luqa 2 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

talalit l‑lmasiḥ

¹ ġ‑uwssan‑an a‑ġ‑d‑iffuġ yal‑lqanun zġ‑dar‑ugllid imqqurn qayṣr uġusṭus, yamr kullu mddn ġ‑kraygatt mani ad‑ḥasbn ism‑nsn.

² tawala tamzwarut ayan ġ‑ḥasbn mddn, ijra ġ‑uwssan lli‑ġ‑iḥkam kirinyus tamazirt n‑suriyya.

³ ar‑tmuddun mddn kraygatt yan s‑tmazirt‑ns a‑n‑gis‑iḥasb ism‑ns.

⁴ inkr yusf iffuġ tamdint n‑naṣira ġ‑jalil imuddu s‑tmdint n‑dawd lli‑mi‑ttinin bitlaḥm ġ‑tmazirt n‑yudaya, ašku iga ntta zġ‑tasut n‑dawd ula tarwa‑ns.

⁵ iddu a‑n‑iḥasb ih̬f‑ns ntta d‑maryam lli‑n‑iḍalb a‑tg tamġart‑ns, d‑nttat ar‑trbbu.

⁶ ġ‑uwssan lli‑ġ‑llan ġin tlkm‑d luqt n‑tlalit.

⁷ taru arraw‑ns amzwaru, tssmuttl‑t ġ‑uḥzzam tsrs‑t‑in ġ‑yan‑usds, ašku ur‑ufin kra n‑tḥanut ih̬wan ġ‑lfndq.

bann‑d lmalayka i‑imksawn

⁸ ilin kra n‑imksawn ġ‑tmazirt‑an gabln ulli‑nsn ġ‑lh̬la ġ‑iyḍ.

⁹ iban‑asn‑d yal‑lmalak n‑sidi rbbi, yisfiw fllasn lmjd n‑sidi rbbi, iksaḍn bahra.

¹⁰ isawl lmalak yini‑asn: «ad‑ur‑tiksaḍm. hati iwiġ‑awn‑d lh̬bar ifulkin f‑lfrḥ iggutn lli‑ra‑yili i‑kullu‑mddn.

¹¹ ašku ġassad ġ‑tmdint n‑dawd ilul‑awn‑d‑unjjam lli igan lmasiḥ siditnnġ.

¹² ġmkad a‑rad‑awn‑ig tamatart: ra‑n‑tafm yan‑wazzan imuttl ġ‑uḥzzam ittrs‑n ġ‑usds.»

¹³ bann‑d ilmma ikabarn l‑lmalayka ggutnin d‑lmalak, ar‑talġn rbbi ar‑ttinin:

¹⁴ «a‑yili lmjd i‑rbbi ġ‑tattuyt, tili sslamt i‑willi‑f‑irḍa ġ‑ddunit.»

¹⁵ lliġ wrrin lmalayka s‑ignwan inin imksawn i‑ngratsn: «nkrat a‑nddu s‑bitlaḥm a‑nẓr mayd‑f‑aġ‑inna sidi rbbi.»

¹⁶ ddun ġakudan s‑tizzla, afn‑in maryam d‑yusf, ẓrn azzan ġ‑usds.

¹⁷ lliġ‑t‑ẓran sawln‑asn imksawn f‑maylli‑asn‑inna lmalak f‑wazzan‑an,

¹⁸ ar‑tɛjjabn kullu willi sfldnin i‑iwaliwn‑nsn.

¹⁹ imma maryam ar‑ttḥḍu tiġawsiwin‑an ġ‑uwl‑ns ar‑gisnti‑tswingim.

²⁰ wrrin ilmma imksawn, ar‑tškarn rbbi ar‑ti‑talġn f‑kullu ma‑mi‑sfldn ula mad‑ẓran. illa kullu mayan ġmklli‑s‑asn‑inna lmalak.

²¹ zrin ssa‑uwssan s‑d‑iruḥ‑wass lli‑ġ‑rad‑ẓẓalln i‑wazzan. gn‑as ġakudan ism ‹yasuɛ›, iga ism lli‑s‑inna lmalak ur‑ta‑da‑trbbu maryam.

awal n‑simɛan f‑wazzan yasuɛ

²² lliġ kmmln ussan n‑usġus‑nsn skrn ġmklli illan ġ‑ššrɛ n‑musa, awin azzan s‑tmdint n‑urušalim a‑t‑in‑srsn ġ‑lgddam n‑rbbi.

²³ ašku ityara ġ‑ššrɛ n‑rbbi: «a‑tẓlim kraygatt awtm ih̬fddi a‑ig win sidi rbbi.»

²⁴ fkn ilmma tiġrsi i‑rbbi ġmklli‑s‑inna ššrɛ: «sin imalliwn nġd sin itbirn mẓẓinin.»

²⁵ yili yan‑urgaz ġ‑urušalim ism‑ns simɛan, ifulki bahra iɛzzu‑dars‑uġaras n‑rbbi, yili fllas rruḥ lqudus. ar‑bdda‑itrju ass lli‑ġ‑ra‑ijjnjm rbbi mddn‑ns.

²⁶ imla‑yas rruḥ lqudus is‑ur‑ra‑immt ard iẓr lmasiḥ n‑sidi rbbi.

