luqa 20 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

asqsi f‑ma‑d‑yuznn yasuɛ

¹ yan‑wass illa yasuɛ ġ‑tgmmi n‑rbbi ar‑isslmad mddn ar‑asn‑itbrraḥ s‑lh̬bar ifulkin. aškin‑d inmġurn n‑tgmmi n‑rbbi d‑imslmdn n‑ššrɛ d‑imġarn. lkmn‑d yasuɛ

² sqsan‑t: «ini‑aġ, ma‑k‑id‑yuznn a‑tskart kullu ġayad? awal n‑mi ayd‑s‑a‑ti‑tskart?»

³ isawl yasuɛ yini‑asn: «ula nkki ra‑kʷn‑sqsaġ yan‑usqsi. iniyat‑iyi,

⁴ yuḥanna amsddam, ma‑t‑id‑yuznn a‑issddam mddn? izd rbbi nġd bnadm?»

⁵ bdun ar‑ssmqsan i‑ngratsn ar‑ttinin: «ma‑rad‑as‑nini? ašku iġ‑nenna ‹rbbi a‑t‑id‑yuznn› rad‑aġ‑yini ‹mah̬ aylliġ ur‑tuminm mad‑awn‑inna?›

⁶ walaynni iġ‑nenna ‹bnadm a‑t‑id‑yuznn› rad‑aġ‑kkatn kullu mddn‑ad s‑iẓran, ašku ar‑ttinin ntni izd s‑ṣṣaḥt yuḥanna yan‑nnabi a‑iga.»

⁷ sawln ilmma inin‑as: «ur‑nssin ma‑t‑id‑yuznn.»

⁸ irar‑asn yasuɛ: «ula nkki ur‑rad‑awn‑iniġ ma‑yyi‑d‑yuznn ad‑skarġ kullu mayad.»

lmɛna n‑ih̬ʷmmaṣn d‑igr n‑waḍil

⁹ isawl yasuɛ s‑mddn, yut‑asn lmɛna‑yad yini‑asn: «ha‑yan‑urgaz iẓẓa aḍil ġ‑igr‑ns. ifl‑t i‑ih̬ʷmmaṣn, iftu imuddu s‑tmazirt yaḍni igawr‑n ġin.

¹⁰ lliġ‑d‑iruḥ‑uzmz yazn yan‑uh̬ddam‑ns s‑dar ih̬ʷmmaṣn, ad‑as‑d‑fkn ma‑t‑id‑yuškan ġ‑lġllt n‑igr‑ns. walaynni ih̬ʷmmaṣn ġwin ah̬ddam‑an, ssġuršn‑t rarn‑t bla yat.

¹¹ yazn ah̬ddam yaḍni. ula ntta, ssġuršn‑t ih̬ʷmmaṣn ssrfufnn‑t rarn‑t bla yat.

¹² yazn wis kraḍ. ula ntta, ssyaggasn‑t luḥn‑t‑in s‑brra.

¹³ iswangm bab n‑igr d‑ih̬f‑ns yini: ‹ma‑rad‑skrġ ġilad? rad‑aznġ iwi iɛzzan. ntta, ra‑t‑uqqrn.›

¹⁴ imma ih̬ʷmmaṣn‑lli, lliġ‑t‑ẓran mšawarn i‑ngratsn inin: ‹ġwad a‑ra‑iwrt igr. aškad‑d a‑t‑nnġ ig lwrt winnġ.›

¹⁵ nkrn luḥn‑t‑in s‑brra n‑igr nġn‑t.» isqsa‑tn yasuɛ: «ma‑rad‑asn‑iskr bab n‑igr‑an n‑waḍil?

¹⁶ ra‑d‑yašk ihlk ih̬ʷmmaṣn‑an ifk igr i‑wiyyaḍ.» lliġ sfldn mddn i‑ġayan inin: «ad‑aġ‑injja rbbi.»

¹⁷ issmaqql gisn yasuɛ yini‑asn: «ma‑iga mayd ityaran ġ‑warratn n‑rbbi? ‹aẓru lli‑n‑luḥn ibnnayn, nttan a‑iwrrin iga ih̬f n‑uġẓu.›

¹⁸ imma aẓru‑ad, kullu wanna fllas iḍrn ra‑irẓ, d‑wanna‑f‑iḍr ra‑t‑ilbj d‑wakal.»

asqsi f‑ḍabiyt i‑qayṣr

¹⁹ irin imslmdn n‑ššrɛ d‑inmġurn n‑tgmmi n‑rbbi ad‑amẓn yasuɛ, ašku ssnn izd ntni a‑f‑yut lmɛna‑yad, walaynni ksuḍn zġ‑mddn.

²⁰ sul‑t‑gabln, aznn‑d kra n‑irgazn ad‑skarn zund iġ‑a‑ttirin aġaras n‑rbbi, walaynni ran ġir ad‑amẓn yasuɛ f‑wawal‑ns baš a‑t‑in‑dḥin i‑lḥakm n‑rruman a‑fllas‑iḥkam.

²¹ aškin‑d inin‑as: «way‑amslmd, nssn izd lḥqq ayd ttinit ar‑ti‑tsslmadt. ur‑a‑ttmnadt udmawn n‑mddn walaynni ar‑tsslmadt aġaras n‑rbbi ġmklli iga.

