luqa 21 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

tahjjalt tamẓluṭṭ

¹ ar‑itmnad yasuɛ ġ‑id‑bu‑wayda ar‑n‑srasn tiwafkiw‑nsn ġ‑ṣṣnduq ġ‑tgmmi n‑rbbi.

² iẓr‑n yat‑thjjalt tga tamẓluṭṭ, tašk‑id tsrs‑n snat‑tqaridin ġ‑ṣṣnduq idrus‑watig‑nsnt.

³ yini i‑imḥḍarn‑ns: «lḥqq a‑rad‑awn‑iniġ, tahjjalt‑ad tamẓluṭṭ, hatti tfka uggʷar n‑ġwid kullutn,

⁴ ašku ntni fkan zġ‑maylli darsn iggutn, imma nttat, wah̬h̬a tḥtajja, tfka lmɛišt‑ns kullutt.»

maylli ra‑ijru i‑tgmmi n‑rbbi

⁵ sawln imḥḍarn i‑ngratsn f‑tgmmi n‑rbbi, ar‑tɛjjabn ġ‑ufulki n‑iẓran lli‑s‑tġli ula tiwafkiw lli‑gis‑akkan mddn i‑rbbi. imma yasuɛ inna‑yasn:

⁶ «kullu mayd ttmnadm, rad‑d‑aškin‑uwssan ġ‑rad‑kullu‑ityawgar s‑wakal. ur‑ra‑gis‑iqama‑uẓru f‑uẓru.»

maylli‑s‑ra‑tggʷru i‑ddunit‑ad

⁷ sqsan‑t: «way‑amslmd, managu a‑ra‑yili ġayan? ma‑ra‑ig tamatart n‑is‑d‑yakmur a‑ijru?»

⁸ yini‑asn yasuɛ: «awiyat‑stt ġ‑ih̬f‑nnun a‑kʷn‑ur‑ijlu yan, ašku ggutn ġwilli ra‑d‑yašk asin ism‑inu, kud yan ar‑ittini izd nttan a‑igan lmasiḥ ar‑ittini: ‹hati truḥ‑d tasaɛt.› walaynni a‑tn‑ur‑tḍfurm.

⁹ iġ‑tsfldm f‑imaġn ula uduyn ad‑ur‑tġuwḍm, ašku iqqan‑d a‑yili ġayan, walaynni ur‑ta‑d‑iruḥ isiggʷra.»

¹⁰ izayd yini‑asn: «ra‑tnkr‑tqbilt s‑tqbilt, tnkr‑tgldit s‑tgldit,

¹¹ ilint zznzalat šqanin, yili‑uġni d‑waṭṭan ġ‑kigan d‑tmizar. rad‑d‑bannt‑tmitar tjhhdnin ġ‑ignwan ard bahra ġuwḍn mddn.

¹² imma kunni, ur‑ta‑ijri ġayan a‑ra‑kʷn‑tamẓn ar‑kʷn‑ssrfufunn ar‑kʷn‑in‑dḥayn s‑tgʷmma n‑tẓallit ula lḥbs. ra‑kʷn‑in‑ssbiddadn ġ‑lgddam n‑igldan d‑lḥukkam f‑ssibt n‑ma‑tgam winu.

¹³ tasaɛt‑an a‑ihiyyann ad‑asn‑gis‑tfkm tugga‑nnun flla.

¹⁴ walaynni nbḍat ġ‑ih̬f‑nnun ur‑ta‑d‑iruḥ‑uzmz‑an a‑ur‑tswingimm ġ‑mamnk a‑s‑rad‑asn‑trarm awal.

¹⁵ ašku rad‑awn‑d‑fkġ iwaliwn d‑tḥkimt baš a‑ur‑yiẓḍar yan zġ‑inuwwašn‑nnun a‑kʷn‑issfssa ula a‑kʷn‑inru ġ‑ma‑ttinim.

¹⁶ imma kunni ra‑kʷn‑in‑dḥayn ayt‑darun d‑aytmatun d‑ayt‑tqbilt‑nnun ula imddukkʷal‑nnun. rad‑nġn kra gigun.

¹⁷ ra‑kʷn‑tkrhun kullu mddn f‑ssibt n‑ma‑tgam winu.

¹⁸ walaynni ur‑ra‑ityawhlak kra n‑unẓaḍ zġ‑ih̬f‑nnun.

