luqa 22 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

skrn inmġurn f‑ad‑nġn lmasiḥ

¹ yakmur‑d lɛid n‑urh̬ṣiṣ lli‑mi‑ttinin‑daġ lɛid n‑usurf.

² inmġurn n‑tgmmi n‑rbbi d‑imslmdn n‑ššrɛ ar‑siggiln s‑mamnk a‑rad‑nġn yasuɛ, walaynni ksuḍn zġ‑mddn.

³ ġakudan a‑ikšm šiṭan s‑yahuda lli‑mi‑ttinin ish̬aryuṭ, iga yan zġ‑sin d‑mraw n‑umḥḍar.

⁴ iddu yahuda s‑dar inmġurn n‑tgmmi n‑rbbi d‑win imh̬zniyn, imšawar didsn f‑mamnk a‑rad‑asn‑izznz yasuɛ.

⁵ frḥn ntni inin‑as rad‑as‑fkn iqaridn.

⁶ imšaška‑d didsn, iwrri ar‑iswingim mamnk a‑ra‑tn‑iɛawn ad‑amẓn yasuɛ ġ‑kra n‑tasaɛt ġ‑ur‑llin mddn.

imḥḍarn jjujadn imnsi n‑usurf

⁷ ilkm‑d‑wass n‑urh̬ṣiṣ lli‑ġ a‑qqrsn mddn i‑ilqqaġn l‑lɛid n‑usurf.

⁸ inkr yasuɛ yazn bṭrus d‑yuḥanna yini‑asn: «zaydat tjjujadm‑aġ imnsi l‑lɛid n‑usurf a‑t‑nšš i‑ngratnnġ.»

⁹ inin‑as: «mani trit a‑t‑in‑gis‑njjujad?»

¹⁰ yini‑asn: «ẓrat, ra‑n‑tkšmm s‑tmdint, tmnaggarm yan‑urgaz yusi‑d agdur n‑waman. ḍfurat‑t s‑tgmmi nna‑s‑ikšm,

¹¹ tinim i‑bu‑tgmmi‑an ‹hati inna‑yak‑d‑umslmd, maniġ illa‑uḥanu lli‑ġ‑rad‑ššġ imnsi n‑usurf nkki d‑imḥḍarn‑inu?›

¹² rad‑awn‑iml bu‑tgmmi‑an yan‑uḥanu n‑uflla imqqurn iswan. ġin a‑ġ‑ra‑tjjujadm.»

¹³ ddun ntni afn‑in ġmklli‑asn‑inna, jjujadn imnsi n‑usurf.

imnsi n‑siditnnġ

¹⁴ lliġ‑di‑tlkm tasaɛt n‑imnsi, iskiws yasuɛ a‑išš d‑irqqasn‑ns,

¹⁵ yini‑asn: «mnšk a‑s‑riġ ad‑didun‑ššġ imnsi‑ad n‑usurf ur‑ta‑mmutġ.

¹⁶ ašku rad‑awn‑iniġ, ur‑sul‑ra‑t‑ššġ ard yafu ġ‑tgldit n‑rbbi.»

¹⁷ yasi lkas iškr rbbi, yini i‑imḥḍarn‑ns: «amẓat lkas‑ad, tsum zġ‑gis kullukn.

¹⁸ rad‑awn‑iniġ, ur‑sul‑rad‑ssuġ zġ‑lġllt n‑waḍil ard‑di‑tašk‑tgldit n‑rbbi.»

¹⁹ yasi tangult, iškr rbbi ibbi‑tt ifk‑asn‑tt yini‑asn: «h̬tad tga ddat‑inu, ttyawfka f‑ssibt‑nnun. skarat mayad a‑yyi‑d‑srs‑tswingimm.»

²⁰ yasi ula lkas ġmkad ġ‑isiggʷra n‑imnsi, yini‑asn: «lkas‑ad iga lɛhd l‑ljdid ġ‑gratun d‑rbbi s‑idammn‑inu lli‑ra‑iffi f‑ssibt‑nnun.

²¹ walaynni hay‑afus n‑walli‑yyi‑n‑izznzan ittrs didi ġ‑lmida‑yad.

²² ra‑immt yus n‑bnadm ġmklli iqṣad rbbi, walaynni taguḍi a‑ra‑yili i‑urgaz lli‑t‑izznzan.»

²³ bdun ntni ar‑ssmqsan i‑ngratsn f‑manwa gisn a‑ra‑iskr ġayan.

ma‑ra‑ig anmġur ġ‑tgldit n‑rbbi?

²⁴ ar‑tẓin imḥḍarn i‑ngratsn f‑manwa gisn a‑ra‑ig anmġur.

²⁵ isawl srsn yasuɛ yini‑asn: «ha‑igldan n‑ddunit ar‑tḥkamn f‑ayt‑tmizar‑nsn, ula inmġurn‑nsn ar‑ttirin mddn ad‑fllasn‑ttinin ‹id‑bu‑ljudit›.