²² ini‑aġ, is‑iḥlla a‑nakka ḍabiyt i‑qayṣr nġd uhu?»

²³ imma yasuɛ issn mad‑nuwwan ġ‑lḥilt‑nsn, yini‑asn:

²⁴ «mlat‑iyi‑d yan‑uqarid. iniyat‑iyi, win mit a‑iga‑uwdm‑ad d‑ism‑ad gis illan?» inin‑as: «win qayṣr.»

²⁵ irar‑asn: «fkat i‑qayṣr ma‑igan win qayṣr, tfkm i‑rbbi ma‑igan win rbbi.»

²⁶ iḍr‑asn lɛjb f‑mayd‑s‑asn‑irur. fssan kullu, ur‑ẓḍarn a‑t‑amẓn f‑wawal‑ns ġ‑lgddam n‑kullu mddn‑an.

asqsi f‑tnkra zġ‑lmut

²⁷ aškin‑d dars kra n‑iṣadduqin. ntni ġ‑lmdhb‑nsn ar‑ttinin «ur‑illi ma‑ra‑d‑inkr zġ‑lmut.»

²⁸ sqsan‑t: «way‑amslmd, yura‑yaġ musa inna ‹iġ‑immut kra n‑yan ifl‑d tamġart‑ns bla tarwa, illa f‑gʷmas n‑urgaz‑an a‑itahl tamġart‑an a‑dids‑iskr tarwa f‑ism n‑gʷmas lli‑immutn.›

²⁹ ha‑ssa n‑aytmatn. yiwi‑umzwaru tamġart, immt ur‑d‑ifil tarwa.

³⁰ yawi‑tt wis sin,

³¹ ntta ula wis kraḍ, aylliġ‑tt‑iwin s‑ssa, mmtn kullutn ur‑d‑filn tarwa.

³² ġ‑isiggʷra tmmt‑tmġart ula nttat.

³³ ini‑aġ, ġ‑tnkra lli‑ġ‑rad‑nkrn kullutn, tamġart n‑manwa gisn a‑ra‑tg? hatti tkka‑ttin tga tamġart‑nsn s‑ssa.»

³⁴ isawl yasuɛ yini‑asn: «ayt‑ddunit‑ad ar‑tahaln ar‑tahalnt,

³⁵ imma ġwilli f‑irḍa rbbi ad‑nkrn zġ‑lmut ddrn ġ‑lih̬rt, ntni ur‑ra‑tahaln ula‑da‑tahalnt.

³⁶ hatni zund lmalayka a‑rad‑gn ašku ur‑sul‑rad‑mmtn. gn tarwa n‑rbbi ašku luln s‑tudrt l‑lih̬rt.

³⁷ imma tankra n‑willi mmutnin, yura fllas ula musa ġ‑warra n‑tzggʷart lli‑ijddrn, yini f‑sidi rbbi is‑iga rbbi n‑ibrahim ig rbbi n‑isḥaq ig rbbi n‑yaɛqub.

³⁸ awal‑an imla‑yaġ is‑ddrn ntni wah̬h̬a mmutn, ašku sul ddrn kullutn ġ‑lgddam n‑rbbi.»

³⁹ inin‑as kra n‑imslmdn n‑ššrɛ: «yʷġẓan mayd tnnit ay‑amslmd.»

⁴⁰ ašku ur‑sul‑zɛmn a‑t‑sqsan.

asqsi f‑ma‑iga lmasiḥ

⁴¹ izayd yasuɛ yini‑asn: «mah̬ aylliġ a‑ttinin mddn ‹ra‑ig lmasiḥ yan zġ‑tasut n‑ugllid dawd›?

⁴² hati dawd ula ntta isawl f‑lmasiḥ ġ‑warra n‑imurign inna: ‹ha‑sidi rbbi inna i‑sidi, skiws f‑ufasiy‑inu

⁴³ ard gġ inuwwašn‑nnk ġ‑ddu iḍarn‑nnk.›

⁴⁴ ha‑dawd s‑ih̬f‑ns ibdr ġwalli igan lmasiḥ ig‑t d‑sidis. mamnk a‑ra‑ig ġir yan zġ‑tasut‑ns?»

imslmdn n‑ššrɛ

⁴⁵ isawl yasuɛ s‑imḥḍarn‑ns ġ‑lgddam n‑mddn‑an kullutn yini‑asn:

⁴⁶ «rarat lɛaql‑nnun zġ‑imslmdn n‑ššrɛ, ašku iɛzza darsn ad‑fttun s‑tmlsa ġzzifnin šwanin, iɛzzu darsn ad‑fllasn‑tsllamn mddn ġ‑laswaq, iɛzzu darsn ad‑zggurun s‑lgddam ġ‑tgʷmma n‑tẓallit ula ġ‑uskiws n‑imnsiwn.

⁴⁷ ar‑šttan tigʷmma n‑thjjalin, ar‑ssiġzzifn tiẓulla‑nsn baš ad‑ssbayynn ih̬fawn‑nsn is‑fulkin. ntni ra‑fllasn‑ittut lḥukm n‑rbbi s‑uggʷar.»