luqa 18 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

lmɛna n‑thjjalt d‑lqaḍi

¹ isawl yasuɛ s‑imḥḍarn‑ns, yiri ad‑asn‑iml is‑tn‑d‑iqqan a‑bdda‑tẓallan bla‑da‑trmayn. yut‑asn lmɛna‑yad,

² yini‑asn: «ha‑yal‑lqaḍi ġ‑yat‑tmdint, ur‑iksuḍ rbbi ula‑da‑stt‑itawi ġ‑mddn.

³ tili yat‑thjjalt ġ‑tmdint‑an ar‑bdda‑tssmummʷi ġ‑dar lqaḍi ar‑as‑ttini: ‹fukku‑yyi zġ‑unuwwaš‑inu.›

^4-5 mnnaw‑uwssan ur‑iri lqaḍi ad‑as‑isfld, imil yini d‑ih̬f‑ns: ‹tahjjalt‑ad ar‑bdda‑yyi‑tssiḥil. wah̬h̬a ur‑ksuḍġ rbbi ula‑da‑stti‑tawiġ ġ‑mddn ra‑stt‑fukkuġ, a‑ur‑sul‑di‑ttaški ad‑iyi‑trẓ ih̬f.›»

⁶ yini‑asn siditnnġ: «ġmkad a‑s‑inna lqaḍi‑an yʷh̬šnn,

⁷ imma rbbi is‑ur‑ra‑ifukku mddn‑ns lli‑as‑aqranin ġ‑iyḍ ula azal? is‑ra‑imaṭl ad‑asn‑ifk maylli zġ‑gis ḍalbn?

⁸ rad‑awn‑iniġ, ra‑tn‑ifukku ḥayna. walaynni ġassan ġ‑rad‑d‑wrriġ s‑ddunit‑ad nkki lli‑igan yus n‑bnadm, is‑rad‑d‑afġ ma‑sul‑yumnn?»

lmɛna n‑ufarisi d‑bu‑nkkas

⁹ izayd yasuɛ isawl s‑kra n‑mddn lli‑iɛjb ih̬f‑nsn, ġaln is‑fulkin ar‑tḥgarn wiyyaḍ. yut‑asn lmɛna‑yad yini‑asn:

¹⁰ «ha‑sin mddn kšmn s‑tgmmi n‑rbbi ad‑ẓẓalln. yan iga afarisi, ig wayyaḍ bu‑nkkas.

¹¹ ibidd‑ufarisi waḥdut, iẓẓall d‑ih̬f‑ns yini: ‹wa‑rbbi, ar‑k‑tškarġ ašku ur‑giġ zund mddn yaḍni. ntni ar‑takʷrn ar‑tġʷššan ar‑tfsadn. ar‑k‑tškarġ ašku ur‑akkʷ‑giġ zund bu‑nkkas‑ad.

¹² ha‑yyi ar‑taẓumġ kraygatt kraḍ‑uwssan, ar‑akkaġ tis mrawt n‑kullu ma‑dari‑illan.›

¹³ imma bu‑nkkas, ibidd‑n ġ‑tġurdin. ur‑iẓḍar a‑yall alln‑ns s‑iggi. ar‑ikkat f‑idmarn‑ns ar‑ittini: ‹wa‑rbbi ṣamḥ‑iyi, iggut mad‑skrġ yʷh̬šn.›

¹⁴ rad‑awn‑iniġ, lliġ wrrin s‑tgʷmma‑nsn, bu‑nkkas‑an a‑f‑irḍa rbbi, urd afarisi. ašku wanna issimġurn ih̬f‑ns ra‑t‑iẓẓimẓay rbbi, imma wanna iẓẓimẓayn ih̬f‑ns ra‑t‑issimġur.»

lmasiḥ ibark tarwa mẓẓinin

¹⁵ ar‑di‑ttaškin mddn ar‑di‑tawin tarwa mẓẓinin i‑yasuɛ, irin a‑n‑fllasn‑isrs ifassn‑ns ibark‑tn. lliġ ẓran imḥḍarn‑ns mayd skarn, rarn‑tn inin‑asn: «a‑tn‑d‑ur‑tawim.»

¹⁶ imma yasuɛ iġra‑d i‑tarwa s‑dars yini: «adjat tarwa mẓẓinin a‑d‑dari‑aškin. a‑tn‑ur‑tḥṣarm, ašku zund ġwid a‑mi‑tlla‑tgldit n‑rbbi.

¹⁷ lḥqq a‑rad‑awn‑iniġ, wanna ur‑irin a‑ikšm s‑tgldit n‑rbbi zund arraw imẓẓin ur‑ra‑srs‑ikšm.»

asqsi f‑tudrt l‑lih̬rt

¹⁸ yašk‑id yan‑unmġur n‑tmazirt‑an, isqsa yasuɛ yini‑as: «way‑amslmd ifulkin, ma‑rad‑skrġ baš ad‑ṭṭafġ tudrt l‑lih̬rt?»

