luqa 19 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

injm bu‑nkkas zakka zġ‑ddnub‑ns

¹ izayd yasuɛ ikšm s‑tmdint n‑ariḥa, iftu ġ‑wammas‑ns.

² yili ġin yan‑unmġur n‑willi tamẓnin iqaridn n‑nkkas, ig ism‑ns zakka, iggut‑dars‑wayda.

³ ira bahra a‑iẓr yasuɛ walaynni ggutn mddn ġin, ur‑iẓḍar a‑t‑in‑iẓr ašku igzzul.

⁴ ar‑itazzal izwur mddn, iġli s‑yat‑tsġart n‑imršiq a‑iẓr yasuɛ, ašku ġin a‑zġ‑ra‑izri.

⁵ lliġ‑t‑in‑ilkm yasuɛ yall alln‑ns yini‑as: «wa‑zakka, gguz‑d ġil ġil, ašku ġ‑tgmmi‑nnk a‑ġ‑rad‑gawrġ ġassad.»

⁶ igguz‑d zakka ḥayna, ifrḥ bahra išškšm yasuɛ s‑dars.

⁷ lliġ‑t‑ẓran mddn‑an ggutnin, ar‑kullu‑tngmugn i‑ngratsn ar‑ttinin: «hati ikšm a‑ig anbgi ġ‑dar bu‑ddnub‑ad.»

⁸ imma zakka inkr ibidd f‑iḍarn‑ns yini i‑siditnnġ: «ġilad a‑sidi, rad‑fkġ mnaṣṣ n‑wayda‑nu i‑imẓlaḍ. iġ‑ššiġ kra n‑yan s‑lġʷšš rad‑as‑t‑rarġ f‑kkuẓṭ‑twal.»

⁹ isawl yasuɛ yini‑as: «ġassad ilkm‑d‑ujnjm n‑rbbi tigmmi‑ad, ašku yumn ġwad ula ntta ġmklli yumn babatnnġ ibrahim.

¹⁰ uškiġ‑d nkki lli‑igan yus n‑bnadm ad‑sigglġ s‑willi jlanin jjnjmġ‑tn.»

lmɛna f‑kraḍ ih̬ddamn

¹¹ izayd yasuɛ isawl s‑mddn lli‑as‑sflidnin, yut‑asn lmɛna‑yad ašku yakmur s‑tmdint n‑urušalim. ġaln ntni izd ġ‑uwssan‑an a‑ġ‑ra‑di‑tban‑tgldit n‑rbbi.

¹² yini‑asn: «ha‑yan‑urgaz iga yus n‑tgmmi imqqurn, iskr f‑a‑imuddu s‑yat‑tmazirt yaggugn, baš ad‑as‑fkn lḥqq a‑iḥkam tamazirt‑ns iwrri‑d ig fllas agllid.

¹³ lliġ ur‑ta‑iddi iġra‑d i‑mraw ih̬ddamn‑ns s‑dars, ifk i‑kraygatt yan gisn yan‑uqarid n‑uwrġ, yini‑asn: ‹zaydat ar‑tsaġm ar‑tzznzam ard‑d‑wrriġ.›

¹⁴ imma argaz‑an, ar‑ti‑tkrhun ayt‑tmazirt‑ns, aznn irqqasn s‑tmazirt‑lli yaggugn ar‑ttinin: ‹ur‑nri argaz‑ad a‑fllannġ‑iḥkam.›

¹⁵ izri ma‑izrin s‑as‑ityawfka a‑ig agllid, iwrri ilmma s‑tmazirt‑ns. iġr‑d i‑ih̬ddamn lli‑mi‑ifka iqaridn a‑dars‑kšmn ad‑as‑inin mnšk ad‑d‑srsn‑rurn.

¹⁶ ikšm‑umzwaru yini‑as: ‹aqarid‑nnk a‑sidi, rurġ‑d srs mraw iqaridn yaḍni nnigas.›

¹⁷ yini‑as‑ugllid: ‹išwa. ah̬ddam ifulkin a‑tgit. tskrt s‑lmɛqul s‑mayd idrusn. ra‑k‑gġ ġilad d‑lḥakm f‑mrawt‑tmdinin.›

¹⁸ ikšm wis sin yini‑as: ‹aqarid‑nnk a‑sidi, rurġ‑d srs smmus iqaridn yaḍni nnigas.›

¹⁹ yini‑as‑ugllid: ‹ra‑k‑gġ d‑lḥakm f‑smmust‑tmdinin.›

²⁰ ikšm wayyaḍ yini‑as: ‹hay‑aqarid‑nnk a‑sidi. ḥḍiġ‑t ġ‑yat‑tummʷist.

²¹ ksuḍġ zġ‑gik ašku ssnġ izd argaz išqan a‑tgit, ar‑di‑ttasit ma‑ur‑n‑tsrst ar‑di‑tmggrt ma‑ur‑tkrzt.›

²² yini‑as sidis: ‹way‑ah̬ddam yʷh̬šnn, s‑wawal‑ad tnnit a‑s‑rad‑fllak‑ḥkamġ. tssnt izd argaz išqan ad‑giġ, ar‑di‑tasiġ ma‑ur‑n‑srsġ ar‑d‑mggrġ ma‑ur‑krzġ.