²⁶ imma kunni, a‑ur‑yili ġmkan ġ‑gratun, ašku ġwalli gigun imqqurn illa fllas a‑ig zund ġwalli imẓẓin, ig‑umzwaru zund ah̬ddam.

²⁷ ma‑imqqurn? izd ġwalli igawrn ar‑ištta nġd ġwalli‑as‑d‑israsn amššu? is‑urd ġwalli igawrn ar‑ištta? walaynni lliġ nkki ġ‑gratun zund ah̬ddam.

²⁸ «kunni a‑didi‑ibiddn kullu ussan‑ad n‑trfufnt‑inu.

²⁹ ġmklli‑yyi‑ifka baba rbbi tagldit, rad‑awn‑fkġ ula kunni

³⁰ a‑tšttam ar‑tssam ġ‑dar lmida‑nu ġ‑tgldit‑inu, tgawrm f‑lɛruš ar‑ttḥkamm f‑kullu ayt‑rbbi.»

isawl lmasiḥ f‑ma‑ra‑ijru i‑bṭrus

³¹ isawl yasuɛ s‑bṭrus yini‑as: «simɛan, simɛan, han šiṭan iḍalb a‑kʷn‑izuzzr ġmklli izuzzur‑ufllaḥ ibḍu alim d‑irdn.

³² walaynni ḍalbġ rbbi fllak a‑ur‑immt liman‑nnk. ġakud lliġ twrrit, ssdus aytmak.»

³³ yini‑as bṭrus: «wa‑sidi, ha‑yyi ujadġ ad‑didk‑dduġ s‑lḥbs mmtġ didk.»

³⁴ imma yasuɛ irur‑as: «wa‑bṭrus, rad‑ak‑iniġ, ġ‑iḍ‑ad ur‑ra‑iġr‑ufullus ard tinit kraṭṭ‑twal ur‑iyi‑tssint.»

³⁵ isqsa yasuɛ imḥḍarn‑ns yini‑asn: «ġ‑uwssan lli‑ġ‑kʷn‑uznġ bla aqʷrab ula awmmis ula turẓiyin is‑tlkmm f‑kra ġ‑uwssan‑an?» inin‑as: «uhu, ur‑nlkim f‑yat.»

³⁶ yini‑asn: «imma ġilad, wanna dar aqʷrab ula awmmis illa fllas a‑tn‑dids‑yawi. wanna ur‑dar lkummit illa fllas a‑izznz aslham‑ns isġ‑tt‑id.

³⁷ ašku rad‑awn‑iniġ, iqqan‑d a‑ijru maylli flla ityawnnan ġayd izrin ityara: ‹gan‑t d‑yan zġ‑willi ffuġnin zġ‑ššrɛ n‑rbbi.› hati ra‑yafu kullu ma‑flla‑ityaran.»

³⁸ inin‑as imḥḍarn‑ns: «ẓr a‑sidi, ha‑snat lkmami.» imma ntta irur‑asn: «yuwda.»

ar‑itẓalla lmasiḥ f‑ih̬f‑ns

³⁹ iffuġ yasuɛ zġ‑tmdint iddu s‑uwrir n‑zzitun ġmklli‑bdda‑ittidu s‑ġin. munn dids imḥḍarn‑ns.

⁴⁰ lliġ lkmn adġar‑an yini‑asn: «ẓẓallat tḍalbm rbbi a‑kʷn‑issanf i‑kullu ma‑ra‑kʷn‑ijllu.»

⁴¹ ifl‑tn iftu yaggug‑n fllasn ma‑itggan kkuẓ id‑mraw n‑uẓmmuẓl, iḍr f‑ifaddn‑ns ar‑itẓalla,

⁴² yini: «wa‑baba ḍalbġ‑ak iġ‑trit, kkis flla lkas‑ad n‑urfufn. walaynni a‑yili ma‑trit, urd mad‑riġ nkki.»

⁴³ ġakudan igguz‑d dars yal‑lmalak zġ‑ignna issdus‑t.

⁴⁴ iġuwḍ yasuɛ bahra, ar‑itẓalla s‑uggʷar aylliġ a‑zgis‑itaddum lɛrg f‑wakal zund timqqa n‑idammn.

⁴⁵ lliġ ikmml taẓallit inkr iwrri s‑dar imḥḍarn‑ns, yaf‑tn‑in ṭṭasn. nhatafn s‑taġuft lli‑usin.

⁴⁶ yini‑asn: «mah̬ a‑teṭṭasm? nkrat tḍalbm rbbi a‑kʷn‑issanf i‑kullu ma‑ra‑kʷn‑ijllu.»

uškan‑d ad‑amẓn lmasiḥ

⁴⁷ sul a‑isawal s‑d‑ruḥn mddn ggutnin, izwur‑asn‑d yahuda lli‑igan yan zġ‑sin d‑mraw n‑umḥḍar. iftu s‑dar yasuɛ a‑t‑issudn,

⁴⁸ imma yasuɛ inna‑yas: «wa‑yahuda, izd s‑usudn a‑s‑trit a‑tzznzt yus n‑bnadm?»