¹⁹ isawl yasuɛ yini‑as: «mah̬ aylliġ‑iyi‑tgit d‑wad ifulkin? ur‑illi yan ifulkin abla rbbi waḥdut.

²⁰ kiyi tssnt luṣiyat, ‹a‑ur‑tznut, a‑ur‑tnġt, a‑ur‑takʷrt, a‑ur‑tfkt tugga n‑tkrkas. awi‑tt ġ‑babak d‑innak.›»

²¹ yini‑as‑unmġur: «mayad kullut ar‑t‑skarġ zġ‑lliġ mẓẓiġ sul s‑ġilad.»

²² lliġ isfld yasuɛ i‑mayad yini‑as: «yat‑tġawsa ad‑ak‑iqaman. zayd tzznzt kullu mad‑dark‑illan tfkt‑t i‑imẓlaḍ, yili‑ak‑wayda ġ‑ignna. taškid‑d ilmma tmunt didi.»

²³ imma ntta lliġ isfld i‑wawal‑ad tʷgraẓ‑t bahra ašku iggut‑dars‑wayda.

²⁴ yasuɛ iẓra is‑ti‑tʷgraẓ, yini‑asn: «mnšk a‑s‑išqa f‑willi dar iggut‑wayda ad‑kšmn s‑tgldit n‑rbbi.

²⁵ ra‑irh̬u f‑urɛam a‑ikšm zġ‑tiṭ n‑tasmi ula ikšm yan dar ayda iggutn s‑tgldit n‑rbbi.»

²⁶ inin‑as ġwilli‑as‑sfldnin: «iġ‑iga ġmkad, ma‑ra‑yiẓḍar a‑injm?»

²⁷ yini‑asn yasuɛ: «aynna mi ur‑iẓḍar bnadm, iẓḍar‑as rbbi.»

²⁸ isawl bṭrus yini‑as: «ha‑nkkʷni nfl‑n tigʷmma‑nnġ našk‑id nmun didk.»

²⁹ yini‑asn yasuɛ: «lḥqq a‑rad‑awn‑iniġ, wanna‑n‑ifln tigmmi‑ns nġd tamġart‑ns nġd aytmas nġd babas nġd innas nġd tarwa‑ns f‑ssibt n‑tgldit n‑rbbi,

³⁰ rad‑as‑yili mad‑bahra‑yugʷrn mayad ġ‑ddunit‑ad, tili‑as ġ‑lih̬rt tudrt idumn.»

isawl lmasiḥ tis kraṭṭ‑twal f‑lmut‑ns

³¹ yawi yasuɛ sin d‑mraw n‑umḥḍar‑ns waḥdutn, yini‑asn: «ẓrat, ra‑nddu s‑urušalim, ijru ġin kullu mad‑uran lanbiya f‑yus n‑bnadm.

³² ra‑yyi‑dḥin s‑gr ifassn n‑ibrraniyn, ṭnẓn gigi rgmn‑iyi ssufsn flla.

³³ ra‑yyi‑ssġuršn nġn‑iyi, nkrġ‑d ilmma zġ‑lmut ġ‑wis kraḍ‑uwssan.»

³⁴ imma imḥḍarn‑ns ur‑fhimn tiġawsiwin‑ad. ur‑ssinn ma‑ira ad‑asn‑yini, tntl fllasn lmɛna.

lmasiḥ ijjujji abukaḍ

³⁵ yakmur‑d yasuɛ s‑tmdint n‑ariḥa. illa ġin yan‑ubukaḍ igawr ġ‑tama n‑uġaras ar‑itḍalab.

³⁶ isfld i‑mddn ggutnin ar‑zrayn ġ‑uġaras isqsa‑tn f‑ma‑illan.

³⁷ inin‑as: «yasuɛ gu‑naṣira ayd izrin.»

³⁸ yall awal‑ns ġakudan iġr‑as yini: «wa‑yasuɛ yus n‑dawd, ḥnnu gigi.»

³⁹ grawln mddn lli‑biddnin ġ‑lgddam‑ns, akʷin gis inin‑as a‑ifssa. imma ntta izuyd ar‑itġuwwat ar‑ittini: «wa‑yus n‑dawd, ḥnnu gigi.»

⁴⁰ ibidd yasuɛ yini i‑mddn‑an a‑t‑id‑awin s‑dars. lliġ‑t‑id‑iruḥ‑ubukaḍ isqsa‑t yasuɛ:

⁴¹ «ma‑trit ad‑ak‑t‑skrġ?» yini‑as: «a‑sidi, ad‑isfiwġ.»

⁴² yini‑as yasuɛ: «isfiw ġilad, ha‑kiyi tjjit ašku tumnt.»

⁴³ yisfiw ġakudan iḍfur yasuɛ ġ‑uġaras ar‑italġ rbbi. mddn‑an kullutn, lliġ‑t‑ẓran alġn rbbi bahra.