luqa 3 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

tabrraḥt n‑yuḥanna amsddam

¹ ġ‑usggʷas wis smmus d‑mraw n‑ugllid imqqurn qayṣr ṭibaryus, iga bilaṭus gu‑bunṭus lḥakm f‑yudaya, ig hirudus agllid n‑jalil, ig gʷmas filibbus agllid n‑iṭuraya d‑trah̬unitis, ig lisanyas agllid n‑abilini.

² ġ‑uwssan‑an lliġ iga ḥannan d‑qayafa inmġurn hiyyanin n‑tgmmi n‑rbbi, yašk‑id‑wawal n‑rbbi s‑yuḥanna yus n‑zakariyya ġ‑lh̬la.

³ ar‑itkka tisgiw n‑wasif n‑urdun ar‑itbrraḥ ar‑ittini: «flat kullu ma‑tskarm yʷh̬šn, tddmm ġ‑waman, baš ad‑awn‑iṣamḥ rbbi f‑ddnub‑nnun.»

⁴ ġmkan a‑s‑yuwfa ma‑ityaran ġ‑warra n‑nnabi išaɛya inna: «ha‑yan‑wawal ar‑itbrraḥ ġ‑lh̬la ar‑ittini ‹jjujadat aġaras n‑siditnnġ, tssnmm tiġarasin‑ns.

⁵ ra‑tngadda kraygatt talat, astwan idrarn ula iwrar. ra‑inm‑uġaras nna‑ilullin, trh̬u‑tġarast nna‑išqan.

⁶ rad‑ẓrn kullu mddn anjjam lli‑ra‑d‑yazn rbbi.›»

⁷ aškin‑d mddn ggutnin s‑dar yuḥanna, irin a‑tn‑issddm ġ‑waman. imma ntta inna‑yasn: «wa‑tarwa n‑ifaġrn, mad‑awn‑innan izd ġmkad a‑s‑ra‑tanfm i‑lɛqubit lli‑ra‑ittut f‑ddunit?

⁸ skarat afulki baš a‑iban is‑tflm ma‑yʷh̬šnn. a‑ur‑ttinim i‑ngratun ‹nkkʷni nga tarwa n‑ibrahim,› ašku rad‑awn‑iniġ, rbbi iẓḍar a‑d‑issnkr tarwa i‑ibrahim ula zġ‑iẓran‑ad.

⁹ hay‑aglzim ittrs f‑uggja n‑usġar. kud tasġart nna‑ur‑yakkan lġllt imimn, ra‑stt‑ibbi iluḥ‑tt‑in ġ‑lɛafit.»

¹⁰ sqsan‑t mddn: «ini‑aġ mad‑aġ‑d‑iqqann a‑t‑nskr?»

¹¹ irar‑asn: «wanna iṭṭafn sin iqšban, ifk yan i‑wanna ur‑dar‑illi. wanna dar ma‑ištta, ibḍu‑t d‑wiyyaḍ.»

¹² aškin‑d dars ilmma kra zġ‑willi tamẓnin iqaridn n‑nkkas, irin a‑tn‑issddm, sqsan‑t: «way‑amslmd, mad‑aġ‑d‑iqqann a‑t‑nskr nkkʷni?»

¹³ irar‑asn: «a‑ur‑ttamẓm zġ‑dar mddn uggʷar n‑ma‑kʷn‑d‑yuškan.»

¹⁴ aškin‑d ilmma kra n‑iɛskrin sqsan‑t: «imma nkkʷni, mad‑aġ‑d‑iqqann a‑t‑nskar?» irar‑asn: «a‑ur‑ttɛddam f‑yan ula tssḍrm lbaḍl f‑yan. zaydat tqnɛum s‑tġrad‑nnun.»

¹⁵ ar‑bahra‑swingimn mddn ġ‑yuḥanna, ar‑ssmqsan i‑ngratsn: «izd ġwad a‑igan lmasiḥ lli‑ra‑d‑yazn rbbi?»