²³ mah̬ aylliġ ur‑n‑tgit aqarid‑inu ġ‑lbank, akud nna‑d‑wrriġ amẓġ‑t‑id ntta d‑ma‑d‑irur ikka nnigas?›

²⁴ yini‑ugllid i‑willi n‑tama‑ns: ‹kkisat‑as aqarid‑an tfkm‑t i‑walli dar mraw iqaridn.›

²⁵ inin‑as: ‹ha‑ntta mraw ad‑dars‑illan, a‑sidi.›

²⁶ irar‑asn: ‹rad‑awn‑iniġ, wanna dar illa, rad‑as‑ityawfka uggʷar. imma wanna ur‑dar‑illi, rad‑as‑ityawkkas ula ma‑dars‑illan.

²⁷ imma inuwwašn‑an‑inu lli‑ur‑rinin ad‑gġ agllid‑nsn, awiyat‑tn‑d tnġm‑tn ġ‑lgddam‑inu.›»

ikšm lmasiḥ s‑urušalim

²⁸ lliġ ikmml yasuɛ iwaliwn‑ad, izayd ġ‑uġaras n‑urušalim izwur‑asn.

²⁹ lliġ ilkm awrir n‑zzitun ġ‑tsga n‑bitfaji d‑bitɛanya, yazn sin zġ‑imḥḍarn‑ns

³⁰ yini‑asn: «zaydat s‑uduwwar‑an l‑lgddam‑nnun. kšmat srs, ra‑n‑tafm yan‑usnus iqqnn ur‑jju‑fllas‑ini yan. fsiyat‑as tawim‑t‑id s‑ġid.

³¹ iġ‑kʷn‑isqsa kra n‑yan mah̬ ad‑as‑tfssim, tinim‑as: ‹ira‑t siditnnġ.›»

³² ddun irqqasn‑lli afn‑in kullu maylli‑s‑asn‑inna yasuɛ.

³³ lliġ fssin i‑usnus, inin‑asn id‑bab‑ns: «mah̬ a‑tfssim i‑usnus‑ad?»

³⁴ inin‑asn: «ira‑t siditnnġ.»

³⁵ awin‑d asnus i‑yasuɛ. grn‑in fllas islhamn‑nsn, ssnin yasuɛ.

³⁶ issudu ġ‑uġaras, aškin‑d mddn ar‑sswan islhamn‑nsn ġ‑wakal ġ‑lgddam‑ns.

³⁷ lliġ ilkm agsar n‑uwrir n‑zzitun, yakmur‑n s‑tmdint, frḥn kullu imḥḍarn‑an ggutnin, ar‑talln awal‑nsn ar‑talġn rbbi f‑kullu tiġawsiwin lli‑ẓran mqqurnt

³⁸ ar‑ttinin: «ambarki a‑iga‑ugllid‑ad‑d‑yuškan s‑ism n‑sidi rbbi. sslamt ġ‑ignna d‑lmjd ġ‑tattuyt.»

³⁹ sawln srs kra n‑ifarisin zġ‑gr mddn‑an inin‑as: «way‑amslmd, ini i‑imḥḍarn‑nnk ad‑fssan.»

⁴⁰ irar‑asn yasuɛ: «rad‑awn‑iniġ, iġ‑fssan ġwid, rad‑utn iẓran‑ad taġurit.»

ar‑yalla lmasiḥ f‑urušalim

⁴¹ lliġ‑n‑yakmur yasuɛ s‑tama n‑urušalim issmaqql‑n gis ar‑yalla,

⁴² yini‑as: «mrad is‑tssnt aġaras n‑sslamt ġassad, walaynni intl fllam.

⁴³ rad‑d‑aškin‑uwssan ġ‑ra‑km‑d‑lkmn inuwwašn‑nnm, sutln‑am ašbar rgln fllam, ḥṣarn‑km zġ‑kraygatt tasga.

⁴⁴ ra‑km‑h̬lun d‑tarwa‑nnm gim, ur‑ra‑gim‑fln aẓru f‑wayyaḍ, ašku ur‑trit a‑tissant izd ġ‑uzmz‑ad a‑ġ‑iskr rbbi f‑a‑km‑ijjnjm.»

lmasiḥ ar‑iṭṭay imznzn zġ‑tgmmi n‑rbbi

⁴⁵ ikšm yasuɛ s‑tgmmi n‑rbbi, inkr ar‑zgis‑iṭṭay ġwilli gis zznzanin,

⁴⁶ yini‑asn: «han ityara ġ‑warra n‑rbbi ‹tigmmi‑nu ra‑tg tigmmi n‑tẓallit› imma kunni, hati trurm‑tt tga ifri n‑imh̬h̬arn.»

⁴⁷ kraygatt ass ar‑isslmad ġ‑tgmmi n‑rbbi. imma inmġurn n‑tgmmi n‑rbbi d‑imslmdn n‑ššrɛ d‑imġarn n‑tmazirt‑an ar‑siggiln mamnk a‑s‑ra‑t‑hlkn.

⁴⁸ walaynni ur‑ufin mamnk, ašku mddn kullutn ar‑bahra‑ttirin ad‑sflidn i‑iwaliwn‑ns.