddn. gawrn ġ‑gratsn kra n‑mddn l‑lmdhb n‑ifarisin d‑kra n‑imslmdn n‑ššrɛ, uškan‑d zġ‑kullu timdinin n‑jalil ula zġ‑yudaya d‑tmdint n‑urušalim. yasuɛ tlla‑gis‑tḥkimt itjhhdn n‑rbbi a‑ijjujji imuḍan.

¹⁸ aškin‑d kra n‑mddn asin‑d yan‑urgaz ikušmn ign f‑imjdin‑ns. irin a‑t‑in‑srsn ġ‑lgddam n‑yasuɛ,

¹⁹ walaynni ur‑ufin mamnk a‑t‑šškšamn ašku tɛmmr‑tgmmi s‑mddn ggutnin. ssġlin‑t ilmma s‑ukfaf f‑iggi n‑tgmmi, zzugzn imjdin lli‑f‑ign zġ‑gr lyajur s‑wammas n‑mddn ġ‑lgddam n‑yasuɛ.

²⁰ iẓr yasuɛ mamnk a‑bahra‑srs‑umnn, isawl s‑ukušam yini‑as: «way‑argaz, ittin fllak ddnub‑nnk.»

²¹ bdun imslmdn‑lli n‑ššrɛ d‑ifarisin ar‑swingimn d‑ih̬fawn‑nsn: «ma‑iga ġwad ar‑isawal s‑lkufr? ma‑iẓḍarn a‑issitti ddnub abla rbbi waḥdut?»

²² imma yasuɛ issn ma‑ġ‑a‑swingimn, yini‑asn: «mah̬ aylliġ a‑tswingimm d‑ih̬fawn‑nnun ġmkad?

²³ ma‑gisn‑irh̬an, ad‑iniġ ‹ittin fllak ddnub‑nnk› nġd ad‑iniġ ‹nkr ar‑ttidut›?

²⁴ imma ġilad rad‑awn‑mlġ is‑dari taẓḍḍart ġ‑ddunit ad‑ssittiġ ddnub, nkki lli‑igan yus n‑bnadm.» isawl ilmma s‑ukušam yini‑as: «nniġ‑ak, nkr, tasit imjdin‑nnk, tddut s‑tgmmi‑nnk.»

²⁵ inkr ġakudan ġ‑lgddam‑nsn yasi maylli‑f‑ign iddu s‑tgmmi‑ns ar‑italġ rbbi.

²⁶ ġuwḍn mddn‑an kullutn iḍr‑asn lɛjb, ar‑talġn rbbi ar‑ttinin: «tiġawsiwin hiyyanin a‑nẓra ġassad.»

iġra‑d lmasiḥ i‑lawi

²⁷ tiġurdin n‑mayan iffuġ yasuɛ iẓr yan bu‑nkkas ism‑ns lawi, igawr ġ‑tgmmi lli‑ġ‑a‑tamẓn iqaridn n‑nkkas. yini‑as yasuɛ: «ašk‑id, mun didi.»

²⁸ inkr lawi ifl kullu ma‑dars‑illan imun dids.

²⁹ iskr‑as lawi yan‑imnsi imqqurn ġ‑tgmmi‑ns. gawrn didsn id‑bu‑nkkas ggutnin d‑inbgiwn yaḍni.

³⁰ imma ifarisin d‑imslmdn n‑ššrɛ zġ‑lmdhb‑nsn ar‑ssngmugn f‑imḥḍarn n‑yasuɛ inin‑asn: «mah̬ aylliġ a‑tšttam ar‑tssam d‑willi tamẓnin nkkas ula mddn‑an ʷh̬šnnin?»

³¹ isawl yasuɛ yini‑asn: «urd ġwilli dusnin a‑iḥtajjan aṭbib walaynni ġwilli uḍnnin.

³² ur‑d‑uškiġ a‑n‑ġrġ i‑willi ġalnin is‑fulkin, walaynni uškiġ‑d a‑n‑ġrġ i‑willi ʷh̬šnnin, ad‑fln lh̬ʷšant‑nsn.»

asqsi f‑uẓum

³³ sqsan‑t: «mah̬ aylliġ a‑bahra‑taẓumn ar‑tẓallan imḥḍarn n‑yuḥanna ula imḥḍarn n‑ifarisin, imma imḥḍarn‑nnk kiyi ar‑šttan ar‑ssan?»

³⁴ irar‑asn yasuɛ: «is‑tẓḍarm a‑tinim i‑ayt‑tmġra ad‑aẓumn d‑usli didsn?

³⁵ walaynni rad‑d‑aškin‑uwssan lli‑ġ‑ra‑fllasn‑yitti‑usli. ġ‑uwssan‑an a‑ġ‑rad‑taẓumn.»

³⁶ izayd yasuɛ yut‑asn lmɛna‑yad yini‑asn: «ur‑illi ma‑itbbin tadġart zġ‑tmlsit l‑ljdid ig‑tt i‑tmlsit taqdimt. iġ‑iskr ġmkan ra‑ihlk timlsit l‑ljdid, ur‑ra‑di‑tmšaška‑tdġart l‑ljdid d‑tmlsit taqdimt.

³⁷ ur‑illi ma‑itggan aman n‑waḍil iktin l‑ljdid ġ‑ilmawn iqdimn. iġ‑iskr ġmkan rad‑stġn‑waman l‑ljdid ilmawn iqdimn ffin‑waman ġ‑wakal h̬srn ilmawn.

³⁸ walaynni iqqan‑d a‑bdda‑tggan aman l‑ljdid ġ‑ilmawn l‑ljdid.

³⁹ wanna iswan aman n‑waḍil iqdimn ur‑ra‑yiri win ljdid, ašku ar‑ittini ‹aqdim a‑ifulkin.›»