¹⁹ biddat tzgam, ġmkad a‑s‑ra‑tnjmm.

rad‑ilin‑uwssan šqanin

²⁰ «iġ‑tẓram tamdint n‑urušalim sutlnt‑as lḥrkat n‑iɛskrin, tissanm is‑d‑yakmur‑wass ġ‑ra‑th̬lu.

²¹ imma ġassan, winna llanin ġ‑tmazirt n‑yudaya, iqqan‑tn‑d ad‑rwln s‑idrarn. d‑winna llanin ġ‑tmdint, iqqan‑tn‑d a‑stt‑ffuġn. d‑winna llanin ġ‑lh̬la, iqqan‑tn‑d a‑n‑ur‑kšmn s‑tmdint.

²² ašku rad‑gn‑uwssan‑an ussan l‑lɛqubit, a‑gisn‑ijru kullu ma‑fllasn‑ityaran ġ‑warratn n‑rbbi.

²³ mnšk a‑s‑rad‑šqun‑uwssan‑an f‑tilli gisn rbbunin ula tilli gisn ssngaynin. ašku ra‑tigat tassast ġ‑tmazirt‑ad, yili lġaḍab n‑rbbi f‑mddn‑ad.

²⁴ ra‑immt kra ġ‑imiġ, krfn wiyyaḍ awin‑tn s‑tmizar aggugnin. rad‑akʷln ibrraniyn f‑urušalim ard ikmml‑uzmz‑nsn.

ġmkad a‑ra‑d‑iwrri lmasiḥ

²⁵ «rad‑ilint‑tmitar ġ‑tafukt d‑wayyur d‑itran, tili taġuft iggutn ġ‑kigan d‑tmizar n‑ddunit, ġuwḍn mddn ġ‑ijjij n‑umda ula taḍangiwin‑ns.

²⁶ rad‑iksaḍn bahra tġašan s‑taġuft n‑ma‑ra‑izri f‑ddunit, ašku ra‑tyattaynt tifawin n‑ignwan.

²⁷ ġakudan a‑ra‑yyi‑ẓrn, nkki lli‑igan yus n‑bnadm, ftiġ‑d ġ‑yat‑tmdlut s‑lquwwa d‑lmjd iggutn.

²⁸ ġakud nna‑tẓram tiġawsiwin‑ad ar‑jrrunt, nkrat tallm ih̬fawn‑nnun, ašku takmur‑d tasaɛt lli‑ġ‑ra‑tnjmm.»

managu a‑ra‑yili mayad?

²⁹ izayd yasuɛ yut‑asn lmɛna‑yad yini‑asn: «ẓrat tazart ula isġarn kullutn.

³⁰ iġ‑a‑d‑ssufuġn ifrawn‑nsn, tissanm is‑d‑yakmur ṣṣif.

³¹ ġmkan a‑ra‑yili. iġ‑tẓram timitar‑ad‑s‑awn‑nniġ ar‑jrrunt, tissanm is‑di‑takmur‑tgldit n‑rbbi.

³² lḥqq a‑rad‑awn‑iniġ, ur‑ra‑tzri tasut‑ad ard kullu ijru mayad.

³³ rad‑ittin ignwan d‑wakal walaynni ur‑sar‑ittin iwaliwn‑inu.

ḍufat ar‑ttẓallam

³⁴ «awiyat‑stt ġ‑ih̬f‑nnun a‑ur‑tlhum s‑umššu ula tissi ula tiġufiwin n‑tudrt‑ad, a‑ur‑imil iruḥ‑kʷn‑d‑wass‑an iġwi‑kʷn zund agḍiḍ lli‑tġwi‑tẓqqurt.

³⁵ ašku ra‑izri‑wass‑an f‑kullu imzdġn n‑ddunit.

³⁶ rarat lɛaql tḍufm‑bdda ar‑ttḍalabm rbbi a‑kʷn‑issdus a‑tnjmm zġ‑kullu ġaylli ra‑ijru, tbiddm ġ‑lgddam n‑yus n‑bnadm tzgam.»

³⁷ ass f‑wass ar‑isslmad yasuɛ ġ‑tgmmi n‑rbbi, ar‑itffuġ ġ‑iyḍ a‑inssa ġ‑uwrir n‑zzitun.

³⁸ zikk ṣbaḥ n‑kraygatt ass ar‑di‑ttaškin mddn ggutnin s‑tgmmi n‑rbbi, ar‑d‑dars‑tmunun ad‑as‑sfldn.