⁴⁹ lliġ ẓran imḥḍarn‑ns ma‑ra‑ijru inin‑as: «wa‑sidi, is‑trit a‑tn‑nṭṭay s‑lkmami‑ad?»

⁵⁰ inkr yan zġ‑imḥḍarn yut ah̬ddam n‑unmġur n‑tgmmi n‑rbbi ibbi‑as amẓẓuġ afasi.

⁵¹ imma yasuɛ inna‑yasn: «zgayat.» iggr‑n i‑umẓẓuġ n‑uh̬ddam ijjujji‑t.

⁵² isawl yasuɛ s‑inmġurn n‑tgmmi n‑rbbi d‑win imh̬zniyn d‑imġarn n‑tmazirt lli‑d‑uškanin a‑t‑amẓn, yini‑asn: «ma‑s‑di‑tffuġm s‑lkmami d‑iɛmad zund iġ‑giġ amh̬h̬ar?

⁵³ lliġ‑n‑bdda didun kraygatt ass ġ‑tgmmi n‑rbbi, ur‑iyi‑tumẓm ġ‑uwssan‑an, walaynni tasaɛt‑nnun ayad a‑gis‑tḥkam lquwwa n‑tillas.»

bṭrus inakr lmasiḥ

⁵⁴ ġwin yasuɛ awin‑t s‑tgmmi n‑unmġur n‑tgmmi n‑rbbi, iḍfur‑t bṭrus zġ‑tuggugt.

⁵⁵ ssrġan mddn lɛafit ġ‑wammas n‑tgmmi, gawrn ġ‑tama‑ns. iddu bṭrus iskiws ġ‑gratsn.

⁵⁶ tẓr‑t yat‑th̬ddamt ġ‑tifawt l‑lɛafit, tssmaqql gis tini i‑mddn‑an: «ula ġwad illa d‑yasuɛ.»

⁵⁷ irar‑as bṭrus: «wa‑tamġart, ur‑t‑ssinġ nkki.»

⁵⁸ yan imikk s‑t‑iẓra yan yaḍni yini‑as: «ula kiyi tgit yan zġ‑gisn.» irar‑as‑daġ bṭrus: «way‑argaz, urd nkki.»

⁵⁹ tzri yat tasaɛt s‑isawl yan yaḍni s‑jjhd yini‑asn: «s‑ṣṣaḥt, ġwad illa dids ula ntta, ašku gu‑jalil a‑iga.»

⁶⁰ irar‑d‑daġ bṭrus: «way‑argaz, han ur‑ssinġ mayd ttinit.» ġakudan sul a‑isawal s‑iġra‑ufullus.

⁶¹ igrawl siditnnġ issmaqql ġ‑bṭrus. iswangm‑d bṭrus awal lli‑s‑as‑inna siditnnġ: «ġ‑iḍ‑ad ur‑ra‑iġr‑ufullus ard tinit kraṭṭ‑twal ur‑iyi‑tssint.»

⁶² iffuġ bṭrus ar‑yalla bahra.

ṭṭnẓ lli‑izrin f‑lmasiḥ

⁶³ nkrn imh̬zniyn lli‑ḍufnin yasuɛ, ar‑gis‑ḍṣṣan ar‑t‑kkatn.

⁶⁴ dln‑as alln‑ns s‑yan‑ušddad ar‑as‑ttinin: «wa‑nnabi, ml‑aġ manwa‑k‑yutn.»

⁶⁵ ar‑t‑rggmn s‑kigan d‑iwaliwn ʷh̬šnnin.

ibidd lmasiḥ ġ‑lmḥkama

⁶⁶ lliġ‑d‑iġli‑wass munn‑d imġarn l‑lmḥkama, gan inmġurn n‑tgmmi n‑rbbi d‑imslmdn n‑ššrɛ. awin yasuɛ s‑lgddam‑nsn

⁶⁷ sqsan‑t: «ini‑aġ, izd kiyin a‑igan lmasiḥ n‑rbbi?» isawl yasuɛ yini‑asn: «iġ‑awn‑t‑nniġ, ur‑ra‑yyi‑tamnm.

⁶⁸ iġ‑kʷn‑fllas‑sqsaġ ur‑ra‑di‑trarm awal.

⁶⁹ walaynni yan imikk ra‑n‑iskiws yus n‑bnadm f‑ufasi n‑rbbi itjhhdn.»

⁷⁰ sqsan‑t kullutn: «is‑tnnit kiyi yus n‑rbbi a‑tgit?» irar‑asn: «ġmklli‑s‑tnnam ad‑giġ.»

⁷¹ nkrn ġakudan ar‑ttinin: «ma‑s‑sul‑nra tugga n‑wiyyaḍ? nsfld kullu i‑ġayd inna.»