²⁷ simɛan, yiwi‑t rruḥ lqudus ikšm s‑tgmmi n‑rbbi. aškin‑d ayt‑dars n‑yasuɛ ġ‑tasaɛt‑an, awin‑d azzan ad‑kmmln f‑ssibt‑ns ma‑illan ġ‑ššrɛ.

²⁸ yasi‑t simɛan ġ‑gr ifassn‑ns, yalġ rbbi yini:

²⁹ «ġmkad a‑sidi rbbi tssuwfit‑iyi‑d awal. adj ah̬ddam‑nnk a‑n‑ffuġġ ddunit ġilad s‑sslamt,

³⁰ ašku ẓrant‑walln‑inu anjjam

³¹ lli‑di‑tuznt f‑kullu mddn.

³² ra‑ig tifawt i‑ayt‑tmizar aggugnin, yawi‑d lmjd‑nnk i‑ayt‑rbbi.»

³³ itɛjjb yusf d‑innas n‑wazzan f‑mayd‑fllas‑inna simɛan.

³⁴ izayd simɛan iḍalb rbbi a‑tn‑ibark, isawl ilmma s‑maryam innas n‑wazzan, yini‑as: «azzan‑ad, iga‑t rbbi d‑wad‑s‑rad‑ḍrn kigan d‑mddn n‑ayt‑rbbi, nkrn kigan f‑ssibt‑ns. ig‑t d‑yat‑tmatart lli‑rad‑agʷin mddn ggutnin,

³⁵ d‑ġmkan a‑s‑rad‑ssbayynn tinbaḍin n‑uwlawn‑nsn. ula kmmi, rad‑am‑tbbi taġuft ul‑nnm zund taẓẓit.»

ḥanna tškr rbbi f‑wazzan yasuɛ

³⁶ tili ġin yat‑thjjalt ar‑tsawal s‑mad‑as‑d‑imala rbbi. iga ism‑ns ḥanna illis n‑fanwil zġ‑tqbilt n‑ašir. tmqqur bahra, tzzri d‑urgaz‑ns ssa n‑isggʷasn zġ‑lliġ‑tt‑ila,

³⁷ tili dars tam id‑mraw d‑kkuẓ (84) n‑usggʷas. ur‑a‑ttffuġ tigmmi n‑rbbi, ar‑gis‑ttɛbad rbbi ar‑ttaẓum ar‑ti‑ttḍalab ġ‑iyḍ ula azal.

³⁸ tašk‑id ġ‑tasaɛt‑an talġ rbbi, tsawl f‑wazzan‑an i‑kullu willi trjunin ass lli‑ġ‑ra‑ifukku rbbi ayt‑urušalim.

³⁹ lliġ ikmml yusf d‑maryam maylli fllasn illan ġ‑ššrɛ n‑sidi rbbi, wrrin s‑tmdint‑nsn n‑naṣira ġ‑tmazirt n‑jalil.

⁴⁰ ar‑itimġur‑wazzan ar‑itdus. tigat‑gis‑tḥkimt, tili fllas lbaraka n‑rbbi.

aḥšmi yasuɛ ġ‑tgmmi n‑rbbi

⁴¹ asggʷas ar asggʷas ar‑ttidun ayt‑dars n‑yasuɛ s‑tmdint n‑urušalim ġ‑lɛid n‑usurf.

⁴² lliġ irgl sin d‑mraw n‑usggʷas ddun ġmklli bdda.

⁴³ ġakud lliġ kmmln‑uwssan l‑lɛid amẓn aġaras s‑tmazirt‑nsn. ur‑ssinn ayt‑dars is‑n‑iqama‑uḥšmi yasuɛ ġ‑urušalim,

⁴⁴ ġaln is‑didsn‑imun ġ‑ukabar. zzrin ass kullut ġ‑uġaras, bdun ilmma ar‑srs‑siggiln ġ‑gr ayt‑darsn d‑imddukkʷal‑nsn.

⁴⁵ lliġ‑t‑ur‑ufin wrrin s‑urušalim a‑srs‑siggiln.

⁴⁶ ar wis kraḍ‑uwssan a‑t‑in‑ufan ġ‑gr imslmdn n‑ššrɛ ġ‑tgmmi n‑rbbi, ar‑asn‑isflid ar‑tn‑isqsa.

⁴⁷ ġwilli‑as‑sflidnin ar‑kullu‑tɛjjabn ġ‑lfhmt‑ns ula taḥkimt lli‑s‑a‑itrara awal.

⁴⁸ lliġ‑t‑ẓran ayt‑dars iḍr‑asn lɛjb, tini‑as innas: «mah̬ a‑iwi aylliġ‑aġ‑tskrt ġmkad? ha‑nkki d‑babak nusi fllak taġuft bahra, ar‑srk‑nsiggil.»

⁴⁹ imma ntta inna‑yasn: «mah̬ aylliġ a‑sri‑tsiggilm? is‑ur‑tssinm is‑d‑iqqan ad‑iliġ ġ‑tgmmi n‑baba?»

⁵⁰ imma ntni ur‑fhimn awal lli‑s‑asn‑inna.

⁵¹ imun didsn ġakudan, wrrin s‑naṣira, ar‑iskar s‑iwaliwn‑nsn. imma innas tḥḍa kullu tiġawsiwin‑an ġ‑uwl‑ns.

⁵² ar‑itzayad yasuɛ ġ‑tiddi ula taḥkimt, irḍu srs rbbi ula mddn.