¹⁶ isawl yuḥanna yini‑asn: «ha‑yyi ar‑kʷn‑ssddamġ ġ‑waman walaynni ra‑d‑yašk yan yugʷr‑iyi, ur‑sthllaġ ad‑rẓmġ ifalan n‑turẓiyin‑ns. ra‑kʷn‑issddm nttan s‑rruḥ lqudus d‑lɛafit,

¹⁷ yasi tazzrt a‑izuzzr, issmun‑d irdn‑ns ġ‑uḥanu, ijdr alim s‑lɛafit ur‑sar‑ih̬sin.»

¹⁸ izayd yuḥanna s‑iwaliwn ggutnin ar‑itbrraḥ i‑mddn f‑lh̬bar ifulkin ar‑asn‑ittini ad‑d‑wrrin s‑uġaras n‑rbbi.

¹⁹ iẓi yuḥanna d‑ugllid hirudus f‑ssibt n‑hirudiyya lli‑yiwi hirudus wah̬h̬a tga tamġart n‑gʷmas. isawl srs yuḥanna f‑mnnawt lh̬ʷšanat yaḍni ar‑tnt‑iskar.

²⁰ imma hirudus izuyd i‑kullu ġayan, iluḥ‑n yuḥanna ġ‑lḥbs.

udum l‑lmasiḥ f‑ufus n‑yuḥanna

²¹ tiġurdin n‑ma‑issddm yuḥanna kullu mddn‑an, issddm yasuɛ ula ntta. ibidd yasuɛ ar‑itẓalla, s‑rẓmn ignwan

²² igguz‑d fllas rruḥ lqudus ġ‑ssift n‑yan‑utbir, isawl‑d yan‑wawal zġ‑ignwan yini: «kiyi tgit iwi iɛzzan. frḥġ srk bahra.»

tasutin lli‑zġ‑iga lmasiḥ

²³ lliġ igra yasuɛ ġ‑twuri‑ns yili dars ma‑itggan kraḍ id‑mraw n‑usggʷas. ar‑as‑ttinin yus n‑yusf yus n‑ɛali

²⁴ yus n‑mattat yus n‑lawi yus n‑malki yus n‑yannay yus n‑yusf

²⁵ yus n‑mattitya yus n‑ɛamus yus n‑naḥum yus n‑ḥasli yus n‑naggay

²⁶ yus n‑maḥat yus n‑mattitya yus n‑šimɛi yus n‑yusih̬ yus n‑yuda

²⁷ yus n‑yuḥanna yus n‑risa yus n‑zrubbabl yus n‑šaltyal yus n‑nir

²⁸ yus n‑malki yus n‑addi yus n‑quṣm yus n‑almmudam yus n‑ɛir

²⁹ yus n‑yašuɛ yus n‑aliɛazr yus n‑yurim yus n‑mattat yus n‑lawi

³⁰ yus n‑šimɛun yus n‑yahuda yus n‑yusf yus n‑yunam yus n‑alyaqim

³¹ yus n‑malya yus n‑manna yus n‑mattata yus n‑natan yus n‑dawd

³² yus n‑išay yus n‑ɛubid yus n‑buɛaz yus n‑šalaḥ yus n‑naḥšun

³³ yus n‑ɛminadab yus n‑admin yus n‑arni yus n‑ḥaṣrun yus n‑fariṣ yus n‑yahuda

³⁴ yus n‑yaɛqub yus n‑isḥaq yus n‑ibrahim yus n‑taraḥ yus n‑naḥur

³⁵ yus n‑sarug yus n‑raɛu yus n‑falag yus n‑ɛabr yus n‑šalaḥ

³⁶ yus n‑qinan yus n‑arfakšad yus n‑šam yus n‑nuḥ yus n‑lamak

³⁷ yus n‑matušalaḥ yus n‑ah̬nuh̬ yus n‑yarad yus n‑mahalalil yus n‑qinan

³⁸ yus n‑anus yus n‑šit yus n‑adam yus n‑rbbi.